ຍ້ອງຍໍ ຢູ-12 ນະຄອນຫຼວງ ທີ່ສ້າງຜົນງານ ທີ່ປະເທດໄທ

208 03 ມ.ສ. 2019 ວົງຈອນກີລາ
ຍ້ອງຍໍ ຢູ-12 ນະຄອນຫຼວງ ທີ່ສ້າງຜົນງານ ທີ່ປະເທດໄທ

    ພິ­ທີ​ສະ­ຫຼຸບ​ຜົນ­ງານ​ຂອງ​ນັກ​ເຕະ ຢູ-12 ທີມ​ເຍົາ­ວະ​ຊົນ ນະ­ຄອນ­ຫຼວງ​ວຽງ​ຈັນ (ນວ) ທີ່​ຄວ້າ​ອັນ​ດັບ​ທີ 2 ເຕະ­ບານ​ຊີງ​ແຊັມ​ນາໆຊາດ ທີ່​ປະ­ເທດ​ໄທ ຈັດ​ຂຶ້ນ​ວັນ​ທີ 29 ມີ­ນາ 2019 ຜ່ານ​ມາ ທີ່​ຮ້ານ​ອາ­ຫານ​ສະ­ປອດ​ວິວ ເມືອງ​ສີ​ສັດ­ຕະ​ນາກ ນວ ໂດຍ​ມີ​ທ່ານ ຊົມ​ພູ ແກ້ວ​ປັນ­ຍາ ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ທ່ານ ກະ­ເສມ ອິນ​ທະ­ລາ ຮອງ​ປະ­ທານ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ ທ່ານ ວຽງ​ສະ­ຫວັນ ແສງ​ຈັນ ປະ­ທານ​ສະ­ຫະ­ພັນ​ບານ­ເຕະ ນວ ພ້ອມ​ດ້ວຍ​ຄະ­ນະ​ຄູ​ເຝິກ ນັກ­ກີ­ລາ ພໍ່​ແມ່​ນັກ­ກີ­ລາ​ເຂົ້າ​ຮ່ວມ.

    ທ່ານ ວຽງ​ສະ­ຫວັນ ແສງ​ຈັນ ກ່າວ​ວ່າ: ການ​ຈັດ​ພິ­ທີ​ສະ­ຫຼຸບ​ຜົນ­ສຳ­ເລັດ​ຂອງ​ນັກ​ເຕະ ຢູ-12 ນວ ໃນ​ຄັ້ງ​ນີ ແມ່ນ​ມີ​ຄວາມ​ໝາຍ​ຄວາມ​ສຳ­ຄັນ​ຫຼາຍ ເປັນ​ບ່ອນ​ອີງ​ໃຫ້​ນັກ­ກີ­ລາ​ສືບ­ຕໍ່​ຝຶກ​ຝົນ​ຫຼໍ່​ຫຼອມ​ປະ­ສົບ​ການ​ຂອງ​ຕົນ​ເອງ ເພື່ອ​ກ້າວ​ສູ່​ຜົນ­ສຳ­ເລັດ​ໃນ­ຕໍ່­ໜ້າ ໃຫ້​ສອດ­ຄ່ອງ​ກັບ​ແຜນ​ພັດ­ທະ­ນາ​ການ­ເຄື່ອນ­ໄຫວ​ຂອງ​ວົງ​ການ​ກີ­ລາ​ເຕະ­ບານ ນວ ໃນ​ເບື້ອງ​ຕົ້ນ​ຈະ​ຈັດ​ໃຫ້​ມີ​ການ​ແຂ່ງ­ຂັນ​ໃນ​ຮຸ່ນ​ເຍົາ­ວະ​ຊົນ​ທົ່ວ ນວ ແລະ ຈະ​ຕ້ອນ­ຮັບ​ການ​ມາ​ຢ້ຽມ­ຢາມ​ນັກ­ກີ­ລາ​ຈາກ​ປະ­ເທດ​ເພື່ອນ​ບ້ານ ທັງ​ນີ້ ກໍ່​ເພື່ອ​ສ້າງ​ປະ­ສົບ​ການ​ໃຫ້​ນັກ­ກີ­ລາ​ໃນ​ຮຸ່ນ​ດັ່ງ­ກ່າວ ທີ່​ເປັນ​ແບບ­ຢ່າງ​ທີ່​ດີ ໃນ​ຮຸ່ນ​ເຍົາ­ວະ​ຊົນ ສາ­ມາດ​ກ້າວ​ຂຶ້ນ​ໄປ​ເປັນ​ນັກ​ເຕະ​ລະ­ດັບ​ອາ­ຊີບ​ໄດ້​ໃນ​ອະ­ນາ­ຄົດ ຢ່າງ​ມີ​ຄຸນ​ນະ​ພາບ.

    ການ​ແຂ່ງ­ຂັນ​ເຕະ­ບານ​ຊີງ​ແຊັມ​ນາໆຊາດ ຈັດ​ຂຶ້ນ​ທີ່​ປະ­ເທດ​ໄທ ມີ 6 ຊາດ​ເຂົ້າ​ຮ່ວມ ໄດ້​ຈັດ​ແບ່ງ​ອອກ​ເປັນ 2 ກຸ່ມ ແຕ່​ລະ​ກຸ່ມ​ແຂ່ງ­ຂັນ​ພົບ​ກັນ​ໝົດ​ຄັດ​ເອົາ​ທີ 1-2 ເຂົ້າ​ຮອບ​ຕໍ່​ໄປ ໂດຍ​ຜົນ­ງານ​ໃນ​ຮອບ​ຄັດ​ເລືອກ​ຂອງ ນະ­ຄອນ­ຫຼວງ ນັດ​ທຳ​ອິດ ຊະ­ນະ ຫວຽດ­ນາມ 3-0 ນັດ​ທີ 2 ຊະ­ນະ ຍີ່­ປຸ່ນ 4-0 ຜ່ານ​ເຂົ້າ​ຮອບ 4 ທີມ ຊະ­ນະ​ທີມ​ອັງ­ກິດ 3-0 ປະ­ຕູ ກ່ອນ​ຈະ​ພາດ​ທ່າ​ໃນ​ນັດ​ຊີງ​ຊະ­ນະ​ເລີດ ເສຍ​ທີມ​ຊາດ​ໄທ 1-0 ປະ­ຕູ ໄດ້​ພຽງ​ອັນ​ດັບ​ທີ 2.

ຂ່າວທີ່ກ່ຽວຂ້ອງ