ສະຫຼອງວັນຟຣັງໂກໂຟນີສາກົນ 20 ມີນາ

334 04 ມ.ສ. 2019 ຫົວຂໍ້ຂ່າວອື່ນໆ
ສະຫຼອງວັນຟຣັງໂກໂຟນີສາກົນ 20 ມີນາ

    ພິ­ທີ​ສະ­ເຫຼີມ­ສະ­ຫຼອງ​ວັນ​ຟຣັງ​ໂກ​ໂຟ​ນີ​ສາ­ກົນ (OIF) (20 ມີ­ນາ) ຈັດ​ຂຶ້ນ​ວັນ​ທີ 2 ເມ­ສາ 2019 ຢູ່​ຄະ­ນະ​ເສດ­ຖະ­ສາດ ແລະ ບໍ­ລິ­ຫານ​ທຸ­ລະ​ກິດ ມະ­ຫາ­ວິ­ທະ­ຍາ­ໄລ​ແຫ່ງ​ຊາດ (ມຊ) ໂດຍ​ມີ​ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ມີ​ທ່ານ​ນາງ Florence Jeanblane-Risler ເອກ​ອັກ​ຄະ​ລັດ​ຖະ​ທູດ​ຝຣັ່ງ ປະ­ຈຳ​ລາວ ທ່ານ​ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ຫົວ­ໜ້າ​ຫ້ອງ­ການ​ມະ­ຫາ­ວິ­ທະ­ຍາ­ໄລ​ຟຣັງ​ໂກ​ໂຟ​ນີ (AUF) ປະ­ຈຳ​ລາວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ໄດ້​ຍົກ​ໃຫ້​ເຫັນ​ຄວາມ​ໝາຍ-ຄວາມ​ສຳ­ຄັນ​ຂອງ​ວັນ​ຟຣັງ​ໂກ​ໂຟ​ນີ ການ​ສົ່ງ­ເສີມ​ການ​ນຳ​ໃຊ້​ພາ­ສາ​ຝຣັ່ງ​ຢູ່ ສປປ ລາວ ແລະ ການ​ສົ່ງ­ເສີມ​ການ​ພົວ­ພັນ​ຮ່ວມ​ມື ລະ­ຫວ່າງ ສປປ ລາວ ແລະ ອົງ­ການ OIF ພ້ອມ​ນີ້ ທ່ານ​ເອກ​ອັກ​ຄະ​ລັດ​ຖະ​ທູດ​ຝຣັ່ງ ປະ­ຈຳ​ລາວ ຍັງ​ໄດ້​ເນັ້ນ​ຄວາມ​ສຳ­ຄັນ​ຂອງ​ວັນ​ດັ່ງ­ກ່າວ ພ້ອມ​ທັງ​ຍົກ​ໃຫ້​ເຫັນ​ການ​ນຳ​ໃຊ້​ພາ­ສາ​ຝຣັ່ງ​ໃນ​ເວ­ທີ​ສາ­ກົນ ແລະ ການ​ຮ່ວມ​ມື​ດ້ານ​ພາ­ສາ​ຝຣັ່ງ ຢູ່ ສປປ ລາວ ນອກ​ນີ້ ທ່ານ ບຸນ​ເລີດ ສຸດ­ທິ​ຈັກ ຜູ້​ປະ­ສານ​ງານ​ແຫ່ງ​ຊາດ ປະ­ຈຳ​ອົງ­ການ​ດັ່ງ­ກ່າວ ຍັງ​ໄດ້​ອ່ານ​ສານ​ຂອງ​ເລ­ຂາ­ທິ­ການ​ໃຫຍ່ ອົງ­ການ​ຟຣັງ​ໂກ​ໂຟ​ນີ ສຳ­ລັບ​ການ​ສະ­ເຫຼີມ­ສະ­ຫຼອງ​ວັນ​ດັ່ງ­ກ່າວ ປະ­ຈຳ​ປີ 2019 ພາຍ​ໃຕ້​ຫົວ­ຂໍ້ “ກະ­ລຸ­ນາ​ເວົ້າ​ພາ­ສາ​ຝຣັ່ງ”.

    ໃນ​ວັນ​ດັ່ງ­ກ່າວ ຍັງ​ມີ​ການ­ສະ­ແດງ​ສິ­ລະ​ປະ-ວັນ­ນະ­ຄະ­ດີ ຈາກ​ນັກ­ຮຽນ-ນັກ​ສຶກ​ສາ​ພາ­ສາ​ຝຣັ່ງ ກາ­ນວາງ­ສະ­ແດງ​ຮູບ​ພາບ ແລະ ຂໍ້​ມູນ​ຂ່າວ­ສານ​ກ່ຽວ​ກັບ​ການ­ເຄື່ອນ­ໄຫວ​ກິດ­ຈະ­ກຳ​ຕ່າງໆ​ຂອງ​ຄູ-ອາ­ຈານ ແລະ ນັກ­ຮຽນ-ນັກ​ສຶກ​ສາ​ພາ­ສາ​ຝຣັ່ງ ຂອງ ມຊ ໃນ​ຂອບ​ວຽກ​ງານ​ຟຣັງ​ໂກ​ໂຟ​ນີ ເຮັດ​ໃຫ້​ງານ​ດັ່ງ­ກ່າວ​ດຳ­ເນີນ​ໄປ​ດ້ວຍ​ບັນ­ຍາ­ກາດ​ອັນ​ມີ​ຄວາມ​ໝາຍ ແລະ ສຳ­ເລັດ​ຢ່າງ​ຈົບ­ງາມ.

ຂ່າວທີ່ກ່ຽວຂ້ອງ