ນະຄອນນີວຢອກກຳນົດປັບໃໝ 1.000 ໂດລາ ຕໍ່ຜູ້ບໍ່ສັກວັກແຊງປ້ອງກັນພະຍາດໝາກແດງ

117 12 ມ.ສ. 2019 ຂ່າວຕ່າງປະເທດ
ນະຄອນນີວຢອກກຳນົດປັບໃໝ 1.000 ໂດລາ ຕໍ່ຜູ້ບໍ່ສັກວັກແຊງປ້ອງກັນພະຍາດໝາກແດງ

   ອຳນາດ​ການ​ປົກຄອງ​ນະຄອນ​ນີວ​ຢອກ ຂອງ ສ ອາ​ເມ​ຣິ​ກາ ແຈ້ງ​ໃຫ້​ຮູ້​ເຖິງ​ຂໍ້​ກຳນົດ​ໃໝ່ ເພື່ອ​ສະກັດ​ກັ້ນ​ການ​ແຜ່​ລາມ​ຂອງ​ພະຍາດໝາກແດງ ຊຶ່ງ​ຕາມ​ນັ້ນແລ້ວ​ກໍ​ແມ່ນ ຜູ້​ທີ່​ບໍ່​ປະຕິບັດ​ການ​ສັກ​ວັກ​ແຊງ​ປ້ອງ​ກັນ​ພະຍາດໝາກແດງ ໝາກ​ເບີດ ແລະ​ຣູ​ແບລ​ລາ (rubella) ທີ່​ເອີ້ນ​ວ່າ​ວັກ​ແຊງ MMR ຫຼື​ບໍ່​ມີ​ຫຼັກ​ຖານ ກ່ຽວ​ກັບ​ຄວາມ​ສາມາດ​ໃນ​ການ​ປອດ​ພະຍາດ ສຳລັບ​ພະຍາດໝາກແດງ ແມ່ນ​ອາດ​ຈະ​ຖືກ​ປັບ​ໃໝ 1.000 ໂດ​ລາ​ສະຫະລັດ.

    ເມື່ອ​ວັນ​ທີ 9 ເມສາ​ນີ້ ທ່ານ ບີ​​ລ ເດີ ບລາ​ຊີ​ໂອ ເຈົ້າ​ຄອງ​ນະຄອນ​ນີວ​ຢອກ ໄດ້​ປະກາດ​ພາວະ​ສຸກ​ເສີນ ສຳລັບ​ສຸຂະພາບ​ຂອງ​ຊຸມ​ຊົນ ທ່າມກາງ​ທີ່​ພະຍາດໝາກແດງ​ພວມ​ລະບາດ ຢູ່​ໃນ​ຊຸມ​ຊົນ​ຊາວ​ຢີວ ໃນ​ເຂດ ວິນ​ລຽມ​​ສ​ບວກ (Williamsburg) ທີ່​ຂຶ້ນ​ກັບ​ເມືອງ ບຣຸກ​ລິນ ຂອງ​ນະຄອນ​ນີວ​ຢອກ. ທ່ານ ບີ​​ລ ເດີນ ບລາ​ຊີ​ໂອ ເວົ້າ​ວ່າ ບັນດາ​ຜູ້​ທີ່​ຍັງ​ບໍ່​ທັນ​ໄດ້​ສັກ​ຢາ​ກັນ​ພະຍາດ ຊຶ່ງ​ດຳລົງ​ຊີວິດ​ຢູ່​ໃນ​ເຂດ​ທີ່​ໄດ້​ຮັບ​ການ​ຄັດ​ເລືອກ ແມ່ນ​ຈະ​ຕ້ອງ​ໄດ້​ຖືກ​ບັງຄັບ​ໃຫ້​ສັກ​ວັກ​ຊິນ MMR ທັງ​ນີ້​ກໍ​ເພື່ອ​ເປັນ​ການ​ສະກັດ​ກັ້ນ​ການ​ລະບາດ​ຂອງ​ພະຍາດ ເພື່ອ​ປ້ອງ​ກັນ​ສຸຂະພາບ​ຂອງ​ຊຸມ​ຊົນ.

   ບັນດາ​ພະນັກງານ ທີ່​ຂຶ້ນ​ກັບ​ພະ​ແນກ​ສາທາລະນະ​ສຸກ ແລະ ສຸຂະພາບ​ທາງ​ຈິດ ຂອງ​ນະຄອນ​ນີວ​ຢອກ ຈະ​ກວດກາ​ເບິ່ງ​ເອກະສານ​ການ​ສັກ​ຢາ​ກັນ​ພະຍາດ ຂອງ​ບຸກຄົນ​ໃດ​ກໍ​ຕາມ ທີ່​ອາດ​ສຳ​ພັດ​ກັບ​ຄົນ​ເຈັບ​ທີ່​ເປັນ​ພະຍາດໝາກແດງ ເພື່ອ​ນຳໄປ​ສູ່​ການ​ປະຕິບັດ​ການ​ສັກ​ວັກ​ແຊງ​ແບບ​ບັງຄັບ.

    ການ​ປະກາດ​ພາວະ​ສຸກ​ເສີນ ສຳລັບ​ສຸຂະພາບ​ຊຸມ​ຊົນ​ນັ້ນ ຖືກ​ນຳ​ອອກ​ມາ ເພື່ອ​ຮັບ​ມື​ກັບ​ສະພາບ​ການ​ລະບາດ​ຂອງ​ພະຍາດໝາກແດງ ຢູ່​ໃນ​ນະຄອນ​ນີວ​ຢອກ ໂດຍ​ມີ​ຜູ້​ຕິດ​ພະຍາດໝາກແດງ 285 ລາຍ ໃນ​ນັ້ນ​ມີ​ເດັກນ້ອຍ 246 ຄົນ ທີ່​ອາ​ໃສ​ຢູ່​ໃນ​ເມືອງ ບຣຸກ​ລິນ ແລະ​ເມືອງ ກວິນ ແລະ ມີ 5 ກໍລະນີ ຈາກ​ຈຳນວນ 21 ກໍລະນີ​ທີ່​ເຂົ້າ​ໄປ​ປິ່ນປົວ​ຢູ່​ໃນ​ໂຮງໝໍ ຕ້ອງ​ໄດ້​ນຳ​ເຂົ້າ​ໄປ​ປິ່ນປົວ​ຢູ່​ໃນ​ຫ້ອງ​ດູ​ແລ​ເປັນ​ພິເສດ ນັບ​ແຕ່​ເກີດ​ການລະບາດພະຍາດ​ໝາກ​ແດງ ເມື່ອ​ເດືອນ​ຕຸລາ ປີ 2018 ເປັນຕົ້ນ​ມາ.

 

ຂ່າວທີ່ກ່ຽວຂ້ອງ