ປີໃໝ່ລາວ ອາສາກູ້ໄພ 1624 ເພີ່ມຈຸດປະຈຳການ

429 12 ມ.ສ. 2019 ຂ່າວໜ້າ​ໜຶ່ງ

    ໃນ​ໂອ­ກາດ​ບຸນ­ປີ­ໃໝ່​ລາວ ພສ 2562 ອາ­ສາ​ກູ້​ໄພ​ນະ­ຄອນ­ຫຼວງ​ວຽງ​ຈັນ (ນວ) ໄດ້​ກະ­ກຽມ​ຮັບ​ໃຊ້​ຊ່ວຍ­ເຫຼືອ​ສັງ­ຄົມ​ຫຼາຍ​ດ້ານ ໂດຍ​ໄດ້​ແບ່ງ​ກຳ­ລັງ​ການ­ເຄື່ອນ­ໄຫວ​ຊ່ວຍ­ເຫຼືອ​ຜູ້​ປະ­ສົບ​ໄພ​ທັງ​ໝົດ​ອອກ​ເປັນ 5 ຈຸດ ແລະ ມີ​ອາ­ສາ​ສະ­ໝັກ 185 ຄົນ.

    ທ່ານ ລຳ​ເງິນ ວົງ​ພະ­ຈັນ ປະ­ທານ​ສະ­ມາ­ຄົມ​ອາ­ສາ​ກູ້​ໄພ ນວ ໄດ້​ໃຫ້​ສຳ­ພາດ​ວັນ​ທີ 10 ເມ­ສາ 2019 ວ່າ: ໃນ​ໂອ­ກາດ​ປີ​ໃໝ່​ລາວ ອາ­ສາ​ກູ້​ໄພ ນວ ໄດ້​ກຽມ­ພ້ອມ​ຕະ­ຫຼອດ​ເວ­ລາ​ໃນ​ຫຼາຍ​ດ້ານ ໂດຍ​ສະ­ເພາະ ການ​ຊ່ວຍ­ເຫຼືອ​ຈາກ​ເກີດ​ອຸ­ບັດ­ເຫດ​ເຊິ່ງ​ປີ­ຜ່ານ­ມາ​ໄດ້​ວາງ​ຈຸດ​ປະ­ຈຳ­ການ​ຢູ່ 4 ຈຸດ ສຳ­ລັບ​ປີ​ນີ້​ໄດ້​ຂະ­ຫຍາຍ​ຈຸດ​ປະ­ຈຳ­ການ​ອອກ​ເປັນ 5 ຈຸດ​ຄື: ເມືອງ​ຫາດ​ຊາຍ​ຟອງ ສີ​ໂຄດ​ຕະ­ບອງ ໄຊ​ເຊດ​ຖາ ເມືອງ​ລະ 1 ຈຸດ ແລະ ເມືອງ​ໄຊ​ທາ­ນີ ມີ 2 ຈຸດ ສ່ວນ​ພາ­ຫະ­ນະ​ຮັບ​ໃຊ້​ການ­ເຄື່ອນ­ໄຫວ​ທັງ​ໝົດ​ມີ​ລົດ 7 ຄັນ ໃນ​ນັ້ນ ໄດ້​ແບ່ງ​ກຳ­ລັງ​ອາ­ສາ​ສະ­ໝັກ​ຄັນ​ລະ 5 ຄົນ ແລະ ໄດ້​ແບ່ງ​ພະ­ນັກ­ງານ​ອາ­ສາ​ຢູ່​ຈຸດ​ປະ­ຈຳ­ການ​ປະ­ມານ​ຈຸດ​ລະ 20 ຄົນ ໂດຍ​ໝູ­ນວຽນ​ກັນ​ເປັນ 3 ທີມ​ຊ່ວຍ­ເຫຼືອ​ຜູ້​ປະ­ສົບ​ໄພ​ຕໍ່ 12 ຊົ່ວ­ໂມງ ນອກ​ນັ້ນ ຍັງ​ໄດ້​ເພີ່ມ​ອາ­ສາ​ສະ­ໝັກ​ເຂົ້າ​ຕື່ມ 40 ຄົນ​ຕໍ່​ເວນ­ຍາມ​ໜຶ່ງ ປັດ­ຈຸ­ບັນ​ລວມ​ກຳ­ລັງ​ອາ­ສາ​ສະ­ໝັກ​ທັງ​ໝົດ 185 ຄົນ ເຊິ່ງ​ຈະ​ເລີ່ມ​ປະ­ຕິ­ບັດ​ການ­ເຄື່ອນ­ໄຫວ​ແຕ່​ວັນ​ທີ 12-17 ເມ­ສາ 2019 ທີ່​ເປັນ​ເຂດ​ວັນ​ອັນ­ຕະ­ລາຍ ນອກ​ນັ້ນ ປີ​ນີ້​ຍັງ​ໄດ້​ສ້າງ​ໂຄງ­ການ​ພິ­ເສດ​ສຳ­ລັບ​ຊ່ວຍ­ເຫຼືອ​ຜູ້​ປະ­ສົບ​ໄພ ເປັນ­ຕົ້ນ ຊ່ວຍ­ເຫຼືອ​ການ​ຮັບ​ສົ່ງ​ຄົນ​ເມົາ​ຈາກ​ການ​ດື່ມ​ສິ່ງ​ມືນ​ເມົາ​ຕ່າງໆ.

    ປັດ­ຈຸ­ບັນ​ອາ­ສາ​ກູ້​ໄພ 1624 ນວ ສະ­ເພາະ​ຊ່ວຍ­ເຫຼືອ​ຜູ້​ປະ­ສົບ​ໄພ​ມີ​ຄວາມ​ພ້ອມ 100% ຄຽງ​ຄູ່​ກັນ​ນັ້ນ ກໍ​ຍັງ​ມີ​ບັນ­ຫາ​ທີ່​ປະ​ເຊີນ​ການ​ທ້າ​ທາຍ ເປັນ­ຕົ້ນ ດ້ານ​ທຶນ­ຮອນ​ໃນ​ການ​ຊື້​ວັດ­ຖຸ​ອຸ­ປະ­ກອນ ແລະ ຄ່າ​ໃຊ້​ຈ່າຍ​ອື່ນໆ​ຍັງ­ພຽງ​ພໍ ນອກ​ນັ້ນ​ຍັງ​ມີ​ກຸ່ມ​ບາງ​ຄົນ ໃນ​ເວ­ລາ​ກິນ​ດື່ມ​ສ້າງ­ສັນ​ຫຼິ້ນ​ນ້ຳ​ຢູ່​ບໍ­ລິ­ເວນ​ແຄມ​ທາງ ຍັງ​ບໍ່​ໃຫ້­ການ​ຮ່ວມ​ມື ໂດຍ​ໄດ້​ຫົດ​ນ້ຳ​ໃສ່​ແວ່ນ​ລົດ​ສຸກ​ເສີນ ຈົນ​ເຮັດ​ໃຫ້​ມີ​ທັດ­ສະ­ນະ​ວິ­ໄສ​ຜູ້​ຂັບ​ຂີ່​ບໍ່​ເຫັນ​ທາງ​ຊັດ​ເຈນ ການ​ເຮັດ​ໃນ​ເວ­ລາ​ຮັບ​ສົ່ງ​ຊ່ວຍ­ເຫຼືອ​ຜູ້​ບາດ­ເຈັບ​ມີ​ການ​ຊັກ​ຊ້າ​ລົງ ພ້ອມ​ນີ້ ກໍ​ຮຽກ­ຮ້ອງ​ມາ​ຍັງ​ຜູ້​ໃຊ້​ລົດ​ໃຊ້​ຖະ­ໜົນ​ເວ­ລາ​ມີ​ລົດ​ກູ້​ໄພ​ເປີດ​ທາງ​ຂົນ­ສົ່ງ​ຄົນ​ເຈັບ ກໍ​ໃຫ້­ການ​ຮ່ວມ​ມື​ເພື່ອ​ຈະ​ໄດ້​ຊ່ວຍ­ເຫຼືອ​ຄົນ​ເຈັບ​ທ່ວງ​ທັນ​ເວ­ລາ.

ຂ່າວທີ່ກ່ຽວຂ້ອງ