ຫາລືວຽກງານເຄື່ອຄ່າຍທາງໂພຊະນາການ

261 03 ມ.ສ. 2019 ຂ່າວໜ້າ​ໜຶ່ງ
ຫາລືວຽກງານເຄື່ອຄ່າຍທາງໂພຊະນາການ

    ກອງ​ປະ­ຊຸມ​ປະ­ຈຳ​ປີ​ຂອງ​ສະ­ມາ­ຊິກ​ເຄືອ​ຄ່າຍ​ການ­ຈັດ­ຕັ້ງ​ທາງ​ສັງ­ຄົມ ເພື່ອ​ໂພ­ຊະ​ນາ​ການ ຈັດ​ຂຶ້ນ​ວັນ​ທີ 2-4 ເມ­ສາ 2019 ຢູ່​ໂຮງ­ແຮມ​ຣັດ​ສະ­ໝີ​ພລາ​ຊາ ໂດຍ​ມີ​ທ່ານ​ນາງ ແຄ​ລີ ຄຳ​ພູ­ໄຊ ຜູ້​ຊ່ຽວ­ຊານ​ອາ­ວຸ­ໂສ​ດ້ານ​ສຸ­ຂະ­ພາບ ອົງ­ການ​ຊ່ວຍ­ເຫຼືອ​ເດັກ ທ່ານ​ນາງ ຈັນ​ສີ ພິມ​ພະ­ຈັນ ປະ­ທານ​ສະ­ມາ­ຄົມ​ສົ່ງ­ເສີມ​ສຸ­ຂະ­ພາບ​ຄອບ­ຄົວ ບັນ­ດາ​ສະ­ມາ­ຊິກ​ເຄືອ​ຄ່າຍ​ອົງ​ການ­ຈັດ­ຕັ້ງ​ທາງ​ສັງ­ຄົມ ເພື່ອ​ໂພ­ຊະ​ນາ​ການ ຈາກ​ບັນ­ດາ​ແຂວງ ນະ­ຄອນ­ຫຼວງ ໃນ​ທົ່ວ​ປະ­ເທດ.

    ຈຸດ­ປະ­ສົງ​ເພື່ອ​ເປີດ​ໂອ­ກາດ​ໃຫ້​ສະ­ມາ­ຊິກ​ໄດ້​ຮຽນ​ຮູ້ ແລະ ແລກ­ປ່ຽນ​ບົດ­ຮຽນ​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ດ້ານ​ໂພ­ຊະ​ນາ​ການ ເປັນ​ການ​ແຈ້ງ​ໃຫ້​ສະ­ມາ­ຊິກ ແລະ ຜູ້​ມີ​ສ່ວນ​ກ່ຽວ­ຂ້ອງ​ກັບ​ວຽກ​ງານ​ໂພ­ຊະ​ນາ​ການ ຮັບ​ຮູ້​ກິດ­ຈະ­ກຳ​ໃນ­ຕໍ່­ໜ້າ​ຂອງ​ເຄືອ​ຄ່າຍ ທັງ​ເປັນ​ການ​ລະ­ດົມ​ແນວ​ຄິດ​ຈາກ​ສະ­ມາ­ຊິກ ເພື່ອ​ສ້າງ​ແຜນ​ວຽກ​ງານ​ປະ­ຈຳ​ປີ 2019 ແລະ ດຳ­ເນີນ​ການ​ເລືອກ​ຕັ້ງ​ຄະ­ນະ​ກຳ­ມະ­ການ​ບໍ­ລິ­ຫານ​ງານ ສະ­ມາ­ຊິກ​ເຄືອ​ຄ່າຍ​ອົງ​ການ­ຈັດ­ຕັ້ງ​ທາງ​ສັງ­ຄົມ​ເພື່ອ​ໂພ­ຊະ​ນາ​ການ.

    ທ່ານ​ນາງ ແຄ​ລີ ຄຳ​ພູ­ໄຊ ກ່າວ​ວ່າ: ກອງ​ປະ­ຊຸມ​ຄັ້ງ​ນີ້ ມີ​ຄວາມ​ສຳ­ຄັນ​ຫຼາຍ ເພາະ​ບັນ­ຫາ​ການ​ຂາດ​ສານ​ອາ­ຫານ ສ້າງ​ຜົນ​ກະ­ທົບ​ຕໍ່ ສປປ ລາວ ເຄືອ​ຄ່າຍ​ອົງ​ການ­ຈັດ­ຕັ້ງ​ທາງ​ສັງ­ຄົມ ເພື່ອ​ສົ່ງ­ເສີມ​ໂພ­ຊະ​ນາ​ການ ແມ່ນ​ເຄືອ​ຄ່າຍ​ທີ່​ສ້າງ​ຂຶ້ນ​ແຕ່ 2014 ເພື່ອ​ສົ່ງ­ເສີມ​ການ​ປັບ­ປຸງ​ສະ­ຖາ­ນະ​ພາບ​ດ້ານ​ໂພ­ຊະ​ນາ​ການ​ຂອງ​ປະ­ຊາ­ຊົນ​ໃນ ສປປ ລາວ ໂດຍ​ສະ­ເພາະ ແມ່­ຍິງ ແລະ ເດັກ­ນ້ອຍ ໄລ­ຍະ 1.000 ວັນ​ທຳ​ອິດ ກອງ​ປະ­ຊຸມ​ຄັ້ງ​ນີ້ ເປັນ​ທາງ​ອອກ​ອັນ​ໜຶ່ງ​ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ໂພ­ຊະ​ນາ​ການ​ຢ່າງ​ມີ​ປະ​ສິດ­ທິ​ຜົນ ເພາະ​ສະ­ມາ­ຊິກ​ເຄືອ​ຄ່າຍ​ຜູ້​ປະ­ຕິ­ບັດ​ໜ້າ­ທີ່​ຕົວ​ຈິງ ຈະ​ໄດ້​ພ້ອມ​ກັນ​ສະ­ເໜີ​ທິດ​ທາງ ຂໍ້​ຫຍຸ້ງ­ຍາກ ຂໍ້​ສະ­ດວກ​ໃນ​ການ​ປັບ­ປຸງ​ແກ້​ໄຂ ເຮັດ​ໃຫ້​ວຽກ​ງານ​ດັ່ງ­ກ່າວ​ມີ​ຄວາມ​ສອດ­ຄ່ອງ ໂປ່ງ​ໃສ ເປັນ​ເອ­ກະ​ພາບ​ກັນ​ໃນ​ການ­ຈັດ­ຕັ້ງ​ປະ­ຕິ­ບັດ ແລະ ບັນ­ລຸ​ຜົນ​ຕາມ​ຄາດ­ໝາຍ​ທີ່​ວາງ​ໄວ້.

ຂ່າວທີ່ກ່ຽວຂ້ອງ