ຄາດວ່າຈະມີ 2.000 ຄົນ ເຂົ້າຮ່ວມສັບປະດາຄວາມປອດໄພທາງທ້ອງຖະໜົນ

215 02 ມ.ສ. 2019 ຫົວຂໍ້ຂ່າວອື່ນໆ

    ພິ­ທີ​ຖະ­ແຫຼງ​ຂ່າວ​ການ​ຈັດ​ສັບ­ປະ­ດາ​ແຫ່ງ​ຊາດ ດ້ານ​ຄວາມ​ປອດ​ໄພ​ທາງ​ທ້ອງ​ຖະ­ໜົນ ປະ­ຈຳ​ປີ 2019 ຈັດ​ຂຶ້ນ​ວັນ​ທີ 1 ເມ­ສາ 2019 ຢູ່​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ (ຍທຂ) ໂດຍ​ມີ​ທ່ານ ວິ­ໄລ​ພັນ ໄຊ​ຍະ​ວົງ ຮອງ​ຫົວ­ໜ້າ​ກົມ​ຂົນ­ສົ່ງ ກະ­ຊວງ ຍທຂ ຮອງ​ຫົວ­ໜ້າ​ກອງ​ເລ­ຂາ​ຄະ­ນະ​ກຳ­ມະ­ການ​ແຫ່ງ​ຊາດ ດ້ານ​ຄວາມ​ປອດ​ໄພ​ທາງ​ຖະ­ໜົນ ມີ​ທ່ານ ແກ້ວ​ມາ­ລາ ແສງ​ທອງ ຮອງ​ຫົວ­ໜ້າ​ກົມ​ຕຳ­ຫຼວດ​ຈະ­ລາ­ຈອນ​ກະ­ຊວງ​ປ້ອງ​ກັນ​ຄວາມ​ສະ­ຫງົບ ທ່ານ ສົມ​ສະ­ຫວາດ ພົງ­ສາ ຮອງ​ຫົວ­ໜ້າ​ກົມ​ສື່​ມວນ​ຊົນ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ວິ­ໄລ​ພັນ ໄຊ​ຍະ​ວົງ ກ່າວ​ວ່າ: ສປປ ລາວ ໄດ້​ກຳ­ນົດ​ເອົາ​ວັນ​ທີ 1-7 ເມ­ສາ 2019 ເປັນ​ສັບ­ປະ­ດາ​ແຫ່ງ​ຊາດ​ດ້ານ​ຄວາມ​ປອດ​ໄພ​ທາງ​ຖະ­ໜົນ ເພື່ອ​ປຸກ­ລະ­ດົມ​ໃຫ້​ທຸກ​ພາກ­ສ່ວນ​ໃນ​ສັງ­ຄົມ ໃຫ້​ຄວາມ​ສຳ­ຄັນ​ໃນ​ການ​ປະ­ຕິ­ບັດ​ກົດ​ລະ­ບຽບ​ຈະ­ລາ­ຈອນ​ເວ­ລາ​ຂັບ​ຂີ່​ຍານ­ພາ­ຫະ­ນະ​ຕາມ​ທ້ອງ​ຖະ­ໜົນ ແລະ ເຫັນ​ໄດ້​ເຖິງ​ໄພ​ອັນ­ຕະ­ລາຍ​ຈາກ​ການ​ເກີດ​ອຸ­ບັດ­ເຫດ ທີ່​ໄດ້​ສ້າງ​ຄວາມ​ເສຍ​ຫາຍ​ຢ່າງ​ຫຼວງ­ຫຼາຍ​ຕໍ່​ຊີ­ວິດ ແລະ ຊັບ​ສິນ ການ​ຈັດ​ງານ​ປີ​ນີ້ ພໍ­ດີ​ກົງ​ກັບ​ການ​ຈັດ​ງານ​ດ້ານ​ຄວາມ​ປອດ​ໄພ​ສາ­ກົນ​ທີ່​ຈັດ​ຂຶ້ນ​ທຸກໆ 2 ປີ ໂດຍ​ປີ 2019 ສາ­ກົນ​ໄດ້​ກຳ­ນົດ​ເອົາ​ວັນ​ທີ 6-12 ພຶດ­ສະ­ພາ ເປັນ​ສັບ­ປະ­ດາ​ຈັດ​ງານ ສຳ­ລັບ ສປປ ລາວ ຕາມ​ກົດ­ໝາຍ​ຈະ­ລາ­ຈອນ​ທາງ­ບົກ ໄດ້​ກຳ­ນົດ​ອາ­ທິດ​ທຳ​ອິດ​ເດືອນ​ເມ­ສາ ເປັນ​ສັບ­ປະ­ດາ​ແຫ່ງ​ຊາດ​ດ້ານ​ຄວາມ​ປອດ​ໄພ​ຕາມ​ຖະ­ໜົນ ໃນ​ນາມ​ທີ່​ເປັນ​ປະ­ເທດ​ສະ­ມາ­ຊິກ​ຂອງ​ສະ­ຫະ​ປະ­ຊາ​ຊາດ ກໍ​ຕ້ອງ​ໄດ້​ຈັດ​ຕັ້ງ​ປະ­ຕິ­ບັດ​ພັນ­ທະ​ສາ­ກົນ ໄປ​ພ້ອມ​ກັບ​ການ​ຈັດ​ງານ​ສັບ­ປະ­ດາ​ແຫ່ງ​ຊາດ ດ້ານ​ຄວາມ​ປອດ​ໄພ​ທາງ​ຖະ­ໜົນ.

    ສຳ­ລັບ​ການ​ເກີດ​ອຸ­ບັດ​ຕິ​ເຫດ​ທາງ​ຖະ­ໜົນ​ຢູ່ ສປປ ລາວ ຕາມ​ການ​ລາຍ​ງານ​ຂອງ​ເຈົ້າ​ໜ້າ­ທີ່​ຕຳ­ຫຼວດ​ຈະ­ລາ­ຈອນ​ໃນ​ແຕ່​ລະ​ປີ ສະ­ຖິ­ຕິ​ການ​ເກີດ​ອຸ­ບັດ​ຕິ​ເຫດ​ຕາມ​ທ້ອງ​ຖະ­ໜົນ​ມີ​ຜູ້​ເສຍ​ຊີ­ວິດ​ຫຼາຍ​ກວ່າ 1.000 ຄົນ ບາດ­ເຈັບ​ຫຼາຍ​ກວ່າ 8.000 ຄົນ ຖ້າ​ຄິດ­ໄລ່​ຕາມ​ການ​ກຳ­ນົດ​ຂອງ​ອົງ­ການ​ອະ­ນາ­ໄມ​ໂລກ​ຜູ້​ເສຍ​ຊີ­ວິດ ແລະ ຜູ້​ບາດ­ເຈັບ​ໜຶ່ງ​ຄົນ ຈະ​ມີ​ມູນ​ຄ່າ​ເກືອ​ເທົ່າ​ກັບ 70 ເທື່ອ​ຂອງ​ລວມ​ຍອດ​ຜະ­ລິດ​ຕະ​ພັນ​ພາຍ​ໃນ ມູນ​ຄ່າ​ການ​ສູນ​ເສຍ​ດ້ານ​ເສດ­ຖະ­ກິດ​ຫຼາຍ​ກວ່າ 500 ລ້ານ​ໂດ​ລາ​ຕໍ່​ປີ ດັ່ງ­ນັ້ນ ການ​ຈັດ​ສັບ­ປະ­ດາ​ຄວາມ​ປອດ​ໄພ​ຕາມ​ທ້ອງ​ຖະ­ໜົນ​ໃນ​ແຕ່​ລະ​ປີ ຈຶ່ງ​ເປັນ​ສິ່ງ​ຈຳ­ເປັນ ແລະ ມີ​ຄວາມ​ໝາຍ​ສຳ­ຄັນ ເພື່ອ​ແນ­ໃສ່​ປຸກ­ລະ­ດົມ​ໃຫ້​ທຸກ​ພາກ­ສ່ວນ ເຫັນ​ເຖິງ​ໄພ​ອັນ­ຕະ­ລາຍ​ຈາກ​ການ​ເກີດ​ອຸ­ບັດ​ຕິ​ເຫດ ພ້ອມ​ທັງ​ເປັນ​ການ​ປະ­ຕິ­ບັດ​ພັນ­ທະ​ຂອງ ສປປ ລາວ ຕໍ່​ສາ­ກົນ ເຊິ່ງ​ປີ​ນີ້​ການ​ຈັດ​ກິດ­ຈະ­ກຳ​ດັ່ງ­ກ່າວ ແມ່ນ​ເລີ່ມ​ແຕ່​ວັນ​ທີ 1 ເມ­ສາ ຈະ​ມີ​ການ​ໂຄ­ສະ­ນາ​ຄວາມ​ປອດ​ໄພ​ຕາມ​ທ້ອງ​ຖະ­ໜົນ​ຜ່ານ​ສື່​ຕ່າງໆ ວັນ​ທີ 4 ເມ­ສາ ຈັດ​ກິດ­ຈະ­ກຳ​ຢູ່​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ວັນ​ທີ 5 ເມ­ສາ ຈັດ​ກິດ­ຈະ­ກຳ​ຢູ່​ວິ­ທະ­ຍາ­ໄລ​ການ​ຊ່າງ​ປາກ​ປາ​ສັກ ວັນ​ທີ 6 ເມ­ສາ ເວ­ລາ 5-6:30 ໂມງ ຈະ​ໂຮມ​ຊຸມ­ນຸມ​ເພື່ອ​ສະ­ເຫຼີມ­ສະ­ຫຼອງ ສັບ­ປະ­ດາ​ແຫ່ງ​ຄວາມ​ປອດ​ໄພ​ທາງ​ຖະ­ໜົນ ພາຍ​ໃຕ້​ຄຳ​ຂວັນ ຊີ­ວິດ​ປອດ​ໄພ​ຮ່ວມ​ໃຈ​ປ້ອງ​ກັນ​ອຸ­ບັດ​ຕິ​ເຫດ ຢູ່​ສວນ​ສາ­ທາ­ລະ­ນະ​ປະ­ຕູ​ໄຊ ໃນ​ນີ້​ຈະ​ເຊີນ​ຜູ້​ເຂົ້າ​ຮ່ວມ​ຈາກ​ສຳ­ນັກ­ງານ ອົງ­ການ ນັກ­ຮຽນ ນັກ​ສຶກ​ສາ ແລະ ມວນ​ຊົນ​ຜູ້​ທີ່​ສົນ­ໃຈ ເຊິ່ງ​ຄາດ​ວ່າ​ຈະ​ມີ​ຜູ້​ເຂົ້າ​ຮ່ວມ​ປະ­ມານ 1.500-2000 ຄົນ ຈາກ​ນັ້ນ​ຈະ​ມີ​ຂະ​ບວນ​ຍ່າງ​ແຕ່​ປະ­ຕູ​ໄຊ-ຫໍ­ຄຳ-ປະ­ຕູ​ໄຊ ແລະ ກິດ­ຈະ­ກຳ​ຖາມ-ຕອບ​ກ່ຽວ​ກັບ​ຄວາມ​ປອດ​ໄພ​ຕາມ​ທ້ອງ​ຖະ­ໜົນ ແລະ ອື່ນໆ.

ຂ່າວທີ່ກ່ຽວຂ້ອງ