ຮອງນາຍົກ ເນັ້ນຂະແໜງ ປທສ ສືບຕໍ່ຍົກສູງການຄຸ້ມຄອງມະຫາພາກ ແລະ ການສ້າງບຸຄະລາກອນ

266 03 ມ.ສ. 2019 ຂ່າວໜ້າ​ໜຶ່ງ

    ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ໄດ້​ເນັ້ນ​ໃຫ້​ຂະ­ແໜງ­ການ​ໄປ­ສະ­ນີ ໂທລະ​ຄົມ­ມະ­ນາ­ຄົມ ແລະ ການ​ສື່­ສານ (ປທສ) ສືບ­ຕໍ່​ຍົກ​ສູງ​ພາ­ລະ​ບົດ­ບາດ​ການ​ຄຸ້ມ​ຄອງ​ມະ­ຫາ​ພາກ ແລະ ຄຸ້ມ​ຄອງ​ໂຄງ​ລ່າງ​ເຕັກ­ນິກ ໄປ​ພ້ອມ​ກັບ​ການ​ເອົາ­ໃຈ­ໃສ່​ເປັນ​ພິ­ເສດ ໃນ​ການ​ສ້າງ​ບຸ​ຄະ­ລາ​ກອນ​ໃຫ້​ມີ​ຄວາມ​ຮູ້​ໃນ​ການ​ນຳ​ໃຊ້​ອຸ­ປະ­ກອນ​ເອ​ເລັກ​ໂຕຣ​ນິກ ໃຫ້​ທັນ​ກັບ​ການ​ຂະ­ຫຍາຍ­ຕົວ​ຂອງ​ວຽກ​ງານ​ເຕັກ​ໂນ​ໂລ​ຊີ​ການ​ສື່­ສານ​ຂໍ້​ມູນ​ຂ່າວ­ສານ (ICT) ແລະ ເປັນ​ເຈົ້າ​ການ​ໃນ​ການ​ໂຄ­ສະ­ນາ​ເຜີຍ­ແຜ່ ວິ­ທີ​ນຳ​ໃຊ້​ທີ່​ເປັນ​ປະ­ໂຫຍດ​ຂອງ​ການ​ນຳ​ໃຊ້​ສື່​ສັງ­ຄົມ​ອອນ​ລາຍ ຄຽງ​ຄູ່​ກັບ​ມາດ​ຕະ­ການ​ແກ້​ໄຂ​ປາ­ກົດ­ການ​ຫຍໍ້­ທໍ້.

    ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ໄດ້​ກ່າວ​ໃນ​ໂອ­ກາດ​ໂອ້​ລົມ​ຕໍ່​ກອງ​ປະ­ຊຸມ​ວຽກ​ງານ​ຂະ­ແໜງ ປທສ ປະ­ຈຳ​ປີ 2018 ໃນ​ວັນ​ທີ 2 ເມ­ສາ 2019 ທີ່​ນະ­ຄອນ­ຫຼວງ​ວຽງ​ຈັນ ໂດຍ​ໄດ້​ສະ­ແດງ​ຄວາມ​ຍ້ອງ­ຍໍ​ຊົມ­ເຊີຍ​ຕໍ່​ຄຳ​ຂວັນ​ຂອງ​ກອງ​ປະ­ຊຸມ ໃນ​ຫົວ­ຂໍ້ “ສົ່ງ­ເສີມ ແລະ ຫັນ​ການ​ຄຸ້ມ​ຄອງ​ລັດ ດ້ວຍ​ລະ­ບົບ​ດິ​ຈິ​ຕອນ” ທີ່​ສ່ອງ​ແສງ​ເຖິງ​ຄວາມ​ຮັບ­ຜິດ­ຊອບ​ຂອງ​ທຸກ​ຂະ­ແໜງ­ການ​ຕໍ່​ວຽກ​ງານ​ໄອ​ຊີ​ທີ ແລະ ສຸມ​ໃສ່​ຈັດ​ຕັ້ງ​ປະ­ຕິ­ບັດ​ແຜນ​ພັດ­ທະ­ນາ ຂະ­ແໜງ ປທສ 5 ປີ ຄັ້ງ​ທີ II (2016-2020) ດ້ວຍ​ບັນ­ຍາ­ກາດ​ຄຶກ­ຄື້ນ ແລະ ມີ​ຜົນ­ສຳ­ເລັດ​ຢ່າງ​ໜ້າ​ເພິ່ງ​ພໍ­ໃຈ​ຫຼາຍ​ປະ­ການ ໂດຍ​ທ່ານ ສົມ​ດີ ດວງ​ດີ ໄດ້​ເນັ້ນ​ໃຫ້​ຂະ­ແໜງ­ການ ປທສ ສືບ­ຕໍ່​ຈັດ​ຕັ້ງ​ຜັນ​ຂະ­ຫຍາຍ​ວິ­ໄສ​ທັດ ຮອດ​ປີ 2030 ແຜນ​ຍຸດ​ທະ​ສາດ ຮອດ​ປີ 2025 ແລະ ແຜນ​ພັດ­ທະ­ນາ 5 ປີ 2016-2020 ໃຫ້​ບັນ­ລຸ​ຕາມ​ຄາດ­ໝາຍ​ທີ່​ວາງ​ໄວ້ ລວມ​ທັງ​ເອົາ­ໃຈ­ໃສ່​ໃນ​ການ​ໂຄ­ສະ­ນາ​ເຜີຍ­ແຜ່​ບັນ­ດາ​ນິ­ຕິ​ກຳ ທັງ​ກົດ­ໝາຍ ລຸ່ມ​ກົດ­ໝາຍ​ດ້ານ​ໄປ­ສະ­ນີ ໂທລະ​ຄົມ­ມະ­ນາ­ຄົມ ແລະ ອິນ​ເຕີ​ເນັດ​ໃຫ້​ຄົບ​ຊຸດ ຄຽງ​ຄູ່​ກັບ​ການ​ປັບ­ປຸງ ແລະ ສ້າງ​ໃໝ່​ໃຫ້​ທັນ​ກັບ​ສະ­ພາບ.

ຂ່າວທີ່ກ່ຽວຂ້ອງ