ສະກູ໊ດ ສາຍການບິນລາຄາປະຢັດ ໄຂບໍລິການໃນລາວ 3 ຖ້ຽວຕໍ່ອາທິດ

263 03 ມ.ສ. 2019 ຂ່າວໜ້າ​ໜຶ່ງ
ສະກູ໊ດ ສາຍການບິນລາຄາປະຢັດ ໄຂບໍລິການໃນລາວ 3 ຖ້ຽວຕໍ່ອາທິດ

    ສາຍ​ການ­ບິນ​ສະ​ກູ໊ດ (Scoot) ເປັນ​ສາຍ​ການ­ບິນ​ລາ­ຄາ​ປະ­ຢັດ​ຂອງ​ສາຍ​ການ­ບິນ​ສິງ­ກະ­ໂປ ເປີດ​ຖ້ຽວ​ບິນ​ປະ­ຖົມ​ມະ­ລຶກ ລາວ-ສິງ­ກະ­ໂປ ຂຶ້ນ​ວັນ​ທີ 1 ເມ­ສາ 2019 ເຊິ່ງ​ເປັນ​ການ​ເລີ່ມ​ຕົ້ນ​ໃຫ້​ບໍ­ລິ­ການ 3 ຖ້ຽວ​ຕໍ່​ອາ­ທິດ (ວັນ​ຈັນ ພະ­ຫັດ ເສົາ) ເສັ້ນ­ທາງ​ຈາກ​ນະ­ຄອນ­ຫຼວງ​ພະ​ບາງ ແລະ ນະ­ຄອນ­ຫຼວງ​ວຽງ​ຈັນ-ສິງ­ກະ­ໂປ ການ​ບໍ­ລິ­ການ​ນີ້​ຖືກ​ໂອນ​ມາ​ຈາກ​ສາຍ​ການ­ບິນ​ພັນ­ທະ​ມິດ ກໍ​ຄື ສາຍ​ການ­ບິນ SilkAir ເຊິ່ງ​ປັດ­ຈຸ­ບັນ ສະ​ກູ໊ດ ເປັນ​ສາຍ​ການ­ບິນ​ດຽວ​ທີ່​ໃຫ້​ບໍ­ລິ­ການ​ບິນ​ຕົງ ລາວ-ສິງ­ກະ­ໂປ.

    ວັນ​ທີ 1 ເມ­ສາ 2019 ເຮືອ­ບິນ A320 ທີ່​ມີ​ຊື່­ວ່າ Yellow Tail ໄດ້​ບິນ​ມາ​ຮອດ​ສະ­ໜາມ​ບິນ​ຫຼວງ​ພະ​ບາງ ແລະ ສະ­ໜາມ​ບິນ​ສາ­ກົນ​ວັດ​ໄຕ ແລະ ໄດ້​ມີ​ການ​ສີດ​ນ້ຳ​ຕ້ອນ­ຮັບ​ຕາມ​ປະ­ເພ­ນີ​ຢູ່​ທັງ 2 ສະ­ໜາມ​ບິນ ເຊິ່ງ​ເຮືອ­ບິນ​ຖ້ຽວ​ດັ່ງ­ກ່າວ ແມ່ນ​ບິນ​ວົນ​ຕາມ​ເສັ້ນ­ທາງ​ແບບ​ຜ່ານ​ຫຼາຍ​ປາຍ­ທາງ ຄື: ເດີນ­ທາງ​ຈາກ​ສິງ­ກະ­ໂປ-ຫຼວງ​ພະ​ບາງ ແລະ ມາ​ຕໍ່​ນະ­ຄອນ­ຫຼວງ​ວຽງ​ຈັນ ກ່ອນ​ຈະ​ບິນ​ກັບ​ສິງ­ກະ­ໂປ ເພື່ອ​ເປັນ​ການ​ສະ­ເຫຼີມ­ສະ­ຫຼອງ​ຖ້ຽວ​ບິນ​ປະ­ຖົມ​ມະ­ລຶກ​ມາ­ສູ່​ລາວ ສະ​ກູ໊ດ ໄດ້​ຈັດ​ຖ້ຽວ​ບິນ​ທີ່​ເປັນ​ເອ­ກະ­ລັກ​ສະ­ເພາະ ໂດຍ​ການ​ເປີດ​ດົນ­ຕີ​ພື້ນ­ເມືອງ​ລາວ ຜ່ານ​ລະ­ບົບ​ສຽງ​ພ້ອມ​ທັງ​ຈັດ​ກິດ­ຈະ­ກຳ​ທົດ​ສອບ​ຄວາມ​ຮູ້​ຂອງ​ຜູ້­ໂດຍ­ສານ​ເທິງ​ເຮືອ­ບິນ​ກ່ຽວ​ກັບ​ລາວ ແລະ ສະ​ກູ໊ດ ມີ​ຜູ້­ໂດຍ­ສານ​ທີ່​ໂຊກ​ດີ 5 ທ່ານ​ທີ່​ໄດ້​ຮັບ​ລາ­ງວັນ ເຊັ່ນ: ບັດ​ສົມ​ມະ​ນາ​ຄຸນ​ສະ​ກູ໊ດ ມູນ​ຄ່າ 100 ໂດ​ລາ​ສິງ­ກະ­ໂປ ກະ­ເປົາ​ສຳ­ລັບ​ໃສ່​ອຸ­ປະ­ກອນ​ເພື່ອ​ການ​ເດີນ­ທາງ ໜັງ­ສື​ນຳ​ທ່ຽວ​ລາວ ແລະ ບັດ​ເຂົ້າ​ນຳ​ໃຊ້​ບໍ­ລິ­ການ​ຫ້ອງ​ພັກ​ຜູ້­ໂດຍ­ສານ​ຂາ​ອອກ​ຂອງ​ສະ​ກູ໊ດ (Scoot-in-Style).

    ສາຍ​ການ­ບິນ​ສະ​ກູ໊ດ ໄດ້​ຈັດ​ງານ​ສະ­ເຫຼີມ­ສະ­ຫຼອງ​ເປີດ​ຖ້ຽວ​ບິນ​ຮອບ​ປະ­ຖົມ​ປະ​ລຶກ​ຂຶ້ນ​ໃນ​ວັນ​ດັ່ງ­ກ່າວ ຢູ່​ຮ້ານ​ອາ­ຫານ​ເບວ​ຈີ້ ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ວິ​ນັອດ ຄາ​ນັນ ປະ­ທານ​ເຈົ້າ​ໜ້າ­ທີ່​ບໍ­ລິ­ຫານ​ຝ່າຍ​ການ​ຄ້າ ສະ​ກູ໊ດ ມີ​ທ່ານ ໂດ​ມິ​ນິກ ໂກ ເອກ​ອັກ​ຄະ​ລັດ​ຖະ​ທູດ​ປະ­ເທດ​ສິງ­ກະ­ໂປ ປະ­ຈຳ​ລາວ ທ່ານ ວັນ­ເພັງ ຈັນ­ທະ​ພອນ ຫົວ­ໜ້າ​ກົມ​ການ­ບິນ​ພົນ​ລະ​ເຮືອນ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ສຳ­ລັບ​ລາ­ຄາ​ຖ້ຽວ​ບິນ​ທີ່​ລວມ​ອາ­ກອນ​ຂອງ​ຊັ້ນ​ປະ­ຢັດ ຈາກ​ນະ­ຄອນ­ຫຼວງ​ພະ​ບາງ-ສິງ­ກະ­ໂປ ເລີ່ມ​ແຕ່ 65 ໂດ​ລາ​ສະ­ຫະ­ລັດ​ຕໍ່​ຖ້ຽວ ສ່ວນ​ເສັ້ນ­ທາງ​ນະ­ຄອນ­ຫຼວງ​ວຽງ​ຈັນ-ສິງ­ກະ­ໂປ ລາ­ຄາ​ເລີ່ມ​ແຕ່ 75 ໂດ​ລາ​ສະ­ຫະ­ລັດ ຂໍ້​ມູນ​ເພີ່ມ​ຕື່ມ​ທີ່ FlyScoot.com ສະ​ກູ໊ດ ເລີ່ມ​ໃຫ້​ບໍ­ລິ­ການ​ຄັ້ງ​ທຳ​ອິດ​ໃນ​ເດືອນ​ມິ­ຖຸ­ນາ 2012 ແລະ ໄດ້​ຊະ­ນະ​ຫຼາຍ​ລາ­ງວັນ ເຊັ່ນ: ລາ­ງວັນ​ສາຍ​ການ­ບິນ​ລາ­ຄາ​ປະ­ຢັດ​ທີ່​ດີ​ທີ່​ສຸດ (ພາກ​ພື້ນ​ອາ­ຊີ-ປາ​ຊີ​ຟິກ) ໂດຍ AirlineRatings.com ປີ 2015-2018 ແລະ ຕິດ 10 ອັນ​ດັບ​ທຳ​ອິດ​ຂອງ​ສາຍ​ການ­ບິນ​ລາ­ຄາ​ປະ­ຢັດ​ທີ່​ດີ​ທີ່​ສຸດ​ໃນ​ໂລກ ໃນ​ປີ 2015 ແລະ 2018 ໂດຍ​ສະ​ກາຍ​ແທຼັກ.

ຂ່າວທີ່ກ່ຽວຂ້ອງ