ຂ່າວຫຼ້າສຸດ

ພາບຖ່າຍດາວທຽມ ຊ່ວຍລະບຸພື້ນທີ່ທຸກຍາກທີ່ສຸດຂອງໂລກ

261 09 ມ.ສ. 2019 ຫົວຂໍ້ຂ່າວອື່ນໆ

    ໜຶ່ງ​ໃນ​ເປົ້າ​ໝາຍ 17 ຂໍ້​ຕາມ​ເປົ້າ​ໝາຍ​ຂອງ​ການ​ພັດ­ທະ­ນາ​ຢ່າງ​ໝັ້ນ­ຄົງ​ຂອງ​ອົງ­ການ​ສະ­ຫະ​ປະ­ຊາ​ຊາດ ທີ່​ປະ­ກາດ​ໃຊ້​ໃນ​ປີ 2015 (Sustainable Development Goals) ມຸ່ງ​ທີ່​ຈະ​ກຳ­ຈັດ​ຄວາມ­ທຸກ​ຍາກ​ຫຼາຍ​ທີ່​ສຸດ​ໃຫ້​ໝົດ​ໄປ ພາຍ​ໃນ​ປີ 2030.

    ບັນ­ດາ​ຜູ້​ຊ່ຽວ­ຊານ ມັກ​ວັດ​ລະ­ດັບ​ຄວາມ­ທຸກ​ຍາກ​ດ້ວຍ​ຂໍ້​ມູນ​ຂອງ​ການ​ສຳ​ຫຼວດ​ສຳ­ມະ­ໂນ​ປະ­ຊາ­ກອນ ແຕ່​ການ​ສຳ​ຫຼວດ​ເຫຼົ່າ​ນີ້ ເສຍ​ຄ່າ​ໃຊ້​ຈ່າຍ​ສູງ ແລະ ໃຊ້​ເວ­ລາ​ດົນ​ນານ ແລະ ໃຊ້​ບຸ​ຄະ­ລາ​ກອນ​ຈຳ­ນວນ​ຫຼາຍ ປະ­ເທດ​ຕ່າງໆ​ທົ່ວ​ໂລກ ມັກ​ເຮັດ​ການ​ສຳ​ຫຼວດ​ປະ­ຊາ­ກອນ​ດົນໆ​ເທື່ອ​ໜຶ່ງ ເພາະ​ບໍ່​ສາ­ມາດ​ເຮັດ​ໄດ້​ເປັນ​ປະ­ຈຳ​ທຸກ​ປີ.

    ໃນ​ອີກ​ດ້ານ​ໜຶ່ງ ດາວ​ທຽມ​ສາ­ມາດ​ຖ່າຍ​ພາບ​ພື້ນ​ທີ່​ຕ່າງໆ​ທົ່ວ​ໂລກ​ໄດ້​ທຸກໆ​ສອງ​ເຖິງ​ສາມ​ວັນ ໂດຍ​ເປັນ​ພາບ​ຖ່າຍ​ທີ່​ມີ​ຄວາມ​ລະ­ອຽດ​ຂອງ​ພາບ​ສູງ ພາບ​ຖ່າຍ​ທາງ​ດາວ​ທຽມ​ມີ​ຄຸນ​ນະ​ພາບ​ດີ​ຂຶ້ນ​ຕະ­ຫຼອດ​ເວ­ລາ ແລະ ມີ​ລາ­ຄາ​ຖືກ​ລົງ ເນື່ອງ​ຈາກ​ມີ​ຈຳ­ນວນ​ດາວ​ທຽມ​ຂອງ​ລັດ­ຖະ­ບານ ແລະ ຂອງ​ບໍ­ລິ­ສັດ​ເອ­ກະ​ຊົນ​ຖືກ​ສົ່ງ​ຂຶ້ນ​ໄປ​ເຮັດ​ວຽກ​ກັນ​ຫຼາຍ​ຂຶ້ນ.

    ທີມ​ນັກ​ວິ­ໄຈ​ໄດ້​ໃຊ້​ພາບ​ຖ່າຍ​ທາງ​ດາວ​ທຽມ ທີ່​ສະ­ແດງ​ລະ­ດັບ​ຄວາມ​ສະ­ຫວ່າງ​ຫຼາຍ​ທີ່​ສຸດ​ຂອງ​ແສງ​ໄຟ​ໃນ​ຕອນ​ກາງ­ຄືນ ໃນ​ການ​ປະ​ເມີນ​ກິດ­ຈະ­ກຳ​ທາງ​ເສດ­ຖະ­ກິດ​ຂອງ​ພາກ​ພື້ນ​ຕ່າງໆ​ທົ່ວ​ໂລກ ໃນ​ຂະ­ນະ​ທີ່​ມີ​ນັກ​ວິ­ໄຈ​ອີກ​ຈຳ­ນວນ​ໜຶ່ງ ທີ່​ໃຊ້​ພາບ​ຖ່າຍ​ທາງ​ດາວ​ທຽມ​ໃນ​ການ​ລະ­ບຸ​ກຸ່ມ​ບ້ານ​ທີ່​ຮັ່ງ­ມີ​ທີ່​ສຸດ ແລະ ທີ່​ທຸກ​ຍາກ​ທີ່​ສຸດ.

    ນອກ­ຈາກ​ນີ້ ຍັງ​ມີ​ກຸ່ມ​ນັກ​ວິ­ໄຈ​ອີກ​ກຸ່ມ​ໜຶ່ງ​ທີ່​ແຍ​ກວ່າ​ເຂດ​ທີ່­ຢູ່​ໃດ​ຮັ່ງ­ມີ ຫຼື​ທຸກ​ຍາກ ໂດຍ​ໃຊ້​ພາບ​ຖ່າຍ​ຂອງ​ຄວາມ​ໜາ​ແໜ້ນ​ຂອງ​ຕຶກ ແລະ ອາ­ຄານ ຕະ­ຫຼອດ​ຈົນ​ພືດ​ປົກ​ຄຸມ​ດິນ.

ຜົນ​ການ​ສຶກ​ສາ​ໃໝ່​ຫຼ້າ​ສຸດ ໃຊ້​ວິ­ທີ​ການ​ສຶກ​ສາ​ຂໍ້​ມູນ​ທີ່​ໃຫ້​ລາຍ​ລະ­ອຽດ​ຫຼາຍ​ທີ່​ສຸດ ໂດຍ​ສາ­ມາດ​ລະ­ບຸ​ໄດ້​ວ່າ ພາຍ​ໃນ​ໜຶ່ງ​ກຸ່ມ​ບ້ານ ໂດຍ​ສາ­ມາດ​ລະ­ບຸ​ວ່າ​ຄົວ​ເຮືອນ​ໃດ​ທຸກ​ຍາກ ແລະ ຄົວ​ເຮືອນ​ໃດ​ຮັ່ງ­ມີ ເຊິ່ງ​ມີ​ຄວາມ​ແມ່ນ​ຢຳ 62%.

    ຜົນ​ການ​ສຶກ​ສາ​ນີ້ ເນັ້ນ​ທີ່​ກຸ່ມ​ບ້ານ​ແຫ່ງ​ໜຶ່ງ​ໃນ​ເຂດ​ຊົນ­ນະ­ບົດ​ຂອງ​ປະ­ເທດ​ເຄນ​ຢາ ຊື່ Sauri ເຊິ່ງ​ເປັນ​ສ່ວນ​ໜຶ່ງ​ຂອງ​ໂຄງ­ການ​ກຸ່ມ​ບ້ານ​ມິນ​ເລ​ນ່ຽມ (Millennium Villages Project) ເຊິ່ງ​ເປັນ​ໂຄງ­ການ​ທົດ​ລອງ​ດ້ານ​ການ​ສຶກ​ສາ​ຄວາມ­ທຸກ​ຍາກ​ຂະ­ໜາດ​ໃຫຍ່​ໂຄງ­ການ​ໜຶ່ງ ມີ​ການ​ຈັດ​ເກັບ​ຂໍ້​ມູນ​ໃນ​ລາຍ​ລະ­ອຽດ​ກ່ຽວ​ກັບ​ລາຍ​ໄດ້ ແລະ ຊັບ​ສິນ​ຂອງ​ຄົວ​ເຮືອນ​ໃນ​ປີ 2005.

    ແລະ ໃນ​ພາບ​ຖ່າຍ​ທາງ​ດາວ​ທຽມ​ຂອງ​ກຸ່ມ​ບ້ານ​ແຫ່ງ​ນີ້ ທີມ​ນັກ​ວິ­ໄຈ​ໄດ້​ວັດ​ຂະ­ໜາດ​ຂອງ​ເຮືອນ​ແຕ່​ລະ​ຫຼັງ ແລະ ສຶກ​ສາ​ບ່ອນ​ທຳ​ມາ​ຫາ​ກິນ​ທີ່­ຢູ່​ອ້ອມໆ ແລະ ບໍ່​ແປກ​ໃຈ​ທີ່​ເຮືອນ​ທີ່​ມີ​ຂະ­ໜາດ​ນ້ອຍ​ກວ່າ ມີ​ຄົນ​ອາ­ໄສ​ທີ່​ທຸກ​ຍາກ​ກວ່າ ແລະ ທີ່​ໜ້າ​ສົນ­ໃຈ ທີມ​ນັກ​ວິ­ໄຈ​ຍັງ​ພົບ​ດ້ວຍ​ວ່າ​ຄົວ​ເຮືອນ​ທີ່​ທຸກ​ຍາກ ມັກ​ມີ​ທີ່​ດິນ​ເຮັດ​ກິນ​ທີ່​ຫວ່າງ​ເປົ່າ​ຫຼາຍ​ກວ່າ​ໃນ​ເດືອນ​ກັນ­ຍາ ໃນ​ພື້ນ​ທີ່​ເຂດ​ນີ້​ຂອງ​ເຄນ​ຢາ ປົກ­ກະ­ຕິ​ໃນ​ໄລ­ຍະ​ເດືອນ​ນີ້​ຂອງ​ປີ ຊາວ​ກະ­ສິ­ກອນ​ຈະ​ກຽມ​ພື້ນ​ທີ່​ດິນ​ໃນ​ການ​ປູກ​ພືດ​ຮອບ​ທີ​ສອງ​ຂອງ​ປີ.

    ທ່ານ ແກ​ຣີ່ ວັດ​ມອກ (Gary Watmough) ນັກ​ພູມ​ສາດ​ແຫ່ງ​ມະ­ຫາ­ວິ­ທະ­ຍາ­ໄລ​ເອ​ດິນ​ເບີກ (University of Edinburgh) ແລະ ຫົວ­ໜ້າ​ຜູ້​ຮ່າງ​ລາຍ​ງານ​ຜົນ​ການ​ວິ­ໄຈ​ກ່າວ​ວ່າ ໂດຍ​ທົ່ວ​ໄປ​ແລ້ວ ຄົວ​ເຮືອນ​ທີ່​ທຸກ​ຍາກ​ກວ່າ ຈະ​ປູກ​ພືດ​ຮອບ​ສອງ​ໃນ​ໄລ­ຍະ​ລະ­ດູ​ການ​ປູກ ຝັງ​ເພາະ​ມີ​ຄວາມ​ຈຳ­ເປັນ ເນື່ອງ​ຈາກ​ບໍ່​ມີ​ທີ່​ດິນ­ພຽງ​ພໍ​ແກ່​ການ​ປູກ­ຝັງ ຫຼື​ອາດ​ຕ້ອງ­ການ​ປູກ​ພືດ​ສຳ­ຮອງ​ເພືອ​ມີ​ເຫດ​ບໍ່​ຄາດ​ຝັນ​ເກີດ​ຂຶ້ນ.

    ພາບ​ຖ່າຍ​ຈາກ​ດາວ​ທຽມ​ຍັງ​ພົບ​ດ້ວຍ​ວ່າ ເນື້ອ­ທີ່​ປູກ­ຝັງ​ຂອງ​ຄົວ​ເຮືອນ​ທີ່​ທຸກ​ຍາກ​ປູກ​ພືດ​ໃນ​ເວ­ລາ​ທີ່​ສັ້ນ​ກວ່າ ນັກ​ວິ­ໄຈ​ກ່າວ​ວ່າ​ເມື່ອ​ທີມ​ງານ​ກັບ​ໄປ​ເບິ່ງ​ຂໍ້​ມູນ​ຈາກ​ພາກ​ສະ­ໜາມ ພວກ​ເຂົາ​ພົບ​ວ່າ​ຄົວ​ເຮືອນ​ທຸກ​ຍາກ ມັກ​ບໍ່​ປູກ​ພືດ​ໃນ​ພື້ນ​ທີ່​ເພາະ​ປູກ​ໄວ​ເທົ່າ​ກັບ​ຄົວ​ເຮືອນ​ອື່ນໆ ນັ້ນ​ເປັນ​ເພາະ­ວ່າ​ຄົນ​ເຫຼົ່າ​ນີ້​ໄປ​ຮັບ­ຈ້າງ​ປູກ​ພືດ​ໃຫ້​ກັບ​ຄອບ­ຄົວ​ທີ່​ຮັ່ງ­ມີ​ກວ່າ​ເສຍ​ກ່ອນ​ທີ່​ຈະ​ປູກ​ພືດ​ຂອງ​ຕົນ ພວກ​ເຂົາ​ຈະ​ໃຊ້​ເງິນ​ທີ່​ໄດ້​ຈາກ​ຄ່າ​ຮັບ­ຈ້າງ​ປູກ​ພືດ​ໄປ​ຊື້​ເມັດ​ພືດ ເຊິ່ງ​ເຮັດ​ໃຫ້​ພືດ​ທີ່​ພວກ​ເຂົາ​ປູກ​ມີ​ເວ­ລາ​ໜ້ອຍ​ລົງ​ໃນ​ການ​ເຕີບ​ໂຕ.

    ທ່ານ ເດ​ວິດ ນິວ​ເຮົາສ໌ (David Newhouse) ນັກ​ເສດ­ຖະ­ສາດ​ແຫ່ງ​ທະ­ນາ­ຄານ​ໂລກ ເຊິ່ງ​ບໍ່​ກ່ຽວ­ຂ້ອງ​ກັບ​ການ​ສຶກ​ສາ​ນີ້ ກ່າວ​ວ່າ ຜົນ​ການ​ສຶກ​ສາ​ນີ້ ເປັນ​ກ້າວ​ຍ່າງ​ທີ່​ສຳ­ຄັນ ສະ­ແດງ​ໃຫ້​ເຫັນ​ສັກ­ກະ​ຍະ​ພາບ​ຂອງ​ພາບ​ຖ່າຍ​ທາງ​ດາວ​ທຽມ ໃນ​ການ​ໄຈ້​ແຍກ​ລະ­ຫວ່າງ​ຄວາມ​ມັ່ງ​ຄັ່ງ​ຂອງ​ທ່ານ​ກັບ​ຂອງ​ເພື່ອນ​ບ້ານ ແລະ ເຂົາ​ຊີ້​ແຈງ​ວ່າ​ນີ້​ຂ້ອນ​ຂ້າງ​ໜ້າ​ຢ້ານ​ກົວ ແຕ່​ກໍ​ໜ້າ​ຕື່ນ­ເຕັ້ນ​ດ້ວຍ.

    ເຂົາ​ແນະ­ນຳ​ວ່າ ຄວາມ​ກັງ­ວົນ​ກ່ຽວ​ກັບ​ຄວາມ​ເປັນ​ສ່ວນ​ຕົວ​ນີ້ ຕ້ອງ​ໄດ້​ຮັບ​ການ​ແກ້​ໄຂ​ເສຍ​ກ່ອນ​ທີ່​ຈະ​ນຳ​ວິ­ທີ​ການ​ສຶກ​ສາ​ແບບ​ນີ້​ໄປ​ໃຊ້​ໃນ​ງານ​ຈິງໆ.

    ແຕ່​ຍັງ​ບໍ່​ຊັດ​ເຈນ​ວ່າ ການ​ປ່ຽນ­ແປງ​ຕໍ່​ຄວາມ­ທຸກ​ຍາກ ຈະ​ສາ­ມາດ​ເບິ່ງ​ເຫັນ​ໄດ້​ຈາກ​ພາບ​ຖ່າຍ​ດາວ​ທຽມ​ຫຼື​ບໍ່ ແລະ ຄຳ​ຖາມ​ນີ້​ເປັນ​ປະ­ເດັນ​ທີ່​ທີມ​ນັກ​ວິ­ໄຈ​ຈະ​ຄົ້ນ​ຫາ​ຄຳ​ຕອບ​ຕໍ່​ໄປ.

ຂ່າວທີ່ກ່ຽວຂ້ອງ