ເບິ່ງບ້ານເຂົາເອົາບົດຮຽນ 11/04/2019

339 11 ມ.ສ. 2019 ຫົວຂໍ້ຂ່າວອື່ນໆ

    ມື້­ນີ້​ມີ​ເລື່ອງ​ກ່ຽວ​ກັບ​ມາດ​ຕະ­ການ​ຂອງ​ຈີນ ໃນ​ການ​ຈຳ­ກັດ​ລົດ​ທີ່​ແລ່ນ​ຢູ່​ນະ­ຄອນ­ຫຼວງ​ປັກ​ກິ່ງ ແລະ ເລື່ອງ ຈີ​ເລ ອອກ​ກົດ­ໝາຍ​ລົງ­ໂທດ​ຜູ້​ໃສ່​ຫູ​ຟັງ​ຕອນ​ຍ່າງ.

    ທີ່ ສປ ຈີນ: ໃນ​ຊຸມ​ປີ​ຫຼັງ​ມາ​ນີ້ ທາງ​ການ​ຈີນ ໄດ້​ເອົາ​ຫຼາຍ​ມາດ​ຕະ­ການ ເພື່ອ​ແກ້​ໄຂ​ສະ­ພາບ​ແອ​ອັດ​ຂອງ​ຍານ­ພາ­ຫະ­ນະ​ຕາມ​ຖະ­ໜົນ ໃນ​ບັນ­ດາ​ຕົວ​ເມືອງ​ໃຫຍ່ໆ​ຕ່າງໆ ໂດຍ​ສະ­ເພາະ​ແມ່ນ ໃນ​ນະ­ຄອນ­ຫຼວງ​ປັກ​ກິ່ງ ນອກ­ຈາກ​ບັນ­ຫາ​ແອ​ອັດ​ຊັກ​ຊ້າ​ເສຍ​ເວ­ລາ​ແລ້ວ ຈຳ­ນວນ​ລົດ​ທີ່​ເພີ່ມ​ຂຶ້ນ​ໃນ​ແຕ່​ລະ​ວັນ​ນັ້ນ ຍັງ​ໄດ້​ສ້າງ​ບັນ­ຫາ​ມົນ​ລະ​ພິດ​ທາງ​ອາ­ກາດ​ອີກ​ດ້ວຍ ເພື່ອ​ແກ້​ໄຂ​ບັນ­ຫາ​ດັ່ງ­ກ່າວ ທາງ​ການ​ນະ­ຄອນ­ຫຼວງ​ປັກ​ກິ່ງ ຈຶ່ງ​ມີ​ແຜນ​ຈຳ­ກັດ​ຈຳ­ນວນ​ລົດ​ປ້າຍ​ທະ­ບຽນ​ເຂດ​ແຂວງ​ອື່ນ ແລ່ນ​ເຂົ້າ​ໂຕ​ນະ­ຄອນ­ຫຼວງ ການ​ຈຳ­ກັດ​ດັ່ງ­ກ່າວ ຈະ​ເລີ່ມ​ປະ­ຕິ­ບັດ​ໃນ​ວັນ​ທີ 1 ເດືອນ​ພະ­ຈິກ ປີ 2019 ນີ້​ເອງ ພາຍ​ໃຕ້​ແຜນ​ຈຳ­ກັດ​ນີ້ ລົດ​ທີ່​ໃສ່​ປ້າຍ​ທະ­ບຽນ​ຕ່າງ​ເຂດ ຕ່າງ​ແຂວງ ແລະ ຕ່າງ​ເມືອງ ສາ­ມາດ​ແລ່ນ​ເຂົ້າ​ນະ­ຄອນ­ຫຼວງ​ປັກ​ກິ່ງ​ໄດ້ ກໍ​ຕໍ່​ເມື່ອ​ມີ​ໃບ​ອະ­ນຸ­ຍາດ​ສະ­ເພາະ ແລະ ສາ­ມາດ​ເຂົ້າ​ໄດ້​ໃນ​ຈຳ­ນວນ​ຈຳ­ກັດ ຄື ພຽງ 12 ຄັ້ງ​ຕໍ່​ປີ ແລະ ແຕ່​ລະ​ຄັ້ງ​ມີ​ໄລ­ຍະ​ພຽງ 7 ວັນ ຕິດ­ຕໍ່​ກັນ​ເທົ່າ​ນັ້ນ ໝາຍ​ຄວາມ​ວ່າ ໃນ​ແຕ່​ລະ​ປີ ລົດ​ທີ່​ມີ​ປ້າຍ​ທະ­ບຽນ​ນອກ​ນະ­ຄອນ­ຫຼວງ ສາ­ມາດ​ແລ່ນ​ເຂົ້າ​ນະ­ຄອນ­ຫຼວງ​ໄດ້ ໃນ​ຂອບ 84 ມື້​ເທົ່າ​ນັ້ນ ຕາມ​ສະ­ຖິ­ຕິ​ໃນ​ເດືອນ​ເມ­ສາ ປີ 2018 ລົດ​ໃຫຍ່​ທີ່​ຈົດ​ທະ­ບຽນ​ຢູ່​ນະ­ຄອນ­ຫຼວງ​ປັກ​ກິ່ງ​ນັ້ນ ມີ​ຈຳ­ນວນ 5,97 ລ້ານ​ຄັນ ແຕ່​ລົດ​ທີ່​ຈົດ​ທະ­ບຽນ​ຢູ່​ເຂດ​ນອກ ທີ່​ແລ່ນ​ເປັນ​ປະ­ຈຳ​ຢູ່​ນະ­ຄອນ­ຫຼວງ​ປັກ​ກິ່ງ​ນັ້ນ ມີ​ຈຳ­ນວນ​ສູງ​ເຖິງ 700.000 ຄັນ ຫຼື ສ່ຳໆກັບ​ຈຳ­ນວນ​ລົດ​ໃນ​ເກາະ​ຮົງ​ກົງ ຂ່າວ​ບອກ​ວ່າ ໃນ​ປີ 2010 ທາງ​ການ​ນະ­ຄອນ­ຫຼວງ​ປັກ​ກິ່ງ ໄດ້​ອອກ​ທະ­ບຽນ​ລົດ​ປ້າຍ​ນະ­ຄອນ­ຫຼວງ ດ້ວຍ​ວິ­ທີ​ຈົກ​ສະ­ຫຼາກ​ອັດ­ຕະ­ໂນ­ມັດ ຜູ້​ທີ່​ຕ້ອງ­ການ​ຊື້​ລົດ​ໃຫຍ່ ກ່ອນ​ອື່ນ​ຕ້ອງ​ໄດ້​ຈົກ​ສະ­ຫຼາກ​ເອົາ​ປ້າຍ​ທະ­ບຽນ ແລ້ວ​ຈຶ່ງ​ສາ­ມາດ​ຊື້​ລົດ ຖ້າ​ຈົກ​ບໍ່​ໄດ້​ກໍ​ຕ້ອງ​ລໍ​ສ່ຽງ​ເທື່ອ​ໃໝ່ ເນື່ອງ​ຈາ​ກວ່າ ລະ­ບົບ​ຈົກ​ສະ­ຫຼາກ​ກັບ​ຄວາມ​ຕ້ອງ­ການ​ຊື້​ລົດ​ຕົວ​ຈິງ​ນັ້ນ ຫຼຸດ​ລື່ນ​ກັນ​ຫຼາຍ ດັ່ງ­ນັ້ນ ຜູ້​ທີ່​ຕ້ອງ­ການ​ຊື້​ລົດ​ຈຶ່ງ​ສວຍ­ໂອ­ກາດ ຊອກ​ໃສ່​ປ້າຍ​ທະ­ບຽນ​ເຂດ​ນອກ​ທີ່​ງ່າຍ​ກວ່າ ສ່ວນ​ຮ້ານ​ຂາຍ­ຍ່ອຍ​ລົດ ກໍ​ສວຍ­ໂອ­ກາດ​ຊອກ​ລາຍ​ໄດ້​ດ້ວຍ​ການ​ບໍ­ລິ­ການ​ປ້າຍ​ລົດ​ເຂດ​ນອກ​ນະ­ຄອນ­ຫຼວງ ໂດຍ​ໄດ້​ຄ່າ​ຕອບ​ແທນ​ເປັນ​ເງິນ​ປະ­ມານ 4.500 ຢວນ ຫຼື ເທົ່າ​ກັບ 702 ໂດ​ລາ​ສະ­ຫະ­ລັດ​ຕໍ່ 1 ປ້າຍ ເມື່ອ​ໄດ້​ປ້າຍ​ທະ­ບຽນ​ແລ້ວ ຜູ້​ຊື້​ລົດ​ກໍ​ສາ­ມາດ​ຂໍ­ອະ­ນຸ­ຍາດ​ເປັນ​ແຕ່​ລະ​ອາ­ທິດ ເພື່ອ​ແລ່ນ​ລົດ​ເຂົ້າ​ນະ­ຄອນ­ຫຼວງ​ປັກ​ກິ່ງ.

    ທີ່ ຈີ​ເລ: ປະ­ເທດ​ທີ່­ຢູ່​ພາກ​ພື້ນ​ອາ​ເມ​ຣິ​ກາ​ໃຕ້ ຊື່­ວ່າ ຈີ​ເລ ນີ້ ໄດ້​ອອກ​ກົດ­ໝາຍ+ອ່າວ​ແປກ ເພື່ອ​ເອົາ​ໂທດ​ຜູ້​ໃສ່​ຫູ​ຟັງ​ຕາມ​ຖະ­ໜົນ​ຫົນ­ທາງ ສະ­ຖານ­ທີ່​ສາ­ທາ­ລະ­ນະ ຍ້ອນ​ວ່າ ບຸກ­ຄົນ​ທີ່​ມີ​ພຶດ­ຕິ​ກຳ​ແບບ​ນີ້​ນັ້ນ ສ່ຽງ​ປະ­ສົບ​ອຸ­ບັດ­ເຫດ ຖືກ​ລົດ​ຕຳ​ບາດ­ເຈັບ​ລົ້ມ​ຕາຍ ເພາະ​ມົວ​ຟັງ​ແຕ່​ເພງ ເລີຍ​ບໍ່​ສົນ­ໃຈ​ບັນ­ຫາ​ອ້ອມ​ຕົວ​ທີ່​ຈະ​ເກີດ​ຂຶ້ນ ສະ­ຖິ­ຕິ​ແຕ່​ປີ 2011-2015 ບອກ​ວ່າ ຄົນ​ທີ່​ຖືກ​ລົດ​ຕຳ​ເສຍ​ຊີ­ວິດ ເວ­ລາ​ຍ່າງ​ຢູ່ ຈີ​ເລ ນັ້ນ ມີ​ເຖິງ 3.024 ສົບ ສ່ວນ​ທີ່​ໄດ້​ຮັບ​ບາດ­ເຈັບ​ນັ້ນ ມີ​ສູງ​ເຖິງ 42 ພັນ​ຄົນ ລັດ​ຖະ​ສະ­ພາ ຈີ​ເລ ໄດ້​ເລີ່ມ​ຮ່າງ​ກົດ­ໝາຍ​ເອົາ​ໂທດ​ຜູ້​ໃສ່​ຫູ​ຟັງ​ຕອນ​ຍ່າງ​ຕາມ​ທາງ ຕາມ​ສະ­ຖານ­ທີ່​ສາ­ທາ­ລະ­ນະ​ໃນ​ທ້າຍ​ປີ 2014 ແລະ ໄດ້​ຮັບ­ຮອງ​ເອົາ​ໃນ​ປີ 2015 ກົດ­ໝາຍ​ກຳ­ນົດ​ໂທດ​ດ້ວຍ​ການ​ປັບ​ໃໝ​ຜູ້​ລະ­ເມີດ​ເປັນ​ເງິນ ລະ­ຫວ່າງ 35-103 ໂດ​ລາ​ສະ­ຫະ­ລັດ​ຕໍ່​ຄັ້ງ ຖ້າ​ເປັນ​ກໍ­ລະ­ນີ​ຮ້າຍ​ແຮງ ຜູ້​ລະ­ເມີດ​ກໍ​ຈະ​ໄດ້​ຮັບ​ໂທດ ທັງ​ຖືກ​ປັບ​ໃໝ ແລະ ຖືກ​ຕັດ​ອິດ​ສະ­ລະ​ພາບ ນອກ­ຈາກ​ກຳ­ນົດ​ໂທດ​ຕໍ່​ຜູ້​ໃສ່​ຫູ​ຟັງ​ຕອນ​ຍ່າງ​ແລ້ວ ກໍ​ຍັງ​ໄດ້​ກຳ­ນົດ​ໂທດ​ໜັກ​ຕື່ມ ສຳ­ລັບ​ຜູ້​ໃສ່​ຫູ​ຟັງ​ຕອນ​ຂ້າມ​ທາງ ຕອນ​ຢູ່​ໃກ້ໆ​ທາງ​ລົດ­ໄຟ ແລະ ເວ­ລາ​ຂັບ​ຂີ່​ຍານ­ພາ­ຫະ­ນະ.

ຂ່າວທີ່ກ່ຽວຂ້ອງ