ຂ່າວຫຼ້າສຸດ

ຣາຊ-ລາວ ສືບຕໍ່ຊ່ວຍເຫຼືອຊາວໜຸ່ມປະກອບອາຊີບທີ່ໝັ້ນຄົງ

222 02 ມ.ສ. 2019 ຫົວຂໍ້ຂ່າວອື່ນໆ
ຣາຊ-ລາວ ສືບຕໍ່ຊ່ວຍເຫຼືອຊາວໜຸ່ມປະກອບອາຊີບທີ່ໝັ້ນຄົງ

    ວັນ​ທີ 24-28 ມີ­ນາ 2019 ຄະ­ນະ​ຮັບ­ຜິດ­ຊອບ​ວຽກ​ງານ​ໂຄງ­ການ “ກ້າ​ໄມ້ ແຕກ​ໃບ ສົດ­ໃສ ຢືນ​ຕົ້ນ ໃຫຍ່​ງາມ” ລົງ​ເຄື່ອນ​ໄຫວ​ຢ້ຽມ­ຢາມ ແລະ ຕິດ­ຕາມ​ຊາວ​ໜຸ່ມ​ຜູ້​ທີ່​ໄດ້​ຮັບ​ທຶນ​ບໍ່​ມີ​ດອກ​ເບ້ຍ​ຢູ່ 3 ແຂວງ​ພາກ​ເໜືອ ນຳ​ໂດຍ​ທ່ານ ຄຳ​ປຸ່ນ ແກ້ວ​ວິ​ພາ­ກອນ ຮອງ​ຫົວ­ໜ້າ​ກົມ​ພັດ­ທະ­ນາ​ວິ­ຊາ​ຊີບ​ຊາວ​ໜຸ່ມ ສູນ​ກາງ​ຊາວ​ໜຸ່ມ​ປະ­ຊາ­ຊົນ​ປະ­ຕິ­ວັດ​ລາວ ທ່ານ ນະ​ລົງ​ວິດ ຄອງ​ສິນ ຜູ້​ຈັດ­ການ​ອົງ​ກອນ​ສຳ­ພັນ​ລາວ ບໍ­ລິ­ສັດ ຣາ​ຊ-ລາວ ບໍ­ລິ­ການ ຈຳ­ກັດ ພ້ອມ​ດ້ວຍ​ສື່​ມວນ​ຊົນ.

    ການ­ເຄື່ອນ­ໄຫວ​ຂອງ​ຄະ­ນະ​ໄດ້​ເດີນ­ທາງ​ໄປ​ທີ່​ບ້ານ​ນາ​ຫວາຍ ເມືອງ​ບຸນ​ໃຕ້ ແຂວງ​ຜົ້ງ​ສາ­ລີ ເພື່ອ​ຕິດ­ຕາມ ແລະ ຊຸກ­ຍູ້​ສົ່ງ­ເສີມ ທ້າວ ບຸນ​ທະ­ວີ ຊາວ​ໜຸ່ມ​ຜູ້​ທີ່​ໄດ້​ຮັບ​ທຶນ​ຈາກ​ໂຄງ­ການ​ໃນ​ເດືອນ​ສິງ­ຫາ 2012 ຈຳ­ນວນ 10.500.000 ກີບ ແລະ ໄດ້​ສົ່ງ​ທຶນ​ຄືນ​ໃຫ້​ແກ່​ໂຄງ­ການ​ໝົດ​ແລ້ວ ປັດ­ຈຸ­ບັນ​ຜູ້­ກ່ຽວ​ໄດ້​ປະ­ກອບ​ອາ­ຊີບ​ເປີດ​ຮ້ານ​ສ້ອມ­ແປງ​ລົດ­ຈັກ ສາ­ມາດ​ສ້າງ​ລາຍ​ຮັບ​ເຂົ້າ​ສູ່​ຄອບ­ຄົວ​ອາ­ທິດ​ໜຶ່ງ​ປະ­ມານ 6 ແສນ​ກີບ ຈາກ​ນັ້ນ ທາງ​ຄະ­ນະ​ໄດ້​ເດີນ­ທາງ​ໄປ​ທີ່​ບ້ານ​ດອນ​ສະ­ອາດ ເມືອງ​ຫຼາ ແຂວງ​ອຸ­ດົມ​ໄຊ ຢ້ຽມ­ຢາມ​ຄອບ­ຄົວ​ທ້າວ ບຸນ​ເພັງ ໄຊ​ຍະ​ສິດ ສະ­ມາ­ຊິກ​ຊາວ​ໜຸ່ມ​ຜູ້​ທີ່​ໄດ້​ຮັບ​ທຶນ​ຈາກ​ໂຄງ­ການ​ໃນ​ເດືອນ​ມິ­ຖຸ­ນາ 2018 ຈຳ­ນວນ 10 ລ້ານ​ກີບ ເພື່ອ​ເປີດ​ຮ້ານ​ສ້ອມ­ແປງ​ລົດ­ຈັກ ປັດ­ຈຸ­ບັນ​ຜູ້­ກ່ຽວ​ສາ­ມາດ​ສ້າງ​ລາຍ​ຮັບ​ເຂົ້າ​ສູ່​ຄອບ­ຄົວ​ປະ­ມານ 2-3 ແສນ​ກີບ​ຕໍ່​ວັນ ຈາກ​ນັ້ນ ຄະ­ນະ​ໄດ້​ເດີນ­ທາງ​ໄປ​ທີ່​ບ້ານ​ຫ້ວຍ​ທາດ ເມືອງ​ເມິງ ແຂວງ​ບໍ່​ແກ້ວ ເພື່ອ​ມອບ​ເງິນ​ຈາກ​ໂຄງ­ການ​ຈຳ­ນວນ 10 ລ້ານ​ກີບ​ໃຫ້​ແກ່​ທ້າວ ຈອນ ໄຊ​ຍະ​ວົງ ສະ­ມາ­ຊິກ​ຊາວ​ໜຸ່ມ​ທີ່​ຜ່ານ​ໂຮງ­ຮຽນ​ວິ­ຊາ​ຊີບ DonBosco ເພື່ອ​ເປີດ​ຮ້ານ​ສ້ອມ­ແປງ​ລົດ­ຈັກ ຕາງ­ໜ້າ​ໃຫ້​ແກ່​ໂຄງ­ການ​ກ່າວ​ມອບ​ເງິນ​ໂດຍ​ທ່ານ ຄຳ​ປຸ່ນ ແກ້ວ​ວິ​ພາ­ກອນ ມີ​ທ່ານ​ຮອງ​ເລ­ຂາ​ຄະ­ນະ​ບໍ­ລິ­ຫານ​ງານ​ຊາວ​ໜຸ່ມ​ແຂວງ​ບໍ່​ແກ້ວ ແລະ ອຳ­ນາດ​ການ​ປົກ​ຄ້ອງ​ບ້ານ​ເຂົ້າ​ຮ່ວມ.

    ບໍ­ລິ­ສັດ ຣາ​ຊ-ລາວ ບໍ­ລິ­ການ ຈຳ­ກັດ ໄດ້​ຮ່ວມ​ມື​ກັບ​ກົມ​ພັດ­ທະ­ນາ​ວິ­ຊາ​ຊີບ​ສູນ​ກາງ​ຊາວ​ໜຸ່ມ ປປລ ໃນ​ການ​ຊ່ວຍ­ເຫຼືອ​ສັງ­ຄົມ​ລາວ ເວົ້າ​ລວມ ເວົ້າ​ສະ­ເພາະ ໄດ້​ຮັບ​ການ​ຊ່ວຍ­ເຫຼືອ​ຈາກ​ສູນ​ກາງ ຊປປລ ໃນ​ປີ 2012 ເປັນ­ຕົ້ນ​ມາ ປັດ­ຈຸ­ບັນ​ໂດຍ​ການ​ສະ­ໜັບ­ສະ­ໜູນ​ທຶນ​ໝູ­ນວຽນ ເພື່ອ​ປະ­ກອບ​ອາ­ຊີບ​ໃຫ້​ແກ່​ຊາວ​ໜຸ່ມ​ທີ່​ຮຽນ​ຈົບ ຈາກ​ສູນ​ເຝິກ­ອົບ­ຮົມ​ວິ­ຊາ​ຊີບ​ຊາວ​ໜຸ່ມ ແລະ ຊາວ​ໜຸ່ມ​ຜູ້​ດ້ອຍ​ໂອ­ກາດ ທີ່​ບໍ່​ມີ​ວຽກ​ເຮັດ​ງານ​ທຳ​ໃຫ້​ມີ​ອາ­ຊີບ​ທີ່​ໝັ້ນ­ຄົງ ເພື່ອ​ໃຫ້​ກົມ​ພັດ­ທະ­ນາ​ວິ­ຊາ​ຊີບ​ສູນ​ກາງ ຊປປລ ນຳ​ເອົາ​ທຶນ​ໄປ​ມອບ​ຕໍ່­ໃຫ້​ຊາວ​ໜຸ່ມ ກູ້​ຢືມ​ໂດຍ​ບໍ່​ມີ​ອັດ­ຕາ​ດອກ​ເບ້ຍ​ໄລ­ຍະ 3 ປີ ເປັນ​ສ່ວນ​ໜຶ່ງ​ທີ່​ປະ­ກອບ­ສ່ວນ​ເຂົ້າ​ໃນ​ການ​ສ້າງ­ສາ​ພັດ­ທະ­ນາ​ປະ­ເທດ​ຊາດ ເສີມ​ສ້າງ​ພັດ­ທະ­ນາ​ດ້ານ​ວິ­ຊາ​ຊີບ ພັດ­ທະ­ນາ​ດ້ານ​ສີ­ມື​ແຮງ​ງານ​ລາວ​ໃຫ້​ມີ​ຄຸນ​ນະ​ພາບ ຈາກ​ນັ້ນ​ແມ່ນ​ໝູ­ນວຽນ​ທຶນ​ດັ່ງ­ກ່າວ​ໃຫ້​ຊາວ​ໜຸ່ມ​ຜູ້​ອື່ນໆ ທີ່​ມີ​ເງື່ອນ­ໄຂ​ຢືມ​ຕໍ່​ໄປ.

ຂ່າວທີ່ກ່ຽວຂ້ອງ