ໝໍ້ແປງຍີ່ຫໍ້ SK ສາມາດຕອບສະໜອງຕາມຄວາມຕ້ອງການລູກຄ້າ

331 12 ມ.ສ. 2019 ຂ່າວໜ້າ​ໜຶ່ງ
ໝໍ້ແປງຍີ່ຫໍ້ SK ສາມາດຕອບສະໜອງຕາມຄວາມຕ້ອງການລູກຄ້າ

    ໃນ​ໂອ­ກາດ​ເຂົ້າ​ຮ່ວມ​ກອງ​ປະ­ຊຸມ​ແລກ­ປ່ຽນ​ບົດ­ຮຽນ ກ່ຽວ​ກັບ​ການ​ສ້າງ​ຄວາມ​ເຂັ້ມ­ແຂງ​ໃຫ້​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ບັນ­ດາ​ແຂວງ​ພາກ​ກາງ (ໄຊ​ສົມ­ບູນ ວຽງ​ຈັນ ນະ­ຄອນ­ຫຼວງ​ວຽງ​ຈັນ ບໍ​ລິ​ຄຳ​ໄຊ ຄຳ​ມ່ວນ ສະ­ຫວັນ​ນະ​ເຂດ) ວັນ​ທີ 9 ເມ­ສາ 2019 ທ່ານ ອຸ​ເດດ ສຸ­ວັນ­ນະ​ວົງ ປະ­ທານ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ພ້ອມ​ຄະ­ນະ ໄດ້​ໄປ​ຢ້ຽມ­ຢາມ​ໂຮງ­ງານ​ອຸດ­ສາ­ຫະ­ກຳ​ເອັສ​ອີ​ເອັສ ຈຳ­ກັດ ບ້ານ​ໂພນ​ສະ­ອາດ ເມືອງ​ປາກ​ຊັນ ແຂວງ​ບໍ​ລິ​ຄຳ​ໄຊ ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ໄຊ​ຍະ​ເພັດ ຈັນ​ທິ​ສອນ ປະ­ທານ​ບໍ­ລິ­ສັດ ເອັສ​ອີ​ເອັສ​ກໍ່­ສ້າງ​ຄົບ​ວົງ​ຈອນ ຈຳ­ກັດ​ຜູ້​ດຽວ ປະ­ທານ​ໂຮງ­ງານ​ອຸດ­ສາ­ຫະ­ກຳ​ເອັສ​ອີ​ເອັສ ຈຳ­ກັດ.

    ທ່ານ ໄຊ​ຍະ​ເພັດ ຈັນ​ທິ​ສອນ ກ່າວ​ວ່າ: ໂຮງ­ງານ​ອຸດ­ສາ­ຫະ­ກຳ ເອັສ​ອີ​ເອັສ ສ້າງ­ຕັ້ງ​ວັນ​ທີ 11 ມີ­ນາ 2017 ເປັນ​ໂຮງ­ງານ​ທີ່​ຜະ­ລິດ ແລະ ຈຳ­ໜ່າຍ​ໝໍ້​ແປງ​ຍີ່­ຫໍ້ SK ແຕ່ 30-2.500 KVA ເຊິ່ງ​ສາ­ມາດ​ນຳ​ໃຊ້​ໃນ​ອຸດ­ສາ­ຫະ­ກຳ​ໄດ້ ນອກ​ນີ້ ຍັງ​ຜະ­ລິດ​ແຜ່ນ​ມຸງ​ຫຼັງ­ຄາ​ອາ​ລູ​ຊິງ ແລະ ເຫຼັກ​ຮູບ​ປະ­ພັນ​ທຸກ​ຊະ­ນິດ ໂດຍ​ນຳ​ໃຊ້​ວັດ­ຖຸ​ດິບ​ຈາກ​ປະ­ເທດ​ໃກ້​ຄຽງ ແລະ ພາຍ​ໃນ​ຈຳ­ນວນ​ໜຶ່ງ​ມາ​ແປ​ຮູບ​ເປັນ​ຜະ­ລິດ​ຕະ​ພັນ ນັບ​ແຕ່​ເອົາ​ແຜ່ນ​ເຫຼັກ​ມາ​ຕັດ ຈອດ​ນຳ​ທອງ­ແດງ​ມາ​ພັນ​ໃຫ້​ໄດ້​ລະ­ດັບ​ຕ່າງໆ ແລະ ປະ­ກອບ​ໃຫ້​ເປັນ​ຜະ­ລິດ​ຕະ​ພັນ​ສຳ­ເລັດ​ຮູບ ປັດ­ຈຸ­ບັນ​ມີ​ພະ­ນັກ­ງານ 30 ກວ່າ​ຄົນ ແລະ ມີ​ວິ­ຊາ​ການ​ເປັນ​ຄົນ​ລາວ ໂຮງ­ງານ​ໄດ້​ເນັ້ນ​ມາດ­ຕະ­ຖານ​ເປັນ​ຫຼັກ ໂດຍ​ໄດ້​ຮັບ​ມາດ­ຕະ­ຖານ​ສາ­ກົນ ISO 9001:2015 ສຳ­ລັບ​ການ­ຈຳ­ໜ່າຍ​ສ່ວນ​ໃຫຍ່​ໄດ້​ຈຳ­ໜ່າຍ​ຢູ່​ບັນ­ດາ​ແຂວງ​ພາກ​ໃຕ້ ໂອ­ກາດ​ນີ້ ຂ້າ­ພະ­ເຈົ້າ​ຂໍ​ຂອບ­ໃຈ​ມາ​ຍັງ​ການ​ນຳ​ພັກ-ລັດ ທີ່​ໄດ້​ເອົາ­ໃຈ­ໃສ່​ຊຸກ­ຍູ້​ສົ່ງ­ເສີມ​ເປັນ​ຢ່າງ​ດີ ພ້ອມ​ນີ້​ກໍ​ຂໍ​ຮຽກ­ຮ້ອງ​ໃຫ້​ລູກ​ຄ້າ​ຈົ່ງ​ນຳ​ໃຊ້​ຜະ­ລິດ​ຕະ​ພັນ​ຂອງ​ຄົນ​ລາວ​ໃຫ້​ຫຼາຍ​ຂຶ້ນ ເຊິ່ງ​ໂຮງ­ງານ​ພວກ​ເຮົາ​ມີ​ຄວາມ​ສາ­ມາດ​ຕອບ​ສະ­ໜອງ​ຢ່າງ​ພຽງ­ພໍ​ຕາມ​ຄວາມ​ຕ້ອງ­ການ​ຂອງ​ລູກ​ຄ້າ.

    ໂອ­ກາດ​ນີ້ ທ່ານ ອຸ​ເດດ ສຸ­ວັນ­ນະ​ວົງ ກ່າວ​ວ່າ: ຜ່ານ​ການ​ລົງ​ຢ້ຽມ­ຢາມ​ໂຮງ­ງານ​ຄັ້ງ​ນີ້ ຂ້າ­ພະ­ເຈົ້າ​ຮູ້­ສຶກ​ພາກ­ພູມ​ໃຈ​ທີ່​ໂຮງ­ງານ​ສາ­ມາດ​ນຳ​ໃຊ້​ວັດ­ຖຸ​ດິບ​ທີ່​ມີ​ໃນ​ປະ­ເທດ​ເຮົາ ແລະ ວັດ­ຖຸ​ດິບ​ທີ່​ບໍ່​ສາ­ມາດ​ຜະ­ລິດ​ໄດ້​ໃນ​ປະ­ເທດ ມາ​ແປ​ຮູບ​ໃຫ້​ເປັນ​ຜະ­ລິດ​ຕະ​ພັນ​ທີ່​ມີ​ຄຸນ​ນະ​ພາບ ໂດຍ​ຄົນ​ລາວ​ເປັນ​ຜູ້​ຜະ­ລິດ ເຖິງ​ວ່າ​ແຂວງ​ບໍ​ລິ​ຄຳ​ໄຊ ເປັນ​ແຂວງ​ນ້ອຍ​ແຕ່​ສາ­ມາດ​ສ້າງ​ຜະ­ລິດ​ຕະ​ພັນ​ທີ່​ໄດ້​ລະ­ດັບ​ມາດ­ຕະ­ຖານ​ສາ­ກົນ ແຕ່​ໂຮງ­ງານ​ແຫ່ງ​ນີ້ ຍັງ​ມີ​ຄວາມ​ຕ້ອງ­ການ​ໃຫ້​ສະ­ພາ​ການ​ຄ້າ​ຊ່ວຍ­ເຫຼືອ​ດ້ານ​ການ​ຕະ­ຫຼາດ​ພາຍ​ໃນ ແລະ ຕ່າງ­ປະ­ເທດ ເຊິ່ງ​ພວກ​ເຮົາ​ຈະ​ໄດ້​ຊ່ວຍ­ເຫຼືອ​ໃນ​ຂອບ​ໂຄງ­ການ​ສົ່ງ­ເສີມ​ຍີ່­ຫໍ້​ລາວ ແນ­ໃສ່​ໃຫ້​ໂຮງ­ງານ​ດັ່ງ­ກ່າວ​ຂະ­ຫຍາຍ​ກິດ­ຈະ­ການ​ໃຫ້​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ