ຂ່າວຫຼ້າສຸດ

ມອບໂຄງການກໍ່ສ້າງໂຮງຮຽນປະຖົມສົມບູນພັນໄຊ

413 01 ມ.ສ. 2019 ຂ່າວໜ້າ​ໜຶ່ງ
ມອບໂຄງການກໍ່ສ້າງໂຮງຮຽນປະຖົມສົມບູນພັນໄຊ

    ວັນ​ທີ 28 ມີ­ນາ 2019 ທີ່​ບ້ານ​ພັນ​ໄຊ ເມືອງ​ຊຳ​ເໜືອ ແຂວງ​ຫົວ­ພັນ ໄດ້​ມີ​ພິ­ທີ​ມອບ-ຮັບ​ໂຄງ­ການ​ກໍ່­ສ້າງ​ໂຮງ­ຮຽນ​ປະ­ຖົມ​ສົມ­ບູນ​ພັນ​ໄຊ ມີ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ທ່ານ ວັນ​ໄຊ ແພງ​ຊຸມ​ມາ ເຈົ້າ­ແຂວງ​ຫົວ­ພັນ ທ່ານ​ປະ­ທານ​ທະ­ນາ­ຄານ ເອັດ​ທີ (STB) ປະ­ທານ​ບໍ­ລິ­ສັດ​ຜູ້​ຮັບ​ເໝົາ​ກໍ່­ສ້າງ ພ້ອມ​ດ້ວຍ​ອຳ­ນາດ​ການ​ປົກ­ຄອງ​ແຂວງ ຄູ-ອາ­ຈານ ແລະ ນັກ­ຮຽນ​ເຂົ້າ​ຮ່ວມ.

    ທ່ານ ພູ­ເຂົາ​ຄຳ ພຣະ​ວໍ­ລະ​ໄຊ ປະ­ທານ​ບໍ­ລິ­ສັດ ໄຊ​ເຊດ​ຖາ​ກໍ່­ສ້າງ​ຂົວ​ທາງ ຈຳ­ກັດ ໄດ້​ລາຍ​ງານ​ໃຫ້​ຊາບ​ກ່ຽວ​ກັບ​ໂຄງ­ການ​ກໍ່­ສ້າງ​ໂຮງ­ຮຽນ​ປະ­ຖົມ​ສົມ­ບູນ​ພັນ​ໄຊ​ວ່າ: ໂຄງ­ການ​ດັ່ງ­ກ່າວ ໄດ້​ຮັບ​ການ​ລະ­ດົມ​ທຶນ​ຈາກ​ຄອບ­ຄົວ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ແລະ ໄດ້​ຮັບ​ການ​ສະ­ໜັບ­ສະ­ໜູນ​ຈາກ ທະ­ນາ­ຄານ​ເອັດ​ທີ (STB) ເຊິ່ງ​ໄດ້​ດຳ­ເນີນ​ການ​ກໍ່­ສ້າງ​ແຕ່​ວັນ​ທີ 2 ກັນ­ຍາ 2019 ມີ​ມູນ​ຄ່າ 2,4 ຕື້​ກີບ ປະ­ກອບ​ດ້ວຍ​ອາ­ຄານ 2 ຊັ້ນ 1 ຫຼັງ ຂະ­ໜາດ​ກວ້າງ 9 ແມັດ ແລະ ຍາວ 33 ແມັດ ມີ 6 ຫ້ອງ​ຮຽນ​ປະ­ກອບ​ດ້ວຍ​ໂຕະ ຕັ່ງ ກະ­ດານ ແລະ ສິ່ງ​ອຳ­ນວຍ​ຄວາມ​ສະ­ດວກ​ຕ່າງໆ​ທີ່​ຈຳ­ເປັນ ສາ­ມາດ​ຮອງ​ຮັບ​ນັກ­ຮຽນ​ຊັ້ນ​ປະ­ຖົມ ແລະ ມັດ­ທະ­ຍົມ​ໄດ້​ປະ­ມານ 228 ຄົນ ນອກ​ນັ້ນ​ຍັງ​ປະ­ກອບ​ດ້ວຍ​ຫ້ອງ­ການ​ຄູ-ອາ­ຈານ ຫ້ອງ​ສະ­ໝຸດ ແລະ ຫ້ອງ​ນ້ຳ 1 ຫ້ອງ ມີ​ເດີ່ນ​ກີ­ລາ ເພື່ອ​ໃຫ້​ນັກ­ຮຽນ​ໄດ້​ຫຼິ້ນ​ກີ­ລາ-ກາ​ຍະ​ກຳ​ເຕົ້າ­ໂຮມ​ນັກ­ຮຽນ ແລະ ເປັນ​ສະ­ຖານ­ທີ່​ຈັດ​ພິ­ທີ​ທາງ​ສັງ­ຄົມ​ຕ່າງໆ​ອີກ​ດ້ວຍ.

    ຈາກ​ນັ້ນ ທ່ານ ວັນ​ໄຊ ແພງ​ຊຸມ​ມາ ໄດ້​ຕາງ­ໜ້າ​ໃຫ້​ອຳ­ນາດ​ການ​ປົກ­ຄອງ​ແຂວງ ກໍ​ຄື​ປະ­ຊາ­ຊົນ​ແຂວງ​ຫົວ­ພັນ​ຂຶ້ນ​ກ່າວ​ຮັບ​ເອົາ​ໂຄງ­ການ ພ້ອມ​ທັງ​ສະ­ແດງ​ຄວາມ​ຂອບ­ໃຈ​ຕໍ່​ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ແລະ ຜູ້​ອຸ­ປະ­ຖຳ​ທຶນ­ຮອນ​ໃນ​ການ​ກໍ່­ສ້າງ​ໂຮງ­ຮຽນ​ປະ­ຖົມ​ສົມ­ບູນ​ພັນ​ໄຊ​ຄັ້ງ​ນີ້ ແລະ ຈະ​ພ້ອມ​ກັນ​ປົກ​ປັກ​ຮັກ­ສາ​ນຳ​ໃຊ້​ໂຮງ­ຮຽນ​ດັ່ງ­ກ່າວ ໃຫ້​ເກີດ​ປະ­ໂຫຍດ​ສູງ​ສຸດ ໂດຍ​ສະ­ເພາະ​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ​ຂອງ​ແຂວງ​ຫົວ­ພັນ.

    ໂອ­ກາດ​ນີ້ ທ່ານ ສອນ​ໄຊ ສີ​ພັນ​ດອນ ຍັງ​ໄດ້​ມອບ​ອຸ­ປະ­ກອນ​ການ​ຮຽນ ແລະ ເຄື່ອງ​ກີ­ລາ​ໃຫ້​ໂຮງ­ຮຽນ​ມັດ­ທະ­ຍົມ​ສົມ­ບູນ​ພັນ​ໄຊ ນອກ​ນັ້ນ​ຍັງ​ໄດ້​ເດີນ­ທາງ​ໄປ​ຢ້ຽມ­ຢາມ​ໂຄງ­ການ​ຂຸດ​ຄົ້ນ​ແຮ່​ທາດ ແລະ ສະ­ຖານ­ທີ່​ທ່ອງ​ທ່ຽວ​ທາງ​ປະ­ຫວັດ­ສາດ​ຢູ່​ທີ່​ເມືອງ​ວຽງ​ໄຊ​ຕື່ມ​ອີກ.

ຂ່າວທີ່ກ່ຽວຂ້ອງ