ໄຂອະນຸສອນສະຖານ ທ່ານ ໜູຮັກ ພູມສະຫວັນ

566 10 ມ.ສ. 2019 ຂ່າວໜ້າ​ໜຶ່ງ
ໄຂອະນຸສອນສະຖານ ທ່ານ ໜູຮັກ ພູມສະຫວັນ

    ໂດຍ​ປະ­ຕິ­ບັດ​ຕາມ​ມະ­ຕິ​ຕົກ­ລົງ​ຂອງ​ຄະ­ນະ​ເລ­ຂາ­ທິ­ການ​ສູນ​ກາງ​ພັກ ວ່າ​ດ້ວຍ​ການ​ສ້າງ ແລະ ອະ­ນຸ​ຮັກ​ຮັກ­ສາ​ອະ­ນຸ­ສອນ​ສະ­ຖານ ທ່ານ ໜູ​ຮັກ ພູມ​ສະ­ຫວັນ ແລະ ອີງ­ໃສ່​ຈິດ­ໃຈ​ຊີ້​ນຳ​ຂອງ​ກົມ​ການ­ເມືອງ​ສູນ​ກາງ​ພັກ ຄະ­ນະ​ເລ­ຂາ­ທິ­ການ​ສູນ​ກາງ​ພັກ-ລັດ­ຖະ­ບານ ກ່ຽວ​ກັບ​ການ​ຈາ­ລຶກ​ຄຸນ­ງາມ­ຄວາມ­ດີ ແລະ ຜົນ­ງານ​ອັນ​ໃຫຍ່​ຫຼວງ ຂອງ​ບັນ­ດາ​ທ່ານ​ຜູ້­ນຳ​ຮຸ່ນ​ທຳ​ອິດ ຂອງ​ການ​ປະ­ຕິ­ວັດ​ລາວ ໃຫ້​ຍືນ​ຍົງ​ຄົງ​ຕົວ​ຕະ­ຫຼອດ​ຮອດ​ເຊັ່ນ​ລູກ​ເຊັ່ນ​ຫຼານ ພ້ອມ​ນັ້ນ ເພື່ອ​ເປັນ​ການ​ສະ­ເຫຼີມ­ສະ­ຫຼອງ​ວັນ​ຄ້າຍ​ວັນ​ເກີດ​ຂອງ​ທ່ານ ໜູ​ຮັກ ພູມ​ສະ­ຫວັນ ຄົບ­ຮອບ 105 ປີ (9/4/1914-9/4/2019).

    ວັນ​ທີ 9 ເມ­ສາ 2019 ທີ່​ບ້ານ​ສະ­ພານ​ທອງ​ເໜືອ ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ ໄດ້​ມີ​ພິ­ທີ​ໄຂ​ອະ­ນຸ­ສອນ​ສະ­ຖານ ທ່ານ ໜູ​ຮັກ ພູມ​ສະ­ຫວັນ ຢ່າງ​ເປັນ​ທາງ​ການ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ບຸນ​ຍັງ ວໍ­ລະ​ຈິດ ປະ­ທານ​ປະ­ເທດ ພ້ອມ​ດ້ວຍ​ບັນ­ດາ​ທ່ານ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ອະ­ດີດ​ການ​ນຳ​ຂັ້ນ​ສູງ ພະ­ນັກ­ງານ​ອາ­ວຸ­ໂສ​ບຳ­ນານ ຄອບ­ຄົວ​ລູກ​ຫຼານ ອະ­ດີດ​ພະ­ນັກ­ງານ​ໃກ້​ສິດ ອະ­ດີດ​ເລ­ຂາ ທ່ານ ໜູ​ຮັກ ພູມ​ສະ­ຫວັນ ອົງ​ການ­ຈັດ­ຕັ້ງ​ກ່ຽວ­ຂ້ອງ ແລະ ພະ­ນັກ­ງານ​ການ​ນຳ​ຮັບ­ຜິດ­ຊອບ​ພິ​ພິ​ທະ​ພັນ ໄກ­ສອນ ພົມ­ວິ­ຫານ.

    ໃນ​ພິ­ທີ ທ່ານ ບຸນ​ປອນ ບຸດ​ຕະ​ນະ​ວົງ ກຳ­ມະ­ການ​ສູນ​ກາງ​ພັກ ຮອງ​ປະ­ທານ​ສະ­ພາ​ແຫ່ງ​ຊາດ ໄດ້​ຂຶ້ນ​ກ່າວ​ບົດ​ສູນ​ທອນ​ພົດ​ໄຂ​ອະ­ນຸ­ສອນ​ສະ­ຖານ ທ່ານ ໜູ​ຮັກ ພູມ​ສະ­ຫວັນ ເຊິ່ງ​ມີ​ບາງ​ຕອນ​ວ່າ: ເພື່ອ​ເປັນ​ການ​ປົກ​ປັກ​ຮັກ­ສາ​ເສີມ​ຂະ­ຫຍາຍ​ຄຸນ​ປະ­ໂຫຍດ​ສູງ​ສຸດ ຂອງ​ສະ­ຖານ­ທີ່​ດັ່ງ­ກ່າວ ໃຫ້​ເປັນ​ບ່ອນ​ສຶກ​ສາ​ອົບ­ຮົມ ປູກ​ຈິດ​ສຳ­ນຶກ​ໃຫ້​ແກ່​ຮຸ່ນ​ຄົນ​ສືບ​ທອດ​ໄດ້ ຮຽນ​ຮູ້​ກ່ຽວ​ກັບ​ຄຸນ­ງາມ­ຄວາມ­ດີ ແລະ ຜົນ­ງານ​ອັນ​ໃຫຍ່​ຫຼວງ​ຂອງ​ທ່ານ ໜູ​ຮັກ ພູມ​ສະ­ຫວັນ ທີ່​ໄດ້​ອຸ­ທິດ​ຕະ­ຫຼອດ​ຊີ­ວິດ​ເພື່ອ​ປະ­ເທດ​ຊາດ ແລະ ການ​ປະ­ຕິ­ວັດ​ໃຫ້​ຍືນ​ຍົງ ເຊິ່ງ​ທ່ານ​ແມ່ນ​ໜຶ່ງ​ໃນ​ບັນ­ດາ​ທ່ານ​ຜູ້­ນຳ​ຮຸ່ນ​ທຳ​ອິດ ຂອງ​ການ​ປະ­ຕິ­ວັດ​ລາວ ທີ່​ຕໍ່­ສູ້​ຄຽງ​ບ່າ​ຄຽງ​ໄຫຼ່​ຮ່ວມ​ກັບ​ປະ­ທານ ໄກ­ສອນ ພົມ­ວິ­ຫານ ແຕ່​ຫົວ­ທີ ທ່ານ​ເປັນ​ຜູ້­ນຳ​ທີ່​ປະ­ເສີດ ເປັນ​ລູກ​ຮັກ​ຫຼານ​ແພງ​ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ ເປັນ​ຜູ້­ນຳ​ທີ່​ມີ​ຄວາມ​ປີ​ຊາ​ສາ­ມາດ ສະ­ຫຼາດ​ສ່ອງ​ໃສ ອຸ­ທິດ​ເຫື່ອ­ແຮງ ກຳ­ລັງ­ວັງ­ຊາ ສະ­ຕິ​ປັນ­ຍາ​ຮ່ວມ​ກັບ​ບັນ­ດາ​ທ່ານ​ຜູ້­ນຳ​ການ​ປະ­ຕິ­ວັດ ໃນ​ການ​ຊີ້​ນຳ​ຂະ​ບວນ​ການ​ຕໍ່­ສູ້​ປົດ​ປ່ອຍ​ຊາດ ພ້ອມ​ນັ້ນ ທ່ານ​ເປັນ​ນັກ​ຮັກ​ຊາດ​ທີ່​ມີ​ຄວາມ​ອົງ­ອາດ​ກ້າ­ຫານ ມີ​ມາ­ນະ​ຈິດ ແລະ ອຸ­ດົມ​ການ​ອັນ​ສູງ​ສົ່ງ ເດັດ­ຂາດ​ບໍ່​ຍອມ​ຈຳ­ນົນ​ຕໍ່​ສັດ­ຕູ​ໃນ​ສະ­ຖາ­ນະ​ການ​ທີ່​ສ່ຽງ​ເປັນ​ສ່ຽງ​ຕາຍ ຖືກ​ຈັບ​ກຸມ​ຄຸມ​ຂັງ ທ່ານ​ກໍ​ມີ​ຄວາມ​ເຊື່ອ​ໝັ້ນ​ຕໍ່​ການ​ນຳ​ຂອງ​ພັກ ແລະ ຕໍ່​ໄຊ­ຊະ­ນະ​ສຸດ​ທ້າຍ​ຂອງ​ການ​ປະ­ຕິ­ວັດ.

    ດ້ວຍ​ຄຸນ­ງາມ­ຄວາມ­ດີ ແລະ ຜົນ­ງານ​ອັນ​ໃຫຍ່​ຫຼວງ​ຂອງ​ທ່ານ ໜູ​ຮັກ ພູມ​ສະ­ຫວັນ ທີ່​ໄດ້​ອຸ­ທິດ​ຕະ­ຫຼອດ​ຊີ­ວິດ​ໃຫ້​ແກ່​ພາ­ລະ­ກິດ​ປະ­ຕິ­ວັດ ເພື່ອ​ສະ­ແດງ​ຄວາມ​ເຄົາ­ລົບ​ຮັກ ຄວາມ​ກະ­ຕັນ­ຍູ​ຮູ້​ບຸນ­ຄຸນ​ຂອງ​ພັກ-ລັດ ແລະ ປະ­ຊາ­ຊົນ​ລາວ​ບັນ­ດາ­ເຜົ່າ​ທີ່​ມີ​ຕໍ່​ທ່ານ ໜູ​ຮັກ ພູມ​ສະ­ຫວັນ ພັກ ແລະ ລັດ­ຖະ­ບານ​ລາວ ຈຶ່ງ​ໄດ້​ຕົກ­ລົງ​ສ້າງ ແລະ ອະ­ນຸ​ຮັກ​ຮັກ­ສາ​ອະ­ນຸ­ສອນ​ສະ­ຖານ ຂອງ​ທ່ານ​ໄວ້​ທີ່​ບ້ານ​ສະ­ພານ​ທອງ​ເໜືອ ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ ເຊິ່ງ​ເປັນ​ບ່ອນ​ທີ່​ເພິ່ນ​ໄດ້​ດຳ­ລົງ​ຊີ­ວິດ​ໃນ​ໄລ­ຍະ​ປະ­ເທດ​ຊາດ ດຳ­ເນີນ​ພາ­ລະ­ກິດ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ ນັບ​ແຕ່​ປີ 1975-2008 ເປັນ​ເວ­ລາ 33 ປີ.

    ສຳ­ລັບ​ອະ­ນຸ­ສອນ​ສະ­ຖານ ທ່ານ ໜູ​ຮັກ ພູມ​ສະ­ຫວັນ ເປັນ​ສະ­ຖານ­ທີ່​ມູນ​ມໍ­ລະ­ດົກ​ອັນ​ລ້ຳ​ຄ່າ​ຂອງ​ຊາດ ແລະ ເປັນ​ສະ­ຖານ­ທີ່​ທ່ອງ​ທ່ຽວ​ທາງ​ປະ­ຫວັດ­ສາດ ທີ່​ມີ​ຄວາມ​ໝາຍ​ສຳ­ຄັນ ເຊິ່ງ​ຈະ​ກາຍ­ເປັນ​ບ່ອນ​ສຶກ​ສາ​ອົບ­ຮົມ​ທາງ​ດ້ານ​ການ­ເມືອງ-ແນວ​ຄິດ ເປັນ​ບ່ອນ​ສຶກ​ສາ​ຄົ້ນ­ຄວ້າ​ຮ່ຳ­ຮຽນ​ຂອງ​ພະ­ນັກ­ງານ​ການ​ນຳ​ຫຼັກ​ແຫຼ່ງ ສະ­ມາ­ຊິກ​ພັກ ພະ­ນັກ­ງານ-ລັດ­ຖະ­ກອນ ນັກ­ຮຽນ​ຮູ້ ນັກ​ສຶກ​ສາ ແລະ ປະ­ຊາ­ຊົນ​ລາວ​ບັນ­ດາ­ເຜົ່າ ຕະ­ຫຼອດ​ຮອດ​ແຂກ​ທັງ​ພາຍ​ໃນ ແລະ ຕ່າງ­ປະ­ເທດ ໄດ້​ສຶກ​ສາ​ຮຽນ​ຮູ້ ເຊື່ອມ​ຊຶມ​ຢ່າງ​ໜັກ​ແໜ້ນ​ຕໍ່​ແບບ­ແຜນ​ການ​ດຳ­ລົງ​ຊີ­ວິດ ແບບ­ແຜນ​ວິ­ທີ​ເຮັດ​ວຽກ ແລະ ຄຸນ­ສົມ­ບັດ​ສິນ​ທຳ​ປະ­ຕິ­ວັດ​ອັນ​ໃສ​ແຈ້ງ​ຂອງ​ທ່ານ ໜູ​ຮັກ ພູມ​ສະ­ຫວັນ ເຊິ່ງ​ສະ­ຖານ­ທີ່​ດັ່ງ­ກ່າວ ຈະ​ເປີດ​ໃຫ້​ແຂກ​ເຂົ້າ​ຢ້ຽມ​ຊົມ​ທຸກໆ​ວັນ​ອັງ­ຄານ ຫາ ວັນ​ອາ­ທິດ ຕອນ​ເຊົ້າ​ເວ­ລາ 8:00-12:00 ໂມງ ແລະ ຕອນ​ບ່າຍ ເວ­ລາ 13:00-16:00 ໂມງ.

ຂ່າວທີ່ກ່ຽວຂ້ອງ