ຍ່າງເພື່ອສຸຂະພາບ ວັນສັບປະດາແຫ່ງຊາດ ຕ້ານຄວາມປອດໄພທາງຖະໜົນ

204 11 ມ.ສ. 2019 ວົງຈອນກີລາ
ຍ່າງເພື່ອສຸຂະພາບ ວັນສັບປະດາແຫ່ງຊາດ ຕ້ານຄວາມປອດໄພທາງຖະໜົນ

    ກິດ­ຈະ­ກຳ​ຍ່າງ​ເພື່ອ​ສຸ­ຂະ­ພາບ ເນື່ອງ​ໃນ​ວັນ​ສັບ­ປະ­ດາ​ແຫ່ງ​ຊາດ​ຕ້ານ​ຄວາມ​ປອດ​ໄພ​ທາງ​ຖະ­ໜົນ ປະ­ຈຳ​ປີ 2019 ພາຍ​ໃຕ້​ຫົວ­ຂໍ້ ຊີ­ວິດ​ປອດ​ໄພ​ຮ່ວມ​ກັນ​ປ້ອງ​ກັນ​ອຸ­ປະ­ຕິ­ເຫດ ຈັດ​ຂຶ້ນ​ວັນ​ທີ 6 ເມ­ສາ 2019 ທີ່​ປະ­ຕູ​ໄຊ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ວຽງ​ສະ​ຫວັດ ສີ​ພັນ​ດອນ ຮອງ​ລັດ­ຖະ­ມົນ­ຕີ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ພ້ອມ​ດ້ວຍ​ນັກ​ສຶກ​ສາ ນັກ­ຮຽນ ຕະ­ຫຼອດ​ຮອດ​ພໍ່​ແມ່​ປະ­ຊາ­ຊົນ​ເຂົ້າ​ຮ່ວມ.

    ທ່ານ​ຮອງ​ລັດ­ຖະ­ມົນ­ຕີ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ​ກ່າວ​ວ່າ: ສປປ ລາວ ມີ​ສະ­ພາບ​ການ​ເກີດ​ອຸ­ປະ­ຕິ­ເຫດ ໄດ້​ກາຍ­ເປັນ​ບັນ­ຫາ​ສຳ­ຄັນ ເປັນ​ປາ­ກົດ­ການ​ຫຍໍ້­ທໍ້​ຂອງ​ສັງ­ຄົມ ໃນ​ແຕ່​ລະ​ປີ​ມີ​ຜູ້​ເສຍ​ຊີ­ວິດ​ຈາກ​ການ​ເກີດ​ອຸ­ປະ­ຕິ­ເຫດ​ສະ­ເລ່ຍ 1 ພັນ​ຄົນ ແລະ ບາດ­ເຈັບ​ຫຼາຍ​ກວ່າ 9 ພັນ​ຄົນ ສະ­ນັ້ນ​ຈຶ່ງ​ໄດ້​ຈັດ​ງານ​ສັບ­ປະ­ດາ​ນີ້​ຂຶ້ນ ເພື່ອ​ຄວາມ​ປອດ​ໄພ​ທາງ​ຖະ­ໜົນ ການ​ຈັດ​ສັບ­ປະ­ດາ​ຄວາມ​ປອດ​ໄພ​ທາງ​ຖະ­ໜົນ​ສາ­ກົນ​ຜ່ານ​ມາ​ແລ້ວ 4 ຄັ້ງ ສຳ­ລັບ​ປີ​ນີ້​ອົງ­ການ​ສະ­ຫະ​ປະ­ຊາ​ຊາດ ໄດ້​ກຳ­ນົດ​ໃຫ້​ແຕ່​ລະ​ປະ­ເທດ​ສະ­ມາ­ຊິກ ພ້ອມ​ກັນ​ຈັດ​ສັບ­ປະ­ດາ​ສາ­ກົນ​ດ້ານ​ຄວາມ​ປອດ​ໄພ​ທາງ​ຖະ­ໜົນ ຄັ້ງ​ທີ 5 ວັນ​ທີ 6-12 ພຶດ­ສະ­ພາ 2019 ພາຍ​ໃຕ້​ຄຳ​ຂວັນ ຊີ­ວິດ​ປອດ​ໄພ​ຮ່ວມ​ກັນ​ປ້ອງ​ກັນ​ອຸ­ປະ­ຕິ­ເຫດ.

    ການ​ຈັດ​ສັບ­ປະ­ດາ​ແຫ່ງ​ຊາດ ດ້ານ​ຄວາມ​ປອດ​ໄພ​ດ້ານ​ຖະ­ໜົນ ໃນ​ແຕ່​ລະ​ປີ ແມ່ນ​ເປັນ​ສິ່ງ​ຈຳ­ເປັນ ແລະ ມີ​ຄວາມ​ສຳ­ຄັນ​ທີ່​ທຸກ​ພາກ­ສ່ວນ​ກ່ຽວ­ຂ້ອງ​ທັງ​ພາກ​ລັດ ແລະ ເອ­ກະ​ຊົນ​ໄດ້​ຮ່ວມ​ແຮງ​ຮ່ວມ​ໃຈ​ປະ­ກອບ­ສ່ວນ​ເຫື່ອ­ແຮງ​ວັດ­ຖຸ​ປັດ​ໄຈ ຈັດ​ງານ​ສັບ­ປະ­ດາ​ຄວາມ​ປອດ​ໄພ​ທາງ​ຖະ­ໜົນ​ນີ້​ຂຶ້ນ ແນ­ໃສ່​ປຸກ­ລະ­ດົມ​ໃຫ້​ທຸກ​ພາກ­ສ່ວນ ແລະ ທຸກ​ຊັ້ນ​ຄົນ​ໃນ​ສັງ­ຄົມ​ໃຫ້​ເຫັນ​ເຖິງ​ໄພ​ອັນ­ຕະ­ລາຍ​ຈາກ​ການ​ເກີດ​ອຸ­ປະ­ຕິ­ເຫດ ພ້ອມ​ທັງ​ຮ່ວມ​ໃຈ​ກັນ​ປົກ​ປ້ອງ​ຊີ­ວິດ ແລະ ຊັບ​ສິນ​ຂອງ​ຕົນ​ເອງ​ຈາກ​ການ​ເກີດ​ອຸ­ປະ­ຕິ­ເຫດ ແລະ ພ້ອມ​ກັນ​ເຄື່ອນ​ໄຫວ ເພື່ອ​ປະ­ກອບ­ສ່ວນ​ໃນ​ການ​ຫຼຸດ­ຜ່ອນ​ການ​ເກີດ​ອຸ­ປະ­ຕິ­ເຫດ​ລົງ​ເທື່ອ​ລະ​ກ້າວ.

ຂ່າວທີ່ກ່ຽວຂ້ອງ