ຂ່າວຫຼ້າສຸດ

ທ່ານຮອງນາຍົກ ເນັ້ນ ຍທຂ ສືບຕໍ່ແກ້ໄຂ 19 ບັນຫາທີ່ຍັງຄົງຄ້າງ

514 01 ມ.ສ. 2019 ຂ່າວໜ້າ​ໜຶ່ງ

    ກອງ​ປະ­ຊຸມ​ວຽກ​ງານ​ໂຍ­ທາ​ທິ​ການ ແລະ ຂົນ­ສົ່ງ ປະ­ຈຳ​ປີ 2018 ຈັດ​ຂຶ້ນ​ວັນ​ທີ 28-29 ມີ­ນາ 2019 ຢູ່​ຫໍ​ປະ­ຊຸມ​ແຫ່ງ​ຊາດ ໂດຍ​ເປັນ​ປະ­ທານ​ຂອງ​ທ່ານ ບຸນ​ຈັນ ສິນ​ທະ​ວົງ ລັດ­ຖະ­ມົນ­ຕີ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ (ຍທຂ) ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ພ້ອມ​ດ້ວຍ​ບັນ­ດາ​ຮອງ​ລັດ­ຖະ­ມົນ­ຕີ ຮອງ​ເຈົ້າ­ແຂວງ ຮອງ​ເຈົ້າ​ຄອງ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ໂອ­ກາດ​ນີ້ ທ່ານ ສົມ​ດີ ດວງ​ດີ ກໍ​ໄດ້​ໂອ້​ລົມ ເຊິ່ງ​ທ່ານ​ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ຜົນ­ສຳ­ເລັດ​ທີ່​ກະ­ຊວງ ຍທຂ ຍາດ​ມາ​ໄດ້ ອັນ​ພົ້ນ​ເດັ່ນ​ແມ່ນ​ສົກ​ປີ 2017-2018 ສາ­ມາດ​ກວດ­ກາ​ໂຄງ­ການ​ລົງ­ທຶນ​ຂອງ​ລັດ​ທີ່​ມີ​ມູນ​ຄ່າ​ສູງ ເຊິ່ງ​ພາຍ­ຫຼັງ​ກວດ­ກາ​ດ້ານ​ຫົວ­ໜ່ວຍ​ລາ­ຄາ ສາ­ມາດ​ປະ­ຢັດ​ງົບ­ປະ­ມານ​ຂອງ​ລັດ​ໄດ້ 3.560,86 ຕື້​ກີບ ສຳ­ເລັດ​ເອ­ກະ­ສານ​ຂໍ້​ຕົກ­ລົງ​ຂອງ​ລັດ­ຖະ­ມົນ­ຕີ ວ່າ​ດ້ວຍ​ການ​ຄຸ້ມ​ຄອງ​ການ​ປຸກ​ສ້າງ ສະ­ບັບ​ປັບ­ປຸງ ປີ 2019 ຂໍ້​ຕົກ­ລົງ​ຂອງ​ລັດ­ຖະ­ມົນ­ຕີ ວ່າ​ດ້ວຍ​ລະ­ບຽບ​ການ​ຄຸ້ມ​ຄອງ​ຂໍ­ອະ­ນຸ­ຍາດ​ດຳ­ເນີນ​ທຸ­ລະ​ກິດ ໃນ​ຂະ­ແໜງ ຍທຂ (ຜັນ​ຂະ­ຫຍາຍ​ຄຳ​ສັ່ງ​ຂອງ​ນາ­ຍົກ­ລັດ­ຖະ­ມົນ­ຕີ ສະ­ບັບ​ເລກ​ທີ 02/ນຍ ລົງ​ວັນ​ທີ 1/2/2018) ເຊິ່ງ​ເອ­ກະ­ສານ​ທີ່​ສຳ­ຄັນ​ນຳ​ໃຊ້​ໃນ​ການ​ຄຸ້ມ​ຄອງ​ລັດ​ດ້ວຍ​ກົດ­ໝາຍ ລະ­ບຽບ​ການ ແລະ ຜົນ­ງານ​ອື່ນໆ​ອີກ.

    ພ້ອມ​ນີ້ ທ່ານ​ຍັງ​ໄດ້​ສະ­ເໜີ​ໃຫ້​ຂະ­ແໜງ ຍທຂ ສືບ­ຕໍ່​ປັບ­ປຸງ ແລະ ເອົາ​ໃຈ່​ໃສ່ ເປັນ­ຕົ້ນ ການ​ແກ້​ໄຂ 19 ບັນ­ຫາ​ທີ່​ຍັງ​ຄົງ​ຄ້າງ ປັດ­ຈຸ­ບັນ ຈຳ­ນວນ​ໜຶ່ງ​ໄດ້​ຖືກ​ແກ້​ໄຂ​ແລ້ວ ບາງ​ບັນ­ຫາ​ກໍ​ໄດ້​ຮັບ​ການ​ແກ້​ໄຂ​ລະ­ດັບ​ໜຶ່ງ ແລະ ບາງ​ບັນ­ຫາ​ຍັງ​ມີ​ລັກ­ສະ­ນະ​ຊ້ຳ​ເຮື້ອ ເປັນ­ຕົ້ນ ການ​ຄຸ້ມ​ຄອງ​ຜັງ­ເມືອງ ແລະ ສິ່ງ​ປຸກ​ສ້າງ (ການ​ອະ­ນຸ­ຍາດ​ປຸກ​ສ້າງ ບໍ່​ສອດ­ຄ່ອງ​ກັບ​ແຜນ ຜັງ​ລວມ​ການ​ພັດ­ທະ­ນາ​ຕົວ​ເມືອງ) ການ​ຄຸ້ມ​ຄອງ​ລົດ​ບັນ­ທຸກ​ນ້ຳ­ໜັກ​ເກີນ ການ​ແກ້​ໄຂ​ບັນ­ຫາ​ການ​ຈາ­ລະ​ຈອນ​ແອ​ອັດ ແລະ ອຸ­ບັດ­ເຫດ​ຕາມ​ຖະ­ໜົນ ການ​ຄຸ້ມ​ຄອງ​ການ​ຂົນ­ສົ່ງ​ໂດຍ­ສານ-ສະ­ຖາ­ນີ​ຂົນ­ສົ່ງ ບັນ­ຫາ​ການ​ກໍ່­ສ້າງ ແລະ ສ້ອມ­ແປງ​ຂົວ​ທາງ ມີ​ລາ­ຄາ​ສູງ ຄຸນ​ນະ​ພາບ​ຕ່ຳ ແກ່­ຍາວ​ເວ­ລາ ແລະ ອື່ນໆ ພ້ອມ​ທັງ​ຄົ້ນ­ຄວ້າ​ວິ­ທີ​ແກ້​ໄຂ​ບັນ­ຫາ​ຕ່າງໆ​ຢ່າງ​ຖືກ­ຕ້ອງ ເພື່ອ​ແກ້​ໄຂ​ບັນ­ຫາ​ດັ່ງ­ກ່າວ​ໃຫ້​ໝົດ​ໄປ ພ້ອມ​ທັງ​ຄົ້ນ­ຄວ້າ​ຢ່າງ​ລະ­ອຽດ ເພື່ອ​ນຳ​ສະ­ເໜີ​ລັດ­ຖະ­ບານ ພິ­ຈາ­ລະ­ນາ​ຮັບ­ຮອງ.

    ສຳ­ລັບ​ທິດ​ທາງ​ຕໍ່­ໜ້າ ກະ­ຊວງ ຍທຂ ຕ້ອງ​ປະ­ຕິ­ບັດ 5 ໜ້າ­ທີ່​ມະ­ຫາ​ພາກ ການ​ກຳ­ນົດ​ແຜນ​ພັດ­ທະ­ນາ​ການ​ກໍ່­ສ້າງ​ຂົວ​ທາງ​ໄລ­ຍະ​ຍາວ ສືບ­ຕໍ່​ປະ­ສານ​ສົມ­ທົບ​ກັບ​ກະ­ຊວງ​ແຜນ­ການ ແລະ ການ​ລົງ­ທຶນ ເພື່ອ​ໃຫ້​ເຂົ້າ​ກັບ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ແລະ ສອດ­ຄ່ອງ​ກັບ​ແຜນ​ພັດ­ທະ­ນາ​ແຕ່​ລະ​ຂົງ­ເຂດ ແນ­ໃສ່​ເຮັດ​ໃຫ້­ການ​ລົງ­ທຶນ​ໃນ​ການ​ກໍ່­ສ້າງ​ຂົວ​ທາງ ສາ­ມາດ​ຮັບ​ໃຊ້​ໃຫ້­ການ​ຜະ­ລິດ​ເປັນ​ສິນ­ຄ້າ ແລະ ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ຊາດ ການ​ເຊື່ອມ​ໂຍງ​ກັບ​ພາກ​ພື້ນ ແລະ ສາ­ກົນ ລະ­ຫວ່າງ​ອາ​ຊຽນ ແລະ ສປ ຈີນ ຈະ​ເລັ່ງ​ໃສ່​ອັນ​ໃດ​ທີ່​ເປັນ​ບຸ­ລິ­ມະ­ສິດ​ຕົ້ນ­ຕໍ ເພື່ອ​ຮັບ​ໃຊ້​ຜົນ​ປະ­ໂຫຍດ​ຂອງ​ຊາດ ແລະ ນຳ​ໃຊ້​ທ່າ­ແຮງ​ທີ່​ມີ​ຂອງ​ປະ­ເທດ ກັບ​ແຜນ​ພັດ­ທະ­ນາ​ລວມ​ຂອງ​ປະ­ເທດ​ອ້ອມ​ຂ້າງ ເພື່ອ​ຈັດ​ລຽງ​ບຸ­ລິ­ມະ­ສິດ​ການ​ພັດ­ທະ­ນາ​ບັນ­ດາ​ເສັ້ນ­ທາງ​ເຊື່ອມ​ຈອດ​ກັບ​ປະ­ເທດ​ອ້ອມ​ຂ້າງ​ແຕ່​ລະ​ໄລ­ຍະ ເອົາ­ໃຈ­ໃສ່​ຢ່າງ​ຈິງ​ຈັງ ແລະ ປະ­ຕິ­ບັດ​ຢ່າງ​ເຂັ້ມ​ງວດ ວຽກ​ງານ​ກວດ​ສອບ-ກວດ­ກາ ໂດຍ​ສະ­ເພາະ​ວຽກ​ງານ​ກວດ­ກາ​ໂຄງ­ການ​ແຕ່​ຫົວ­ທີ ຖື​ສຳ­ຄັນ​ຫາງ​ສຽງ​ຂອງ​ສັງ­ຄົມ ກໍ​ຄື​ປະ­ຊາ­ຊົນ​ທີ່​ຜ່ານ​ສາຍ​ດ່ວນ​ສະ­ພາ​ແຫ່ງ​ຊາດ ສາຍ​ດ່ວນ​ລັດ­ຖະ­ບານ ແລະ ສາຍ​ດ່ວນ​ຂອງ​ກະ­ຊວງ ຍທຂ ເພື່ອ​ນຳ​ມາ​ພິ­ຈາ­ລະ­ນາ​ຄົ້ນ­ຄວ້າ ກວດ­ກາ ແລະ ແກ້​ໄຂ​ໃຫ້​ທັນ​ສະ­ພາບ​ການ.

ຂ່າວທີ່ກ່ຽວຂ້ອງ