VASE ສຶບຕໍ່ວາງລະບົບທໍ່ແຈກຢາຍນ້ຳປະປາ ແລະ ພັດທະນາແຫຼ່ງທ່ອງທ່ຽວ

365 09 ມ.ສ. 2019 ຂ່າວໜ້າ​ໜຶ່ງ
VASE ສຶບຕໍ່ວາງລະບົບທໍ່ແຈກຢາຍນ້ຳປະປາ ແລະ ພັດທະນາແຫຼ່ງທ່ອງທ່ຽວ

    ພິ­ທີ​ລົງ​ນາມ​ສັນ­ຍາ​ດັດ­ແກ້ ແລະ ເພີ່ມ​ເຕີມ​ບາງ​ເນື້ອ​ໃນ​ຂອງ​ສັນ­ຍາ ວ່າ​ດ້ວຍ​ການ​ລົງ­ທຶນ​ກໍ່­ສ້າງ​ດຳ​ເດີນ​ງານ ແລະ ມອບ​ໂອນ (BOT) ໂຮງ­ງານ​ຜະ­ລິດ​ນ້ຳ​ປະ­ປາ​ທ່າ​ເດື່ອ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ (ນວ) ໄລ­ຍະ I ແລະ ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ ເພື່ອ​ເກັບ​ກຳ​ຂໍ້​ມູນ​ສຶກ​ສາ ແລະ ສຳ​ຫຼວດ​ຄວາມ​ເປັນ​ໄປ​ໄດ້​ໃນ​ການ​ພັດ­ທະ­ນາ ເປັນ​ແຫຼ່ງ​ທ່ອງ​ທ່ຽວ​ອະ­ນຸ​ຮັກ​ທຳ​ມະ​ຊາດ​ແບບ​ຍືນ​ຍົງ ຢູ່​ເຂດ​ບ້ານ​ປາກ​ກວາງ ເຂດ​ໜອງ​ຫານ ບ້ານ​ນາ­ທາມ ແລະ ບ້ານ​ນາ​ຊອນ ເມືອງ​ປາກ​ງື່ມ ຈັດ​ຂຶ້ນ​ວັນ​ທີ 8 ເມ­ສາ 2019 ຢູ່​ໂຮງ­ແຮມ​ແລນ​ມາກ ນະ­ຄອນ­ຫຼວງ​ວຽງ​ຈັນ ລະ­ຫວ່າງ​ທ່ານ ພູ​ໂຂງ ບັນ­ນະ​ວົງ ຫົວ­ໜ້າ​ພະ​ແນກ​ແຜນ­ການ ແລະ ການ​ລົງ­ທຶນ ນວ ແລະ ທ່ານ ແສງ​ລາ­ຕີ ສະ­ຫວັນ​ຄຳ ຜູ້­ອຳ­ນວຍ­ການ​ບໍ­ລິ­ສັດ ວຽງ​ຈັນ​ອໍ​ໂຕ​ເມ​ຊັນ​ແອນ​ໂຊ​ລູ​ຊັນ​ເອັນ​ຈີ​ເນຍ​ຣິງ ຈຳ­ກັດ (VASE) ມີ​ທ່ານ ຄຳ​ເຜີຍ ວົງ­ສາ​ຄຳ​ຜຸຍ ຜູ້­ອຳ­ນວຍ­ການ​ລັດ​ວິ​ສາ​ຫະ​ກິດ​ນ້ຳ​ປະ­ປາ ນວ ທ່ານ ຄຳ​ປະ­ດິດ ເຂັມ​ມາ­ນິດ ຫົວ­ໜ້າ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ແສງ​ລາ­ຕີ ສະ­ຫວັນ​ຄຳ ກ່າວ​ວ່າ: ໂຮງ­ງານ​ຜະ­ລິດ​ນ້ຳ​ປະ­ປາ​ທ່າ​ເດື່ອ ໄລ­ຍະ I ມີ​ກຳ­ລັງ​ຜະ­ລິດ 20.000 ແມັດ​ກ້ອນ​ຕໍ່​ວັນ ໄດ້​ຮັບ​ອະ­ນຸ­ຍາດ​ກໍ່­ສ້າງ​ປີ 2015 ໄດ້​ສຳ­ເລັດ​ການ​ກໍ່­ສ້າງ ແລະ ໄຂ​ນຳ​ໃຊ້​ປີ 2017 ແຕ່​ເນື່ອງ​ຈາກ​ລະ­ບົບ​ທໍ່​ແຈກ​ນ້ຳ​ປະ­ປາ​ທີ່­ຢູ່​ເຂດ​ເມືອງ​ຫາດ​ຊາຍ​ຟອງ ໃນ​ເມື່ອ​ກ່ອນ​ມີ​ຂະ­ໜາດ​ນ້ອຍ ການ​ໃຊ້​ງານ​ບໍ່​ສະ­ດວກ ສິ່ງ​ສຳ­ຄັນ​ການ​ວາງ​ທໍ່​ແຈກ​ບໍ່​ທົ່ວ​ເຖິງ​ຫຼາຍ​ບ້ານ ບໍ­ລິ­ສັດ​ຈຶ່ງ​ສະ­ເໜີ​ລັດ​ວິ​ສາ​ຫະ​ກິດ​ນ້ຳ​ປະ­ປາ ນວ ໃນ​ນາມ​ຄູ່​ສັນ­ຍາ ເພື່ອ​ລົງ­ທຶນ​ສືບ­ຕໍ່​ວາງ​ລະ­ບົບ​ທໍ່​ແຈກ​ຢາຍ​ນ້ຳ​ປະ­ປາ ເຂດ​ບໍ­ລິ­ການ​ເມືອງ​ຫາດ​ຊາຍ​ຟອງ ມີ​ຄວາມ​ຍາວ 100 ກິ­ໂລ­ແມັດ ກວມ​ເອົາ 6 ເຂດ​ຄື: ບ້ານ​ທ່າ​ມ່ວງ-ບ້ານ​ຖິ່ນ​ເພຍ ບ້ານ​ທ່າ​ມ່ວງ-ບ້ານ​ນ້ອຍ​ຊຽງ​ດາ ບ້ານ​ທ່າ​ນາ​ແລ້ງ-ບ້ານ​ນາ​ໄຫ ບ້ານ​ນາ​ໄຫ-ບ້ານ​ທ່າ​ແຂກ ບ້ານ​ຊຽງ​ດາ ແລະ ບ້ານ​ຖິ່ນ​ແຖ່ນ ມີ​ການ​ຕິດ​ຕັ້ງ​ໝໍ້​ແທກ​ນ້ຳ​ເບື້ອງ​ຕົ້ນ​ປະ­ມານ 7.000 ໜ່ວຍ ມູນ​ຄ່າ​ການ​ລົງ­ທຶນ 12 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 100 ຕື້​ກວ່າ​ກີບ.

    ສຳ­ລັບ​ການ​ພັດ­ທະ­ນາ​ແຫຼ່ງ​ທ່ອງ​ທ່ຽວ​ເຂດ​ບ້ານ​ປາກ​ກວາງ ເຂດ​ໜອງ​ຫານ ບ້ານ​ນາ­ທາມ ແລະ ບ້ານ​ນາ​ຊອນ ເພື່ອ​ແນ­ໃສ່​ສົ່ງ­ເສີມ​ວຽກ​ງານ​ການ­ທ່ອງ­ທ່ຽວ​ໃນ ນວ ໃຫ້​ນັບ​ມື້​ຫຼາຍ​ຂຶ້ນ ທັງ​ເປັນ​ການ​ຕອບ​ສະ­ໜອງ​ຄວາມ​ຕ້ອງ­ການ​ຂັ້ນ​ພື້ນ­ຖານ ໃນ​ການ​ເພີ່ມ​ຂຶ້ນ​ຂອງ​ນັກ​ທ່ອງ​ທ່ຽວ​ແຕ່​ລະ​ປີ ແລະ ການ​ຂະ­ຫຍາຍ­ຕົວ​ດ້ານ​ເສດ­ຖະ­ກິດ-ສັງ­ຄົມ​ຂອງ ນວ ເວົ້າ​ສະ­ເພາະ ເມືອງ​ປາກ​ງື່ມ ໃຫ້​ມີ​ແຫຼ່ງ​ທ່ອງ​ທ່ຽວ​ໃນ​ຮູບ​ແບບ​ອະ­ນຸ​ຮັກ​ທຳ​ມະ​ຊາດ​ອີກ​ແຫ່ງ​ໜຶ່ງ​ທີ່​ສວຍ​ງາມ ເພື່ອ​ດຶງ​ດູດ​ນັກ​ທ່ອງ​ທ່ຽວ​ໃຫ້​ນັບ​ມື້​ນັບ​ຫຼາຍ​ຂຶ້ນ ບໍ­ລິ­ສັດ VASE ຈຶ່ງ​ໄດ້​ຍື່ນ​ເຈດ​ຈຳ­ນົງ​ເຖິງ​ອຳ­ນາດ​ການ​ປົກ­ຄອງ ນວ ເພື່ອ​ສຶກ​ສາ​ສຳ​ຫຼວດ​ເຂດ​ດັ່ງ­ກ່າວ ສ້າງ​ເປັນ​ແຫຼ່ງ​ທ່ອງ​ທ່ຽວ​ແບບ​ອະ­ນຸ​ຮັກ​ທຳ​ມະ​ຊາດ ແລະ ໃຫ້​ປະ­ຊາ­ຊົນ​ມີ​ສ່ວນ​ຮ່ວມ​ເຊັ່ນ: ກິດ­ຈະ­ກຳ​ກະ­ສິ­ກຳ​ກິດ­ຈະ­ກຳ​ທ່ອງ​ທ່ຽວ ສວນ​ສາ­ທາ­ລະ­ນະ​ການ​ແຂ່ງ​ລົດ ຊ່ວງ​ເຮືອ ແລະ ເຮືອນ​ພັກ ໃນ​ຮູບ​ແບບ​ອະ­ນຸ​ຮັກ​ທຳ​ມະ​ຊາດ ແລະ ອື່ນໆ.

ຂ່າວທີ່ກ່ຽວຂ້ອງ