ສ ອາເມຣິກາ ກັບຄືນສູ່ການເຊື່ອມຕໍ່ການໂຈມຕີທາງອາກາດຢູ່ໃນໂຊມາລີ

117 12 ມ.ສ. 2019 ຂ່າວຕ່າງປະເທດ
ສ ອາເມຣິກາ ກັບຄືນສູ່ການເຊື່ອມຕໍ່ການໂຈມຕີທາງອາກາດຢູ່ໃນໂຊມາລີ

     ກອງ​ບັນຊາ​ການ​ຂອງ​ກອງທັບ ສ ອາ​ເມ​ຣິ​ກາ ປະຈຳ​ທະວີບ​ອາ​ຟະ​ຣິກ​ກາ (Africom) ແຈ້ງ​ໃຫ້​ຮູ້ເມື່ອ​ວັນ​ທີ 10 ເມສາ​ນີ້​ວ່າ ໄດ້​ກັບ​ຄືນ​ສູ່​ການ​ປະຕິບັດ​ການ​ໂຈມ​ຕີ​ທາງ​ອາກາດ ທີ່​ແນໃສ່​ກຸ່ມ​ມື​ປືນ ອາ​​ລ-ຊາ​ບັບ ໃນ​ໂຊ​ມາລີ ຫຼັງ​ຈາກ​ທີ່​ໄດ້​ໂຈະ​ມາ​ເປັນ​ເວລາ​ສັ້ນໆ ຍ້ອນ​ມີ​ການ​ກ່າວ​ຫາ​ຂາດ​ອົງການ​ນິລະໂທດ​ສະ​ກຳ​ສາກົນ (Amnesty).

    ຂ່າວ​ແຈ້ງວ່າ ການ​ໂຈມ​ຕີ​ທາງ​ອາກາດ​ເທື່ອ​ໃໝ່​ຫຼ້າ​ສຸດ ມີ​ຂຶ້ນ​ເມື່ອ​ວັນ​ທີ 9 ເມສາ​ນີ້ ຢູ່​ທາງ​ທິດຕາເວັນຕົກ​ສ່ຽງ​ໃຕ້​ນະຄອນຫຼວງ ໂມ​ກາ​ດີ​ຊູ ຂອງ​ໂຊ​ມາລີ. Africom ໃຫ້​ຮູ້​ວ່າ ໃນ​ການ​ໂຈມ​ຕີ​ນີ້ ສະມາຊິກ​ຂອງ​ກຸ່ມ​ມື​ປືນ ອາ​​ລ-ຊາ​ບັບ ຖືກ​ສັງຫານ 1 ຄົນ ແລະ​ ບໍ່​ມີ​ສາມັນ​ຊົນ​ຄົນ​ໃດ ບາດເຈັບ ຫຼື​ເສຍ​ຊີວິດ. ນີ້​ເປັນ​ການ​ໂຈມ​ຕີ​ທາງ​ອາກາດ ເປັນ​ເທື່ອ​ທຳ​ອິດ ທີ່ Africom ປະຕິບັດ ນັບ​ແຕ່​ວັນ​ທີ 18 ມີນາ​ປີ​ນີ້ ເປັນຕົ້ນ​ມາ.

     ເມື່ອ​ວັນ​ທີ 19 ມີນາ​ທີ່​ຜ່ານ​ມາ Amnesty  ໄດ້​ປະກາດ​ບົດ​ລາຍ​ງານ​ສະບັບ​ໜຶ່ງ ໂດຍ​ໄດ້​ກ່າວ​ຫາ​ວ່າ Africom ພະຍາຍາມ​ປົກ​ປິດ​ຕົວ​ເລກ​ຜູ້​ບາດເຈັບ​ລົ້ມ​ຕາຍ ຂອງ​ຝ່າຍ​ພົນ​ລະ​ເຮືອນ. ບົດ​ລາຍ​ງານ​ລະບຸ​ວ່າ ໃນ​ການ​ໂຈມ​ຕີ 5 ຄັ້ງ​ຫຼ້າ​ສຸດ​ນັ້ນ ກອງທັບ ສ ອາ​ເມ​ຣິ​ກາ ໄດ້​ເຮັດ​ໃຫ້​ສາມັນ​ຊົນ​ເສຍ​ຊີວິດ 14 ຄົນ ແລະ​ ບາດເຈັບ​ອີກ 7 ຄົນ.

    ການ​ກ່າວ​ຫາ​ຂອງ Amnesty ມີ​ອອກ​ມາ​ພໍດີ​ກັບ​ຈຸດ​ເວລາ​ທີ່ Africom ພວມ​ຊຸກຍູ້​ການ ເຄື່ອນ​ໄຫວ​ຢູ່​ໃນ​ໂຊ​ມາລີ ໂດຍ​ທີ່​ນັບ​ແຕ່​ຕົ້ນ​ປີ 2019 ເປັນຕົ້ນ​ມາ ໄດ້​ມີ​ການ​ປະຕິບັດ​ການ ໂຈມ​ຕີ​ທາງ​ອາກາດ 28 ລາຍ ທຽບໃສ່ 47 ລາຍ​ທີ່​ປະຕິບັດ​ໃນ​ປີ 2018 ແລະ 35 ລາຍ ໃນ​ປີ 2017.

ຂ່າວທີ່ກ່ຽວຂ້ອງ