ຈະລາຈອນກຽມກຳລັງຫຼາຍຮ້ອຍຄົນ ປ້ອງກັນບຸນປີໃໝ່ລາວ

166 11 ມ.ສ. 2019 ຂ່າວໜ້າ​ໜຶ່ງ

    ວັນ​ທີ 9 ເມ­ສາ 2019 ຢູ່​ພະ​ແນກ​ຕຳ­ຫຼວດ​ຈະ­ລາ­ຈອນ ນະ­ຄອນ­ຫຼວງ​ວຽງ​ຈັນ (ນວ) ໄດ້​ຈັດ​ກອງ​ປະ­ຊຸມ​ວາງ​ແຜນ​ປ້ອງ​ກັນ​ບຸນ­ປີ­ໃໝ່​ລາວ ພສ 2562 ມີ​ທ່ານ ພັອ ທົງ​ສະ​ຫວັດ ຫຼວງ​ຈັນ​ດາ​ວົງ ຮອງ​ກອງ​ບັນ­ຊາ​ການ ປກສ ນວ ທ່ານ ພັນ​ໂທ ຢຸດ​ຕະ​ພົງ ສຸ­ວັນ­ນະ​ສິງ ຮອງ​ຫົວ­ໜ້າ​ຫ້ອງ​ຕຳ­ຫຼວດ ຜູ້​ຊີ້​ນຳ​ວຽກ​ງານ​ຈະ­ລາ­ຈອນ ນວ ທ່ານ ພັທ ເພັງ​ສະ­ຫວັນ ທຳ​ມະ​ບູນ ຫົວ­ໜ້າ​ພະ​ແນກ​ຈະ­ລາ­ຈອນ ນວ ພ້ອມ​ດ້ວຍ​ຫົວ­ໜ້າ ຮອງ​ຫົວ­ໜ້າ ແລະ ເຈົ້າ​ໜ້າ­ທີ່​ຕຳ­ຫຼວດ​ຈະ­ລາ­ຈອນ​ເມືອງ 9 ເມືອງ​ເຂົ້າ​ຮ່ວມ.

    ທ່ານ ພັທ ເພັງ​ສະ­ຫວັນ ທຳ​ມະ​ບູນ ກ່າວ​ວ່າ: ເພື່ອ​ເຮັດ​ໃຫ້­ການ​ສະ­ເຫຼີມ­ສະ­ຫຼອງ​ສົ່ງ​ທ້າຍ​ປີ​ເກົ່າ ແລະ ຕ້ອນ­ຮັບ​ປີ​ໃໝ່​ລາວ ພສ 2562 ເລີ່ມ​ແຕ່​ວັນ​ທີ 14-16 ເມ­ສາ 2019 ຢູ່ ນວ ດຳ­ເນີນ​ໄປ​ດ້ວຍ​ບັນ­ຍາ­ກາດ​ເບີກ­ບານ​ມ່ວນ­ຊື່ນ ມີ​ຄວາມ​ສະ­ຫງົບ ຄວາມ​ເປັນ​ລະ­ບຽບ​ຮຽບ​ຮ້ອຍ ແລະ ເປັນ​ສິ່ງ​ປະ​ທັບ​ໃຈ​ເພື່ອ​ດຶງ​ດູດ​ນັກ​ທ່ຽວ​ທ່ອງ​ພາຍ​ໃນ ແລະ ຕ່າງ­ປະ­ເທດ ໃຫ້​ລັ່ງ​ໄຫຼ​ເຂົ້າ​ມາ​ທ່ຽວ​ຊົມ​ບຸນ​ປະ­ເພ­ນີ​ຂອງ​ຊາດ​ລາວ​ເຮົາ​ໃຫ້​ຫຼາຍ​ຂຶ້ນ ພະ​ແນກ​ຕຳ­ຫຼວດ​ຈະ­ລາ­ຈອນ ນວ ຈຶ່ງ​ໄດ້​ຈັດ​ກຳ­ລັງ​ເຈົ້າ​ໜ້າ­ທີ່​ຈະ­ລາ­ຈອນ​ທີ່​ເຂົ້າ​ປ້ອງ​ກັນ ໃນ​ງານ​ບຸນ­ປີ­ໃໝ່​ລາວ ທັງ​ໝົດ 588 ຄົນ ຍິງ 33 ຄົນ ໃນ​ນີ້ ມີ​ຈຸດ​ປ້ອງ​ກັນ​ທັງ​ໝົດ 32 ຈຸດ ມີ​ປ້ອມ​ປະ­ຈຳ 54 ປ້ອມ ຈຸດ​ເຂົ້າ-ອອກ​ເມືອງ 4 ຈຸດ ມີ​ກຳ­ລັງ​ປະ­ຈຳ​ຈຸດ​ທັງ​ໝົດ 324 ຄົນ ກຳ­ລັງ​ປະ­ຈຳ​ປ້ອມ 264 ຄົນ ແລະ ມີ​ຈຸດ​ປະ­ຈຳ­ການ​ຄອຍ​ເຫດ 10 ຈຸດ.

    ງານ​ສົ່ງ​ທ້າຍ​ປີ​ເກົ່າ ແລະ ຕ້ອນ­ຮັບ​ປີ​ໃໝ່​ລາວ ພສ 2561 (ແຕ່​ວັນ​ທີ 14-16 ເມ­ສາ 2018) ທົ່ວ ນວ ມີ​ອຸ­ບັດ­ເຫດ​ເກີດ​ຂຶ້ນ​ທັງ​ໝົດ 24 ກໍ­ລະ­ນີ ມີ​ຜູ້​ເສຍ​ຊີ­ວິດ 6 ຄົນ ໃນ​ນັ້ນ ເມືອງ​ໄຊ​ທາ­ນີ​ເກີດ​ຂຶ້ນ​ຫຼາຍ​ກວ່າ​ໝູ່ 7 ກໍ­ລະ­ນີ ສຳ­ລັບ​ອຸ­ບັດ­ເຫດ​ທີ່​ເກີດ​ແຕ່​ລະ​ຄັ້ງ ເຮັດ​ໃຫ້​ມີ​ຜູ້​ໄດ້​ຮັບ​ບາດ­ເຈັບ​ເລັກ​ໜ້ອຍ 4 ຄົນ ສົມ­ຄວນ 22 ຄົນ ສາ­ຫັດ 11 ຄົນ ມີ​ພາ­ຫະ­ນະ​ເປ່​ເພ​ເລັກ​ໜ້ອຍ 10 ຄັນ ສົມ­ຄວນ 36 ຄັນ ໃນ​ນີ້ ຄົນ​ຂັບ​ໄດ້​ຮັບ​ບາດ­ເຈັບ​ເລັກ​ໜ້ອຍ 4 ຄົນ ສົມ­ຄວນ 15 ຄົນ ສາ­ຫັດ 9 ຄົນ ເສຍ​ຊີ­ວິດ 5 ຄົນ ແລະ ຜູ້​ຊ້ອນ​ທ້າຍ​ໄດ້​ຮັບ​ບາດ­ເຈັບ​ສົມ­ຄວນ 5 ຄົນ ສາ­ຫັດ 2 ຄົນ ແລະ ເສຍ​ຊີ­ວິດ 1 ຄົນ.

ຂ່າວທີ່ກ່ຽວຂ້ອງ