ແຕ່ງຕັ້ງຄະນະບໍລິຫານງານ ຄພລ ຊຸດໃໝ່

195 09 ມ.ສ. 2019 ວົງຈອນກີລາ
ແຕ່ງຕັ້ງຄະນະບໍລິຫານງານ ຄພລ ຊຸດໃໝ່

    ປະ­ກາດ​ການ­ຈັດ­ຕັ້ງ​ຄະ­ນະ​ບໍ­ລິ­ຫານ​ງານ ຄະ­ນະ​ກຳ­ມະ­ການ​ພາ​ຣາ​ແລມ​ປິກ​ແຫ່ງ​ຊາດ​ລາວ ຫຼື ຄພລ ຊຸດ​ໃໝ່ ໄດ້​ຈັດ​ຂຶ້ນ​ວັນ​ທີ 4 ເມ­ສາ 2019 ທີ່​ໂຮງ­ແຮມ​ລ້ານ​ຊ້າງ ມີ​ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ປະ­ທານ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ (ຄອລ) ທັງ​ເປັນ​ປະ­ທານ​ຄະ­ນະ​ກຳ­ມະ­ການ​ພາ​ຣາ​ແລມ​ປິກ​ແຫ່ງ​ຊາດ​ລາວ ຄພລ ຄົນ​ໃໝ່ ມີ​ບັນ­ດາ​ຮອງ​ລັດ­ຖະ­ມົນ­ຕີ ຫົວ­ໜ້າ​ກົມ​ກີ­ລາ​ມວນ​ຊົນ ພ້ອມ​ດ້ວຍ​ພະ­ນັກ­ງານ​ທີ່​ກ່ຽວ­ຂ້ອງ ແຂກ​ຖືກ​ເຊີນ ຄູ​ເຝິກ ແລະ ນັກ­ກີ­ລາ​ເຂົ້າ​ຮ່ວມ.

    ໂອ­ກາດ​ນີ້ ທ່ານ ສີ­ທາດ ຈັນ­ທະ​ບູ​ລີ ລາຍ​ງານ​ຜົນ­ສຳ­ເລັດ ໃນ​ການ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ເອ​ຊຽນ​ພາ​ຣາ​ເກມ ຄັ້ງ​ທີ 12 ທີ່​ປະ­ເທດ​ອິນ​ໂດ​ເນ​ເຊຍ ໃຫ້​ຮູ້​ວ່າ: ຜົນ­ສຳ­ເລັດ​ໃນ​ການ​ເຂົ້າ​ຮ່ວມ​ງານ​ດັ່ງ­ກ່າວ ບັນ­ດາ​ຄະ­ນະ​ກົມ​ກີ­ລາ​ມວນ​ຊົນ ພະ­ນັກ­ງານ​ວິ­ຊາ​ການ ຄູ​ເຝິກ ແລະ ນັກ­ກີ­ລາ ພ້ອມ​ກັນ​ເອົາ­ໃຈ­ໃສ່​ຢ່າງ​ຕັ້ງ­ໜ້າ​ຈັດ​ຕັ້ງ​ປະ­ຕິ­ບັດ​ບັນ­ດາ​ໜ້າ­ທີ່​ຕ່າງໆ ທີ່​ມອບ​ໝາຍ​ໃຫ້​ຢ່າງ​ມີ​ຜົນ­ສຳ­ເລັດ​ຕາມ​ເປົ້າ​ໝາຍ​ທີ່​ວາງ​ໄວ້ ກໍ​ຄື​ສາ­ມາດ​ນຳ­ພາ​ນັກ­ກີ­ລາ​ສ້າງ​ຜົນ­ງານ​ຄັ້ງ​ປະ­ຫວັດ­ສາດ ຄວ້າ​ຫຼຽນ​ຄຳ ຈາກ​ທ້າວ ເປ້ຍ ເຫຼົາ​ພັກ­ດີ ນັກ­ກີ­ລາ​ຍົກ​ນ້ຳ­ໜັກ​ທີມ​ຊາດ​ລາວ ຮຸ່ນ​ນ້ຳ­ໜັກ 49 ກິ​ໂລ ສ່ວນ​ກີ­ລາ​ແລ່ນ-ລານ ລອຍ­ນ້ຳ ແລະ ໂກນ​ບານ ເຖິງ​ຈະ​ບໍ່​ມີ​ຜົນ­ງານ​ໄດ້​ຫຼຽນ​ມາ​ຄ້ອງ​ຄໍ ແຕ່​ກໍ​ສາ­ມາດ​ສ້າງ​ສະ­ຖິ­ຕິ​ທີ່​ດີ​ກວ່າ​ເກົ່າ.

    ໃນ​ພິ­ທີ​ກໍ​ໄດ້​ມີ​ການ​ມອບ​ເງິນ​ໂບ​ນັດ​ຂອງ​ລັດ­ຖະ­ບານ 25 ລ້ານ​ກີບ ໃຫ້​ທ້າວ ເປ້ຍ ເຫຼົາ​ພັກ­ດີ ນັກ­ກີ­ລາ​ຍົກ​ນ້ຳ­ໜັກ​ຄົນ​ພິ­ການ​ທີມ​ຊາດ​ລາວ ທີ່​ສາ­ມາດ​ສ້າງ​ປະ­ຫວັດ­ສາດ​ໜ້າ​ໃໝ່​ຄວ້າ​ຫຼຽນ​ຄຳ ໃນ​ງານ​ເອ​ຊຽນ​ພາ​ຣາ​ເກມ ຄັ້ງ​ທີ 12 ທີ່​ປະ­ເທດ​ອິນ​ໂດ​ເນ​ເຊຍ ເປັນ​ເຈົ້າ­ພາບ ແລະ ມອບ​ເງິນ 12,5 ລ້ານ​ກີບ ໃຫ້​ຄູ​ເຝິກ​ກີ­ລາ​ຍົກ​ນ້ຳ­ໜັກ​ເອີກ​ດ້ວຍ.

ຂ່າວທີ່ກ່ຽວຂ້ອງ