ນາຍົກລັດຖະມົນຕີ ຕ້ອນຮັບຄະນະຜູ້ແທນ 3 ປະເທດ

760 01 ມ.ສ. 2019 ຂ່າວໜ້າ​ໜຶ່ງ
ນາຍົກລັດຖະມົນຕີ ຕ້ອນຮັບຄະນະຜູ້ແທນ 3 ປະເທດ

    ວັນ​ທີ 29 ມີ­ນາ 2019 ທີ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ທ່ານ ທອງ​ລຸນ ສີ​ສຸ​ລິດ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ນາ­ຍົກ­ລັດ­ຖະ­ມົນ­ຕີ ໄດ້​ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ທ່ານ​ນາງ ຮວ່າງ ທິ ຖຸ້ຍ​ລານ ກຳ­ມະ­ການ​ສູນ​ກາງ​ພັກ ເລ­ຂາ​ຄະ­ນະ​ພັກ​ແຂວງ​ຫວິງ​ຟຸກ ສສ ຫວຽດ­ນາມ ພ້ອມ​ຄະ­ນະ ໃນ​ໂອ­ກາດ​ທີ່​ເດີນ­ທາງ​ມາ​ຢ້ຽມ­ຢາມ ສປປ ລາວ ກໍ​ຄື ແຂວງ​ຫຼວງ​ນ້ຳ​ທາ ແລະ ບັນ­ດາ​ແຂວງ​ພາກ​ເໜືອ​ຈຳ­ນວນ​ໜຶ່ງ ໃນ​ວັນ​ທີ 25-29 ມີ­ນາ​ນີ້ ເພື່ອ​ສືບ­ຕໍ່​ເພີ່ມ​ທະ­ວີ​ການ​ພົວ­ພັນ​ຮ່ວມ​ມື.

    ໂອ­ກາດ​ນີ້ ທ່ານ​ນາ­ຍົກ­ລັດ­ຖະ­ມົນ­ຕີ ໄດ້​ສະ­ແດງ​ຄວາມ​ຕ້ອນ­ຮັບ ແລະ ຕີ​ລາ­ຄາ​ສູງ​ຕໍ່​ການ​ມາ​ຢ້ຽມ­ຢາມ ແລະ ເຮັດ​ວຽກ​ຂອງ​ຄະ­ນະ​ຜູ້​ແທນ​ຂັ້ນ​ສູງ​ແຂວງ​ຫວິງ​ຟຸກ​ຢູ່​ລາວ​ຄັ້ງ​ນີ້ ຈະ​ເປັນ​ການ​ສືບ­ຕໍ່​ເພີ່ມ​ທະ­ວີ​ການ​ພົວ­ພັນ​ຮ່ວມ​ມື​ແບບ​ພິ­ເສດ​ຮອບ­ດ້ານ ລະ­ຫວ່າງ​ສອງ​ພັກ​ສອງ​ລັດ​ເວົ້າ​ລວມ ເວົ້າ​ສະ­ເພາະ​ລະ­ຫວ່າງ​ແຂວງ​ຫຼວງ​ນ້ຳ​ທາ ແລະ ແຂວງ​ຫວິງ​ຟຸກ ທີ່​ມີ​ມາ​ແລ້ວ​ນັ້ນ ໃຫ້​ນັບ​ມື້​ແຕກ​ດອກ​ອອກ​ຜົນ​ຍິ່ງ​ຂຶ້ນ ເຊິ່ງ​ການ​ພົບ​ປະ​ສອງ​ຝ່າຍ​ຄັ້ງ​ນີ້ ທ່ານ​ເລ­ຂາ​ຄະ­ນະ​ພັກ​ແຂວງ​ຫວິງ​ຟຸກ ໄດ້​ລາຍ​ງານ​ໃຫ້​ທ່ານ​ນາ­ຍົກ­ລັດ­ຖະ­ມົນ­ຕີ​ຊາບ​ເຖິງ​ຈຸດ­ປະ­ສົງ​ການ​ມາ​ຢ້ຽມ­ຢາມ​ແຂວງ​ຫຼວງ​ນ້ຳ​ທາ ທີ່​ເປັນ​ແຂວງ​ແຮກ­ສ່ຽວ ແລະ ບັນ­ດາ​ແຂວງ​ພາກ​ເໜືອ​ຈຳ­ນວນ​ໜຶ່ງ​ນັ້ນ ເພື່ອ​ສືບ­ຕໍ່​ຮັດ​ແໜ້ນ​ຄວາມ​ສາ​ມາ​ຄີ​ລະ­ຫວ່າງ​ທ້ອງ­ຖິ່ນ​ດ້ວຍ​ກັນ ແລະ ການ​ມາ​ຢ້ຽມ­ຢາມ​ຄັ້ງ​ນີ້ ຍັງ​ໄດ້​ໃຫ້​ທຶນ​ຊ່ວຍ­ເຫຼືອ​ກໍ່­ສ້າງ​ໂຮງ­ຮຽນ​ປະ­ຖົມ​ສົມ­ບູນ​ບ້ານ​ນ້ຳ​ແຫງນ ແລະ ໃນ​ຜ່ານ​ມາ​ນອກ­ຈາກ​ສອງ​ຝ່າຍ ໄດ້​ແລກ­ປ່ຽນ​ກັນ​ຢ້ຽມ­ຢາມ​ຄະ­ນະ​ຜູ້​ແທນ​ເຊິ່ງ​ກັນ ແລະ ກັນ​ເປັນ​ປົກ­ກະ­ຕິ​ແລ້ວ ແຂວງ​ຫວິງ​ຟຸກ​ຍັງ​ໄດ້​ໃຫ້­ການ​ຊ່ວຍ­ເຫຼືອ​ແຂວງ​ຫຼວງ​ນ້ຳ ເປັນ­ຕົ້ນ ໃຫ້​ທຶນ​ກໍ່­ສ້າງ​ບຸ​ຄະ­ລາ​ກອນ​ໄປ​ຮຽນ​ຊັ້ນ​ປະ­ລິນ­ຍາ​ຕີ ແລະ ຊັ້ນ​ສູງ​ຢູ່​ຫວຽດ­ນາມ​ປີ​ລະ 10 ທຶນ ຊ່ວຍ​ກໍ່­ສ້າງ​ຫ້ອງ­ການ​ກອງ​ບັນ­ຊາ​ການ​ທະ­ຫານ​ເມືອງ​ຫຼວງ​ນ້ຳ​ທາ ໂຮງ­ຮຽນ ມສ ເທ­ສະ​ບານ​ເມືອງ ແລະ ອື່ນໆ ໂອ­ກາດ​ນີ້ ທ່ານ​ນາ­ຍົກ­ລັດ­ຖະ­ມົນ­ຕີ ກໍ​ໄດ້​ສະ­ແດງ​ຄວາມ​ຂອບ­ໃຈ​ມາ​ຍັງ​ແຂວງ​ຫວິງ​ຟຸກ ທີ່​ໄດ້​ໃຫ້­ການ​ຊ່ວຍ­ເຫຼືອ​ກໍ່­ສ້າງ​ບຸ​ຄະ­ລາ​ກອນ ແລະ ໃຫ້​ທຶນ​ພັດ­ທະ­ນາ​ພື້ນ­ຖານ​ໂຄງ​ລ່າງ​ຢູ່​ແຂວງ​ຫຼວງ​ນ້ຳ​ທາ ເປັນ​ການ​ປະ­ກອບ­ສ່ວນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ລາວ ກໍ​ຄື​ແຂວງ​ຫຼວງ​ນ້ຳ​ທາ​ໃຫ້​ມີ​ບາດ­ກ້າວ​ອັນ​ໃໝ່ ພ້ອມ​ນີ້ ທ່ານ​ຍັງ​ໄດ້​ຊຸກ­ຍູ້​ໃຫ້​ສອງ​ແຂວງ ສືບ­ຕໍ່​ເພີ່ມ​ທະ­ວີ​ການ​ພົວ­ພັນ​ຮ່ວມ​ມື​ເຊິ່ງ​ກັນ ແລະ ກັນ​ໃຫ້​ນັບ​ມື້​ແໜ້ນ​ແຟ້ນ ເພື່ອ​ນຳ​ເອົາ​ຜົນ​ປະ­ໂຫຍດ​ມາ­ສູ່​ປະ­ຊາ­ຊົນ​ສອງ​ຊາດ ກໍ​ຄື​ສອງ​ແຂວງ ຈາກ​ນັ້ນ ຕອນ​ທ້າຍ​ທ່ານ​ເລ­ຂາ​ພັກ​ແຂວງ​ຫວິງ​ຟຸກ ກໍ​ໄດ້​ສະ­ແດງ​ຄວາມ​ຂອບ​ອົກ​ຂອບ­ໃຈ​ມາ​ຍັງ​ທ່ານ​ນາ­ຍົກ­ລັດ­ຖະ­ມົນ­ຕີ ທີ່​ໃຫ້​ກຽດ​ຕ້ອນ­ຮັບ​ຢ່າງ​ອົບ​ອຸ່ນ.

    ໃນ​ວັນ​ດຽວ​ກັນ​ນີ້ ທີ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ທ່ານ​ນາ­ຍົກ­ລັດ­ຖະ­ມົນ­ຕີ ຍັງ​ໄດ້​ໃຫ້​ກຽດ​ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ທ່ານ ລີ​ຊູ​ຢອງ ຮອງ​ປະ­ທານ​ພັກ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ຫົວ­ໜ້າ​ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ​ແຮງ​ງານ​ເກົາ­ຫຼີ ພ້ອມ​ຄະ­ນະ ໃນ​ໂອ­ກາດ​ທີ່​ເດີນ­ທາງ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່​ລາວ​ແຕ່​ວັນ​ທີ 27-31 ມີ­ນາ​ນີ້ ແລະ ຕ້ອນ­ຮັບ​ທ່ານ ດັກ​ອິນ ອຸນ​ສະ​ເຕນ ລັດ­ຖະ­ມົນ­ຕີ​ພັດ­ທະ­ນາ​ສາ­ກົນ ກະ­ຊວງ​ການ​ຕ່າງ­ປະ­ເທດ ແຫ່ງ ຣາ​ຊະ​ອາ­ນາ­ຈັກ​ນອກ​ແວ ພ້ອມ​ຄະ­ນະ ໃນ​ໂອ­ກາດ​ທີ່​ເດີນ­ທາງ​ມາ​ຢ້ຽມ­ຢາມ​ລາວ​ຢ່າງ​ເປັນ​ທາງ​ການ ແລະ ເຮັດ​ວຽກ​ກັບ​ກະ­ຊວງ​ການ​ຕ່າງ­ປະ­ເທດ​ລາວ ໃນ​ວັນ​ທີ 29 ມີ­ນາ​ນີ້.

ຂ່າວທີ່ກ່ຽວຂ້ອງ