ນ້ຳປະປາ ຮຽກຮ້ອງປີໃໝ່ພ້ອມກັນໃຊ້ນ້ຳແບບປະຢັດ

300 11 ມ.ສ. 2019 ຂ່າວໜ້າ​ໜຶ່ງ
ນ້ຳປະປາ ຮຽກຮ້ອງປີໃໝ່ພ້ອມກັນໃຊ້ນ້ຳແບບປະຢັດ

    ລັດ​ວິ​ສາ​ຫະ​ກິດ​ນ້ຳ​ປະ­ປາ ນະ­ຄອນ­ຫຼວງ​ວຽງ​ຈັນ (ນວ) ສືບ­ຕໍ່​ເຕີບ​ໃຫຍ່​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ກຳ­ລັງ​ການ​ຜະ­ລິດ​ທັງ​ໝົດ​ສູງ​ເຖິງ 320.000 ແມັດ​ກ້ອນ​ຕໍ່​ວັນ ໃນ​ປີ 2018 ສາ­ມາດ​ຈຳ­ໜ່າຍ​ນ້ຳ​ໃຫ້​ປະ­ຊາ­ຊົນ​ໄດ້​ເຖິງ 95% ຂອງ​ແຜນ­ການ​ປີ ຢ່າງ­ໃດ​ກໍ​ຕາມ​ປີ​ໃໝ່​ລາວ 2562 ຜູ້­ອຳ­ນວຍ­ການ​ໃຫຍ່​ນ້ຳ​ປະ­ປາ ນວ ຮຽກ­ຮ້ອງ​ໃຫ້​ໃຊ້​ນ້ຳ​ແບບ​ປະ­ຢັດ.

    ທ່ານ ຄຳ​ເຜີຍ ວົງ­ສາ​ຄຳ​ຜຸຍ ຜູ້­ອຳ­ນວຍ­ການ​ໃຫຍ່​ລັດ​ວິ​ສາ​ຫະ​ກິດ​ນ້ຳ​ປະ­ປາ ນວ ໃຫ້​ສຳ­ພາດ​ວັນ​ທີ 9 ເມ­ສາ 2019 ວ່າ: ລັດ​ວິ​ສາ​ຫະ​ກິດ​ນ້ຳ​ປະ­ປາ ຍັງ​ສືບ­ຕໍ່​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ໂດຍ​ໄດ້​ເອົາ­ໃຈ­ໃສ່​ການ​ຜະ­ລິດ ເພື່ອ​ສະ­ໜອງ​ນ້ຳ​ໃຫ້​ພຽງ­ພໍ​ຕາມ​ຄວາມ​ຕ້ອງ­ການ​ຂອງ​ປະ­ຊາ­ຊົນ ມີ​ເຂດ​ພື້ນ​ທີ່​ບໍ­ລິ­ການ 7 ເມືອງ​ໃນ ແລະ 2 ເມືອງ​ນອກ ໃນ​ປີ 2018 ສາ­ມາດ​ຜະ­ລິດ​ນ້ຳ​ໄດ້​ທັງ​ໝົດ 93,34 ລ້ານ​ກວ່າ​ແມັດ​ກ້ອນ ສາ­ມາດ​ຂະ­ຫຍາຍ​ລະ­ບົບ​ທໍ່​ສົ່ງ ແລະ ທໍ່​ບໍ­ລິ­ການ​ຫຼາຍ​ກວ່າ 70 ກິ­ໂລ­ແມັດ ມີ​ລະ­ບົບ​ທໍ່​ສົ່ງ​ເຖິງ 2.404 ກິ­ໂລ­ແມັດ ໝໍ້​ແທກ​ນ້ຳ 131.852 ໜ່ວຍ ໃນ​ເຂດ 9 ຕົວ​ເມືອງ​ກວມ​ເອົາ​ປະ­ມານ 75% ຂອງ​ພື້ນ​ທີ່​ບໍ­ລິ­ການ ສາ­ມາດ​ຕິດ​ຕັ້ງ​ໝໍ້​ແທກ​ນ້ຳ​ໃໝ່​ໄດ້ 7.798 ໜ່ວຍ ທຽບ­ໃສ່​ແຜນ­ການ​ປີ​ໄດ້ 84% (9.233 ໜ່ວຍ) ປັດ­ຈຸ­ບັນ​ມີ​ທັງ​ໝົດ 8 ສາ­ຂາ ແລະ 1 ພະ​ແນກ ເພື່ອ​ຈຳ­ໜ່າຍ​ນ້ຳ​ປະ­ປາ​ໃຫ້​ປະ­ຊາ­ຊົນ​ໃນ ນວ ໄດ້ 62,31 ລ້ານ​ກວ່າ​ແມັດ​ກ້ອນ ປະ­ຕິ­ບັດ​ລາຍ​ຮັບ​ໄດ້ 169 ຕື້​ກີບ ຫຼຸດ​ແຜນ­ການ​ປີ 7% (182 ຕື້​ກີບ) ແລະ ສາ­ມາດ​ມອບ​ພັນ­ທະ​ເຂົ້າ​ງົບ­ປະ­ມານ 19 ຕື້​ກີບ ປະ­ຕິ­ບັດ​ໄດ້ 95% ຂອງ​ແຜນ­ການ​ປີ ພ້ອມ​ນັ້ນ ຍັງ​ສືບ­ຕໍ່​ປະ­ຕິ­ບັດ​ບັນ­ດາ​ໂຄງ­ການ​ຕ່າງໆ​ເຊັ່ນ: ໂຄງ­ການ​ຊານ­ເມືອງ ໂຄງ­ການ BOT ກໍ່­ສ້າງ​ນ້ຳ​ປະ­ປາ​ທ່າ​ເດື່ອ ໂຄງ­ການ​ຮ່ວມ​ມື​ສາ­ກົນ ໂຄງ­ການ MaWaSU 2 (JICA) ແລະ ອື່ນໆ.

    ເຖິງ​ແມ່ນ​ວ່າ­ການ​ສະ­ໜອງ ແລະ ຈຳ­ໜ່າຍ​ນ້ຳ​ປະ­ປາ​ໃຫ້​ປະ­ຊາ­ຊົນ​ໃນ ນວ ຈະ​ກວມ​ຫຼາຍ​ກວ່າ 90% ແຕ່​ລັດ​ວິ​ສາ​ຫະ​ກິດ ຍັງ​ໄດ້​ເອົາ­ໃຈ­ໃສ່​ສົ່ງ­ເສີມ​ໃຫ້​ມີ​ການ​ນຳ​ໃຊ້​ນ້ຳ​ແບບ​ປະ­ຢັດ ໂດຍ​ສະ­ເພາະ ໃນ​ງານ​ບຸນ­ປີ­ໃໝ່​ລາວ ກິດ­ຈະ­ກຳ​ຫຼັກ​ແມ່ນ​ການ​ຫົດ­ສົງ ດັ່ງ­ນັ້ນ ຜູ້­ອຳ­ນວຍ­ການ​ໃຫຍ່​ລັດ​ວິ​ສາ​ຫະ​ກິດ​ນ້ຳ​ປະ­ປາ ນວ ໃນ​ໂອ­ກາດ​ສະ­ເຫຼີມ­ສະ­ຫຼອງ​ບຸນ­ປີ­ໃໝ່​ລາວ ເຊິ່ງ​ຈະ​ມີ​ການ​ຫຼິ້ນ​ນ້ຳ ຫົດ­ສົງ ດັ່ງ­ນັ້ນ ຈຶ່ງ​ຮຽກ­ຮ້ອງ​ມາ​ຍັງ​ຊັ້ນ​ຄົນ​ຕ່າງໆ​ໃນ​ສັງ­ຄົມ ຈົ່ງ​ພ້ອມ​ກັນ​ໃຊ້​ນ້ຳ​ແບບ​ປະ­ຢັດ ເອົາ­ໃຈ­ໃສ່​ໃນ​ການ​ເປີດ​ປິດ​ນ້ຳ​ແຕ່​ລະ​ຄັ້ງ ຖ້າ​ມີ​ການ​ໃຊ້​ຫຼາຍ​ຈະ​ສົ່ງ​ຜົນ​ໃຫ້​ຜູ້​ທີ່­ຢູ່​ຫ່າງ​ໄກ​ລະ­ບົບ​ທໍ່​ລະ­ບົບ​ແຮງ​ດັນ​ຕ່ຳ ຈະ​ເຮັດ​ໃຫ້​ນ້ຳ​ບໍ່​ໄປ​ຮອດ ດັ່ງ­ນັ້ນ ຈຶ່ງ​ຮຽກ­ຮ້ອງ​ມາ​ຍັງ​ຜູ້​ຊົມ­ໃຊ້​ນ້ຳ​ຕ້ອງ​ມີ​ສະ­ຕິ ມີ​ສ່ວນ​ຮ່ວມ​ໃນ​ການ​ຊົມ­ໃຊ້​ນ້ຳ​ປະ­ປາ ພ້ອມ​ນັ້ນ ກໍ​ຂໍ​ຮຽກ­ຮ້ອງ​ອີກ​ຢ່າງ​ໜຶ່ງ​ຖ້າ​ມີ​ການ​ຊົມ­ໃຊ້​ກໍ​ຕ້ອງ​ໄດ້​ຈ່າຍ ໃນ​ຈຸດ​ນີ້​ພວກ​ເຮົາ​ກໍ​ມີ​ການ​ບໍ­ລິ­ການ​ຜ່ານ​ລະ­ບົບ​ທະ­ນາ­ຄານ​ຕ່າງໆ ເພື່ອ​ອຳ­ນວຍ​ຄວາມ​ສະ­ດວກ ດັ່ງ­ນັ້ນ ຜູ້​ຊົມ­ໃຊ້​ໃຫ້​ໄປ​ຊຳ­ລະ​ຄ່າ​ນ້ຳ​ຕາມ​ກຳ­ນົດ​ເວ­ລາ ຖ້າ​ເກີນ 2 ເດືອນ ພວກ​ເຮົາ​ມີ​ຄວາມ​ຈຳ­ເປັນ​ຢຸດ​ການ​ໃຫ້​ບໍ­ລິ­ການ​ນີ້ ແມ່ນ​ຢູ່​ໃນ​ລະ­ບຽບ​ຂອງ​ພວກ​ເຮົາ.

ຂ່າວທີ່ກ່ຽວຂ້ອງ