ທົດລອງນໍາໃຊ້ລະບົບສາກໄຟ ໃຫ້ພາຫະນະທີ່ນໍາໃຊ້ພະລັງງານໄຟຟ້າ

459 03 ມ.ສ. 2019 ຂ່າວໜ້າ​ໜຶ່ງ
ທົດລອງນໍາໃຊ້ລະບົບສາກໄຟ ໃຫ້ພາຫະນະທີ່ນໍາໃຊ້ພະລັງງານໄຟຟ້າ

    ພິ­ທີ​ໄຂ​ໂຄງ­ການ​ສາ­ທິດ​ທົດ​ລອງ​ນຳ​ໃຊ້​ສະ­ຖາ­ນີ​ສາກ ແລະ ລົດ​ທີ່​ຂັບ​ເຄື່ອນ​ດ້ວຍ​ພະ­ລັງ­ງານ​ໄຟ­ຟ້າ ໃນ ສປປ ລາວ ຈັດ​ຂຶ້ນ​ວັນ​ທີ 2 ເມ­ສາ 2019 ຢູ່​ໂຮງ­ແຮມ​ແລນ​ມາກ ໂດຍ​ມີ​ທ່ານ ຄຳ​ມະ­ນີ ອິນ​ທິ​ລາດ ລັດ­ຖະ­ມົນ­ຕີ​ກະ­ຊວງ​ພະ­ລັງ­ງານ ແລະ ບໍ່​ແຮ່ (ພບ) ມີ​ບັນ­ດາ​ຮອງ​ລັດ­ຖະ­ມົນ­ຕີ ຫົວ­ໜ້າ​ກົມ-ຮອງ​ກົມ ຫົວ­ໜ້າ​ພະ​ແນກ-ຮອງ​ພະ​ແນກ ຜູ້­ອຳ­ນວຍ­ການ​ລັດ​ວິ​ສາ​ຫະ​ກິດ ແລະ ແຂກ​ຖືກ​ເຊີນ​ເຂົ້າ​ຮ່ວມ.

    ທ່ານ ຄຳ​ມະ­ນີ ອິນ​ທິ​ລາດ ກ່າວ​ວ່າ: ການ​ພັດ­ທະ­ນາ​ພະ­ລັງ­ງານ ເປັນ​ບຸ­ລິ­ມະ­ສິດ​ໜຶ່ງ​ທີ່​ສຳ­ຄັນ​ໄດ້​ມີ​ການ​ພັດ­ທະ­ນາ ແລະ ມີ​ການ​ປັບ­ປຸງ​ໂຄງ​ສ້າງ​ອຸດ­ສາ­ຫະ­ກຳ​ພະ­ລັງ­ງານ ການ​ຍົກ​ລະ­ດັບ​ຄວາມ​ສາ­ມາດ​ດ້ານ​ວິ­ຊາ​ການ ໄປ​ຄຽງ​ຄູ່​ກັບ​ການ​ນຳ​ໃຊ້​ເຕັກ­ນິກ ເຕັກ​ໂນ​ໂລ​ຊີ​ທັນ​ສະ­ໄໝ ນຳ​ໃຊ້​ຊັບ­ພະ­ຍາ­ກອນ​ທຳ​ມະ​ຊາດ​ຢ່າງ​ປະ­ຢັດ ແລະ ມີ​ປະ​ສິດ­ທິ​ຜົນ​ສູງ​ສຸດ ຫັນ​ເອົາ​ການ​ພັດ­ທະ­ນາ​ພະ­ລັງ­ງານ​ເປັນ​ອຸດ­ສາ­ຫະ­ກຳ ແລະ ທັນ​ສະ­ໄໝ ສະ­ໜອງ​ພະ­ລັງ­ງານ​ໃຫ້​ແກ່​ພາກ​ຄົມ­ມະ­ນາ­ຄົມ-ຂົນ­ສົ່ງ​ຢ່າງ​ພຽງ­ພໍ ການ​ພັດ­ທະ­ນາ​ພະ­ລັງ­ງານ​ຕາມ​ທິດ​ສີ­ຂຽວ ສະ­ອາດ ແລະ ຍືນ​ຍົງ ເພື່ອ​ຫຼຸດ­ຜ່ອນ​ການ​ຂຶ້ນ​ກັບ​ພະ­ລັງ­ງານ​ເຊື້ອ​ໄຟ​ຈາກ​ຕ່າງ­ປະ­ເທດ.

    ປັດ­ຈຸ­ບັນ ພວກ​ເຮົາ​ເລັ່ງ​ໃສ່​ການ​ນຳ​ໃຊ້​ທ່າ­ແຮງ​ທາງ​ດ້ານ​ພະ­ລັງ­ງານ​ໄຟ­ຟ້າ ຈາກ​ແຫຼ່ງ​ພະ­ລັງ­ງານ​ທົດ​ແທນ​ຂອງ​ປະ­ເທດ​ເຮົາ​ເປັນ​ຫຼັກ ໂດຍ​ການ​ເລືອກ​ເອົາ​ພາ­ຫະ­ນະ​ທີ່​ນຳ​ໃຊ້​ໄຟ­ຟ້າ ຫຼື ລົດ­ໄຟ​ຟ້າ (Electric Vehicie ”EV” ແບບ​ປະ­ສົມ​ລະ­ຫວ່າງ​ໄຟ­ຟ້າ​ພະ­ລັງ­ງານ​ໄຮ​ໂດຣ​ເຈນ ພະ­ລັງ­ງານ​ຈາກ​ແກ໊​ສ​ມີ​ເທນ ແລະ ແບບ​ໄຟ­ຟ້າ​ກັບ​ນ້ຳ­ມັນ​ເຊື້ອ​ໄຟ​ຊີ­ວະ​ພາບ) ເປັນ​ພື້ນ­ຖານ​ໃນ​ການ​ພັດ­ທະ­ນາ​ລະ­ບົບ​ການ​ຂົນ­ສົ່ງ​ມົນ​ລະ​ພິດ​ຕ່ຳ ມີ­ຄ່າ​ສິ້ນ​ເປືອງ​ຕ່ຳ ທຽບ­ໃສ່​ນ້ຳ­ມັນ​ເຊື້ອ​ໄຟ​ຈາກ​ຟໍ​ຊີນ.

    ໃນ​ພິ­ທີ​ຍັງ​ໄດ້​ມີ​ການ​ເຊັນ​ສັນ­ຍາ​ຮ່ວມ​ມື​ກັນ ລະ­ຫວ່າງ​ທ່ານ ບຸນ​ອຸ້ມ ສີ​ວັນ­ເພັງ ຜູ້­ອຳ­ນວຍ­ການ​ໃຫຍ່ ລັດ​ວິ​ສາ​ຫະ​ກິດ​ໄຟ­ຟ້າ​ລາວ ແລະ ທ່ານ ບຸນ​ເລີດ ຫຼວງ​ປະ­ເສີດ ປະ­ທານ​ບໍ­ລິ­ສັດ EV Lao ຈຳ­ກັດ ໂດຍ​ຊ້ອງ​ໜ້າ​ທ່ານ ຄຳ​ມະ­ນີ ອິນ​ທິ​ລາດ ແລະ ພາກ­ສ່ວນ​ກ່ຽວ­ຂ້ອງ.

ຂ່າວທີ່ກ່ຽວຂ້ອງ