ຂ່າວຫຼ້າສຸດ

ໂຄງການລົດໄຟ ລາວ-ຈີນ ຊົດເຊີຍໃຫ້ປະຊາຊົນແຂວງຫຼວງນ້ຳທາ ເກືອບ 50%

587 02 ມ.ສ. 2019 ຂ່າວໜ້າ​ໜຶ່ງ

    ໃນ​ໄລ­ຍະ​ຜ່ານ​ມາ ຄະ­ນະ​ໄກ່​ເກ່ຍ ແຂວງ​ຫຼວງ​ນ້ຳ​ທາ ໄດ້​ດຳ­ເນີນ​ການ​ປະ­ຕິ­ບັດ​ວຽກ​ງານ​ແກ້​ໄຂ ຊົດ​ເຊີຍ ແລະ ຍົກ­ຍ້າຍ​ຈັດ​ສັນ​ປະ­ຊາ­ຊົນ ທີ່​ໄດ້​ຮັບ​ຜົນ​ກະ­ທົບ​ຈາກ​ໂຄງ­ການ​ກໍ່­ສ້າງ​ເສັ້ນ­ທາງ​ລົດ­ໄຟ ລາວ-ຈີນ ໃນ​ຂອບ​ເຂດ​ແຂວງ​ຫຼວງ​ນ້ຳ​ທາ ເຊິ່ງ​ມີ​ປະ­ຊາ­ຊົນ 4 ບ້ານ​ໄດ້​ຮັບ​ຜົນ​ກະ­ທົບ ຄື: ບ້ານ​ບໍ່​ເຕັນ ຕີນ​ຕົກ ບໍ່​ປຽດ ແລະ ບ້ານ​ນາ​ເຕີຍ ລວມ​ທັງ​ໝົດ 317 ຄອບ­ຄົວ ມູນ​ຄ່າ 168 ກວ່າ​ຕື້​ກີບ ທ່ານ ທອງ­ແດງ ສິດ­ທິ​ສົນ ຮອງ​ເຈົ້າ­ເມືອງ​ຫຼວງ​ນ້ຳ​ທາ ຫົວ­ໜ້າ​ຄະ­ນະ​ໄກ່​ເກ່ຍ​ຜົນ​ກະ­ທົບ ເບີກ​ຈ່າຍ​ຄ່າ​ຊົດ​ເຊີຍ ໂຄງ­ການ​ກໍ່­ສ້າງ​ທາງ​ລົດ­ໄຟ ລາວ-ຈີນ ໄດ້​ເປີດ­ເຜີຍ​ຕໍ່​ສື່​ມວນ​ຊົນ ລາວ-ຈີນ ໃນ​ວັນ​ທີ 29 ມີ­ນາ 2019 ມາ​ຮອດ​ປັດ­ຈຸ­ບັນ ແຂວງ​ຫຼວງ​ນ້ຳ​ທາ ໄດ້​ຮັບ​ງົບ­ປະ­ມານ​ຈາກ​ບໍ­ລິ­ສັດ ທາງ​ລົດ­ໄຟ ລາວ-ຈີນ ຈຳ­ກັດ ຈຳ­ນວນ 3 ງວດ ມູນ​ຄ່າ 83 ຕື້​ກວ່າ​ກີບ ໂດຍ​ໄດ້​ເບີກ​ຈ່າຍ​ໃຫ້​ປະ­ຊາ­ຊົນ​ຜູ້​ທີ່​ໄດ້​ຮັບ​ຜົນ​ກະ­ທົບ 144 ຄອບ­ຄົວ ເທົ່າ​ກັບ 47% ມູນ​ຄ່າ 76 ຕື້​ກວ່າ​ກີບ ແລະ ມີ​ແຜນ­ທີ່​ຈະ​ຊົດ​ເຊີຍ​ຕື່ມ​ອີກ ຫາກ​ໄດ້​ຮັບ​ງົບ­ປະ­ມານ​ໃນ​ງວດ​ທີ 4 ເຊິ່ງ​ມີ​ຈຳ­ນວນ 44 ຄອບ­ຄົວ ມູນ​ຄ່າ 30 ຕື້​ກວ່າ​ກີບ.

    ຢ່າງ­ໃດ​ກໍ​ຕາມ ການ​ແກ້​ໄຂ​ບັນ­ຫາ​ຕ່າງໆ​ຂອງ​ປະ­ຊາ­ຊົນ ທີ່​ໄດ້​ຮັບ​ຜົນ​ກະ­ທົບ​ໃນ​ໄລ­ຍະ​ເບື້ອງ​ຕົ້ນ​ແມ່ນ​ພົບ​ຄວາມ​ຫຍຸ້ງ­ຍາກ​ສົມ­ຄວນ ແຕ່​ມາ​ຮອດ​ປີ​ນີ້ ປະ­ຊາ­ຊົນ​ໄດ້​ມີ​ຄວາມ​ເຂົ້າ­ໃຈ​ກ່ຽວ​ກັບ​ນະ­ໂຍ­ບາຍ​ຂອງ​ພັກ-ລັດ­ຖະ­ບານ ໃນ​ການ​ປະ­ຕິ­ບັດ​ໂຄງ­ການ​ດັ່ງ­ກ່າວ ເຊິ່ງ​ເຂົາ­ເຈົ້າ​ໄດ້​ມີ​ຄວາມ​ຕື່ນ​ຕົວ ແລະ ໃຫ້­ການ​ຮ່ວມ​ມື​ກັບ​ພາກ​ລັດ​ເປັນ​ຢ່າງ​ດີ.

    ນອກ­ຈາກ​ໂຄງ­ການ​ລົດ­ໄຟ ລາວ-ຈີນ ຍັງ​ໄດ້​ປະ­ກອບ­ສ່ວນ​ສ້າງ​ວຽກ​ເຮັດ​ງານ​ທຳ​ໃຫ້​ປະ­ຊາ­ຊົນ ໄວ​ໜຸ່ມ​ໃນ​ທ້ອງ­ຖິ່ນ ລວມ​ທັງ​ຊຸກ­ຍູ້​ດ້ານ​ການ​ບໍ­ລິ­ການ​ໂຮງ­ແຮມ ເຮືອນ​ພັກ ຮ້ານ​ອາ­ຫານ ຕະ­ຫຼອດ​ເຖິງ​ກຸ່ມ​ການ​ຜະ­ລິດ​ພືດ​ກະ­ສິ­ກຳ ໂຄງ­ການ​ກໍ່­ສ້າງ​ເສັ້ນ­ທາງ​ລົດ­ໄຟ ລາວ-ຈີນ ຜ່ານ​ແຂວງ​ຫຼວງ​ນ້ຳ​ທາ ມີ​ຄວາມ​ຍາວ 16,9 ກິ­ໂລ­ແມັດ ປະ­ກອບ​ມີ 2 ສະ­ຖາ­ນີ ຄື: ສະ­ຖາ­ນີ​ບໍ່​ເຕັນ ເຊິ່ງ​ເປັນ​ສະ­ຖາ­ນີ​ໃຫຍ່​ອັນ​ດັບ​ສອງ ຮອງ​ຈາກ​ນະ­ຄອນ­ຫຼວງ​ວຽງ​ຈັນ ສາ­ມາດ​ຮອງ​ຮັບ​ຜູ້­ໂດຍ­ສານ ແລະ ສິນ­ຄ້າ ນອກ​ນັ້ນ ຍັງ​ມີ​ສະ­ຖາ­ນີ​ຂະ­ໜາດ​ນ້ອຍ​ອີກ​ໜຶ່ງ​ແຫ່ງ ຢູ່​ເຂດ​ນາ​ເຕີຍ ໃນ​ນີ້ ມີ​ການ​ກໍ່­ສ້າງ​ຂົວ​ໃຫຍ່​ຈຳ­ນວນ 7 ແຫ່ງ ແລະ ເຈາະ​ອຸ­ມົງ 3 ແຫ່ງ ຄື: ອຸ­ມົງ​ມິດ­ຕະ­ພາບ ລາວ-ຈີນ 2.425 ແມັດ ອຸ­ມົງ​ບໍ່​ເຕັນ 6.461 ແມັດ ອຸ­ມົງ​ຕີນ​ຕົກ 1.173 ແມັດ ສຳ­ລັບ​ອຸ­ມົງ​ບໍ່​ເຕັນ ແລະ ອຸ­ມົງ​ຕີນ​ຕົກ ໄດ້​ສຳ­ເລັດ​ການ​ຂຸດ​ເຈາະ​ເປັນ​ທີ່​ຮຽບ​ຮ້ອຍ​ແລ້ວ ສ່ວນ​ອຸ­ມົງ​ມິດ­ຕະ­ພາບ ລາວ-ຈີນ ພາຍ­ຫຼັງ​ເຈາະ​ໄດ້ 1.267 ແມັດ ຢູ່​ເບື້ອງ​ລາວ​ກໍ​ໄດ້​ຖືກ​ແລວ​ສາຍ​ນ້ຳ​ເກືອ​ໃນ​ປະ­ລິ­ມານ​ສູງ ແລະ ບໍ່​ສາ­ມາດ​ເຈາະ​ຕໍ່​ໄດ້ ຈຶ່ງ​ໄດ້​ຢຸດ­ຕິ​ຊົ່ວ­ຄາວ ໃນ​ວັນ​ດຽວ​ກັນ ທິມ​ງານ​ສື່​ມວນ​ຊົນ ລາວ-ຈີນ ກໍ​ໄດ້​ລົງ​ຢ້ຽມ​ຊົມ​ໂຮງ­ງານ​ປຸງ​ແຕ່ງ​ໂຄງ​ປະ­ກອບ​ເຫຼັກ​ກ້າ ກຸ່ມ​ບໍ­ລິ­ສັດ​ທາງ​ລົດ­ໄຟ​ເລກ 5 ສປ ຈີນ ເພື່ອ​ຮັບ​ໃຊ້​ການ​ກໍ່­ສ້າງ​ທາງ​ລົດ­ໄຟ ລາວ-ຈີນ ໄລ­ຍະ​ທີ 1 ບໍ່​ເຕັນ-ອຸ­ດົມ​ໄຊ ໂຮງ­ງານ​ແຫ່ງ​ນີ້ ໄດ້​ປຸງ​ແຕ່ງ​ເຫຼັກ​ເຈາະ​ອຸ­ມົງ ແມ່​ແບບ​ຫຼໍ່​ເສົາ ຂົວ ແລະ ອື່ນໆ.

ຂ່າວທີ່ກ່ຽວຂ້ອງ