ຂ່າວຫຼ້າສຸດ

ລົງເຄື່ອນໄຫວຕິດຕາມວຽກງານຂົງເຂດເສດຖະກິດ

223 02 ມ.ສ. 2019 ຫົວຂໍ້ຂ່າວອື່ນໆ

    ພາຍ­ຫຼັງ​ທີ່​ຄະ­ນະ​ກຳ­ມະ­ການ​ເສດ­ຖະ­ກິດ ແຜນ­ການ ແລະ ການ​ເງິນ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ (ຄສຜງ ສປ ນວ) ໄດ້​ລົງ​ເຄື່ອນ​ໄຫວ​ວຽກ​ງານ​ຕິດ­ຕາມ​ກວດ­ກາ ແລະ ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ແຜນ​ງົບ­ປະ­ມານ​ແຫ່ງ​ລັດ 3 ເດືອນ ຄາດ​ຄະ­ເນ 6 ເດືອນ​ຕົ້ນ​ປີ 2019 ຢູ່​ບັນ­ດາ​ພະ­ແນກ­ການ​ຫ້ອງ​ການ­ເມືອງ ແລະ ຊຸກ­ຍູ້​ຫົວ­ໜ່ວຍ​ທຸ­ລະ​ກິດ​ໃນ ນວ.

    ວັນ​ທີ 26 ມີ­ນາ 2019 ຜ່ານ​ມາ ຄສຜງ ສປ ນວ ນຳ​ໂດຍ​ທ່ານ ຈັນ­ທອນ ລັດ​ຖະ​ຈັກ ຄະ­ນະ​ປະ­ຈຳ ປະ­ທານ ຄສຜງ ສປ ນວ ພ້ອມ​ດ້ວຍ​ຄະ­ນະ ໄດ້​ລົງ​ເຄື່ອນ​ໄຫວ​ຕິດ­ຕາມ​ກວດ­ກາ ແລະ ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ແຜນ​ງົບ­ປະ­ມານ​ແຫ່ງ​ລັດ​ປີ 2019 ໃນ​ຂົງ­ເຂດ​ເສດ­ຖະ­ກິດ ຢູ່​ລັດ​ວິ​ສາ​ຫະ​ກິດ​ລົດ­ເມ ນວ (ລລມ ນວ) ມີ​ທ່ານ ອາ­ນຸ­ພາບ ຕຸ​ນາ​ລົມ ປະ­ທານ​ສະ­ພາ​ປະ­ຊາ­ຊົນ ກຳ­ມະ­ການ​ສັງ­ກັດ ຄສຜງ ສປ ນວ ທ່ານ​ຫົວ­ໜ້າ ຮອງ​ຫົວ­ໜ້າ​ຂະ­ແໜງ­ການ​ກ່ຽວ­ຂ້ອງ​ເຂົ້າ​ຮ່ວມ.

    ການ​ລົງ​ເຄື່ອນ​ໄຫວ​ຄັ້ງ​ນີ້ ຄະ­ນະ​ໄດ້​ຮັບ​ຟັງ​ລາຍ​ງານ​ຈາກ​ທ່ານ ຄຳ​ພູນ ເຕ​ເມ​ລາດ ຜູ້­ອຳ­ນວຍ­ການ​ລັດ​ວິ​ສາ​ຫະ​ກິດ​ລົດ­ເມ​ນະ­ຄອນ­ຫຼວງ ໄດ້​ຮູ້​ວ່າ: ລັດ​ວິ​ສາ​ຫະ​ກິດ​ລົດ­ເມ ນວ ແມ່ນ​ວິ​ສາ​ຫະ​ກິດ​ຂອງ​ລັດ ພາຍ​ໃຕ້​ການ​ຊີ້​ນຳ​ຂອງ​ສະ­ພາ ຕາງ­ໜ້າ​ຜູ້​ຖື​ຮຸ້ນ​ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ ນວ ມີ​ພາ­ລະ​ບົດ­ບາດ​ເຄື່ອນ​ໄຫວ​ດຳ­ເນີນ​ທຸ­ລະ​ກິດ​ຂົນ­ສົ່ງ​ໂດຍ­ສານ​ໃນ​ຕົວ​ເມືອງ ຊານ­ເມືອງ ແລະ ຕ່າງ­ປະ­ເທດ​ຈຳ­ນວນ​ໜຶ່ງ ການ­ເຄື່ອນ­ໄຫວ​ທຸ­ລະ​ກິດ​ແມ່ນ​ກຸ້ມ​ຕົນ​ເອງ​ທາງ​ດ້ານ​ການ​ເງິນ ແລະ ປະ­ຕິ­ບັດ​ພັນ­ທະ​ໃຫ້​ລັດ​ເປັນ​ປົກ­ກະ­ຕິ​ດີ​ຕະ­ຫຼອດ​ມາ ໃນ​ປີ 2019 ລົດ­ເມ​ທີ່​ຂຶ້ນ​ແຜນ­ການ­ເຄື່ອນ­ໄຫວ​ມີ 106 ຄັນ ມີ​ສາຍ​ທາງ​ບໍ­ລິ­ການ 22 ສາຍ​ທາງ ຄື: ພາຍ​ໃນ​ຕົວ​ເມືອງ 10 ເສັ້ນ­ທາງ ສາຍ​ຊານ­ເມືອງ 3 ເສັ້ນ­ທາງ ຕ່າງ​ແຂວງ 6 ເສັ້ນ­ທາງ ແລະ ຕ່າງ­ປະ­ເທດ 3 ເສັ້ນ­ທາງ ຕະ­ຫຼອດ​ໄລ­ຍະ​ການ­ເຄື່ອນ­ໄຫວ ງວດ​ທີ 1 ຂອງ​ປີ 2019 ເນື່ອງ​ຈາກ​ສະ­ພາບ​ລົດ­ເມ​ທີ່​ແລ່ນ​ບໍ­ລິ­ການ​ມວນ​ຊົນ​ສາຍ​ທາງ​ຕ່າງ​ແຂວງ​ມີ​ສະ­ພາບ​ທີ່​ເກົ່າ​ຫຼາຍ (ນຳ​ໃຊ້​ແຕ່​ປີ 2000) ລວມ​ທັງ​ການ​ເໜັງ​ຕີງ​ຂຶ້ນ-ລົງ​ຂອງ​ລາ­ຄາ​ນ້ຳ­ມັນ ເຮັດ​ໃຫ້​ມູນ​ຄ່າ​ການ​ນຳ​ໃຊ້​ນ້ຳ­ມັນ​ຍັງ​ກວມ​ອັດ­ຕາ​ສູງ ການ​ຂົນ­ສົ່ງ​ໂດຍ­ສານ​ໃນ​ຕົວ​ເມືອງ​ຫຼາຍ​ສາຍ​ຍັງ​ມີ​ຜູ້­ໂດຍ­ສານ​ໜ້ອຍ ແລະ ມີ​ທ່າ​ອ່ຽງ​ຫຼຸບ​ທຶນ ເຊິ່ງ​ໃນ​ຕົ້ນ​ປີ 2019 ສາ­ມາດ​ຂົນ­ສົ່ງ​ຜູ້­ໂດຍ­ສານ​ໄດ້​ທັງ​ໝົດ 727.503 ຄົນ ທຽບ­ໃສ່​ແຜນ­ການ​ປະ­ຕິ­ບັດ​ໄດ້ 89,18%.

    ພ້ອມ​ນີ້ ຄະ­ນະ​ດັ່ງ­ກ່າວ​ໄດ້​ລົງ​ເຄື່ອນ​ໄຫວ​ວຽກ​ງານ​ຕິດ­ຕາມ​ກວດ­ກາ ແລະ ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ແຜນ​ງົບ­ປະ­ມານ​ແຫ່ງ​ລັດ ປີ 2019 ໃນ​ຂົງ­ເຂດ​ວຽກ​ງານ​ເສດ­ຖະ­ກິດ​ຢູ່​ຫ້ອງ​ວ່າ​ການ­ເມືອງ​ສີ​ສັດ­ຕະ​ນາກ ນວ ຕື່ມ​ອີກ.

ຂ່າວທີ່ກ່ຽວຂ້ອງ