ຂ່າວຫຼ້າສຸດ

ແຫຼ່ງທ່ອງທ່ຽວສຸດໃຈ ມີຫຼາຍກິດຈະກຳທີ່ໜ້າທ່ຽວຊົມ

384 05 ມ.ສ. 2019 ຂ່າວໜ້າ​ໜຶ່ງ
ແຫຼ່ງທ່ອງທ່ຽວສຸດໃຈ ມີຫຼາຍກິດຈະກຳທີ່ໜ້າທ່ຽວຊົມ

    ສະ­ຖານ­ທີ່​ທ່ອງ​ທ່ຽວ​ທຳ​ມະ​ຊາດ​ສຸດ​ໃຈ ເປັນ​ສະ­ຖານ­ທີ່​ທ່ອງ​ທ່ຽວ​ແຫ່ງ​ໜຶ່ງ​ທີ່​ໜ້າ​ທ່ຽວ​ຊົມ ເຊິ່ງ​ຕັ້ງ​ຢູ່​ບ້ານ​ຈຳ­ປາ ເມືອງ​ສີ​ໂຄດ​ຕະ­ບອງ ຫ່າງ​ຈາກ​ໃຈ­ກາງ​ຕົວ​ເມືອງ​ນະ­ຄອນ­ຫຼວງ​ວຽງ​ຈັນ ປະ­ມານ 17 ກິ­ໂລ­ແມັດ ຖ້າ​ເດີນ­ທາງ​ຈາກ​ໃນ​ເມືອງ​ສາ­ມາດ​ເຂົ້າ​ໄປ​ໄດ້ 2 ທາງ ຄື: ໄປ​ທາງ​ເສັ້ນ­ທາງ​ເກົ້າ​ລ້ຽວ-ເມືອງ​ສັງ​ທອງ ແລະ ເສັ້ນ­ທາງ 13 ເໜືອ 3 ແຍກ​ໜອງ​ແຕ່ງ.

    ທ່ານ ເຄນ ວົງ​ທອງ​ຈິດ ປະ­ທານ​ບໍ­ລິ­ສັດ ສຸດ​ໃຈ​ທ່ອງ​ທ່ຽວ ຈຳ­ກັດ​ຜູ້​ດຽວ ເຈົ້າ​ຂອງ​ແຫຼ່ງ​ທ່ອງ​ທ່ຽວ​ທຳ​ມະ​ຊາດ​ສຸດ​ໃຈ ໃຫ້​ສຳ­ພາດ​ວັນ​ທີ 30 ມີ­ນາ 2019 ວ່າ: ແຫຼ່ງ​ທ່ອງ​ທ່ຽວ​ທຳ​ມະ​ຊາດ​ສຸດ​ໃຈ ມີ​ເນື້ອ­ທີ່ 17 ເຮັກ­ຕາ ເປັນ​ດິນ​ຂອງ​ຕົນ​ເອງ ທີ່​ບໍ່​ສາ­ມາດ​ພັດ­ທະ­ນາ​ເປັນ​ສວນ​ກະ­ສິ­ກຳ​ໄດ້ ເນື່ອງ​ຈາກ​ເປັນ​ປ່າ​ໂຄກ ເປັນ​ພູ ແລະ ມີ​ພະ​ລານ​ຫີນ​ກ້ອນ​ໃຫຍ່​ຢັ່ງ­ຢາຍ​ທົ່ວ​ພື້ນ​ທີ່ ດັ່ງ­ນັ້ນ ຈຶ່ງ​ໄດ້​ພັດ­ທະ­ນາ​ເປັນ​ແຫຼ່ງ​ທ່ອງ​ທ່ຽວ ເລີ່ມ​ແຕ່​ປີ 2013 ແລະ ເປີດ​ໃຫ້​ບໍ­ລິ­ການ​ປີ 2016 ເປັນ­ຕົ້ນ​ມາ ສະ­ຖານ­ທີ່​ທ່ອງ​ທ່ຽວ​ແຫ່ງ​ນີ້ ຕັ້ງ​ຢູ່​ບໍ່​ໄກ​ຈາກ​ຕົວ​ເມືອງ ມີ​ຄວາມ​ສະ­ດວກ​ໃນ​ການ​ເຂົ້າ​ເຖິງ ເໝາະ​ແກ່​ການ​ໄປ​ພັກ­ຜ່ອນ ເນື່ອງ​ຈາກ​ມີ​ຫຼາຍ​ຢ່າງ​ໃຫ້​ບໍ­ລິ­ການ ເປັນ­ຕົ້ນ​ກິດ­ຈະ­ກຳ​ຂີ່​ຊ້າງ 10 ໂຕ ຜູ້​ລະ 50.000 ກີບ​ຕໍ່​ຄັ້ງ ເຮືອນ​ພັກ​ແບບ​ຫ້ອງ​ຄູ່​ຄືນ​ລະ 150.000 ກີບ ມີ​ອາ­ຫານ​ເຊົ້າ ມີ 16 ຫຼັງ ບໍ­ລິ­ການ​ຕຶກ­ເບັດ​ກິ​ໂລ​ລະ 20.000 ກີບ ມີ​ຕູບ​ນັ່ງ 30 ຕູບ ຄ່າ​ບໍ­ລິ­ການ 20.000 ກີບ ຂີ່​ສະ​ລິງ 11 ຈຸດ ໄລ­ຍະ​ທາງ​ຍາວ 1 ກິ­ໂລ­ແມັດ ຜູ້​ລະ 50.000 ກີບ ມີ​ຫ້ອງ​ປະ­ຊຸມ 1 ຫ້ອງ ຮອງ​ຮັບ​ໄດ້ 100 ຄົນ ກິດ­ຈະ­ກຳ​ນອນ​ເຕັ້ນ ມີ​ອາ­ຫານ-ເຄື່ອງ​ດື່ມ ແລະ ອື່ນໆ​ແບບ​ຄົບ​ວົງ​ຈອນ ພິ­ເສດ​ຍັງ​ມີ​ຫຼາຍ​ຢ່າງ​ທີ່​ບໍ່​ໄດ້​ເສຍ​ຄ່າ​ບໍ­ລິ­ການ ເປັນ­ຕົ້ນ ບ່ອນ​ຈອດ​ລົດ ອາບ­ນ້ຳ​ຫ້ວຍ ທ່ຽວ​ຊົມ​ປ່າ ແລະ ສາ­ມາດ​ເອົາ​ອາ­ຫານ-ເຄື່ອງ​ດື່ມ​ມາ​ແຕ່ງ­ກິນ​ເອງ​ໄດ້ ເຊິ່ງ​ເປີດ​ບໍ­ລິ­ການ​ທຸກ​ວັນ ເລີ່ມ​ແຕ່​ເວ­ລາ 6:00-23:00 ໂມງ.

    ນັບ​ແຕ່​ເປີດ​ບໍ­ລິ­ການ​ເປັນ­ຕົ້ນ​ມາ ມີ​ນັກ​ທ່ອງ​ທ່ຽວ​ເຂົ້າ​ມາ​ທ່ຽວ​ຊົມ​ເປັນ​ຈຳ­ນວນ​ຫຼວງ­ຫຼາຍ ໃນ​ນີ້ 70% ແມ່ນ​ນັກ​ທ່ອງ​ທ່ຽວ​ຕ່າງ­ປະ­ເທດ ໂດຍ​ສະ­ເພາະ ນັກ​ທ່ອງ​ທ່ຽວ​ຈີນ ສ ເກົາ­ຫຼີ ສ່ວນ​ນັກ​ທ່ອງ​ທ່ຽວ​ພາຍ​ໃນ ມັກ​ມາ​ທ່ຽວ​ວັນ​ເສົາ ແລະ ວັນ​ອາ­ທິດ ປັດ­ຈຸ­ບັນ ພວກ​ເຮົາ​ມີ​ແຜນ​ຈະ​ພັດ­ທະ­ນາ​ບາງ​ກິດ­ຈະ­ການ​ຕື່ມ​ອີກ ເປັນ­ຕົ້ນ ສ້າງ​ເດີ່ນ​ຕີ​ເປ​ຕັງ ເດີ່ນ​ຕີ​ດອກ​ປີກ​ໄກ່ ນ້ຳ­ພຸ​ໃຫຍ່ ເພີ່ມ​ຈຳ­ນວນ​ເຮືອນ​ພັກ ບ່ອນ​ຫຼິ້ນ​ເດັກ­ນ້ອຍ ແລະ ອື່ນໆ ເພື່ອ​ສ້າງ​ຄວາມ​ສະ­ດວກ​ໃຫ້​ລູກ​ຄ້າ​ໃຫ້​ມີ​ຫຼາຍ​ທາງ​ເລືອກ ທັງ​ເປັນ​ການ​ດຶງ​ດູດ​ນັກ​ທ່ອງ​ທ່ຽວ​ໃຫ້​ມາ​ທ່ຽວ​ຊົມ​ນັບ​ມື້​ຫຼາຍ​ຂຶ້ນ ແລະ ໃນ​ໂອ­ກາດ​ເປີດ​ປີ​ທ່ອງ​ທ່ຽວ ລາວ-ຈີນ 2019 ກໍ​ຄື ບຸນ­ປີ­ໃໝ່​ລາວ​ທີ່​ຈະ​ມາ​ເຖິງ​ນີ້ ກໍ​ຂໍ​ເຊີນ­ຊວນ​ນັກ​ທ່ອງ​ທ່ຽວ​ພາຍ​ໃນ ແລະ ຕ່າງ­ປະ­ເທດ ມາ​ທ່ຽວ​ຊົມ​ສະ­ຖານ­ທີ່​ທ່ອງ​ທ່ຽວ​ແຫ່ງ​ນີ້​ດ້ວຍ.

ຂ່າວທີ່ກ່ຽວຂ້ອງ