ຂ່າວຫຼ້າສຸດ

ເປີດນຳໃຊ້ຜະລິດຕະພັນ BCEL Mastercard

815 10 ມ.ສ. 2019 ຂ່າວໜ້າ​ໜຶ່ງ
ເປີດນຳໃຊ້ຜະລິດຕະພັນ BCEL Mastercard

    ວັນ​ທີ 5 ເມ­ສາ 2019 ທະ­ນາ­ຄານ​ການ​ຄ້າ​ຕ່າງ­ປະ­ເທດ​ລາວ​ມະ­ຫາ­ຊົນ ໄດ້​ຈັດ​ພິ­ທີ​ແນະ­ນຳ​ຜະ­ລິດ​ຕະ​ພັນ BCEL Mastercard ຂຶ້ນ​ທີ່​ໂຮງ­ແຮມ​ດອນ​ຈັນ​ພາ​ເລດ ນະ­ຄອນ­ຫຼວງ​ວຽງ​ຈັນ ໂດຍ​ເປັນ​ປະ­ທານ​ຂອງ​ທ່ານ ພູ​ຂົງ ຈັນ­ທະ​ຈັກ ຜູ້­ອຳ­ນວຍ­ການ​ໃຫຍ່ ທຄຕລ ແລະ ທ່ານ​ນາງ Winnine Wong ຫົວ­ໜ້າ​ພາກ​ພື້ນ​ອິນ­ດູ­ຈີນ​ຂອງ​ສູນ Mastercard ສາ­ກົນ ມີ​ທ່ານ ບຸນ​ເຫຼືອ ສິນ​ໄຊ​ວໍ​ຣະ​ວົງ ປະ­ທານ​ສະ­ພາ​ບໍ­ລິ­ຫານ ທຄຕລ ທ່ານ ສຸ​ລິ​ສັກ ທຳ​ນຸ​ວົງ ວ່າ­ການ​ຫົວ­ໜ້າ​ກົມ​ຄຸ້ມ​ຄອງ​ລະ­ບົບ​ຊຳ­ລະ​ສະ​ສາງ​ທະ­ນາ­ຄານ​ແຫ່ງ ສປປ ລາວ ພ້ອມ​ດ້ວຍ​ບັນ­ດາ​ຄະ­ນະ​ກົມ ຄະ­ນະ​ພະ​ແນກ​ທີ່​ກ່ຽວ­ຂ້ອງ​ຈາກ​ທະ­ນາ­ຄານ​ແຫ່ງ ສປປ ລາວ ທະ­ນາ­ຄານ​ທຸ­ລະ​ກິດ​ລັດ ບໍ­ລິ­ສັດ​ໃນ​ເຄືອ ທຄຕລ ຄະ­ນະ​ອຳ­ນວຍ​ການ ຄະ­ນະ​ພະ​ແນກ ສູນ ແລະ ສາ­ຂາ ຕະ­ຫຼອດ​ຮອດ​ພະ­ນັກ­ງານ​ຂອງ ທຄຕລ ພາຍ​ໃນ​ນະ­ຄອນ­ຫຼວງ​ວຽງ​ຈັນ​ເຂົ້າ​ຮ່ວມ.

    ໃນ​ຍຸກ​ປັດ­ຈຸ­ບັນ ເຕັກ​ໂນ​ໂລ​ຊີ​ໄດ້​ມີ​ການ​ພັດ­ທະ­ນາ​ຢ່າງ​ບໍ່​ຢຸດ​ຢັ້ງ ເຊິ່ງ​ໄດ້​ເຂົ້າ​ມາ​ມີ​ອິດ​ທິ​ພົນ​ໃນ​ການ​ດຳ­ລົງ​ຊີ­ວິດ​ຂອງ​ຄົນ ທຄຕລ ໄດ້​ມີ​ການ​ນຳ​ໃຊ້​ຄວາມ​ກ້າວ­ໜ້າ​ຂອງ​ເຕັກ​ໂນ​ໂລ​ຊີ ເຂົ້າ​ມາ​ໝູນ​ໃຊ້​ໃນ​ວຽກ​ງານ​ປັບ­ປຸງ​ການ​ບໍ­ລິ­ການ​ໃຫ້​ມີ​ຄວາມ​ສະ­ດວກ ວ່ອງ­ໄວ ທັນ​ສະ­ໄໝ​ບົນ​ພື້ນ­ຖານ​ຄວາມ​ປອດ​ໄພ ແລະ ໄດ້​ມາດ­ຕະ­ຖານ​ສາ­ກົນ ເຊິ່ງ​ການ​ແນະ­ນຳ​ຜະ­ລິດ​ຕະ​ພັນ BCEL Mastercard ຄັ້ງ​ນີ້​ເປັນ​ອີກ​ບາດ­ກ້າວ​ໜຶ່ງ​ແຫ່ງ​ການ​ພັດ­ທະ­ນາ​ຂອງ ທຄຕລ ເຊິ່ງ​ໄດ້​ເປີດ​ໃຫ້​ບໍ­ລິ­ການ​ຜະ­ລິດ​ຕະ​ພັນ​ບັດ​ສາ­ກົນ ທີ່​ຖື​ໄດ້​ວ່າ​ເປັນ​ອີກ​ທາງ​ເລືອກ​ໜຶ່ງ​ໃຫ້​ແກ່​ລູກ​ຄ້າ​ຂອງ ທຄຕລ ໄດ້​ເລືອກ​ນຳ​ໃຊ້​ຜະ­ລິດ​ຕະ​ພັນ​ບັດ​ເຂົ້າ​ໃນ​ການ​ຊຳ­ລະ​ສະ​ສາງ​ຄ່າ​ສິນ­ຄ້າ ແລະ ບໍ­ລິ­ການ​ໄດ້​ທົ່ວ​ໂລກ​ຢ່າງ​ມີ​ລະ­ດັບ ເພື່ອ​ສາ­ມາດ​ເພີ່ມ​ທາງ​ເລືອກ​ໃຫ້​ລູກ​ຄ້າ​ໄດ້​ຢ່າງ​ຫຼາກ​ຫຼາຍ ໃນ​ການ​ຊຳ­ລະ​ສະ​ສາງ​ຄ່າ​ສິນ­ຄ້າ ແລະ ບໍ­ລິ­ການ ທຄຕລ ຈຶ່ງ​ໄດ້​ເປີດ​ໃຫ້​ບໍ­ລິ­ການ​ບັດ BCEL Mastercard 2 ປະ­ເພດ​ທີ່​ມີ​ຄຸນ​ລັກ­ສະ­ນະ​ໂດດ​ເດັ່ນ​ແຕກ​ຕ່າງ​ກັນ​ດັ່ງ­ນີ້: BCEL Word Mastercard ແມ່ນ​ບັດ​ເຄຼ​ດິດ​ມາດສ໌​ເຕີ​ຄາດ ທີ່​ເໝາະ​ສົມ​ສຳ­ລັບ​ລູກ​ຄ້າ​ທີ່​ມັກ​ການ​ເດີນ­ທາງ ແລະ ການ​ໃຊ້​ຈ່າຍ​ຢ່າງ​ມີ​ລະ­ດັບ​ດ້ວຍ​ຕາ​ໜ່າງ​ການ​ບໍ­ລິ­ການ ແລະ ສິດ­ທິ​ພິ­ເສດ​ທີ່​ຄວບ​ຄຸມ ແລະ ເປັນ​ທີ່​ຍອມ­ຮັບ​ຂອງ​ຜູ້​ຖື​ບັດ​ໃນ​ທົ່ວ​ໂລກ​ຂອງ Mastercard ລູກ​ຄ້າ​ຈະ​ໄດ້​ຮັບ​ຄວາມ​ສະ­ດວກ​ສະ­ບາຍ ວ່ອງ­ໄວ ແລະ ປອດ​ໄພ​ໃນ​ການ​ນຳ​ໃຊ້​ບັດ ລູກ​ຄ້າ​ສາ­ມາດ​ນຳ​ໃຊ້​ບັດ​ເພື່ອ​ຖອນ­ເງິນ​ສົດ ຊຳ­ລະ​ຄ່າ​ສິນ­ຄ້າ-ບໍ­ລິ­ການ​ຢູ່​ຕາມ​ຮ້ານ​ຄ້າ​ທັງ​ພາຍ​ໃນ ແລະ ຕ່າງ­ປະ­ເທດ ຊຳ­ລະ​ຄ່າ​ສິນ­ຄ້າ ແລະ ບໍ­ລິ­ການ​ຜ່ານ​ເວັບ​ໄຊ​ຕ່າງໆ​ທີ່​ມີ​ສັນ­ຍະ­ລັກ​ຮັບ​ບັດ Mastercard ພ້ອມ​ທັງ​ໄດ້​ຮັບ​ປະ­ສົບ​ການ​ໃນ​ການ​ຊຳ­ລະ​ຢ່າງ​ມີ​ລະ­ດັບ ແລະ ສິດ­ທິ​ພິ­ເສດ​ທີ່​ເໜືອກ​ວ່າ BCEL Prepaid Mastercard ແມ່ນ​ບັດ​ເຄຼ​ດິດ​ມາດສ໌​ເຕີ​ຄາດ​ແບບ​ຕື່ມ​ເງິນ​ທີ່ ທຄຕລ ໄດ້​ຮ່ວມ​ມື​ກັບ​ສູນ​ບັດ​ສາ­ກົນ Mastercard ອອກ​ໃຫ້​ລູກ​ຄ້າ​ໃນ​ລາວ.

ຂ່າວທີ່ກ່ຽວຂ້ອງ