ຂ່າວຫຼ້າສຸດ

ໄຂນຳໃຊ້ອາຄານກົມສ່ວຍສາອາກອນຫຼັງໃໝ່

442 05 ມ.ສ. 2019 ຂ່າວໜ້າ​ໜຶ່ງ
ໄຂນຳໃຊ້ອາຄານກົມສ່ວຍສາອາກອນຫຼັງໃໝ່

    ພິ­ທີ​ມອບ-ຮັບ​ອາ­ຄານ​ຫຼັງ​ໃໝ່ ໂຄງ­ການ​ພັດ­ທະ­ນາ​ລະ­ບົບ​ຂໍ້​ມູນ​ຂ່າວ­ສານ ການ​ຄຸ້ມ​ຄອງ​ລາຍ​ຮັບ​ສ່ວຍ​ສາ​ອາ­ກອນ ກົມ​ສ່ວຍ​ສາ​ອາ­ກອນ ກະ­ຊວງ​ການ​ເງິນ ຈັດ​ຂຶ້ນ​ວັນ​ທີ 3 ເມ­ສາ 2019 ຢູ່​ກົມ​ດັ່ງ­ກ່າວ ໂດຍ​ມີ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ທ່ານ ຊິນ​ຊັງ ຊູນ ເອກ​ອັກ​ຄະ​ລັດ​ຖະ​ທູດ ສ ເກົາ­ຫຼີ ປະ­ຈຳ​ລາວ ທ່ານ ຈອງ​ວູນ ຢູ ຮອງ​ປະ­ທານ​ບໍ­ລິ­ສັດ LG CNS ຈຳ­ກັດ (ຜູ້​ຮັບ​ເໝົາ​ກໍ່­ສ້າງ) ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ພູ​ທະ­ນູ​ເພັດ ໄຊ​ສົມ­ບັດ ຫົວ­ໜ້າ​ກົມ​ສ່ວຍ​ສາ​ອາ­ກອນ ກ່າວ​ວ່າ: ໂຄງ­ການ​ພັດ­ທະ­ນາ​ລະ­ບົບ​ຂໍ້​ມູນ​ຂ່າວ­ສານ​ຄຸ້ມ​ຄອງ​ລາຍ​ຮັບ​ສ່ວຍ​ສາ​ອາ­ກອນ ເປັນ​ໂຄງ­ການ​ໜຶ່ງ​ທີ່​ນອນ​ໃນ​ແຜນ​ຍຸດ​ທະ​ສາດ​ຂອງ​ຂະ­ແໜງ­ການ​ເງິນ ໄປ​ສູ່​ຄວາມ​ທັນ​ສະ­ໄໝ ເວົ້າ​ສະ­ເພາະ ວຽກ​ການ​ຫັນ​ຄຸ້ມ​ຄອງ​ການ​ເກັບ​ລາຍ​ຮັບ​ໄປ​ສູ່​ລະ­ບົບ​ທັນ​ສະ­ໄໝ ມີ​ລັກ­ສະ­ນະ​ວິ­ທະ­ຍາ­ສາດ ແນ­ໃສ່​ປັບ­ປຸງ​ກົນ​ໄກ​ການ​ເກັບ​ລາຍ​ຮັບ​ໃຫ້​ມີ​ປະ​ສິດ­ທິ​ຜົນ ມີ​ຄວາມ​ໂປ່ງ​ໃສ ທັນ​ເວ­ລາ ສອດ­ຄ່ອງ​ກັບ​ລະ­ບຽບ​ກົດ­ໝາຍ ສ້າງ​ຄວາມ​ສະ­ດວກ​ສະ­ບາຍ ແລະ ເອື້ອ​ອຳ­ນວຍ​ຄວາມ​ສະ­ດວກ​ໃຫ້​ຜູ້​ປະ­ຕິ­ບັດ​ພັນ­ທະ​ອາ­ກອນ.

    ອາ­ຄານ​ດັ່ງ­ກ່າວ ເປັນ​ອາ­ຄານ 6 ຊັ້ນ ຈະ​ນຳ​ໃຊ້​ສຳ­ລັບ​ເກັບ​ຖານ​ຂໍ້​ມູນ ເຝິກ­ອົບ­ຮົມ ບໍ­ລິ­ການ​ຜູ້​ເສຍ​ອາ­ກອນ ຫ້ອງ­ການ ແລະ ຫ້ອງ​ປະ­ຊຸມ ລວມ​ທັງ​ສ້າງ​ສູນ​ຂໍ້​ມູນ​ທີ່­ຢູ່​ແຂວງ​ວຽງ​ຈັນ ໂຄງ­ການ​ນີ້​ໄດ້​ນຳ​ໃຊ້​ເງິນ​ກູ້​ຜ່ອນ­ຜັນ​ຈາກ EDCF ລັດ­ຖະ­ບານ ສ ເກົາ­ຫຼີ ມີ​ມູນ​ຄ່າ​ກູ້​ຢືມ 28,5 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 244 ຕື້​ກືບ ແລະ ທຶນ​ສົມ­ທົບ​ຂອງ​ລັດ­ຖະ­ບານ​ລາວ 4 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 34 ຕື້​ກີບ ໄດ້​ເລີ່ມ​ກໍ່­ສ້າງ​ແຕ່​ປີ 2017 ເປັນ­ຕົ້ນ​ມາ ແລະ ສຳ­ເລັດ​ຕາມ​ແຜນ­ການ​ທີ່​ວາງ​ໄວ້ ແຕ່​ຈະ​ໃຊ້​ເວ­ລາ​ອີກ 3 ເດືອນ ໃນ​ການ​ປັບ­ປຸງ​ເພີ່ມ​ເຕີມ​ບາງ​ວຽກ ເຊັ່ນ: ກໍ່­ສ້າງ​ທາງ​ເຂົ້າ-ອອກ ແລະ ທາງ​ເຊື່ອມ​ຕໍ່​ພາຍ​ໃນ​ກະ­ຊວງ​ການ​ເງິນ.

ຂ່າວທີ່ກ່ຽວຂ້ອງ