ເບິ່ງບ້ານເຂົາເອົາບົດຮຽນ 09/04/2019

309 09 ມ.ສ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້​ມີ 2 ເລື່ອງ​ທີ່​ໜ້າ​ສົນ­ໃຈ ຄື: ເລື່ອງ​ທາງ​ການ​ຈີນ ປາບ​ປາມ​ພວກ​ປອມ​ເປັນ​ນັກ​ໜັງ­ສື­ພິມ ແລະ ເລື່ອງ​ບົດ­ຮຽນ​ການ​ເຊຍ​ບານ­ເຕະ ໃນ​ກີ­ລາ​ບານ­ເຕະ​ໂລກ ຢູ່​ຣັດ​ເຊຍ ເມື່ອ​ປີ 2018.

    ທີ່ ສປ ຈີນ: ຂ່າວ​ໜ້າ​ສົນ­ໃຈ​ໜຶ່ງ​ກ່ຽວ​ກັບ​ອາ­ຊີບ​ຄົນ​ສື່ ຫຼື ນັກ​ຂ່າວ-ນັກ​ໜັງ­ສື­ພິມ​ຢູ່ ສປ ຈີນ ເມື່ອ 2 ປີ​ກ່ອນ​ໜ້າ​ນີ້ ກໍ​ຄື ທາງ​ການ​ຂອງ​ປະ­ເທດ​ນີ້ ໄດ້​ເຜີຍ­ແຜ່​ກ່ຽວ​ກັບ​ຄະ­ດີ​ນັກ​ໜັງ­ສື­ພິມ​ປອມ (ວຽງ​ຈັນ​ທາມ 22 ພຶດ­ສະ­ພາ 2017) ເລື່ອງ​ມີ​ຢູ່​ວ່າ ຫ້ອງ­ການ​ຄະ­ນະ​ກຳ­ມະ­ການ​ລະ­ດັບ​ຊາດ​ຈີນ ຕ້ານ​ການ​ເຜີຍ­ແຜ່​ສື່​ທີ່​ມີ​ເນື້ອ​ໃນ​ລາ­ມົກ ແລະ ຜິດ​ກົດ­ໝາຍ ໄດ້​ເຜີຍ­ແຜ່​ໃຫ້​ຮູ້​ວ່າ ອົງ­ການ​ຮັບ­ຜິດ­ຊອບ​ຈັດ​ຕັ້ງ​ການ​ປະ­ຕິ­ບັດ​ກົດ­ໝາຍ ໄດ້​ດຳ­ເນີນ​ບັ້ນ​ປາບ​ປາມ​ພິ­ເສດ​ການ​ກະ­ທຳ​ທີ່​ເປັນ​ການ​ລະ­ເມີດ​ກົດ­ໝາຍ ໂດຍ​ບຸກ­ຄົນ​ທີ່​ປອມ​ເປັນ​ນັກ​ໜັງ­ສື­ພິມ ນັກ​ໜັງ­ສື­ພິມ​ເຫຼົ່າ​ນີ້ ເຄື່ອນ​ໄຫວ​ນາບ​ຂູ່​ຕົວະ​ຕົ້ມ​ຫຼອກ​ລວງ​ສັງ­ຄົມ ເພື່ອ​ຊອກ​ຜົນ​ປະ­ໂຫຍດ​ໃສ່​ຕົນ ເຊັ່ນ: ພວກ​ເຂົາ​ໄດ້​ເຂົ້າ​ໄປ​ເຈາະ​ໄງ້​ຊອກ​ຫາ​ຂໍ້​ບົກ​ຜ່ອງ​ຂອງ​ຫົວ­ໜ່ວຍ​ທຸ­ລະ​ກິດ ກໍ​ຄື ຜູ້​ປະ­ກອບ​ການ​ແລ້ວ​ຂູ່​ວ່າ ຈະ​ອອກ​ຂ່າວ​ໃນ​ທາງ​ລົບ ຖ້າ​ບໍ່​ຈ່າຍ​ເງິນ​ໃຫ້​ພວກ​ເຂົາ­ເຈົ້າ ຕົວ­ຢ່າງ ໃນ​ແຂວງ​ເຮີ​ເປ ເຈົ້າ​ໜ້າ­ທີ່​ຕຳ­ຫຼວດ​ຈີນ​ໄດ້​ຈັບ​ນັກ​ໜັງ­ສື­ພິມ​ປອມ​ຈຳ­ນວນ 19 ຄົນ ທີ່​ເຄື່ອນ​ໄຫວ​ຂົ່ມ­ຂູ່​ເອົາ​ເງິນ​ນຳ​ຫົວ­ໜ່ວຍ​ທຸ­ລະ​ກິດ ແລະ ນັກ­ທຸ­ລະ­ກິດ ນອກ­ຈາກ​ຮູບ​ການ​ຂົ່ມ­ຂູ່​ດັ່ງ­ກ່າວ​ແລ້ວ ຜູ້​ປອມ​ຕົວ​ເປັນ​ນັກ​ໜັງ­ສື­ພິມ ຍັງ​ຈັດ​ພິມ​ບັດ​ນັກ​ຂ່າວ​ປອມ​ໃຫ້​ຜູ້​ທີ່​ຕ້ອງ­ການ​ອີກ​ດ້ວຍ.

    ທີ່ ສະ­ຫະ­ພັນ​ຣັດ​ເຊຍ: ໃນ​ປີ 2018 ຣັດ​ເຊຍ​ໄດ້​ເປັນ​ເຈົ້າ­ພາບ​ຈັດ​ມະ​ຫະ​ກຳ​ກີ­ລາ​ເຕະ­ບານ­ໂລກ ດ້ວຍ​ຜົນ­ສຳ­ເລັດ​ຢ່າງ​ຈົບ­ງາມ ແລະ ໄດ້​ປະ​ບົດ­ຮຽນ​ອັນ​ດີ​ໄວ້ ກ່ຽວ​ກັບ​ມາດ​ຕະ­ການ​ຄຸ້ມ​ຄອງ​ການ​ປະ­ພຶດ​ຂອງ​ບັນ­ດາ​ກອງ​ເຊຍ ຈາກ​ນາໆ​ປະ­ເທດ​ໃຫ້​ຢູ່​ໃນ​ຂອບ​ຂອງ​ກົດ­ໝາຍ ແລະ ຄວາມ​ເປັນ​ລະ­ບຽບ​ຮຽບ​ຮ້ອຍ ການ​ຄຸ້ມ​ຄອງ​ກອງ​ເຊຍ ຫຼື ຂາ​ເຊຍ​ທິມ​ກີ­ລາ​ບານ­ເຕະ​ນັ້ນ ບໍ່​ເປັນ​ເລື່ອງ​ງ່າຍ ພິ­ສູດ​ໄດ້​ຈາກ​ຂ່າວ​ກ່ຽວ​ກັບ​ຂາ​ເຊຍ​ບານ­ເຕະ​ຕ່ອຍ​ຕີ​ກັນ​ເອງ ຫຼື ທຳ­ຮ້າຍ​ເຈົ້າ​ໜ້າ­ທີ່​ຮັກ­ສາ​ຄວາມ​ສະ­ຫງົບ ແຕ່​ສຳ­ລັບ​ໃນ​ມະ​ຫະ​ກຳ​ກີ­ລາ​ບານ­ເຕະ​ໂລກ​ຢູ່​ຣັດ​ເຊຍ ໃນ​ປີ​ກາຍ​ນີ້ ການ​ຄຸ້ມ​ຄອງ​ກອງ​ເຊຍ​ແມ່ນ​ເຮັດ​ໄດ້​ດີ ບໍ່​ມີ​ກໍ­ລະ­ນີ​ແຕກ​ປອກ​ອອກ​ທາງ ບົດ­ຮຽນ​ຂອງ​ທາງ​ການ​ຣັດ​ເຊຍ ເພື່ອ​ຄວບ​ຄຸມ​ຂາ​ເຊຍ​ບານ­ເຕະ​ລະ­ດັບ​ໂລກ​ນັ້ນ ມີ​ລາຍ​ລະ­ອຽດ​ໃນ​ຂໍ້​ຫ້າມ​ດັ່ງ­ນີ້: ຫ້າມ​ນຳ​ໃຊ້​ແກ ວູ​ວູ​ເຊ​ລາ ທີ່​ມີ​ສຽງ​ດັງ​ແຫ້ມ​ຫູ​ທີ່​ຈະ​ລົບ​ກວນ​ສະ­ມາ­ທິ​ຂອງ​ນັກ­ກີ­ລາ ກໍ​ຄື ຜູ້​ຊົມ ຫ້າມ​ຖື​ອາ­ວຸດ​ທຸກໆ​ປະ­ເພດ ດອກ​ໄມ້​ໄຟ ນ້ຳ​ສີ ເຫຼົ້າ ເຄື່ອງ​ດື່ມ ບັນ­ຈຸ​ໃນ​ຂວດ​ແກ້ວ ຂວດ​ຢາງ ທີ່​ມີ​ບໍ​ລິ​ມາດ​ຫຼາຍ​ກວ່າ​ເຄິ່ງ​ລິດ​ເຂົ້າ​ໄປ​ໃນ​ສະ­ໜາມ ນອກ​ນັ້ນ ກໍ​ຍັງ​ຫ້າມ​ນຳ​ເອ­ກະ­ສານ​ທີ່​ມີ​ເນື້ອ​ໃນ​ຮຸນ​ແຮງ ເຊັ່ນ: ການ​ກໍ່​ການ​ຮ້າຍ ຫຼື ສັນ­ຍະ­ລັກ​ລັດ­ທິ​ຟາດ​ຊິດ ອຸ­ປະ­ກອນ ເລ​ເຊີ ໄຟ​ສາຍ ແລະ ອຸ­ປະ­ກອນ​ທີ່​ບໍ່​ຮຽບ​ຮ້ອຍ ຫ້າມ​ເຫຼົ່າ​ກອງ​ເຊຍ​ເຂົ້າ​ໄປ​ໃນ​ສະ­ໜາມ​ໃນ​ອາ­ການ​ມຶນ­ເມົາ ຫ້າມ​ນຸ່ງ​ຖື​ທີ່​ມີ​ລັກ­ສະ­ນະ​ຍົ້ວ​ຍວນ​ກວນ​ຕັນ­ຫາ ຫ້າມ​ປິດ​ບັງ­ໃບ​ໜ້າ ແລະ ເດັດ­ຂາດ​ບໍ່​ໃຫ້​ນຳ​ສັດ­ລ້ຽງ​ເຂົ້າ​ໄປ​ສະ­ໜາມ​ນຳ ໜ່ວຍ​ກອງ​ເຊຍ​ໃດ​ລະ­ເມີດ​ຂໍ້​ຫ້າມ​ຈະ​ຖືກ​ປັບ​ໃໝ​ເປັນ​ເງິນ​ລະ­ຫວ່າງ 50-160 ໂດ​ລາ​ສະ­ຫະ­ລັດ ແລະ ອາດ​ຖືກ​ຫ້າມ​ເຂົ້າ​ຊົມ​ການ​ແຂ່ງ­ຂັນ​ນັດ​ຕໍ່​ໄປ ສ່ວນ​ຂາ​ເຊຍ ຫຼື ກອງ​ເຊຍ​ຕ່າງ­ປະ­ເທດ​ທີ່​ເຮັດ​ຜິດ​ຊ້ຳ​ນັ້ນ ແມ່ນ​ອາດ​ຖືກ​ຂັບ​ໄລ່​ອອກ​ນອກ​ປະ­ເທດ ຢູ່​ບ້ານ​ເຮົາ​ຈຸດ​ສ່ຽງ​ທີ່​ອາດ​ຈະ​ເກີດ​ຂຶ້ນ​ຈາກ​ນ້ຳ­ມື​ຂອງ​ກອງ​ເຊຍ​ກີ­ລາ​ປະ­ເພດ​ຕ່າງໆ ກໍ​ແມ່ນ​ເລື່ອງ​ນ້ຳ​ເມົາ ແລະ ເນື້ອ​ໃນ​ການ​ເຊຍ​ທີ່​ອາດ​ແຕະ­ຕ້ອງ ຫຼື ກວນ​ປະ­ສາດ​ຂອງ​ອີກ​ຝ່າຍ​ໜຶ່ງ ເລື່ອງ​ນີ້​ຕ້ອງ​ເອົາ­ໃຈ­ໃສ່​ບໍ່​ໃຫ້​ເຫດ​ຮ້າຍ​ເກີດ​ຂຶ້ນ.

ຂ່າວທີ່ກ່ຽວຂ້ອງ