ຮ້າງກ່ອນແຕ່ງ

260 10 ມ.ສ. 2019 ຫົວຂໍ້ຂ່າວອື່ນໆ

    ມີ​ບ່າວ​ສາວ​ຫຼາຍ​ຄູ່ ຕົກ­ລົງ​ປົງ­ໃຈ​ເປັນ​ແຟນ​ຄົບ​ຫາ​ເບິ່ງ​ໃຈ​ກັນ​ກ່ອນ​ຈັກ​ໄລ­ຍະ​ໃດ​ໜຶ່ງ ແລະ ບາງ​ຄູ່​ກໍ​ມີ​ການ​ໝັ້ນ​ໝາຍ​ເປັນ​ຄູ່​ໝັ້ນ ໂດຍ​ສັນ­ຍາ​ກັນ​ໄວ້​ວ່າ​ມີ​ເງິນ​ພ້ອມ​ມື້​ໃດ​ທີ່​ຫາ​ເລີກ​ງາມ​ຍາມ​ດີ​ເຂົາ​ຊິ​ຈັດ​ງານ​ແຕ່ງ ແຕ່​ພໍ​ຄົບ​ກັນ​ໄປ​ແລ້ວ ເຖິງ​ໄລ­ຍະ​ໃດ​ໜຶ່ງ ພັດ​ມີ​ເລື່ອງ​ລະ​ຫອງ​ລະ​ແຫງ​ຜິດ​ໃຈ​ກັນ​ຂຶ້ນ ຕ້ອງ​ໄດ້​ເລີກ­ລາ​ກັນ​ບໍ່​ສາ­ມາດ​ປະ​ຄັບ​ປະ­ຄອງ​ຊີ­ວິດ​ຄູ່​ໄປ​ເຖິງ​ມື້​ແຕ່ງ­ດອງ ນີ້​ເປັນ​ທີ່​ມາ​ຂອງ​ຄຳ​ວ່າ: “ຮ້າງ​ກ່ອນ​ແຕ່ງ”.

    ກ່ອນ​ງານ​ດອງ​ຈະ​ເກີດ​ຂຶ້ນ​ຕາມ​ຮີດ­ຄອງ​ປະ­ເພ­ນີ ຈະ​ມີ​ງານ​ໜຶ່ງ​ເກີດ​ຂຶ້ນ​ກ່ອນ​ນັ້ນ​ແມ່ນ​ພິ­ທີ​ສູ່­ຂໍ​ຜູ້​ສາວ ຫຼື ພິ­ທີ​ໝັ້ນ​ໝາຍ​ກັນ​ລະ­ຫວ່າງ​ຄູ່​ບ່າວ-ສາວ. ພິ­ທີ​ດັ່ງ­ກ່າວ​ມີ​ຂຶ້ນ​ພາຍ­ຫຼັງ​ການ​ຕົກ­ລົງ​ນັດ​ໝາຍ ເລືອກ​ເອົາ​ມື້​ງາມ​ຍາມ​ດີ​ກັນ​ລະ­ຫວ່າງ​ເຖົ້າ​ແກ່​ລຸງ​ຕາ​ທັງ​ສອງ​ກ້ຳ​ສອງ​ຝ່າຍ ນອກ­ຈາກ​ນັ້ນ ຍັງ​ມີ​ຕາງ­ໜ້າ​ຈາກ​ອົງ­ການ​ປົກ­ຄອງ​ບ້ານ​ຂອງ​ຝ່າຍ​ໃດ​ໜຶ່ງ​ເຂົ້າ​ຮ່ວມ. ໃນ​ພິ­ທີ​ນັ້ນ​ຈະ​ໄດ້​ມີ​ການ​ວາງ­ເງິນ​ຄ່າ​ດອງ ຫຼື ເງິນ​ສິນ​ສອດ​ບາງ​ຄົນ​ກໍ​ວ່າ​ເງິນ​ຄ່າ​ລ້ຽງ​ດູ ຄ່າ​ນ້ຳ​ນົມ​ແລ້ວ­ແຕ່​ຈະ​ເອີ້ນ​ກັນ. ຈຳ­ນວນ​ເງິນ​ຄ່າ​ດອງ​ເຄື່ອງ​ສິນ​ສອດ​ທອງ​ໝັ້ນ​ນັ້ນ ບໍ່​ໄດ້​ກຳ­ນົດ​ແບບ​ຕາຍ​ຕົວ​ວ່າ​ຕ້ອງ​ເທົ່າ​ນັ້ນ​ເທົ່າ​ນີ້ ມັນ​ຂຶ້ນ​ຢູ່​ກັບ​ຄວາມ​ເພິ່ງ​ພໍ­ໃຈ​ຂອງ​ທັງ​ສອງ​ຝ່າຍ ກໍ​ຄື​ຝ່າຍ​ເຈົ້າ​ບ່າວ​ກັບ​ເຈົ້າ​ສາວ​ທີ່​ເຂົາ­ເຈົ້າ​ຈະ​ມອບ​ໃຫ້​ກັນ​ເອງ ແລະ ພິ­ທີ​ແຕ່ງ­ດອງ​ກໍ​ບໍ່​ສຳ­ຄັນ ຈັດ​ກໍ​ໄດ້ ບໍ່​ຈັດ​ກໍ​ໄດ້ ໃນ​ທາງ​ກົດ­ໝາຍ​ຮັບ​ຮູ້​ຄວາມ​ເປັນ​ຜົວ​ເມຍ ກໍ​ພຽງ​ແຕ່​ທັງ​ສອງ​ໄດ້​ຈົດ​ທະ­ບຽນ​ສົມ​ຣົດ​ນຳ​ກັນ​ເທົ່າ​ນັ້ນ. ກົດ­ໝາຍ​ວ່າ​ດ້ວຍ​ຄອບ­ຄົວ​ແຫ່ງ ສປປ ລາວ ໄດ້​ເວົ້າ​ເຖິງ​ກໍ­ລະ­ນີ​ນີ້​ຢູ່​ໃນ​ໝວດ​ທີ 3 ມາດ­ຕາ 11 ແລະ 12 ວ່າ: ຄູ່​ບ່າວ​ສາວ​ທີ່​ມີ​ຈຸດ­ປະ­ສົງ​ຢາກ​ແຕ່ງ­ດອງ​ນຳ​ກັນ ຕ້ອງ​ເຮັດ​ຄຳ​ຮ້ອງ​ເປັນ​ລາຍ​ລັກ​ອັກ­ສອນ ແລ້ວ​ຍືນ​ຕໍ່​ເຈົ້າ​ໜ້າ­ທີ່​ທະ­ບຽນ​ຄອບ­ຄົວ​ເມືອງ ເທດ­ສະ­ບານ ໂດຍ​ຜ່ານ​ອົງ­ການ​ປົກ­ຄອງ​ບ້ານ​ບ່ອນ​ຍິງ ຫຼື ຊາຍ​ອາ­ໄສ​ຢູ່. ສ່ວນ​ພິ­ທີ​ແຕ່ງ­ດອງ​ຕາມ​ຮີດ­ຄອງ​ປະ­ເພ­ນີ​ຈະ​ເຮັດ ຫຼື ບໍ່​ເຮັດ​ກໍ​ໄດ້ ຈະ​ເຮັດ​ພ້ອມ ຫຼື ລຸນ​ຫຼັງ​ການ​ຈົດ​ທະ­ບຽນ​ການ​ແຕ່ງ­ດອງ​ນັ້ນ​ກໍ​ໄດ້ ແຕ່​ບໍ່​ໃຫ້​ມີ​ຜົນ​ສະ­ທ້ອນ​ທາງ​ດ້ານ​ກົດ­ໝາຍ ໃນ​ກໍ­ລະ­ນີ​ທີ່​ມີ​ການ​ຈັດ​ງານ​ແຕ່ງ­ດອງ​ນັ້ນ​ກໍ​ໃຫ້​ມີ​ລັກ­ສະ­ນະ​ກະ­ທັດ​ຮັດ ເບົາ­ບາງ ເໝາະ​ສົມ ແລະ ປະ­ຢັດ​ມັດ­ທະ­ຍັດ. ຄູ່​ບ່າວ​ສາວ​ຈະ​ມີ​ຖາ­ນະ​ເປັນ​ຜົວ​ເມຍ​ກັນ ນັບ​ແຕ່​ວັນ​ຈົດ​ທະ­ບຽນ​ການ​ແຕ່ງ­ດອງ​ເປັນ­ຕົ້ນ​ໄປ.

    ແຕ່​ວ່າ​ມາດ­ຕາ 6-7-8 ຂອງ​ກົດ­ໝາຍ​ວ່າ​ດ້ວຍ​ຄອບ­ຄົວ​ແຫ່ງ ສປປ ລາວ ຍັງ​ໄດ້​ລະ­ບຸ​ຕື່ມ​ເຖິງ​ກໍ­ລະ­ນີ​ການ​ສູ່­ຂໍ... ການ​ທົດ​ແທນ​ຄ່າ​ເສຍ​ຫາຍ​ເນື່ອງ​ຈາກ​ບໍ່​ປະ­ຕິ­ບັດ​ຕາມ​ການ​ໝັ້ນ​ໝາຍ ແລະ ການ​ສູ່­ຂໍ... ຄ່າ​ດອງ​ຄ້າງ​ລວມ​ໄປ​ເຖິງ​ບ່າວ​ສາວ ຫຼື ຍິງ-ຊາຍ​ບໍ່​ທັນ​ໄດ້​ແຕ່ງ­ດອງ ແຕ່​ໄດ້​ຮ່ວມ​ປະ­ເວ­ນີ​ກັນ​ກ່ອນ​ຖ້າ​ຝ່າຍ​ຊາຍ​ບໍ່​ເອົາ​ຝ່າຍ​ຍິງ​ຈະ​ຖືກ​ປັບ​ໃໝ ແຕ່​ຖ້າ​ຝ່າຍ​ຍິງ​ບໍ່​ເອົາ​ຝ່າຍ​ຊາຍ​ຈະ​ບໍ່​ເສຍ​ເງິນ​ຄ່າ​ປັບ​ໃໝ (ຖື​ວ່າ​ຈາວ​ກັນ) ແລະ ຖ້າ​ມີ​ລູກ​ນຳ​ກັນ​ຂຶ້ນ​ຝ່າຍ​ຊາຍ​ຊູ້ ຕ້ອງ​ມີ​ພັນ­ທະ​ລ້ຽງ​ດູ​ລູກ​ທີ່​ເກີດ​ມາ​ນັ້ນ​ຈົນ​ກວ່າ​ເດັກ​ຈະ​ມີ​ອາ­ຍຸ​ຄົບ 18 ປີ ນີ້​ຄື​ຜົນ​ສະ­ທ້ອນ​ຈາກ​ການ “ຮ້າງ​ກ່ອນ​ແຕ່ງ”.

ຂ່າວທີ່ກ່ຽວຂ້ອງ