ບໍລິສັດທີ່ປຶກສາດ້ານການລົງທຶນ ຊ່ວຍພັດທະນາຍິງທະນູລາວ

294 08 ມ.ສ. 2019 ວົງຈອນກີລາ
ບໍລິສັດທີ່ປຶກສາດ້ານການລົງທຶນ ຊ່ວຍພັດທະນາຍິງທະນູລາວ

    ອີງ​ຕາມ​ຂໍ້​ມູນ​ຈາກ​ສະ­ຫະ­ພັນ​ກີ­ລາ​ຍິງ​ທະ­ນູ​ແຫ່ງ​ຊາດ​ລາວ ໃຫ້​ຮູ້​ໃນ​ວັນ​ທີ 4 ເມ­ສາ 2019 ວ່າ: ໃນ​ນາມ​ສະ­ຫະ­ພັນ​ກີ­ລາ​ຍິງ​ທະ­ນູ​ແຫ່ງ​ຊາດ​ລາວ ຂໍ​ສະ­ແດງ​ຄວາມ​ຂອບ­ໃຈ ແລະ ຮູ້​ບຸນ​ຄຸ​ອັນ​ໃຫຍ່​ຫຼວງ​ຕໍ່​ທ່ານ ປີ​ຊາ​ໄຊ ແກ້ວ​ໄຊ​ຍະ​ຈັກ ປະ­ທານ​ບໍ­ລິ­ສັດ​ທີ່​ປຶກ­ສາ​ດ້ານ​ການ​ລົງ­ທຶນ ແລະ ກໍ່­ສ້າງ​ເຂື່ອນ​ໄຟ­ຟ້າ ຈຳ­ກັດ​ຜູ້​ດຽວ ທີ່​ໄດ້​ຮັບ​ການ​ແຕ່ງ­ຕັ້ງ​ເປັນ​ປະ­ທານ​ສະ­ຫະ­ພັນ​ຍິງ​ທະ­ນູ​ແຫ່ງ​ຊາດ​ລາວ​ຢ່າງ​ເປັນ​ທາງ​ການ ນັບ​ແຕ່​ວັນ​ທີ 9 ສິງ­ຫາ 2017 ເປັນ­ຕົ້ນ​ມາ ເຊິ່ງ​ທ່ານ​ໄດ້​ເອົາ­ໃຈ­ໃສ່​ຊຸກ­ຍູ້​ປະ­ກອບ­ສ່ວນ​ດ້ານ​ທຶນ­ຮອນ​ສ່ວນ​ຕົວ ເຂົ້າ​ໃນ​ການ​ສົ່ງ​ຄະ­ນະ​ນຳ ຄູ​ເຝິກ ແລະ ນັກ­ກີ­ລາ ອອກ​ເຄື່ອນ​ໄຫວ​ກິດ­ຈະ­ກຳ​ຕ່າງໆ ທັງ​ພາຍ​ໃນ ແລະ ຕ່າງ­ປະ­ເທດ ນັບ​ແຕ່​ທ້າຍ​ປີ 2017 ຫາ​ທ້າຍ​ປີ 2018 ໂດຍ​ສະ­ເພາະ​ທ່ານ​ໄດ້​ໃຫ້­ການ​ຊ່ວຍ­ເຫຼືອ​ເງິນ 123.679 ໂດ​ລາ​ສະ­ຫະ­ລັດ ຫຼື ປະ­ມານ 1 ຕື້​ກີບ ເຂົ້າ​ໃນ​ການ­ເຄື່ອນ­ໄຫວ​ກິດ­ຈະ­ກຳ ແລະ ຊື້​ອຸ­ປະ­ກອນ​ຮັບ​ໃຊ້​ໃຫ້​ແກ່​ນັກ­ກີ­ລາ​ທີມ​ຊາດ ແລະ ຄູ​ເຝິກ​ຈົນ​ເຮັດ​ໃຫ້​ນັກ­ກີ­ລາ​ຍິງ​ທະ­ນູ​ລາວ ມີ​ຜົນ­ງານ​ພົ້ນ​ເດັ່ນ​ຫຼາຍ​ດ້ານ​ທັງ​ໃນ​ລະ­ດັບ​ຊາດ ອະ­ນຸ​ພາກ​ພື້ນ ພາກ​ພື້ນ ແລະ ສາ­ກົນ.

    ຄຽງ​ຄູ່​ກັນ​ນັ້ນ ຍັງ​ໄດ້​ຈ້າງ​ຄູ​ເຝິກ​ທີ່​ມີ​ປະ­ສົບ​ມາ​ຈາກ​ຈີນ ເພື່ອ​ມາ​ຊ່ວຍ​ເຝິກ­ແອບ​ໃຫ້​ແກ່​ນັກ­ກີ­ລາ​ທີມ​ຊາດ​ລາວ ແລະ ໄດ້​ອະ­ນຸ­ຍາດ​ໃຫ້​ຄູ​ເຝິກ​ຈີນ ໄປ​ຊ່ວຍ​ສອນ​ເຝິກ­ແອບ​ໃຫ້​ໂຮງ­ຮຽນ​ພອນ​ສະ­ຫວັນ​ກີ­ລາ-ກາຍ­ຍະ­ກຳ 3 ວັນ​ຕໍ່​ອາ­ທິດ ສະ­ນັ້ນ ສະ­ຫະ­ພັນ​ກີ­ລາ​ຍິງ​ທະ­ນູ​ແຫ່ງ​ຊາດ ຫວັງ​ເປັນ​ຢ່າງ​ຍິ່ງ​ວ່າ ຈະ​ໄດ້​ຮັບ​ການ​ຊ່ວຍ­ເຫຼືອ ແລະ ສະ­ໜັບ­ສະ­ໜູນ​ຈາກ​ທ່ານ​ຕື່ມ​ອີກ​ໃນ​ອະ­ນາ­ຄົດ.

ຂ່າວທີ່ກ່ຽວຂ້ອງ