ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 02/04/2019

221 02 ມ.ສ. 2019 ຫົວຂໍ້ຂ່າວອື່ນໆ

    ມື້­ນີ້ ມີ​ເລື່ອງ​ການ​ປັບ­ປຸງ​ນະ­ໂຍ­ບາຍ​ບຳ­ນານ​ຢູ່ ສປ ຈີນ ມາດ​ຕະ­ການ​ຈຳ­ກັດ​ເນື້ອ​ໃນ​ທີ່​ຜິດ​ກົດ­ໝາຍ​ຢູ່​ໜ້າ​ຈໍ ທີ່ ເຢຍ​ລະ​ມັນ ແລະ ປິດ​ທ້າຍ​ກັບ​ຂ່າວ​ເລື່ອງ​ຄວບ​ຄຸມ​ຢາ­ສູບ​ໄຟ­ຟ້າ​ທີ່ ອິນ​ໂດ​ເນ​ເຊຍ.

    ທີ່ ສປ ຈີນ: ໃນ​ປັດ­ຈຸ­ບັນ ຫຼາຍໆ​ປະ­ເທດ​ພວມ​ປະ​ເຊີນ​ກັບ​ນະ­ໂຍ­ບາຍ​ບຳ­ນານ​ຍ້ອນ​ຂາດ­ແຄນ​ງົບ­ປະ­ມານ ເພື່ອ​ສະ­ໜອງ​ໃຫ້​ຈຳ­ນວນ​ຜູ້​ເຂົ້າ​ບຳ­ນານ​ທີ່​ມີ​ຈຳ­ນວນ​ເພີ່ມ​ຂຶ້ນ​ຢ່າງ​ໄວ­ວາ ສຳ­ລັບ​ປະ­ເທດ​ທີ່​ບໍ່​ມີ​ບັນ­ຫາ​ດ້ານ​ການ​ເງິນ ຊ້ຳ­ພັດ​ມີ​ບັນ­ຫາ​ການ​ຂາດ­ແຄນ​ແຮງ​ງານ ໃນ​ຍຸກ​ຈຳ­ນວນ​ຜູ້​ເຖົ້າ​ລົ້ນ​ປະ­ເທດ ເຊັ່ນ: ຍີ່­ປຸ່ນ ດັ່ງ­ນັ້ນ ຈຶ່ງ​ບໍ່​ແປກ​ທີ່​ຫຼາຍ​ປະ­ເທດ​ໄດ້​ກຳ­ນົດ​ຢືດ​ເກນ​ອາ­ຍຸ​ບຳ­ນານ​ໃຫ້​ຍາວ​ອອກ​ຕື່ມ ເມື່ອ 4 ປີ­ຜ່ານ­ມາ (2015) ທ່ານ​ຢີນ ເວ​ມິນ (Yin Weimin) ລັດ­ຖະ­ມົນ­ຕີ​ກະ­ຊວງ​ຊັບ ພະ­ຍາ­ກອນ​ມະ­ນຸດ ແລະ ຄວາມ​ໝັ້ນ­ຄົງ​ທາງ​ສັງ­ຄົມ​ຈີນ ໄດ້​ອອກ​ມາ​ເປີດ­ເຜີຍ​ວ່າ ຈີນ ມີ​ແຜນ­ການ​ຢືດ​ອາ­ຍຸ​ສຳ­ລັບ​ເຂົ້າ​ບຳ­ນານ ໃຫ້​ຍາວ​ອອກ​ແບບ​ຄ່ອຍ​ເປັນ​ຄ່ອຍ​ໄປ ພາຍ​ໃນ 5 ປີ ຢູ່​ຈີນ​ນັ້ນ ອາ­ຍຸ​ເຂົ້າ​ບຳ­ນານ​ຂອງ​ແຮງ​ງານ​ແມ່­ຍິງ ບາງ​ປະ­ເທດ​ນັ້ນ​ຍັງ​ຕ່ຳ​ຢູ່ ຄື: ຢູ່​ໃນ​ເກນ​ອາ­ຍຸ 50 ປີ​ເທົ່າ​ນັ້ນ ບັນ­ດາ​ຊ່ຽວ­ຊານ​ດ້ານ​ການ​ວິ­ເຄາະ ເຄີຍ​ເຕືອນ​ກ່ຽວ​ວິ​ກິດ​ການ​ດ້ານ​ການ​ເງິນ ທີ່​ຈະ​ເກີດ​ຂຶ້ນ​ກັບ​ນະ­ໂຍ­ບາຍ​ບຳ­ນານ​ຂອງ​ຈີນ ພາຍ​ໃນ​ອີກ 20 ປີ​ຂ້າງ​ໜ້າ ຄື ອາດ​ຈະ​ມີ​ເຖິງ 11 ພັນ​ຕື້​ໂດ​ລາ​ສະ­ຫະ­ລັດ (ໜັງ­ສື­ພິມ​ວຽງ​ຈັນ​ທາມ 11 ມີ­ນາ 2015) ທ່ານ​ລັດ­ຖະ­ມົນ­ຕີ ຢີນ ບອກ​ຕື່ມ​ວ່າ ໃນ​ຊຸມ​ປີ​ຊິ​ມາ​ຕໍ່­ໜ້າ​ນີ້ ຊັດ​ສ່ວນ​ຂອງ​ປະ­ຊາ­ກອນ​ທີ່​ມີ​ອາ­ຍຸ​ສູງ​ກວ່າ 60 ປີ ຈະ​ພຸ່ງ​ຂຶ້ນ​ເຖິງ 39% ຂອງ​ຈຳ­ນວນ​ປະ­ຊາ­ກອນ​ທັງ​ໝົດ​ໃນ​ປະ­ເທດ ຈາກ 15% ໃນ​ປີ 2015.

    ທີ່ ເຢຍ​ລະ​ມັນ: ໃນ​ຕົ້ນ​ເດືອນ​ເມ­ສາ ປີ 2017 ເຢຍ​ລະ​ມັນ ໄດ້​ຮັບ­ຮອງ​ເອົາ​ຮ່າງ​ກົດ­ໝາຍ​ສະ­ກັດ​ກັ້ນ​ເນື້ອ​ໃນ ທີ່​ລະ­ເມີດ​ກົດ­ໝາຍ​ໃນ​ເຄືອ​ຂ່າຍ​ສື່​ສັງ­ຄົມ​ອອນ​ລາຍ ເນື້ອ​ໃນ​ທີ່​ຜິດ​ກົດ­ໝາຍ ປະ­ກອບ​ດ້ວຍ: ການ​ອາ​ຄາດ​ບາດ­ໝາງ ການ​ແກ້­ແຄ້ນ ການ​ຍຸ­ຍົງ​ສົ່ງ­ເສີມ​ຂໍ້​ມູນ​ຂ່າວ​ປອມ ການ​ຢຽບ​ຫຍາມ​ໃສ່​ຮ້າຍ​ປ້າຍ​ສີ ການ​ນາບ​ຂູ່ ການ​ກະ­ທຳ​ທີ່​ພົວ­ພັນ​ກັບ​ການ​ກໍ່​ການ​ຮ້າຍ ການ​ເຜີຍ­ແຜ່​ສິ່ງ​ລາ­ມົກ​ທີ່​ພົວ­ພັນ​ກັບ​ເດັກ­ນ້ອຍ ແລະ​ອື່ນໆ ກົດ­ໝາຍ​ໄດ້​ລະ­ບຸ​ໄວ້​ຢ່າງ​ຈະ​ແຈ້ງ­ວ່າ ບໍ­ລິ­ສັດ​ສື່​ສັງ­ຄົມ​ອອນ​ລາຍ​ໃດ​ທີ່​ບໍ່​ຈຳ­ກັດ ຫຼື ບິດ​ບັງ​ເນື້ອ​ໃນ​ທີ່​ລະ­ເມີດ​ກົດ­ໝາຍ ຕາມ​ກຳ­ນົດ​ເວ­ລາ​ຈະ​ຖືກ​ປັບ​ໃໝ​ເປັນ​ເງິນ​ສູງ​ສຸດ 50 ລ້ານ​ເອີ​ໂຣ ສ່ວນ​ເຈົ້າ​ຂອງ​ບໍ­ລິ­ສັດ​ນັ້ນ ຈະ​ຖືກ​ປັບ​ໃໝ​ສູງ​ສຸດ 5 ລ້ານ​ເອີ​ໂຣ ກົດ­ໝາຍ​ໄດ້​ບັງ­ຄັບ​ໃຫ້​ບໍ­ລິ­ສັດ​ສື່​ສັງ­ຄົມ​ອອນ​ລາຍ ກຳ­ຈັດ​ບັນ­ດາ​ເນື້ອ​ໃນ​ທີ່​ລະ­ເມີດ​ກົດ­ໝາຍ​ພາຍ​ໃນ 24 ຊົ່ວ­ໂມງ ແຕ່​ຖ້າ​ມີ​ກໍ­ລະ­ນີ​ບໍ່​ລົງ​ລອຍ​ກັນ ກໍ​ຕ້ອງ​ແກ້​ໄຂ​ບັນ­ຫາ​ໃຫ້​ສຳ­ເລັດ​ພາຍ​ໃນ 7 ວັນ (ລວມ​ທັງ​ເນື້ອ​ໃນ​ທີ່​ດາວ​ໂຫຼດ ແລະ ແຊ).

    ທີ່ ອິນ​ໂດ​ເນ​ເຊຍ: ໃນ​ທ້າຍ​ປີ 2017 ກະ­ຊວງ​ການ​ຄ້າ​ອິນ​ໂດ​ເນ​ເຊຍ ໄດ້​ອອກ​ລະ­ບຽບ​ການ​ເພື່ອ​ຈຳ­ກັດ​ການ​ຄ້າ​ຢາ­ສູບ​ເອ​ເລັກ​ໂຕຼ​ນິກ (ຫຼື ຢາ­ສູບ​ໄຟ­ຟ້າ e-cigarette) ເຊິ່ງ​ມີ​ຜົນ​ບັງ­ຄັບ​ໃຊ້​ໃນ​ຕົ້ນ​ປີ 2018 ລະ­ບຽບ​ການ​ດັ່ງ­ກ່າວ ອະ­ນຸ­ຍາດ​ໃຫ້​ນຳ​ເຂົ້າ ແລະ ຂາຍ​ຢາ­ສູບ​ປະ­ເພດ​ນີ້​ທົ່ວ​ໄປ​ໄດ້ ແຕ່​ຕ້ອງ​ໄດ້​ຮັບ​ໜັງ­ສື​ແນະ­ນຳ​ຈາກ​ກະ­ຊວງ​ສາ­ທາ­ລະ­ນະ​ສຸກ​ກ່ອນ ສ່ວນ​ຢາ­ສູບ​ໄຟ­ຟ້າ​ທີ່​ຂາຍ​ຊື້​ນັ້ນ ກໍ​ຕ້ອງ​ໄດ້​ຜ່ານ​ມາດ­ຕະ­ຖານ​ແຫ່ງ​ຊາດ.

ຂ່າວທີ່ກ່ຽວຂ້ອງ