ແຂ່ງຂັນບານເຕະສະຫຼອງວັນສ້າງຕັ້ງຊາວໜຸ່ມ

193 12 ມ.ສ. 2019 ວົງຈອນກີລາ
ແຂ່ງຂັນບານເຕະສະຫຼອງວັນສ້າງຕັ້ງຊາວໜຸ່ມ

    ການ​ແຂ່ງ­ຂັນ​ບານ­ເຕະ​ຊາຍ 4 ພາກ­ສ່ວນ ຊີງ​ຂັນ​ເລ­ຂາ​ຊາວ​ໜຸ່ມ​ປະ­ຊາ­ຊົນ​ປະ­ຕິ­ວັດ​ລາວ ກະ­ຊວງ​ສຶກ​ສາ​ທິ​ການ ແລະ ກີ­ລາ ເພື່ອ​ສ້າງ​ຂະ​ບວນ​ການ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ຊາວ​ໜຸ່ມ​ປະ­ຊາ­ຊົນ​ປະ­ຕິ­ວັດ​ລາວ ຄົບ­ຮອບ 64 ປີ (14/4/1955-14/4/2019) ຈັດ​ຂຶ້ນ​ວັນ​ທີ 9 ເມ­ສາ 2019 ທີ່​ເດີ່ນ​ເຕະ­ບານ​ຫຍ້າ​ທຽມ​ສັບ­ພະ​ວິ­ຊາ ມີ​ທ່ານ ສຳ­ລານ ພັນ​ຄະ​ວົງ ເລ­ຂາ​ຄະ­ນະ​ບໍ­ລິ­ຫານ​ງານ​ຊາວ​ໜຸ່ມ​ກະ­ຊວງ​ສຶກ​ສາ​ທິ​ການ ແລະ ກີ­ລາ ບັນ­ດາ​ຄະ­ນະ​ບໍ­ລິ­ຫານ​ງານ​ຊາວ​ໜຸ່ມ​ຮາກ​ຖານ ແລະ ສະ­ມາ­ຊິກ​ຊາວ​ໜຸ່ມ​ເຂົ້າ​ຮ່ວມ.

    ໂອ­ກາດ​ນີ້ ທ່ານ ສຳ­ລານ ພັນ​ຄະ​ວົງ ກ່າວ​ວ່າ: ການ​ແຂ່ງ­ຂັນ​ຄັ້ງ​ນີ້ ນອກ­ຈາກ​ຈະ​ເປັນ​ການ​ສະ­ເຫຼີມ­ສະ­ຫຼອງ​ວັນ​ດັ່ງ­ກ່າວ ໃຫ້​ມີ​ບັນ­ຍາ­ກາດ​ຟົດ­ຟື້ນ ເບີກ­ບານ​ມ່ວນ­ຊື່ນ ແລະ ມີ​ຄວາມ​ໝາຍ​ສຳ­ຄັນ​ຍິ່ງ​ຂຶ້ນ ຄຽງ​ຄູ່​ກັນ​ນັ້ນ ກໍ​ເພື່ອ​ເປັນ​ການ​ຄັດ​ເລືອກ​ເອົາ​ນັກ­ກີ­ລາ​ທີ່​ມີ​ຄວາມ​ສາ­ມາດ ແລະ ພອນ​ສະ­ຫວັນ​ດີ­ເດັ່ນ ກຽມ​ຕາງ­ໜ້າ​ໃຫ້​ທີມ​ຊາວ​ໜຸ່ມ​ກະ­ຊວງ​ສຶກ​ສາ​ທິ​ການ ແລະ ກີ­ລາ ເຂົ້າ​ຮ່ວມ​ແຂ່ງ­ຂັນ​ລາຍ­ການ​ຕ່າງໆ​ທີ່​ຂັ້ນ​ເທິງ​ຈັດ​ຂຶ້ນ ແລະ ເປັນ​ການ​ຮັດ​ແໜ້ນ​ຄວາມ​ສາ­ມັກ­ຄີ​ຮັກ­ແພງ ລະ­ຫວ່າງ​ຄະ­ນະ​ຊາວ​ໜຸ່ມ​ແຕ່​ລະ​ຮາກ​ຖານ ໃຫ້​ມີ​ຄວາມ​ແໜ້ນ​ແຟ້ນ ມີ​ຄວາມ​ໃກ້­ຊິດ­ຕິດ­ແທດ​ກັນ ແນ­ໃສ່​ເຮັດ​ໃຫ້­ການ​ປະ­ສານ​ວຽກ​ງານ​ມີ​ຄວາມ​ສະ­ດວກ​ວ່ອງ­ໄວ ແລະ  ມີ​ຜົນ­ສຳ­ເລັດ​ເປັນ​ກ້າວໆ.

    ການ​ແຂ່ງ­ຂັນ​ມີ​ທັງ​ໝົດ 8 ທີມ​ເຂົ້າ​ຮ່ວມ ໃນ​ນັ້ນ​ຮຸ່ນ​ຊາວ​ໜຸ່ມ​ທົ່ວ​ໄປ 4 ທີມ ແລະ ຮຸ່ນ​ຊາວ​ໜຸ່ມ​ອາ­ວຸ­ໂສ 4 ທີມ ທີ່​ມາ​ຈາກ 4 ຮາກ​ຖານ​ອ້ອມ​ຂ້າງ​ກະ­ຊວງ​ຄື: ຮາກ​ຖານ​ສຳ­ນັກ​ກະ­ຊວງ ຮາກ​ຖານ​ໂຮງ­ຮຽນ​ອ້ອມ​ຂ້າງ ຮາກ​ຖານ​ໂຮງ­ຮຽນ​ເອ­ກະ​ຊົນ ແລະ ຮາກ​ຖານ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ຜ່ານ​ການ​ແຂ່ງ­ຂັນ​ຮຸ່ນ​ຊາວ​ໜຸ່ມ​ທົ່ວ​ໄປ ອັນ​ດັບ 1 ຮາກ​ຖານ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ອັນ​ດັບ 2 ຮາກ​ຖານ​ໂຮງ­ຮຽນ​ອ້ອມ​ຂ້າງ ແລະ ອັນ​ດັບ 3 ຮ່ວມ​ຮາກ​ຖານ​ສຳ­ນັກ​ກະ­ຊວງ ແລະ ຮາກ​ຖານ​ໂຮງ­ຮຽນ​ເອ­ກະ​ຊົນ ສ່ວນ​ຮຸ່ນ​ອາ­ວຸ­ໂສ ອັນ​ດັບ 1 ຮາກ​ຖານ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ອັນ​ດັບ 2 ຮາກ​ຖານ​ໂຮງ­ຮຽນ​ອ້ອມ​ຂ້າງ ແລະ ອັນ​ດັບ 3 ຮ່ວມ​ຮາກ​ຖານ​ສຳ­ນັກ​ກະ­ຊວງ ແລະ ຮາກ​ຖານ​ໂຮງ­ຮຽນ​ເອ­ກະ​ຊົນ.

ຂ່າວທີ່ກ່ຽວຂ້ອງ