ສະຫຼອງວັນສາກົນໂຄສະນາ ເພື່ອຕ້ານລະເບີດບໍ່ທັນແຕກ

276 05 ມ.ສ. 2019 ຂ່າວໜ້າ​ໜຶ່ງ
ສະຫຼອງວັນສາກົນໂຄສະນາ ເພື່ອຕ້ານລະເບີດບໍ່ທັນແຕກ

    ຄະ­ນະ​ກຳ­ມະ­ການ​ຄຸ້ມ​ຄອງ​ແຫ່ງ​ຊາດ ເພື່ອ​ແກ້​ໄຂ​ບັນ­ຫາ​ລະ­ເບີດ​ບໍ່​ທັນ​ແຕກ (ຄຊກລ) ຮ່ວມ​ກັບ​ອົງ­ການ​ສະ­ຫະ​ປະ­ຊາ​ຊາດ ເພື່ອ​ການ​ພັດ­ທະ­ນາ (UNDP) ຈັດ​ພິ­ທີ​ສະ­ເຫຼີມ­ສະ­ຫຼອງ​ວັນ​ສາ­ກົນ​ໂຄ­ສະ­ນາ ເພື່ອ​ຕ້ານ​ລະ­ເບີດ​ບໍ່​ທັນ​ແຕກ ຂຶ້ນ​ວັນ​ທີ 4 ເມ­ສາ 2019 ຢູ່​ບ້ານ​ດ້າງ ເມືອງ​ມະ­ຫາ​ໄຊ ແຂວງ​ຄຳ​ມ່ວນ ໂດຍ​ມີ​ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ປະ­ທານ ຄຊກລ ທ່ານ​ນາງ ຄາ​ຣີ​ນາ ອິມ​ໂມ​ເນັນ ຜູ້­ຕາງ­ໜ້າ​ອົງ­ການ UNDP ທ່ານ ຄຳ​ສີ ອຸດ​ທິ​ວົງ ຮອງ​ເຈົ້າ­ແຂວງ​ຄຳ​ມ່ວນ ຜູ້​ຮັບ­ຜິດ­ຊອບ​ວຽກ​ງານ​ລະ­ເບີດ​ບໍ່​ທັນ​ແຕກ ປະ­ທານ​ຄະ­ນະ​ກຳ­ມະ­ການ​ຄຸ້ມ​ຄອງ ລບຕ ແຂວງ ທ່ານ ພູ​ຂຽວ ຈັນ­ທະ​ສົມ­ບູນ ຫົວ­ໜ້າ ຄຊກລ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ວັນ​ທີ 4 ເມ­ສາ ເປັນ​ວັນ​ສາ­ກົນ​ໂຄ­ສະ­ນາ ເພື່ອ​ຕ້ານ​ລະ­ເບີດ​ບໍ່​ທັນ​ແຕກ/ມິນ ແລະ ຊ່ວຍ­ເຫຼືອ​ການ​ດຳ­ເນີນ​ງານ ເພື່ອ​ແກ້​ໄຂ​ບັນ­ຫາ​ມິນ​ຢູ່​ໃນ​ຫຼາຍ​ປະ­ເທດ ທີ່​ໄດ້​ຮັບ​ຜົນ​ກະ­ທົບ​ຈາກ​ສິ່ງ​ເສດ​ເຫຼືອ​ຈາກ​ສົງ­ຄາມ ກິດ­ຈະ­ກຳ​ຕ່າງໆ​ທີ່​ເກີດ​ຂຶ້ນ​ໃນ​ມື້­ນີ້ ເພື່ອ​ຍົກ​ໃຫ້​ເຫັນ​ສິ່ງ​ເສດ​ເຫຼືອ​ຈາກ​ສົງ­ຄາມ ໄດ້​ສົ່ງ​ຜົນ​ສະ­ທ້ອນ​ຕໍ່​ຊຸມ​ຊົນ ແລະ ປະ­ຊາ­ຊົນ ເຊິ່ງ​ແຂວງ​ຄຳ​ມ່ວນ​ເປັນ​ແຂວງ​ໜຶ່ງ ທີ່​ມີ​ລະ­ເບີດ​ບໍ່​ທັນ​ແຕກ​ຕົກ​ຄ້າງ​ຫຼາຍ​ທີ່​ສຸດ​ຂອງ​ປະ­ເທດ ກິດ­ຈະ­ກຳ​ຕ່າງໆ ເພື່ອ​ສະ­ເຫຼີມ­ສະ­ຫຼອງ​ວັນ​ດັ່ງ­ກ່າວ ໄດ້​ຈັດ​ຂຶ້ນ​ຢູ່​ໂຮງ­ຮຽນ​ປະ­ຖົມ​ບ້ານ​ດ້າງ ເຊິ່ງ​ໄດ້​ມອບ​ປຶ້ມ​ຫຼັກ­ສູດ​ກ່ຽວ​ກັບ​ລະ­ເບີດ​ບໍ່​ທັນ​ແຕກ ແລະ ເສື້ອ​ທີ່​ມີ​ໂລ​ໂກ້​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ ທີ 18 ໃຫ້​ນັກ­ຮຽນ ເພື່ອ​ສຶກ​ສາ​ກ່ຽວ​ກັບ​ຄວາມ​ສ່ຽງ​ຂອງ​ລະ­ເບີດ​ບໍ່​ທັນ​ແຕກ ໂດຍ​ຊຸມ​ປີ­ຜ່ານ­ມາ​ແຂວງ​ຄຳ​ມ່ວນ ມີ​ອຸ­ບັດ­ເຫດ​ຈາກ ລບຕ 46 ຄັ້ງ ເຮັດ​ໃຫ້​ມີ​ຜູ້​ບາດ­ເຈັບ ເສຍ​ຊີ­ວິດ 94 ຄົນ ສະ­ເພາະ​ເມືອງ​ມະ­ຫາ​ໄຊ ມີ​ອຸ­ບັດ­ເຫດ​ຈາກ ລບຕ 5 ຄັ້ງ ເສຍ​ຊີ­ວິດ 14 ຄົນ.

    ກອງ​ທຶນ​ຕອບ​ໂຕ້​ສຸກ​ເສີນ ສະ­ຫະ​ປະ­ຊາ​ຊາດ (CERF) ໄດ້​ສະ­ໜອງ​ທຶນ​ຊ່ວຍ­ເຫຼືອ​ລ້າ 3,8 ລ້ານ ໂດ​ລາ​ສະ­ຫະ­ລັດ ຫຼື ປະ­ມານ 32 ຕື້​ກີບ ໃຫ້ 4 ອົງ­ການ​ໃນ​ເຄືອ​ຄ່າຍ ສປຊ WHO WFP FAO ແລະ UNDP ເພື່ອ​ໃຫ້​ຮັກ­ສາ​ຊີ­ວິດ​ຂອງ​ປະ­ຊາ­ຊົນ ພາຍ­ຫຼັງ​ໄພ​ນ້ຳ​ຖ້ວມ​ໃນ​ປີ 2018 ໂດຍ​ມີ​ເປົ້າ​ໝາຍ​ຊ່ວຍ­ເຫຼືອ​ແຂວງ​ຄຳ​ມ່ວນ ຈາກ​ການ​ຊ່ວຍ­ເຫຼືອ​ຂອງ​ທຶນ​ດັ່ງ­ກ່າວ ເຮັດ​ໃຫ້ UNDP ສາ­ມາດ​ສ້າງ​ວຽກ​ເຮັດ​ງານ​ທຳ​ໄລ­ຍະ​ສັ້ນ​ໃຫ້​ປະ­ຊາ­ຊົນ 3.000 ຄົນ ໂດຍ​ສະ­ເພາະ​ແຮງ​ງານ​ໃນ​ການ​ສ້ອມ­ແປງ​ຫົນ­ທາງ ແລະ ພື້ນ­ຖານ​ໂຄງ​ລ່າງ​ອື່ນໆ ທີ່​ໄດ້​ຮັບ​ຄວາມ​ເສຍ​ຫາຍ​ຈາກ​ນ້ຳ​ຖ້ວມ ໄພ​ນ້ຳ​ຖ້ວມ​ອາດ​ຈະ​ເຮັດ​ໃຫ້ ລບຕ ມີ​ການ​ເຄື່ອນ​ຍ້າຍ​ດ້ວຍ​ເຫດ​ນີ້ ການ​ປູກ​ຈິດ​ສຳ­ນຶກ​ກ່ຽວ​ກັບ​ອັນ­ຕະ­ລາຍ​ຂອງ ລບຕ ແກ່​ເດັກ­ນ້ອຍ ຈິ່ງ​ເປັນ​ພາກ­ສ່ວນ​ໜຶ່ງ​ທີ່​ສຳ­ຄັນ​ຂອງ​ວຽກ​ງານ​ຟື້ນ​ຟູ​ຫຼັງ​ໄພ­ພິ­ບັດ ເພື່ອ​ໃຫ້​ສອດ­ຄ່ອງ​ກັບ​ຄຳ​ໝັ້ນ​ໝາຍ​ຂອງ ສປປ ລາວ ຫົວ­ຂໍ້​ດັ່ງ­ກ່າວ ເຫັນ​ໄດ້​ຊັດ​ເຈນ​ໃນ​ຄວາມ​ພະ​ຍາມ​ເຮັດ​ວຽກ​ຢ່າງ​ໜັກ ເພື່ອ​ບັນ­ລຸ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ​ແຫ່ງ​ຊາດ ເປົ້າ​ໝາຍ​ທີ 18 ກ່ຽວ​ກັບ​ຊີ­ວິດ​ທີ່​ປອດ​ໄພ​ຈາກ​ລະ­ເບີດ​ບໍ່​ທັນ​ແຕກ.

ຂ່າວທີ່ກ່ຽວຂ້ອງ