ນະຄອນຫຼວງ ຄັດເລືອກນັກກີລາຮ່ວມບານເຕະສາຍ ກ

245 08 ມ.ສ. 2019 ວົງຈອນກີລາ
ນະຄອນຫຼວງ ຄັດເລືອກນັກກີລາຮ່ວມບານເຕະສາຍ ກ

    ນັກ­ກີ­ລາ​ເຕະ­ບານ​ຈາກ 9 ຕົວ​ເມືອງ ນະ­ຄອນ­ຫຼວງ​ວຽງ​ຈັນ (ນວ) ເກືອບ 200 ຄົນ ເຂົ້າ​ຮ່ວມ​ຄັດ​ເລືອກ​ກັບ​ສະ­ໂມ­ສອນ ນວ ໃນ​ວັນ​ທີ 3 ເມ­ສາ 2019 ທີ່​ສະ­ໜາມ​ກີ­ລາ​ເຈົ້າ​ອາ​ນຸ​ວົງ ເພື່ອ​ເຂົ້າ​ຮ່ວມ​ທີມ ນວ ກຽມ​ສົ່ງ​ເຂົ້າ​ຮ່ວມ​ແຂ່ງ­ຂັນ​ເຕະ­ບານ​ດິ​ວິ​ຊັນ 1 ຂອງ​ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ (ສຕລ) ໂດຍ​ໃຫ້​ກຽດ​ເຂົ້າ​ຮ່ວມ​ຕິດ­ຕາມ​ຂອງ​ທ່ານ ວຽງ​ສະ­ຫວັນ ແສງ​ຈັນ ປະ­ທານ​ສະ­ຫະ­ພັນ​ບານ­ເຕະ ນວ ພ້ອມ​ດ້ວຍ​ຄະ­ນະ​ຄູ​ເຝິກ.

    ທ່ານ ພູ​ທອງ ວົງ­ກົດ ຄະ­ນະ​ຄູ​ເຝິກ​ສະ­ໂມ­ສອນ ນວ ໃຫ້​ສຳ­ພາດ​ວ່າ: ຖື​ວ່າ​ເປັນ​ໂອ­ກາດ​ທີ່​ດີ​ທີ່​ສະ­ຫະ­ພັນ​ບານ­ເຕະ ນວ ໄດ້​ເປີດ​ໂອ­ກາດ​ໃຫ້​ນັກ­ກີ­ລາ​ໄດ້​ຮ່ວມ​ຄັດ​ເລືອກ ເພື່ອ​ບັນ­ຈຸ​ເຂົ້າ​ທີມ​ກຽມ​ເຂົ້າ​ຮ່ວມ​ການ​ແຂ່ງ­ຂັນ​ບານ­ເຕະ​ດິ​ວິ​ຊັນ 1 ຂອງ ສຕລ ປະ­ຈຳ​ປີ 2019 ເຊິ່ງ​ຈະ​ເປີດ​ການ​ແຂ່ງ­ຂັນ​ຢ່າງ​ເປັນ​ທາງ​ການ​ໃນ​ທ້າຍ​ເດືອນ​ເມ­ສາ​ນີ້ ແລະ ເປັນ​ມື້​ທີ່​ມີ​ນັກ­ກີ­ລາ​ເຂົ້າ​ຮ່ວມ​ຄັດ​ເລືອກ​ຫຼາຍ​ທີ່​ສຸດ​ກວ່າ​ທຸກ​ຄັ້ງ​ທີ່​ຜ່ານ​ມາ ແລະ ວິ­ທີ​ການ​ຄັດ​ເລືອກ​ໄດ້​ເນັ້ນ​ໜັກ 4 ຫຼັກ­ການ​ຕົ້ນ­ຕໍ​ຄື: ຕ້ອງ​ເບິ່ງ​ດ້ານ​ເຕັກ­ນິກ​ຄວາມ​ສາ­ມາດ​ຂອງ​ນັກ­ກີ­ລາ ສະ­ພາບ​ຮ່າງ­ກາຍ ເທັກ​ຕິກ ແລະ ທັກ​ສະ​ດ້ານ​ຄວາມ​ສາ­ມາດ​ສະ­ເພາະ​ຕົວ ຫຼັງ​ຈາກ​ນັ້ນ​ກໍ​ໄດ້​ເກັບ​ຕົວ​ເຝິກ­ຊ້ອມ​ນັກ­ກີ­ລາ​ຢູ່​ສະ­ໜາມ​ກີ­ລາ​ເຈົ້າ​ອາ​ນຸ​ວົງ.

    ຫຼັງ​ຈາກ​ມີ​ການ​ປະ­ກາດ​ລາຍ​ຊື່​ນັກ­ກີ­ລາ 35 ຄົນ​ສຳ­ເລັດ ນັກ­ກີ­ລາ​ເຕະ­ບານ​ຊຸດ​ນີ້ ຈະ​ໄດ້​ລົງ​ສະ­ໜາມ​ອຸ່ນ​ເຄື່ອງ​ກັບ​ບັນ­ດາ​ສະ­ໂມ­ສອນ​ໃຫຍ່​ພາຍ​ໃນ ນວ ເປັນ­ຕົ້ນ​ສະ­ໂມ­ສອນ ໃນ​ການ​ແຂ່ງ­ຂັນ​ບານ­ເຕະ​ເປບ​ຊີ​ລາວ​ພຣີ​ເມຍ​ລີກ ແລະ ບັນ­ດາ​ສະ­ໂມ­ສອນ​ປະ­ເທດ​ໃກ້​ຄຽງ ເພື່ອ​ກຽມ​ຄວາມ​ພ້ອມ​ຈະ​ອອກ​ເດີນ­ທາງ​ໃນ​ວັນ​ທີ 23 ເມ­ສາ 2019 ເຂົ້າ​ຮ່ວມ​ແຂ່ງ­ຂັນ​ເຕະ­ບານ​ລາຍ­ການ​ພິ­ເສດ​ທີ່​ແຂວງ​ຄຸນ​ໝິງ ສປ ຈີນ ກ່ອນ​ຈະ​ກັບ​ມາ​ຕັດ​ໃຫ້​ເຫຼືອ​ນັກ​ເຕະ 25 ຄົນ​ສຸດ​ທ້າຍ ເຂົ້າ​ຮ່ວມ​ລາຍ­ການ​ດິ​ວິ​ຊັນ 1 ຂອງ ສຕລ.

    ສຳ­ລັບ​ການ​ແຂ່ງ­ຂັນ​ເຕະ­ບານ​ດິ​ວິ​ຊັນ 1 ຫຼ້າ​ສຸດ ນວ ໄດ້​ສົ່ງ​ທີມ​ເຂົ້າ​ຮ່ວມ​ແຂ່ງ­ຂັນ​ປີ 2017 ສາ­ມາດ​ຍາດ​ໄດ້​ອັນ​ດັບ​ທີ 4 ສ່ວນ​ປີ 2018 ບໍ່​ໄດ້​ເຂົ້າ​ຮ່ວມ ເນື່ອງ​ຈາກ​ຕິດ​ພາ­ລະ­ກິດ​ເກັບ​ຕົວ​ເຝິກ­ຊ້ອມ ກຽມ​ເຂົ້າ​ຮ່ວມ​ແຂ່ງ­ຂັນ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ທີ່​ແຂວງ​ຊຽງ​ຂວາງ ຮັບ​ກຽດ​ເປັນ​ເຈົ້າ­ພາບ ເຊິ່ງ​ໃນ​ເບື້ອງ​ຕົ້ນ ງານ​ດັ່ງ­ກ່າວ​ມີ​ແຜນ​ຈັດ​ຂຶ້ນ​ໃນ​ທ້າຍ​ປີ 2018 ຫຼັງ​ຈາກ​ນັ້ນ​ກໍ​ໄດ້​ປະ­ກາດ​ເລື່ອນ​ໄປ​ເປັນ​ທ້າຍ​ປີ 2019 ແລະ ຫຼ້າ​ສຸດ​ເລື່ອນ​ໄປ​ຈັດ​ໃສ່​ຕົ້ນ​ປີ 2020.

ຂ່າວທີ່ກ່ຽວຂ້ອງ