ຈີນ ໃຫ້ການຊ່ວຍເຫຼືອໂຄງການໝູ່ບ້ານຕົວແບບ

424 11 ມ.ສ. 2019 ຂ່າວໜ້າ​ໜຶ່ງ
ຈີນ ໃຫ້ການຊ່ວຍເຫຼືອໂຄງການໝູ່ບ້ານຕົວແບບ

    ພິ­ທີ​ເຊັນ​ບົດ​ບັນ­ທຶກ​ການ​ສຳ​ຫຼວດ​ພາກ​ສະ­ໜາມ ວຽກ​ງານ​ການ​ສຶກ​ສາ​ຄວາມ​ເປັນ​ໄປ​ໄດ້ ໂຄງ­ການ​ໝູ່​ບ້ານ​ຕົວ​ແບບ ໃນ​ການ​ຊ່ວຍ­ເຫຼືອ​ແກ້​ໄຂ​ຄວາມ­ທຸກ​ຍາກ​ຢູ່​ລາວ ທີ່​ນຳ​ໃຊ້​ເງິນ 4 ຕື້​ຢວນ ຈັດ​ຂຶ້ນ​ວັນ​ທີ 9 ເມ­ສາ 2019 ຢູ່​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ລະ­ຫວ່າງ​ທ່ານ ໄຂ​ຊະ­ນະ ສິດ­ທິ​ພອນ ຫົວ­ໜ້າ​ຫ້ອງ­ການ ຄະ­ນະ​ກຳ­ມະ­ການ​ຮ່ວມ​ມື​ລາວ-ຈີນ ແລະ ທ່ານ ຫວາງ ສີ​ຮຸ່ຍ ທີ່​ປຶກ­ສາ​ດ້ານ​ເສດ­ຖະ­ກິດ-ການ​ຄ້າ ສະ­ຖານ­ທູດ​ຈີນ ປະ­ຈຳ​ລາວ ມີ​ທ່ານ​ນາງ ເຂັມ​ມະ­ນີ ພົນ​ເສ­ນາ ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ທ່ານ ແຄນ​ທອງ ສີ​ສຸ​ວົງ ຮອງ​ປະ­ທານ​ຄະ­ນະ​ກຳ­ມະ­ການ​ຮ່ວມ​ມື​ລາວ-ຈີນ ກະ­ຊວງ​ແຜນ­ການ ແລະ ການ​ລົງ­ທຶນ ແລະ ພາກ­ສ່ວນ​ກ່ຽວ­ຂ້ອງ​ທັງ​ສອງ​ຝ່າຍ​ເຂົ້າ​ຮ່ວມ.

    ການ​ລົງ​ນາມ​ຄັ້ງ​ນີ້ ເພື່ອ​ຜັນ​ຂະ­ຫຍາຍ​ຜົນ​ການ​ຢ້ຽມ­ຢາມ​ລັດ​ຖະ​ກິດ​ຢູ່​ລາວ​ຂອງ​ທ່ານ ສີ ຈິ້ນ​ຜິງ ເລ­ຂາ­ທິ­ການ​ໃຫຍ່ ປະ­ທານ​ປະ­ເທດ​ຈີນ ໃນ​ວັນ​ທີ 13 ພະ­ຈິກ 2017 ທີ່​ໄດ້​ປະ­ກາດ​ໃຫ້­ການ​ຊ່ວຍ­ເຫຼືອ​ລ້າ​ແກ່​ລາວ​ໃນ 3 ປີ​ຕໍ່­ໜ້າ (2018-2020) ເປັນ​ເງິນ 4 ຕື້​ຢວນ ເຂົ້າ​ໃນ​ການ­ຈັດ­ຕັ້ງ​ປະ­ຕິ­ບັດ 8 ໂຄງ­ການ​ໃຫຍ່ ທີ່​ຕິດ​ພັນ​ກັບ​ການ​ປັບ­ປຸງ​ຊີ­ວິດ​ການ​ເປັນ​ຢູ່ ແລະ ແກ້​ໄຂ​ຄວາມ­ທຸກ​ຍາກ​ຂອງ​ປະ­ຊາ­ຊົນ​ຢູ່​ເຂດ​ຊົນ­ນະ­ບົດ​ຂອງ​ລາວ ພາຍ­ຫຼັງ​ທີ່​ລັດ­ຖະ­ບານ​ຈີນ ໄດ້​ແຕ່ງ­ຕັ້ງ​ຄະ­ນະ​ຊ່ຽວ­ຊານ​ເດີນ­ທາງ​ມາ​ສຳ​ຫຼວດ​ຄວາມ​ເປັນ​ໄປ​ໄດ້​ຂອງ​ໂຄງ­ການ​ກໍ່­ສ້າງ​ສຸກ­ສາ­ລາ 100 ແຫ່ງ ສະ­ໜອງ​ນ້ຳ​ສະ­ອາດ 100 ແຫ່ງ ສະ­ໜອງ​ໄຟ­ຟ້າ​ຊົນ­ນະ­ບົດ 100 ແຫ່ງ ແລະ ໂທລະ­ພາບ​ດີ​ຈິ​ຕອນ 100 ແຫ່ງ ຮ່ວມ​ຂະ­ແໜງ­ການ​ກ່ຽວ­ຂ້ອງ​ຝ່າຍ​ລາວ ແຕ່​ວັນ​ທີ 26 ພະ­ຈິກ ຫາ 28 ທັນ­ວາ 2018 ສອງ​ຝ່າຍ​ໄດ້​ເຫັນ​ດີ​ເປັນ​ເອ­ກະ​ພາບ​ເລືອກ​ເອົາ 2 ແຂວງ​ຄື: ແຂວງ​ຫຼວງ​ພະ​ບາງ ແລະ ແຂວງ​ວຽງ​ຈັນ ລວມ 30 ບ້ານ ເປັນ​ໂຄງ­ການ​ຕົວ​ແບບ ໃນ​ໄລ­ຍະ​ທີ 1 ໃນ​ນີ້ ປະ­ກອບ​ມີ​ໂຄງ­ການ​ສະ­ໜອງ​ໄຟ­ຟ້າ​ຊົນ­ນະ­ບົດ 16 ບ້ານ ສຸກ­ສາ­ລາ 7 ແຫ່ງ ສະ­ໜອງ​ນ້ຳ​ສະ­ອາດ 17 ບ້ານ ແລະ ໂຄງ­ການ​ໂທລະ­ພາບ​ດີ​ຈີ​ຕອນ 30 ບ້ານ ເປັນ​ໂຄງ­ການ​ທົດ​ລອງ​ໄລ­ຍະ 1 ຈາກ​ນັ້ນ ຄະ­ນະ​ຊ່ຽວ­ຊານ​ທັງ​ສອງ​ຝ່າຍ ຈຶ່ງ​ໄດ້​ຮ່າງ​ບົດ​ບັນ­ທຶກ​ການ​ສຳ​ຫຼວດ​ພາກ​ສະ­ໜາມ ວຽກ​ງານ​ສຶກ​ສາ​ຄວາມ​ເປັນ​ໄປ​ໄດ້​ຂອງ​ໂຄງ­ການ​ນີ້ ເປັນ​ບ່ອນ​ອີງ​ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ ແລະ ກ້າວ​ໄປ​ສູ່​ການ​ກຳ­ນົດ​ເປັນ​ໂຄງ­ການ​ຊ່ວຍ­ເຫຼືອ​ໃນ​ຂັ້ນ​ຕໍ່​ໄປ.

ຂ່າວທີ່ກ່ຽວຂ້ອງ