ລະວັງຫຼິ້ນສົງການຢ້ານໂທດອາຍາ

100 12 ມ.ສ. 2019 ຫົວຂໍ້ຂ່າວອື່ນໆ

    ການ​ຫຼິ້ນ​ບຸນ​ສົງ­ການ (ບຸນ­ປີ­ໃໝ່​ລາວ ຫຼື ບຸນ​ຫົດ​ນ້ຳ) ຄວນ​ມີ​ສະ­ຕິ​ລະ­ວັງ​ຕົວ​ເພາະ​ການ​ຫຼິ້ນ (ການ​ກະ­ທຳ) ບາງ​ຢ່າງ​ອາດ​ມີ​ໂທດ​ທາງ​ອາ­ຍາ​ກໍ​ເປັນ​ໄດ້ ເຊິ່ງ​ພົບ​ກັນ​ໃນ​ສະ­ບັບ​ມື້­ນີ້ ຜູ້​ຂຽນ​ຊິ​ນຳ​ເອົາ​ບາງ​ການ​ກະ­ທຳ​ທີ່​ເຮົາ​ອາດ​ຮູ້​ເທົ່າ​ບໍ່​ເຖິງ​ການ ຂາດ​ສະ­ຕິ ພາດ​ພັ້ງ​ໄປ​ຈະ​ມີ​ໂທດ​ຕິດ​ຄຸກ​ຕິດ​ຕະ­ລາງ ແລະ ເສຍ​ເງິນ​ເສຍ​ຄຳ​ຖືກ​ປັບ​ໃໝ.

    ການ​ດື່ມ​ເຫຼົ້າ ຫຼື ສິ່ງ​ມຶນ­ເມົາ ກໍ​ຖື​ວ່າ​ຜິດ​ຢູ່​ແລ້ວ­ແຕ່​ຖ້າ​ຍັງ​ມາ​ຂັບ​ຂີ່​ລົດ​ອອກ​ສູ່​ທ້ອງ​ຖະ­ໜົນ​ຕື່ມ​ອີກ ເຊິ່ງ​ນີ້​ກໍ​ເປັນ​ສາ­ເຫດ​ຕົ້ນໆ​ທີ່​ພາ­ໃຫ້​ເກີດ​ອຸ­ບັດ­ເຫດ​ຂຶ້ນ​ຫຼາຍ ໂດຍ​ສະ­ເພາະ​ໃນ​ໄລ­ຍະ​ເທດ­ສະ­ການ​ບຸນ­ປີ­ໃໝ່ ກໍ­ລະ­ນີ​ດັ່ງ­ກ່າວ​ຕົກ​ຢູ່​ໃນ​ການ​ລະ­ເມີດ​ກົດ​ຈະ­ລາ­ຈອນ​ພາ­ໃຫ້​ເກີດ​ອຸ­ບັດ­ເຫດ (ມາດ­ຕາ 86 ກົດ­ໝາຍ​ວ່າ​ດ້ວຍ​ອາ­ຍາ​ແຫ່ງ ສປປ ລາວ​ສະ­ບັບ​ປັບ­ປຸງ​ໃໝ່) ມີ​ໂທດ​ຕັດ​ອິດ­ສະ­ຫຼະ­ພາບ​ແຕ່ 6 ເດືອນ​ຫາ 10 ປີ ແລະ ປັບ​ໃໝ​ແຕ່ 50 ພັນ​ກີບ​ຫາ 1 ລ້ານ​ກີບ. ແຕ່​ບົດ​ລົງ­ໂທດ​ທີ່​ເຫັນ​ຜົນ​ທັນ­ຕາ​ເຫັນ ກໍ​ຄື​ຜູ້​ປະ­ສົບ​ອຸ­ບັດ­ເຫດ​ທັງ­ຫຼາຍ​ສ່ວນ​ໃຫຍ່ ແມ່ນ​ນຳ​ມາ​ເຊິ່ງ​ຄວາມ​ເສຍ​ຫາຍ​ທັງ​ສຸ­ຂະ­ພາບ ຮ່າງ­ກາຍ ຊີ­ວິດ ແລະ ຊັບ​ສິນ​ໂດຍ​ໄດ້​ຮັບ​ບາດ­ເຈັບ ຫຼື ຮ້າຍ​ແຮງ​ຈົນ​ເຖິງ​ຂັ້ນ​ເສຍ​ຊີ­ວິດ​ກໍ​ຍັງ​ມີ ໃຫ້​ເຫັນ​ເປັນ​ສະ­ຖິ­ຕິ​ຕົວ​ເລກ​ທີ່​ຍັງ​ສູງ​ສົມ­ຄວນ.

    ການ​ຂາຍ​ສິນ­ຄ້າ ແລະ ອຸ­ປະ­ກອນ​ທີ່​ກໍ່­ໃຫ້­ເກີດ​ມີ​ສຽງ​ແຕກ​ສຽງ​ດັງ​ທຸກ​ປະ­ເພດ ການ​ຈູດ​ກະ­ໂພກ ແລະ ບັ້ງ­ໄຟ­ດອກ​ທຸກ​ຊະ­ນິດ ເຊິ່ງ​ສິນ­ຄ້າ​ເກືອດ​ຫ້າມ​ທີ່​ກ່າວ​ມາ​ນີ້ ຖືກ​ຈັດ​ຢູ່​ໃນ​ອາ­ວຸດ​ເສິກ ຫຼື ວັດ­ຖຸ​ລະ­ເບີດ​ໂດຍ​ບໍ່​ຖືກ­ຕ້ອງ​ຕາມ​ກົດ­ໝາຍ (ໃນ​ມາດ­ຕາ 77 ຂອງ​ກົດ­ໝາຍ​ວ່າ​ດ້ວຍ​ອາ­ຍາ​ແຫ່ງ ສປປ ລາວ​ສະ­ບັບ​ປັບ­ປຸງ​ໃໝ່) ເຊິ່ງ​ຖ້າ​ໃຜ​ຊື້-ຂາຍ ຫຼື ມີ​ໄວ້​ໃນ​ຄອບ​ຄອງ​ຈະ​ຖືກ​ລົງ­ໂທດ​ແຕ່ 6 ເດືອນ​ຫາ 5 ປີ ແລະ ອາດ​ຈະ​ຖືກ​ປັບ​ໃໝ​ແຕ່ 1 ລ້ານ​ຫາ 20 ລ້ານ​ກີບ. ການ​ຫຼິ້ນ​ບຸນ­ປີ­ໃໝ່​ລາວ ສ່ວນ​ໃຫຍ່​ບໍ່​ຄ່ອຍ​ໄດ້​ໃຊ້​ສຽງ​ດັງ​ຂອງ​ສິນ­ຄ້າ​ເກືອດ​ຫ້າມ​ດັ່ງ­ກ່າວ ເພາະ​ຕາມ​ຮີດ­ຄອງ​ແທ້ໆ​ຈະ​ໃຊ້​ພຽງ​ແຕ່​ນ້ຳ​ຫົດ​ກັນ​ເທົ່າ​ນັ້ນ ສ່ວນ​ສຽງ​ດັງ​ທີ່​ເກີດ​ຂຶ້ນ​ສ່ວນ​ໃຫຍ່​ແມ່ນ​ຈາກ​ເຄື່ອງ​ສຽງ​ທີ່​ເປີດ​ເພງ​ດັງ​ເກີນ​ຂອບ​ເຂດ ໂດຍ​ບໍ່​ຮູ້​ກາ­ລະ-ເທ­ສະ ເປີດ​ຂ້າມ​ມື້​ສະ­ຫຼອງ​ກັນ​ຈາກ​ມື້​ສັງ­ຂານ​ລ່ວງ​ຫາ​ມື້​ສັງ­ຂານ​ເນົາ ແລະ ຕໍ່​ໃສ່​ມື້​ສັງ­ຂານ​ຂຶ້ນ.

    ການ​ເອົາ​ນ້ຳ­ກ້ອນ​ແກວ່ງ​ໃສ່​ລົດ​ໃສ່​ຄົນ​ສັນ­ຈອນ​ໄປ-ມາ ບໍ່​ໃຫ້​ໃຊ້​ນ້ຳ​ສີ ນ້ຳ​ຄັນ​ຄາຍ ແລະ ນ້ຳ​ເປື້ອນ​ເປິ​ະ​ຫົດ­ສົງ​ເຊິ່ງ​ກັນ ແລະ ກັນ​ຈະ​ມີ​ຄວາມ​ຜິດ​ຢູ່​ໃນ​ກໍ­ລະ­ນີ​ການ​ກະ­ທຳ​ຜິດ​ຕໍ່​ຄວາມ​ປອດ​ໄພ​ຂອງ​ການ​ຈະ­ລາ­ຈອນ (ມາດ­ຕາ 85 ກົດ­ໝາຍ​ວ່າ​ດ້ວຍ​ອາ­ຍາ​ແຫ່ງ ສປປ ລາວ​ສະ­ບັບ​ປັບ­ປຸງ​ໃໝ່) ມີ​ໂທດ​ຕັດ​ອິດ­ສະ­ຫຼະ­ພາບ​ແຕ່ 6 ເດືອນ​ຈົນ​ເຖິງ 10 ປີ ແລະ ຖືກ​ປັບ​ໃໝ​ແຕ່ 1 ແສນ​ຫາ 5 ລ້ານ​ກີບ. ຜ່ານ​ການ​ໄປ​ເລາະ​ຕົວ​ຈິງ​ຂອງ​ຜູ້​ຂຽນ​ເອງ ຍັງ​ເຫັນ​ວ່າ​ປະ­ຕິ­ບັດ​ບໍ່​ໄດ້​ເລີຍ​ເຖິງ​ວ່າ​ບາງ​ຖະ­ໜົນ ຈະ​ມີ​ເຈົ້າ​ໜ້າ­ທີ່​ຕຳ­ຫຼວດ​ປະ­ຈຳ​ຢູ່​ປະ­ຊາ­ຊົນ​ຈຳ­ນວນ​ໜຶ່ງ ກໍ​ຍັງ​ເຫັນ​ເຈົ້າ​ໜ້າ­ທີ່​ດັ່ງ­ກ່າວ​ເປັນ​ຫົວ​ຫຼັກ​ຫົວ­ຕໍ່ ຍັງ​ພາ­ກັນ​ລະ­ເມີດ​ຂໍ້​ຫ້າມ​ທີ​ສາມ ແບບ​ທ້າ​ທາຍ ເຫດ­ການ​ນີ້​ບາງ​ຄັ້ງ​ກໍ​ບານ​ປາຍ​ນຳ­ໄປ​ສູ່​ການ​ອາ​ລະ​ວາດ​ຜິດ​ຖຽງ​ຕີ​ກັນ ຍ້ອນ​ຝ່າຍ​ໜຶ່ງ​ບໍ່​ພໍ­ໃຈ​ອີກ​ຝ່າຍ​ໜຶ່ງ​ທີ່​ແກວ່ງ​ຖົງ​ນ້ຳ​ໃສ່​ຕົນ.

    ການ​ນຸ່ງ​ເຄື່ອງ​ໂປ້ ຢົ້ວ​ຢວນ ແລະ ການ​ກະ­ທຳ​ແບບ​ລາ­ມົກ​ອາ­ນາ​ຈານ ໃນ​ເຂດ​ວັດ ແລະ ສະ­ຖານ­ທີ່​ຊຸມ​ຊົນ​ເຊິ່ງ​ຂໍ້​ນີ້​ໄດ້​ກວມ​ເອົາ​ມາດ­ຕາ 136-137-138 ຂອງ​ກົດ­ໝາຍ​ວ່າ​ດ້ວຍ​ອາ­ຍາ​ແຫ່ງ ສປປ ລາວ ສະ­ບັບ​ປັບ­ປຸງ​ໃໝ່ ມີ​ໂທດ​ສຶກ​ສາ​ອົບ­ຮົມ (ດັດ​ສ້າງ​ໂດຍ​ບໍ່​ຕັດ​ອິດ­ສະ­ຫຼະ­ພາບ) ຈົນ​ຮອດ​ຕັດ​ອິດ­ສະ­ຫຼະ­ພາບ 1 ປີ ແລະ ປັບ​ໃໝ​ແຕ່ 50 ພັນ​ກີບ​ຫາ 5 ລ້ານ​ກີບ. ຜູ້​ຂຽນ​ເຂົ້າ​ໄປ​ສົງ​ນ້ຳ​ພຣະ​ຈົນ​ຄົບ 9 ວັດ​ຕາມ​ຮີດ­ຄອງ​ປະ­ເພ­ນີ ແລະ ຄວາມ​ເຊື່ອ​ຂອງ​ຄົນ​ສ່ວນ​ໃຫຍ່, ປະ­ກົດ​ວ່າ​ທຸກ​ວັດ​ທີ່​ໄປ ຈະ​ພົບ​ເຫັນ​ແມ່­ຍິງ​ລາວ​ຕັ້ງ­ແຕ່​ເດັກ­ນ້ອຍ​ຈົນ​ຮອດ​ຜູ້​ໃຫຍ່​ພາ­ກັນ​ເຂົ້າ​ວັດ​ເລາະ​ສົງ​ພຣະ ສ່ວນ​ຫຼາຍ​ຍັງ​ນຸ່ງ​ໂສ້ງ​ຂາ​ສັ້ນ (ສັ້ນ​ຈົນ​ຈຳ​ກົກ­ຂາ) ແລະ ນຸ່ງ​ເສື້ອ​ບາງໆ​ເມື່ອ​ປຽກ​ນ້ຳ​ກໍ​ເຜີຍ​ໃຫ້​ເຫັນ​ເນື້ອ​ໜັງ​ມັງ­ສາ​ຕັບ​ໄຕ​ໄສ້​ພຸງ​ໝົດ.

ໂດຍ: ມະ­ຕິ​ຊົນ

ຂ່າວທີ່ກ່ຽວຂ້ອງ