ຂ່າວຫຼ້າສຸດ

ສະຖາບັນບຸນເກີດ ໄຂຫ້ອງການຜູ້ຕາງໜ້າຫຼັກສູດການສຶກສາ ຜ່ານອອນລາຍ

560 03 ມ.ສ. 2019 ຂ່າວໜ້າ​ໜຶ່ງ
ສະຖາບັນບຸນເກີດ ໄຂຫ້ອງການຜູ້ຕາງໜ້າຫຼັກສູດການສຶກສາ ຜ່ານອອນລາຍ

    ສະ​ຖາ​ບັນ​ບຸນ​ເກີດ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ໄຂ​ຫ້ອງ­ການ​ຜູ້­ຕາງ­ໜ້າ​ຂອງ​ວິ­ທະ­ຍາ­ໄລ Universal Ministries of The King’s College (UMKC) ເຊິ່ງ​ເປັນ​ຫຼັກ­ສູດ​ການ​ຮຽນ​ແບບ​ອອນ​ລາຍ​ຈາກ UMKC ຟໍ​ລິ​ດາ ສ ອາ​ເມ​ຣິ​ກາ ຂຶ້ນ​ວັນ​ທີ 1 ເມ­ສາ 2019 ຢູ່​ສະ​ຖາ​ບັນ​ດັ່ງ­ກ່າວ ໂດຍ​ມີ​ທ່ານ ວິ­ໄລ ນ້ອຍ​ມະ­ນີ ຕາງ­ໜ້າ​ຫ້ອງ­ການ​ສົ່ງ­ເສີມ​ການ​ສຶກ​ສາ​ພາກ​ເອ­ກະ​ຊົນ ກະ­ຊວງ​ສຶກ​ສາ​ທິ​ການ ແລະ ກີ­ລາ ທ່ານ ນົບ​ພະ​ດົນ ກ້ອນ​ຄຳ ປະ­ທານ​ບໍ­ລິ­ຫານ​ວິ­ທະ­ຍາ­ໄລ UMKC ພ້ອມ​ດ້ວຍ​ປະ­ທານ​ສະ​ຖາ​ບັນ​ບຸນ​ເກີດ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ບຸນ​ເກີດ ສີ​ສຸ­ພັນ​ທອງ ປະ­ທານ​ສະ​ຖາ​ບັນ​ບຸນ​ເກີດ ກ່າວ​ວ່າ: ການ​ໄຂ​ຫ້ອງ­ການ​ຜູ້­ຕາງ­ໜ້າ​ຂອງ​ວິ­ທະ­ຍາ­ໄລ UMKC ເປັນ​ນິ­ມິດ​ໝາຍ​ອັນ​ດີ ໃຫ້​ຜູ້​ທີ່​ສົນ­ໃຈ​ໃນ​ການ​ສຶກ​ສາ​ຄົ້ນ­ຄວ້າ​ຮ່ຳ­ຮຽນ​ຫຼາຍ​ປະ­ເທດ​ທົ່ວ​ໂລກ ກໍ​ນຳ​ໃຊ້​ວິ­ທີ​ການ​ຮຽນ​ແບບ​ອອນ​ລາຍ ເຊິ່ງ​ເໝາະ​ສົມ​ສຳ­ລັບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ໃນ​ປັດ­ຈຸ­ບັນ ສປປ ລາວ ຍິ່ງ​ມີ​ຄວາມ​ຈຳ­ເປັນ​ຢ່າງ​ຍິ່ງ​ໃນ​ການ​ພັດ­ທະ­ນາ​ຍົກ​ລະ­ດັບ​ວິ­ຊາ​ການ ຄວາມ​ຮູ້​ທາງ​ດ້ານ​ເຕັກ​ໂນ​ໂລ​ຊີ​ທີ່​ທັນ​ສະ­ໄໝ ເພື່ອ​ສ້າງ​ຄວາມ​ສະ­ດວກ ບໍ່​ຈຳ­ເປັນ​ຕ້ອງ​ໄປ​ຮຽນ​ຢູ່​ຕ່າງ­ປະ­ເທດ ແຕ່​ເອົາ​ຕ່າງ­ປະ­ເທດ​ມາ​ສອນ​ຢູ່​ບ້ານ​ເຮົາ ເປັນ​ການ​ຫຼຸດ­ຜ່ອນ​ຕົ້ນ​ທຶນ​ການ​ເດີນ­ທາງ ຄ່າ​ຮຽນ​ຕ່າງໆ ເປັນ​ການ​ຮຽນ​ແບບ​ທ່ອງ​ທ່ຽວ ພາຍ­ຫຼັງ​ການ​ສຶກ​ສາ​ຄົ້ນ­ຄວ້າ​ສຳ­ເລັດ ໃບ​ປະ​ກາ​ສະ​ນິ​ຍະ​ບັດ​ຈະ​ຖືກ​ສົ່ງ​ຕົງ​ມາ​ແຕ່​ຟໍ​ລິ​ດາ ເຊິ່ງ​ການ​ມອບ-ຮັບ​ໃບ​ປະ​ກາ​ສະ​ນິ​ຍະ​ບັດ ອາດ​ມີ​ການ​ປ່ຽນ​ໄປ​ແຕ່​ລະ​ປີ ອາດ​ຈະ​ຈັດ​ຢູ່ ສປປ ລາວ ຫຼື ປະ­ເທດ​ຕ່າງໆ ທີ່​ມີ​ຫ້ອງ­ການ​ຜູ້­ຕາງ­ໜ້າ​ຕາມ​ເງື່ອນ­ໄຂ​ເອື້ອ​ອຳ­ນວຍ.

    ກ່ອນ​ໜ້າ​ນີ້​ຫ້ອງ­ການ​ຜູ້­ຕາງ­ໜ້າ ມີ​ສຳ­ນັກ­ງານ​ຢູ່​ຫຼາຍ​ປະ­ເທດ ເປັນ­ຕົ້ນ ມີ​ຢູ່​ປະ­ເທດ​ມຽນ​ມາ ສິງ­ກະ­ໂປ ມາ​ເລ​ເຊຍ ສະ­ເພາະ ສປປ ລາວ ເປັນ​ຫ້ອງ­ການ​ຜູ້­ຕາງ­ໜ້າ​ແຫ່ງ​ທຳ​ອິດ​ຢູ່​ສະ​ຖາ​ບັນ​ບຸນ​ເກີດ ໂດຍ​ຜູ້​ທີ່​ສົນ­ໃຈ​ຢາກ​ສຶກ​ສາ​ຮ່ຳ­ຮຽນ​ຕໍ່​ລະ­ດັບ​ປະ­ລິນ­ຍາ​ໂທ ປະ­ລິນ­ຍາ​ເອກ ກໍ​ສາ­ມາດ​ມາ​ສຶກ​ສາ​ຫາ​ຂໍ້​ມູນ ແລະ ສະ­ໝັກ​ຮຽນ​ນຳ​ຫ້ອງ­ການ​ຜູ້­ຕາງ­ໜ້າ​ຢູ່​ສະ​ຖາ​ບັນ​ບຸນ​ເກີດ ເຊິ່ງ​ມີ​ທຸກ​ສາ­ຂາ​ວິ­ຊາ​ຮຽນ ສາ­ມາດ​ເລືອກ​ຮຽນ​ໄດ້​ຕາມ​ຄວາມ​ຕ້ອງ­ການ.

ຂ່າວທີ່ກ່ຽວຂ້ອງ