ຂ່າວຫຼ້າສຸດ

ກາແດງ ສປ ຈີນ ສືບຕໍ່ໃຫ້ການຊ່ວຍເຫຼືອກາແດງລາວ

234 02 ມ.ສ. 2019 ຫົວຂໍ້ຂ່າວອື່ນໆ
ກາແດງ ສປ ຈີນ ສືບຕໍ່ໃຫ້ການຊ່ວຍເຫຼືອກາແດງລາວ

    ທ່ານ ຄຳ​ຮຸ່ງ ເຮືອງ​ວົງ​ສີ ປະ­ທານ​ອົງ­ການ​ກາ­ແດງ​ລາວ ຕ້ອນ­ຮັບ​ທ່ານ Haijing Wang ຮອງ​ປະ­ທານ​ສະ­ພາ­ກາ­ແດງ ສປ ຈີນ ພ້ອມ​ດ້ວຍ​ຄະ­ນະ ວັນ​ທີ 28 ມີ­ນາ 2019 ຢູ່​ອົງ­ການ​ກາ­ແດງ​ລາວ ໃນ​ໂອ­ກາດ​ທີ່​ຄະ­ນະ​ຜູ້​ແທນ​ດັ່ງ­ກ່າວ​ເດີນ­ທາງ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ສປປ ລາວ ເພື່ອ​ເສີມ​ຂະ­ຫຍາຍ ແລະ ຮັດ​ແໜ້ນ​ສາຍ​ພົວ­ພັນ​ການ​ຮ່ວມ​ມື​ສອງ​ຝ່າຍ.

    ທ່ານ ຄຳ​ຮຸ່ງ ເຮືອງ​ວົງ​ສີ ໄດ້​ສະ­ແດງ​ຄວາມ​ຊົມ­ເຊີຍ ແລະ ຕີ​ລາ­ຄາ​ສູງ​ຕໍ່​ການ​ເດີນ­ທາງ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ສປປ ລາວ ຂອງ​ທ່ານ Haijing Wang ພ້ອມ​ຄະ­ນະ​ໃນ​ຄັ້ງ​ນີ້ ເຊິ່ງ​ເປັນ​ຂີດ​ໝາຍ​ສຳ­ຄັນ​ໃນ​ການ​ເສີມ​ສ້າງ​ສາຍ​ພົວ­ພັນ​ທີ່​ມີ​ມາ​ແຕ່​ຍາວ​ນານ ລະ­ຫວ່າງ​ສອງ​ພັກ ສອງ​ລັດ ກໍ​ຄື ສອງ​ປະ­ເທດ ເວົ້າ​ສະ­ເພາະ ອົງ­ການ​ກາ­ແດງ​ລາວ ແລະ ສະ­ພາ­ກາ­ແດງ ສປ ຈີນ ເຊິ່ງ​ໄລ­ຍະ​ຜ່ານ​ມາ​ສະ­ພາ­ກາ­ແດງ ສປ ຈີນ ໄດ້​ໃຫ້­ການ​ຊ່ວຍ​ວຽກ​ງານ​ກູ້​ໄພ​ກາ­ແດງ ໃຫ້­ການ​ເຝິກ­ອົບ­ຮົມ​ຍົກ​ລະ­ດັບ​ໃຫ້​ອາ­ສາ​ສະ­ໝັກ ແລະ ສະ­ໜັບ­ສະ­ໜູນ​ງົບ­ປະ­ມານ ເພື່ອ​ຈັດ​ຕັ້ງ​ປະ­ຕິ­ບັດ​ໂຄງ­ການ​ຫຼຸດ­ຜ່ອນ​ຄວາມ​ສ່ຽງ​ໄພ­ພິ­ບັດ ເຊິ່ງ​ໄດ້​ຈັດ​ຕັ້ງ​ປະ­ຕິ­ບັດ​ຢູ່​ແຂວງ​ວຽງ​ຈັນ (ເມືອງ​ຊະ­ນະ​ຄາມ ແກ້ວ​ອຸ­ດົມ ໂພນ​ໂຮງ ເມືອງ​ໝື່ນ ແລະ ເມືອງ​ເຟືອງ) ແຂວງ​ຫຼວງ​ພະ​ບາງ ແລະ ນະ­ຄອນ­ຫຼວງ​ວຽງ​ຈັນ ຜ່ານ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ ມີ​ປະ­ຊາ­ຊົນ​ໄດ້​ຮັບ​ຜົນ​ປະ­ໂຫຍດ 72.503 ຄົນ.

    ທ່ານ Haijing Wang ໄດ້​ສະ­ແດງ​ຄວາມ​ຂອບ­ໃຈ ຕໍ່​ການ​ຕ້ອນ­ຮັບ​ຢ່າງ​ອົບ​ອຸ່ນ​ໃນ​ຄັ້ງ​ນີ້ ພ້ອມ​ທັງ​ໄດ້​ແຈ້ງ​ຈຸດ­ປະ­ສົງ​ມາ​ຢ້ຽມ­ຢາມ​ຄັ້ງ​ນີ້ ເພື່ອ​ເປັນ​ການ​ເສີມ​ສ້າງ​ສາຍ​ພົວ­ພັນ ແລະ ການ​ຮ່ວມ​ມື​ໃນ​ປັດ­ຈຸ­ບັນ ແລະ ອະ­ນາ­ຄົດ.

    ໂອ­ກາດ​ນີ້ ຍັງ​ໄດ້​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ ເພື່ອ​ເປັນ​ກອບ​ການ​ຮ່ວມ​ມື​ໃນ​ອະ­ນາ­ຄົດ ໂດຍ​ສະ­ພາ­ກາ­ແດງ ສປ ຈີນ ໄດ້​ມອບ​ເງິນ​ໃຫ້​ອົງ­ການ​ກາ­ແດງ​ລາວ ເພື່ອ​ສືບ­ຕໍ່​ຊ່ວຍ­ເຫຼືອ​ຜູ້​ປະ­ສົບ​ໄພ­ພິ­ບັດ 100.000 ໂດ​ລາ​ສະ­ຫະ­ລັດ ຫຼື ປະ­ມານ 859 ລ້ານ​ກີບ.

ຂ່າວທີ່ກ່ຽວຂ້ອງ