ສາລະວັນ ຄອງເຈົ້າຫຼຽນຄຳ ເປຕັງທົ່ວປະເທດ

182 03 ມ.ສ. 2019 ວົງຈອນກີລາ
ສາລະວັນ ຄອງເຈົ້າຫຼຽນຄຳ ເປຕັງທົ່ວປະເທດ

    ນາງ ຈັນ​ສະ­ໝອນ ວົງ​ສະ​ຫວັດ ນັກ­ກີ­ລາ​ເປ​ຕັງ​ທີມ​ຊາດ​ລາວ ຄະ­ນະ​ຮັບ­ຜິດ­ຊອບ​ຈັດ­ການ​ແຂ່ງ­ຂັນ​ກີ­ລາ​ເປ​ຕັງ ທົ່ວ​ປະ­ເທດ ຊີງ​ຂັນ​ປະ­ທານ​ສະ­ພາ​ແຫ່ງ​ຊາດ ຄັ້ງ​ທີ lX ປະ­ຈຳ​ປີ 2019 ແຈ້ງ​ໃຫ້​ຮູ້­ເມື່ອ​ບໍ່​ດົນ​ມາ​ນີ້​ວ່າ: ວັນ​ທີ 28-30 ມີ­ນາ 2019 ສະ­ຫະ­ພັນ​ເປ​ຕັງ​ແຂວງ​ສາ­ລະ​ວັນ ສົມ­ທົບ​ກັບ​ພະ​ແນກ​ສຶກ​ສາ​ທິ​ການ ແລະ ກີ­ລາ ແຂວງ​ສາ­ລະ​ວັນ ຈັດ​ແຂ່ງ­ຂັນ​ກີ­ລາ​ເປ​ຕັງ ທົ່ວ​ປະ­ເທດ ຊີງ​ຂັນ​ປະ­ທານ​ສະ­ພາ​ແຫ່ງ​ຊາດ ຄັ້ງ​ທີ lX ປະ­ຈຳ​ປີ 2019 ເພື່ອ​ເປັນ​ການ​ຄັດ​ເລືອກ​ທີມ​ຊາດ ກຽມ​ສົ່ງ​ເຂົ້າ​ລະ­ດັບ​ພາກ​ພື້ນ ອາ​ນຸ​ພາກ​ພື້ນ ແລະ ສາ­ກົນ ໃນ­ຕໍ່­ໜ້າ ໂດຍ​ສະ­ເພາະ​ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 30 ຢູ່​ປະ­ເທດ​ຟິ​ລິບ​ປິນ ໃນ​ທ້າຍ​ປີ​ນີ້.

    ການ​ແຂ່ງ­ຂັນ​ຄັ້ງ​ນີ້ ມີ​ນັກ­ກີ­ລາ 9 ພາກ­ສ່ວນ​ເຂົ້າ​ຮ່ວມ ປະ­ກອບ​ມີ 7 ລາຍ­ການ ຄື: ປະ­ເພດ​ດ່ຽວ​ຍິງ ດ່ຽວ​ຊາຍ ທີມ​ຄູ່​ຍິງ ທີມ​ຄູ່​ຊາຍ ທີມ​ຊຸດ​ຊາຍ ທີມ​ຊຸດ​ຍິງ ແລະ ທີມ​ຄູ່​ອາ­ວຸ­ໂສ ຮຸ່ນ​ອາ­ຍຸ 50 ປີ​ຂຶ້ນ​ໄປ ຜ່ານ​ການ​ແຂ່ງ­ຂັນ​ແຂວງ​ສາ­ລະ​ວັນ ສາ­ມາດ​ຍາດ​ໄດ້ 4 ຫຼຽນ​ຄຳ 3 ຫຼຽນ​ເງິນ 5 ຫຼຽນ​ທອງ ເປັນ​ເຈົ້າ​ຫຼຽນ​ຄຳ​ລາຍ­ການ​ດັ່ງ­ກ່າວ ອັນ​ດັບ​ທີ 2 ແມ່ນ​ແຂວງ​ບໍ່​ແກ້ວ 1 ຫຼຽນ​ຄຳ 1 ຫຼຽນ​ເງິນ ທີ 3 ຮ່ວມ​ແຂວງ​ສະ­ຫວັນ​ນະ​ເຂດ ແລະ ທະ­ນາ­ຄານ ລາວ-ຫວຽດ­ນາມ 1 ຫຼຽນ​ຄຳ 1 ຫຼຽນ​ທອງ ທີ 4 ແຂວງ​ຄຳ​ມ່ວນ 1 ຫຼຽນ​ເງິນ 3 ຫຼຽນ​ທອງ. 

    ໃຫ້​ກຽດ​ເຂົ້າ​ຮ່ວມ ແລະ ມອບ​ລາ­ງວັນ​ຂອງ​ທ່ານ ບຸນ​ປອນ ລັດ­ຕະ­ນະ​ວົງ ຮອງ​ປະ­ທານ​ສະ­ພາ​ແຫ່ງ​ຊາດ ທ່ານ ສີ​ສຸ­ວັນ ວົງ​ຈອມ​ສີ ເຈົ້າ­ແຂວງ​ສາ­ລະ​ວັນ ທ່ານ ສົມ​ພູ ພົງ­ສາ ຜູ້​ຊ່ວຍ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ຮອງ​ປະ­ທານ ແລະ ເລ­ຂາ­ທິ­ການ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ.

ຂ່າວທີ່ກ່ຽວຂ້ອງ