ກະຊວງການຕ່າງປະເທດ ແລະ ບັນດາທູຕານຸທູດ ຮ່ວມກັນສະເຫຼີມສະຫຼອງປີໃໝ່ລາວ ພສ 2562

308 09 ມ.ສ. 2019 ຂ່າວໜ້າ​ໜຶ່ງ
ກະຊວງການຕ່າງປະເທດ ແລະ ບັນດາທູຕານຸທູດ ຮ່ວມກັນສະເຫຼີມສະຫຼອງປີໃໝ່ລາວ ພສ 2562

    ວັນ​ທີ 6 ເມ­ສາ 2019 ກະ­ຊວງ​ການ​ຕ່າງ­ປະ­ເທດ ຮ່ວມ​ກັບ​ບັນ­ດາ​ທູ­ຕາ­ນຸ­ທູດ ແລະ ອົງ​ການ­ຈັດ­ຕັ້ງ​ສາ­ກົນ ປະ­ຈຳ ສປປ ລາວ ໄດ້​ຈັດ​ພິ­ທີ​ບາ­ສີ­ສູ່­ຂວັນ​ສະ­ເຫຼີມ­ສະ­ຫຼອງ​ບຸນ­ປີ­ໃໝ່​ລາວ ທີ່ ສວນ​ພຶກ­ສາ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ເພື່ອ​ເປັນ​ການ​ສົ່ງ​ທ້າຍ​ປີ​ເກົ່າ ພສ 2561 ແລະ ຕ້ອນ­ຮັບ​ປີ​ໃໝ່ ພສ 2562 ໃຫ້​ກຽດ​ເຂົ້າ​ຮ່ວມ​ໂດຍ​ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ພ້ອມ​ດ້ວຍ​ພັນ​ລະ​ຍາ ມີ​ຄະ­ນະ​ພັກ-ຄະ­ນະ​ນຳ​ກະ­ຊວງ ພະ­ນັກ­ງານ​ອາ­ວຸ­ໂສ​ບຳ­ນານ ພາກ­ສ່ວນ​ກ່ຽວ­ຂ້ອງ​ບັນ­ດາ​ທູ­ຕາ­ນຸ­ທູດ ກົງ​ສູນ-ກົງ​ສູນ​ກິດ​ຕິ​ມະ​ສັກ ຜູ້­ຕາງ­ໜ້າ​ອົງ​ການ­ຈັດ­ຕັ້ງ​ສາ­ກົນ ປະ­ຈຳ ສປປ ລາວ ແລະ ແຂກ​ຖືກ​ເຊີນ​ເຂົ້າ​ຮ່ວມ.

    ໃນ​ໂອ­ກາດ​ສະ­ເຫຼີມ­ສະ­ຫຼອງ​ສົ່ງ​ທ້າຍ​ປີ​ເກົ່າ ແລະ ຕ້ອນ­ຮັບ​ປີ​ໃໝ່​ໃນ​ຄັ້ງ​ນີ້ ທ່ານ​ລັດ­ຖະ­ມົນ­ຕີ ສະ­ເຫຼີມ​ໄຊ ກົມ​ມະ​ສິດ ໄດ້​ຕາງ­ໜ້າ​ໃຫ້​ຄະ­ນະ​ພັກ-ຄະ­ນະ​ນຳ​ກະ­ຊວງ​ການ​ຕ່າງ­ປະ­ເທດ ໄດ້​ສະ­ແດງ​ຄວາມ​ຍິນ​ດີ​ຕ້ອນ­ຮັບ ແລະ ອວຍ­ພອນ​ປີ​ໃໝ່​ລາວ ຕໍ່​ບັນ­ດາ​ພະ­ນັກ­ງານ ທູ­ຕາ­ນຸ­ທູດ ແລະ ແຂກ​ທີ່​ເຂົ້າ​ຮ່ວມ ດ້ວຍ​ຄວາມ​ອົບ​ອຸ່ນ ແລະ ສະ­ໜິດ­ສະ­ໜົມ ພ້ອມ​ນີ້ ທ່ານ​ລັດ­ຖະ­ມົນ­ຕີ ຍັງ​ໄດ້​ຍົກ​ໃຫ້​ເຫັນ​ເຖິງ​ຄວາມ​ໝາຍ​ຄວາມ​ສຳ­ຄັນ​ຂອງ​ບຸນ­ປີ­ໃໝ່​ລາວ ຊຶ່ງ​ແມ່ນ​ບຸນ​ປະ­ເພ­ນີ​ທີ່​ສຳ­ຄັນ​ຂອງ​ລາວ ແລະ ເປັນ​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ ທີ່​ໄດ້​ສືບ​ສານ​ກັນ​ມາ​ຕັ້ງ­ແຕ່​ບູ­ຮານ​ນະ​ການ ບັນ­ດາ​ສຳ­ນັກ­ງານ​ອົງ­ການ​ຕ່າງໆ​ທັງ​ພາກ​ລັດ ແລະ ເອ­ກະ​ຊົນ ຫົວ­ໜ່ວຍ​ທຸ­ລະ​ກິດ ຕະ­ຫຼອດ​ຮອດ​ພໍ່​ແມ່​ປະ­ຊາ­ຊົນ ກໍ​ໄດ້​ຈັດ​ພິ­ທີ​ບາ­ສີ­ສູ່­ຂວັນ ແລະ ຫົດ­ສົງ​ນ້ຳ​ໃຫ້­ການ​ນຳ​ພັກ-ລັດ ຜູ້​ອາ­ວຸ­ໂສ ຜູ້​ເຖົ້າ​ຜູ້​ແກ່ ແລະ ຜູ້​ເປັນ​ພໍ່​ເປັນ​ແມ່ ກໍ​ຄື ຜູ້​ທີ່​ມີ​ບຸນ­ຄຸນ ເພື່ອ​ເປັນ​ການ​ປັດ​ເປົ່າ​ສິ່ງ​ທີ່​ບໍ່​ດີ​ບໍ່​ງາມ​ໃຫ້​ໄປ​ຕາມ​ປີ​ເກົ່າ ແລະ ອວຍ­ພອນ​ປີ​ໃໝ່​ໃຫ້​ມີ​ແຕ່​ໂຊກ​ແຕ່​ໄຊ.

    ໃນ​ໂອ­ກາດ​ສະ­ເຫຼີມ­ສະ­ຫຼອງ​ປີ​ໃໝ່​ລາວ​ໃນ​ຄັ້ງ​ນີ້ ຍັງ​ເປັນ​ໂອ­ກາດ​ທີ່​ສຳ­ຄັນ​ໃນ​ການ​ເຜີຍ­ແຜ່​ວັດ­ທະ­ນະ­ທຳ ແລະ ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ລາວ ໃຫ້​ແກ່​ບັນ­ດາ​ທູ­ຕາ­ນຸ­ທູດ ແລະ ອົງ​ການ­ຈັດ­ຕັ້ງ​ສາ­ກົນ​ປະ­ຈຳ ສປປ ລາວ ກໍ​ຄື​ຊາວ​ຕ່າງ​ຊາດ​ໃຫ້​ໄດ້​ຮັບ​ຮູ້ ໄດ້​ສຳ­ຜັດ ແລະ ເຂົ້າ­ໃຈ​ຢ່າງ​ເລິກ­ເຊິ່ງ ກ່ຽວ​ກັບ​ບຸນ​ປະ­ເພ­ນີ​ປີ​ໃໝ່​ຂອງ​ລາວ​ເຮົາ ພ້ອມ​ດຽວ​ກັນ​ນີ້ ຍັງ​ເປັນ​ການ​ສົ່ງ­ເສີມ​ຄວາມ​ເຂົ້າ​ອົກ​ເຂົ້າ­ໃຈ ແລະ ຮັດ​ແໜ້ນ​ການ​ພົວ­ພັນ​ຮ່ວມ​ມື​ອັນ​ດີ­ງາມ ລະ­ຫວ່າງ​ພະ­ນັກ­ງານ​ກະ­ຊວງ​ການ​ຕ່າງ­ປະ­ເທດ ກໍ​ຄື ນັກ​ການ​ທູດ​ລາວ​ກັບ​ບັນ­ດາ​ທູ­ຕາ­ນຸ­ທູດ ແລະ ອົງ​ການ­ຈັດ­ຕັ້ງ​ສາ­ກົນ ປະ­ຈຳ ສປປ ລາວ ກໍ​ຄື ບັນ­ດາ​ປະ­ເທດ​ເພື່ອນ​ມິດ​ໃນ​ພາກ​ພື້ນ ແລະ ສາ­ກົນ.

ຂ່າວທີ່ກ່ຽວຂ້ອງ