ຂ່າວຫຼ້າສຸດ

ໂດຍສານສາຍໃຕ້ ເພີ່ມຈໍານວນລົດ ກຽມຄວາມພ້ອມໄລຍະປີໃໝ່ລາວ

364 09 ມ.ສ. 2019 ຂ່າວໜ້າ​ໜຶ່ງ

    ເພື່ອ​ຮອງ​ຮັບ​ຈຳ­ນວນ​ຜູ້­ໂດຍ­ສານ ທີ່​ຈະ​ເດີນ­ທາງ​ໄປ​ສະ­ຖານ­ທີ່​ຕ່າງໆ​ໃນ​ພາກ​ກາງ-ພາກ​ໃຕ້ ທັງ​ຮັບ­ປະ­ກັນ​ບໍ່​ໃຫ້​ມີ​ຜູ້­ໂດຍ­ສານ​ອັ່ງ​ອໍ ແລະ ຕົກ​ຄ້າງ ໄລ­ຍະ​ສະ­ເຫຼີມ­ສະ­ຫຼອງ​ບຸນ­ປີ­ໃໝ່​ລາວ ພສ 2562 ນີ້ ສະ­ຖາ­ນີ​ຂົນ­ສົ່ງ​ໂດຍ­ສານ​ສາຍ​ທາງ­ໄກ ສາຍ​ໃຕ້-ສາຍ​ຕ່າງ­ປະ­ເທດ ໄດ້​ເພີ່ມ​ຈຳ­ນວນ​ລົດ​ໂດຍ­ສານ​ຈຳ­ນວນ 30 ຄັນ ຈາກ 60 ຄັນ​ມາ​ເປັນ 90 ຄັນ.

    ທ່ານ ວັນ­ເພັງ ສີ​ສຸກ ຜູ້­ອຳ­ນວຍ­ການ​ສະ­ຖາ­ນີ​ຂົນ­ສົ່ງ​ໂດຍ­ສານ​ສາຍ​ທາງ­ໄກ​ສາຍ​ໃຕ້-ສາຍ​ຕ່າງ­ປະ­ເທດ ໄດ້​ໃຫ້​ສຳ­ພາດ​ໃນ​ວັນ​ທີ 8 ເມ­ສາ 2019 ນີ້​ວ່າ: ປັດ­ຈຸ­ບັນ ສະ­ຖານ​ນີ​ຂົນ­ສົ່ງ​ໂດຍ­ສານ​ສາຍ​ທາງ­ໄກ​ສາຍ​ໃຕ້-ສາຍ​ຕ່າງ­ປະ­ເທດ ມີ​ຄວາມ​ກຽມ­ພ້ອມ​ໃຫ້​ບໍ­ລິ­ການ​ແກ່​ພໍ່​ແມ່​ປະ­ຊາ­ຊົນ ພະ­ນັກ­ງານ ທະ­ຫານ ຕຳ­ຫຼວດ ທີ່​ຈະ​ເດີນ­ທາງ​ກັບ​ບ້ານ ໃນ​ໄລ­ຍະ​ສະ­ເຫຼີມ­ສະ­ຫຼອງ​ບຸນ­ປີ­ໃໝ່​ລາວ ພສ 2562 ດ້ວຍ​ການ​ເພີ່ມ​ລົດ​ໂດຍ­ສານ ໃນ​ແຕ່​ລະ​ມື້​ປະ­ມານ 30 ຄັນ ຈາກ​ປົກ­ກະ­ຕິ 60 ຄັນ ເປັນ 90 ຄັນ ເພື່ອ​ຮັບ­ປະ­ກັນ​ບໍ່​ໃຫ້​ມີ​ຜູ້­ໂດຍ­ສານ​ຕົກ​ຄ້າງ ສ່ວນ​ລາ­ຄາ​ແມ່ນ​ປົກ­ກະ­ຕິ ແລະ ຈະ​ບໍ່​ຂຶ້ນ​ລາ­ຄາ​ເດັດ­ຂາດ ສຳ­ລັບ​ບັນ­ຫາ​ຫາງ​ສຽງ​ກ່ຽວ​ກັບ​ຕັ່ງ​ເສີມ​ນັ້ນ ສະ­ເພາະ​ລົດ​ທີ່​ອອກ​ຈາກ​ຄິວ ແມ່ນ​ຮັບ­ປະ­ກັນ​ວ່າ​ບໍ່​ມີ​ຕັ່ງ​ເສີມ ຊື້​ປີ້​ນຳ​ສະ­ຖາ­ນີ​ແມ່ນ​ຈະ​ບໍ່​ໄດ້​ນັ່ງ​ຕັ່ງ​ເສີມ ນອກ­ຈາກ​ວ່າ​ຜູ້­ໂດຍ­ສານ​ຈະ​ຂຶ້ນ​ລົດ​ຢູ່​ຕາມ​ສາຍ​ທາງ ເມື່ອ​ບໍ່​ມີ​ບ່ອນ​ນັ່ງ​ຈຳ­ເປັນ​ຕ້ອງ​ໄດ້​ໃຊ້​ຕັ່ງ​ເສີມ

    ໂອ­ກາດ​ນີ້ ທ່ານ ວັນ­ເພັງ ສີ​ສຸກ ຍັງ​ໄດ້​ຮຽກ­ຮ້ອງ​ມາ​ຍັງ​ຜູ້​ໂດຍ​ສາຍ​ທຸກໆ​ທ່ານ ທີ່​ຈະ​ເດີນ­ທາງ​ນຳ​ສະ­ຖາ­ນີ​ຂົນ­ສົ່ງ​ໂດຍ­ສານ​ສາຍ​ທາງ­ໄກ​ສາຍ​ໃຕ້-ສາຍ​ຕ່າງ­ປະ­ເທດ​ພວກ​ເຮົາ ແມ່ນ​ຂໍ​ໃຫ້​ມາ​ຂຶ້ນ​ລົງ​ຢູ່​ສະ­ຖາ­ນີ​ເລີຍ ເພື່ອ​ຮັບ­ປະ­ກັນ​ບໍ່​ໃຫ້​ມີ​ຫາງ​ສຽງ​ຕ່າງໆ ເປັນ­ຕົ້ນ ໄດ້​ນັ່ງ​ຕັ່ງ​ເສີມ ເກັບ​ຄ່າ​ໂດຍ­ສານ​ແພງ ເຄື່ອງ​ຂອງ​ເສຍ​ຫາຍ​ບໍ່​ມີ​ຄົນ​ຮັບ­ຜິດ­ຊອບ ແລະ ອື່ນໆ ພ້ອມ​ທັງ​ຮຽກ­ຮ້ອງ​ໃຫ້​ຜູ້­ໂດຍ­ສານ ຕິດ­ຕາມ​ລົດ​ໂດຍ­ສານ​ທີ່​ຈະ​ເດີນ­ທາງ​ໄປ​ຕາມ​ສາຍ​ທາງ​ຕ່າງໆ ເນື່ອງ​ຈາ​ກວ່າ​ໄລ­ຍະ​ບຸນ­ປີ­ໃໝ່ ຄາດ​ວ່າ​ຈະ​ມີ​ຜູ້­ໂດຍ­ສານ​ມາ​ໃຊ້​ບໍ­ລິ­ການ​ຫຼາຍ ສະ­ນັ້ນ ລົດ​ໂດຍ­ສານ​ບາງ​ຖ້ຽວ ຈະ​ບໍ່​ອອກ​ຕາມ​ໂມງ​ປົກ­ກະ­ຕິ ລົດ​ເຕັມ​ຄັນ​ໃດ​ແມ່ນ​ຈະ​ອອກ​ໄປ​ເລີຍ ເຊິ່ງ​ຈະ​ເລີ່ມ​ເປີດ​ສະ­ຖາ­ນີ​ໂດຍ­ສານ​ແຕ່ 04:00 ໂມງ ແລະ ປິດ 22:00 ໂມງ.

ຂ່າວທີ່ກ່ຽວຂ້ອງ