ຂ່າວຫຼ້າສຸດ

ກູ້ໜີ້ ຢືມສິນ

1.585 12 ມ.ສ. 2019 ນານາສາລະ

    ພະ­ພຸດ­ທະ­ເຈົ້າ​ສອນ​ວ່າ: ການ​ເປັນ​ໜີ້​ເປັນ​ທຸກ​ທີ່​ສຸດ​ໃນ​ໂລກ ແຕ່​ທຶນ​ນິ­ຍົມ​ບອກ​ວ່າ ການ​ເປັນ​ໜີ້​ເປັນ​ເລື່ອງ​ປົກ­ກະ­ຕິ​ຂອງ​ຜູ້​ຕ້ອງ­ການ​ພັດ­ທະ­ນາ ຊ້ຳ­ບໍ່­ໜຳ​ຍັງ​ເວົ້າ​ເໜັບ​ຕື່ມ​ອີ​ກວ່າ: ຜູ້​ບໍ່​ມີ​ໜີ້​ຄື​ຜູ້​ບໍ່​ເກ່ງ ເມື່ອ​ຕັ້ງ​ທະ­ນາ­ຄານ ສະ​ຖາ​ບັນ​ການ​ເງິນ​ຂຶ້ນ​ແລ້ວ ກໍ​ໃຫ້​ໂອ­ກາດ​ຄົນ​ໃນ​ສັງ­ຄົມ​ໄດ້​ມີ​ໂອ­ກາດ​ຢືມ​ເງິນ​ໄປ​ພັດ­ທະ­ນາ​ຊີ­ວິດ ຫຼື ຄອບ­ຄົວ ແລະ ທຸ­ລະ​ກິດ ແນ່­ນອນ​ລູກ​ໜີ້​ຕ້ອງ​ໄດ້​ໃຊ້​ໜີ້​ຕາມ​ກົດ­ໝາຍ ບໍ່​ດັ່ງ­ນັ້ນ ກໍ​ຕຽມ​ໂຕ​ທ່ອງ​ຄາ­ຖາ​ທຳ​ໃຈ​ໄວ້​ໂລດ ຖ້າ­ວ່າ​ຂາດ​ສັກ­ກະ​ຍະ​ພາບ​ໃນ​ການ​ໃຊ້​ໜີ້.

    ຜູ້​ຂຽນ​ອ່ານ​ຢູ່​ໃນ​ປື້ມ​ໂລ­ກາ​ພິ​ວັດ​ທາງ​ເສດ­ຖະ­ກິດ​ກັບ​ການ​ພັດ­ທະ­ນາ​ປະ­ເທດ​ເຮົາ ຂຽນ​ໂດຍ​ທ່ານ ເຈືອງ ສົມ­ບູນ​ຂັນ ພິມ​ປີ 2003 ໄດ້​ໃຫ້​ທັດ­ສະ­ນະ​ເລື່ອງ​ການ​ກູ້​ຢືມ​ໄວ້​ວ່າ: ເຮົາ​ບໍ່​ຄວນ​ຢ້ານ​ການ​ເປັນ​ໜີ້ ແຕ່​ຂໍ​ໃຫ້​ເຂົ້າ­ໃຈ ແລະ ຄົ້ນ­ຄວ້າ​ໃຫ້​ຮູ້​ຈະ­ແຈ້ງ​ກ່ຽວ​ກັບ​ໜີ້ ແລະ ການ​ກູ້​ຢືມ​ເງິນ​ມາ​ພັດ­ທະ­ນາ​ຂອງ​ປະ­ເທດ​ທີ່​ກຳ­ລັງ​ພັດ­ທະ­ນາ​ທັງ­ຫຼາຍ ເຊິ່ງ​ຜູ້​ຂຽນ​ຄິດ​ວ່າ​ມັນ​ບໍ່​ຕ່າງ​ຫຍັງ​ກັບ​ບຸກ­ຄົນ​ໜຶ່ງ​ທີ່​ຕ້ອງ­ການ​ສ້າງ​ຊີ­ວິດ​ໃຫ້​ດີ​ຂຶ້ນ ຫຼື ສ້າງ​ຊີ­ວິດ​ໃຫ້​ສັງ­ຄົມ​ຍອມ­ຮັບ ໂດຍ​ມີ­ຄ່າ​ນິ­ຍົມ​ແຂ່ງ­ຂັນ​ກັນ​ອວດ​ໜ້າ​ຕາ ແລະ ຊັບ​ສິນ ເຊິ່ງ​ເຮົາ​ມຸ່ງ​ແຕ່​ຄວາມ­ສຸກ​ທາງ​ເນື້ອ​ໜັງ ແຕ່​ບໍ່​ຮູ້​ສຳ­ນຶກ​ໃນ​ຮາກ​ເຫງົ້າ​ຂອງ​ວັດ­ທະ­ນະ­ທຳ ຈຶ່ງ​ເກີດ​ມີ​ຄຳ​ຖາມ​ວ່າ: ຖ້າ​ສັງ­ຄົມ​ມີ​ແຕ່​ຮ້ານ​ເຫຼົ້າ ຮ້ານ​ເບຍ​ກິນ​ດື່ມ​ຫຼາຍ​ກວ່າ​ຮ້ານ​ປື້ມ ຫຼື ໂຮງ­ພິມ​ແລ້ວ ຈະ​ກາຍ­ເປັນ​ສັງ­ຄົມ​ແຫ່ງ​ການ​ຮຽນ​ຮູ້​ໄດ້​ແນວ­ໃດ ?.

    ການ​ມີ​ໜີ້​ບໍ່​ແມ່ນ​ສິ່ງ​ແປກ​ປະ­ຫຼາດ ປະ­ເທດ​ໃດ​ກໍ​ມີ​ໜີ້ ລວມ​ທັງ​ປະ­ເທດ​ມະ­ຫາ​ອຳ­ນາດ ຈິງ​ຢູ່​ວ່າ​ຜູ້​ໃຫ້​ກູ້​ຢືມ​ຕ້ອງ​ໄດ້​ເບິ່ງ​ຄວາມ​ສາ­ມາດ​ຂອງ​ລູກ​ໜີ້​ໃນ​ການ​ແທນ​ຄືນ ໂດຍ​ໃຊ້​ຊັບ​ສິນ​ຄ້ຳ­ປະ­ກັນ ດັ່ງ­ນັ້ນ ລູກ​ໜີ້​ຫຼາຍ​ລາຍ​ທີ່​ບໍ່​ສາ­ມາດ​ແທນ​ຄືນ​ແກ່​ຜູ້​ໃຫ້​ຢືມ​ຈຶ່ງ​ຖືກ​ຢຶດ​ຊັບ​ສິນ ຫຼື ຂາຍ​ຊັບ​ສົມ­ບັດ​ໄປ​ໃຊ້​ໜີ້​ທະ­ນາ­ຄານ ເພາະ​ຄວາມ​ຢາກ​ມີ​ຊີ­ວິດ​ດີ­ເດັ່ນ​ນຳ​ສັງ­ຄົມ​ຄົນ​ມີ​ເງິນ ໂດຍ​ບໍ່​ໄດ້​ຄຳ­ນຶງ​ວ່າ​ໂຕ​ເອງ​ເປັນ​ໃຜ ? ມາ​ແຕ່​ໃສ ? ພຽງ​ແຕ່​ເຫັນ​ຊ້າງ​ຂີ້​ກໍ​ຢາກ​ຂີ້​ຕາມ​ຊ້າງ ! ປະ­ເດັນ​ຈຶ່ງ​ຢູ່​ບ່ອນ​ວ່າ ເຮົາ​ຈະ​ສ້າງ​ຄ່າ​ນິ­ຍົມ ແລະ ປູກ­ຝັງ​ສັງ­ຄົມ​ໄປ​ທາງ​ໃດ ? ຖ້າ­ວ່າ​ເຮົາ​ພາ​ສັງ­ຄົມ​ມຸ່ງ​ໄປ​ທີ່​ຄ່າ​ຂອງ​ຄົນ​ຢູ່​ທີ່​ໃຜ​ມີ​ລົດ​ຄັນ​ງາມ ເຮືອນ​ຫຼັງ​ໃຫຍ່ ເຮົາ​ກໍ​ຈະ​ໄດ້​ແຕ່​ວັດ­ຖຸ ແຕ່​ຖ້າ​ເຮົາ​ພາ​ສັງ­ຄົມ​ມຸ່ງ​ໄປ​ທີ່​ການ​ສຶກ​ສາ​ຮາກ​ເຫງົ້າ​ວັດ­ທະ­ນະ­ທຳ ແລະ ປູກ­ຝັງ​ນິ­ໄສ​ການ​ອ່ານ ການ​ຮຽນ​ຮູ້ ແລະ ຮັກ­ຫອມ​ໃນ​ປະ­ເພ­ນີ ເຮົາ​ກໍ​ຈະ​ໄດ້​ຈິດ​ວິນ​ຍານ​ຂອງ​ຊາດ.

    ສະ­ຫຼຸບ​ວ່າ ແນວ­ໃດ​ກໍ​ຕາມ ເວ­ລາ​ຢືມ​ໄດ້​ເງິນ​ມາ​ໃຊ້​ນັ້ນ​ມັນ​ງ່າຍ ແລະ ສຸກ​ສະ­ບາຍ ແຕ່​ບາດ​ຫາ​ເງິນ​ໄປ​ຄືນ​ເຂົາ​ມັນ​ບໍ່​ງ່າຍ​ຄື​ຕອນ​ຢືມ ບາງ​ຄົນ​ເຖິງ​ຄາວ​ຊວຍ ຫຼື ປະ­ໝາດ ຄິດ​ວ່າ​ຈະ​ໃຊ້​ໜີ້​ໄດ້ ແຕ່​ຊາ­ຕາ​ພິກ​ຜັນ​ຖືກ​ຄູ່​ຄ້າ​ຕົວະ​ຕົ້ມ​ຈົນ​ໄດ້​ຂາຍ​ມູນ​ໃຊ້​ໜີ້ ແລະ ເບິດ​ມູນ​ຍັງ​ບໍ່​ແລ້ວ ຄົນ​ໃນ​ຄອບ­ຄົວ​ກໍ​ຕີ​ໂຕ​ອອກ​ຫ່າງ ເພາະ​ຫຼົງ​ຢຶດ​ຕິດ​ວ່າ ເງິນ​ຄື​ຄຳ​ຕອບ​ຂອງ​ຊີ­ວິດ.

ຂໍ​ສະ­ເໜີ​ເປັນ​ການ​ແລກ­ປ່ຽນ ?.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ