ມສ ບ້ານອອມ ໄດ້ອາຄານຮຽນຫຼັງໃໝ່

221 11 ມ.ສ. 2019 ຂ່າວໜ້າ​ໜຶ່ງ
ມສ ບ້ານອອມ ໄດ້ອາຄານຮຽນຫຼັງໃໝ່

    ພິ­ທີ​ມອບ-ຮັບ​ອາ­ຄານ​ຫຼັງ​ໃໝ່​ໂຮງ­ຮຽນ ມສ ບ້ານ​ອອມ ເມືອງ​ອະ­ນຸ­ວົງ ແຂວງ​ໄຊ​ສົມ­ບູນ ຈັດ​ຂຶ້ນ​ເມື່ອ​ບໍ່​ດົນ​ມາ​ນີ້ ຢູ່​ບ້ານ​ດັ່ງ­ກ່າວ ໂດຍ​ມີ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ທ່ານ ພອຍ​ຄຳ ຮຸ່ງ​ບຸນ​ຍວງ ຮອງ​ເຈົ້າ­ແຂວງ​ໄຊ​ສົມ­ບູນ ພ້ອມ​ດ້ວຍ​ພາກ­ສ່ວນ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ພູ­ເຂົາ​ຄຳ ພຣະ​ວໍ­ລະ​ໄຊຍ໌ ຕາງ­ໜ້າ​ບໍ­ລິ­ສັດ ຈະ­ເລີນ​ເຊ​ກອງ ກຣຸບ ຜູ້​ສະ­ໜັບ­ສະ­ໜູນ​ທຶນ ແລະ ກໍ່­ສ້າງ​ໂຮງ­ຮຽນ ມສ ບ້ານ​ອອມ ກ່າວ​ວ່າ: ໂຄງ­ການ​ກໍ່­ສ້າງ​ອາ­ຄານ​ຫຼັງ​ໃໝ່​ໂຮງ­ຮຽນ ມສ ບ້ານ​ອອມ ເກີດ​ຂຶ້ນ​ຈາກ​ການ​ລົງ​ມາ​ເຄື່ອນ​ໄຫວ​ວຽກ​ງານ​ຂອງ​ທ່ານ ສອນ​ໄຊ ສີ​ພັນ​ດອນ ໃນ​ຕົ້ນ​ປີ 2018 ເຊິ່ງ​ເວ­ລາ​ນັ້ນ ໂຮງ­ຮຽນ​ດັ່ງ­ກ່າວ​ມີ​ຄວາມ​ຫຍຸ້ງ­ຍາກ​ດ້ານ​ຫ້ອງ​ຮຽນ (ຫ້ອງ​ຮຽນ​ບໍ່​ພຽງ­ພໍ) ສະ­ນັ້ນ ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ຈຶ່ງ​ໄດ້​ລະ­ດົມ​ແຫຼ່ງ​ທຶນ​ເພື່ອ​ມາ​ກໍ່­ສ້າງ ແລະ ໄດ້​ຮັບ​ການ​ສະ­ໜັບ­ສະ­ໜູນ​ທັງ​ໝົດ​ຈາກ​ທ່ານ ຈັນ­ທະ​ໜອມ ພົມ​ມະ­ນີ ປະ­ທານ​ບໍ­ລິ­ສັດ ຈະ­ເລີນ​ເຊ​ກອງ ກຣຸບ ມູນ​ຄ່າ 3,85 ຕື້​ກີບ ເຊິ່ງ​ປະ­ກອບ​ມີ​ອາ­ຄານ 2 ຊັ້ນ 1 ຫຼັງ ມີ 12 ຫ້ອງ​ຮຽນ ພ້ອມ​ປະ­ກອບ​ໂຕະ ຕັ່ງ ກະ­ດານ ແລະ ສິ່ງ​ອຳ­ນວຍ​ຄວາມ​ສະ­ດວກ​ທີ່​ຈຳ­ເປັນ ສາ­ມາດ​ຮອງ​ຮັບ​ນັກ­ຮຽນ​ໄດ້​ປະ­ມານ 480 ຄົນ.

    ໂອ­ກາດ​ນີ້ ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ຍັງ​ໄດ້​ນຳ​ອຸ­ປະ­ກອນ​ການ​ຮຽນ ແລະ ອຸ­ປະ­ກອນ-ເຄື່ອງ​ກີ­ລາ​ຈຳ­ນວນ​ໜຶ່ງ​ມອບ​ໃຫ້​ນັກ­ຮຽນ ເພື່ອ​ຊຸກ­ຍູ້​ການ​ຮຽນ ແລະ ສົ່ງ­ເສີມ​ໃຫ້​ເຂົາ­ເຈົ້າ​ມີ​ສຸ­ຂະ­ພາບ​ແຂງ­ແຮງ ມີ​ຄວາມ​ເບີກ­ບານ​ມ່ວນ­ຊື່ນ ຊ່ວຍ​ພັດ­ທະ­ນາ​ດ້ານ​ຮ່າງ­ກາຍ ແລະ ຈິດ­ໃຈ ໄປ​ພ້ອມໆ​ກັບ​ການ​ຮຽນ​ໃນ​ຫ້ອງ​ຮຽນ​ຕື່ມ​ອີກ.

ຂ່າວທີ່ກ່ຽວຂ້ອງ