ຂ່າວຫຼ້າສຸດ

ວິທີ​ແກ້​ໄຂ​ນິໄສ​ລູກ​ທີ່​ໝັກ​ຫຼິ້ນ​ໂທລະສັບ

230 01 ມ.ສ. 2019 ຫົວຂໍ້ຂ່າວອື່ນໆ
ວິທີ​ແກ້​ໄຂ​ນິໄສ​ລູກ​ທີ່​ໝັກ​ຫຼິ້ນ​ໂທລະສັບ

     ໃນ​ປັດຈຸບັນ​ນີ້​ອຸປະກອນ​ເທັກ​ໂນ​ໂລ​ຊີ ເຊັ່ນ: ໂທລະສັບ​ສະມາດ​ໂຟນ ແທັບ​ເລັດ ຄອມ​ພິວ​ເຕີ ເກມ ແລະ ສື່​ສັງຄົມ​ອອນ​ລາຍ​ທີ່​ໄດ້​ມີ​ການ​ພັດທະນາ​ຢ່າງ​ຕໍ່​ເນື່ອງ​ເຊິ່ງ​ມີ​ບົດບາດ​ໃນ​ການ​ໃຊ້​ຊີວິດ​ປະຈຳ​ວັນ​ຂອງ​ເດັກ ແລະ ເປັນ​ບັນຫາ​ເດັກນ້ອຍ​ຕິດ​ໂທລະສັບ​ຫຼື​ຫຼິ້ນ​ໂທລະສັບ​ຫຼາຍ​ຂຶ້ນ ດັ່ງນັ້ນ​ພໍ່​ແມ່ ຄວນ​ໃຫ້​ຄວາມ​ສົນໃຈ​ແນະນຳ​ລູກ​ໃນ​ການ​ນຳ​ໃຊ້​ໃຫ້​ເກີດ​ຜົນ ແລະ ໃດ້​ປະໂຫຍດ​ຈາກ​ເຄື່ອງໃຊ້​ເຫຼົ່າ​ນີ້ ແລະ ຄວນ​ມີ​ວິທີ​ໃນ​ການ​ຄວບ​ຄຸມ​ລູກ​ຂອງ​ຕົນ​ບໍ່​ໃຫ້​ຕິດ​ໂທລະສັບ​ດັ່ງນີ້:

1. ຈັດ​ແຍກ​ພື້ນ​ທີ່​ສຳລັບ​ອຸປະກອນ​ເອ​ເລັກ​ໂຕ​ນິກ​ໂດຍ​ສະເພາະ  

         ພໍ່​ແມ່​ຫຼາຍໆ​ທ່ານ​ອາດ​ຈະ​ຄິດ​ວ່າ ການ​ຈຳກັດ​ຊົ່ວໂມງ​ໃນ​ການ​ຫຼິ້ນ​ອິນ​ເຕີ​ເນັດ ເກມ ໂທລະສັບ​ມື​ຖື ເບິ່ງ​ໂທລະພາບ ຫຼື ອື່ນໆ ເປັນ​ການ​ກະທຳ​ທີ່​ຖືກຕ້ອງ ເຊິ່ງ​ແທ້ໆ ແລ້ວ​ກໍ​ບໍ່​ຜິດ​ຫຍັງ​ຫຼາຍ ແຕ່​ເຮົາ​ມີ​ວິທີ​ທີ່​ດີ​ກວ່າ​ມາ​ນຳ​ສະເໜີ​ກັນ ນັ້ນ​ກໍ​ຄື ພໍ່​ແມ່​ຄວນ​ຈະ​ຈັດ​ແຍກ​ພື້ນ​ທີ່​ສຳລັບ​ອຸປະກອນ ເຕັກ​ໂນ​ໂລ​ຊີ ເຫຼົ່າ​ນີ້​ເອົາ​ໄວ້​ຕ່າງຫາກ ຖ້າ​ຫາກ​ລູກ​ຢາກ​ຈະ​ເບິ່ງ​ໂທລະພາບ ຫຼິ້ນ​ເກມ ຫຼື ຫຼິ້ນ​ຄອມ​ພິວ​ເຕີ ກໍ​ໃຫ້​ລູກ​ໄປ​ຢູ່​ຫ້ອງ ຫຼື ມຸມ​ທີ່​ຈັດ​ກຽມ​ໄວ້​ເທົ່າ​ນັ້ນ ນອກຈາກ​ນີ້​ໃນ​ໄລຍະ​ອື່ນໆ ເຊັ່ນ ຕອນ​ເຮັດ​ວຽກບ້ານ ກິນ​ເຂົ້າ ຫຼື ອອກ​ນອກ​ເຮືອນ ກໍ​ຄວນ​ຕັດ​ຊ່ອງ​ທາງ​ການ​ສື່ສານ​ອອກ​ໄປ​ທັງ​ໝົດ ໂດຍ​ສະເພາະ​ໄລຍະ​ກ່ອນ​ເຂົ້າ​ນອນ ເພາະ​ຄື້ນ​ຄວາມ​ຖີ່​ຕ່າງໆ ຈາກ​ອຸປະກອນ​ອີ​ເລັກ​ໂຕ​ນິກ ຈະ​ເຂົ້າ​ໄປ​ລົບ​ກວນ​ການ​ນອນ​ຂອງ​ລູກ​ເຈົ້າ.

2. ຢູ່​ກັບ​ລູກ​ໃຫ້​ຫຼາຍ​ຂຶ້ນ

      ຈາກ​ການ​ວິໄຈ​ຫຼາຍໆ​ບ່ອນ​ພົບ​ວ່າ ເດັກນ້ອຍ​ທີ່​ສົນໃຈ​ກັບ​ການ​ເບິ່ງ​ໂທລະພາບ ຫຼື ສັງຄົມ​ອອນ​ລາຍ ຫຼາຍ​ເກີນ​ໄປ ມີ​ຄວາມ​ສ່ຽງ​ທີ່​ຈະ​ກາຍເປັນ​ເດັກ​ດື້​ດ້ານ ບໍ່​ຟັງ​ຄວາມ ຫຼື ເບິ່ງ​ໂລກ​ໃນ​ແງ່​ລົບ​ສູງ​ກວ່າ​ເດັກນ້ອຍ​ທົ່ວ​ໄປ ເຊິ່ງ​ພຶດຕິ​ກຳ​ເຫຼົ່າ​ນີ້ ນີ້​ເອງ​ທີ່​ເຮັດ​ໃຫ້​ພວກ​ເຂົາ​ປັບ​ໂຕ​ເຂົ້າ​ກັບ​ໝູ່ໆ ແລະ​ສັງຄົມ​ໃນ​ຊີວິດ​ຈິງ​ໄດ້​ຍາກ ດັ່ງນັ້ນ​ສິ່ງ​ທີ່​ດີ​ທີ່​ສຸດ​ກ່ອນ​ທີ່​ຈະ​ເກີດ​ບັນຫາ​ແບບ​ນີ້​ກັບ​ລູກ​ຂອງ​ເຈົ້າ ກໍ​ຄື ພະຍາຍາມ​ຫາ​ເວລາ​ມາ​ຢູ່​ກັບ​ລູກ​ຂອງ​ເຈົ້າ​ໃຫ້​ຫຼາຍໆ ຫຼື ອາດ​ຈະ​ຫາ​ກິດຈະກຳ​ມ່ວນໆ ມາ​ເຮັດ​ຮ່ວມ​ກັນ​ດີ​ກວ່າ ນອກຈາກ​ຈະ​ຊ່ວຍ​ດຶງ​ດູດ​ຄວາມ​ສົນໃຈ​ຂອງ​ລູກ​ແລ້ວ ກໍ​ຍັງ​ຊ່ວຍ​ສານ​ສຳພັນ​ທີ່​ດີ​ໃຫ້​ກັບ​ຄົນ​ໃນ​ຄອບຄົວ​ນຳ​ອີກ

3. ບອກເລົ່າ​ຂໍ້​ເສຍ​ໃຫ້​ລູກ​ຟັງ

    ການ​ບັງຄັບ​ບໍ່​ໃຫ້​ລູກ​ເຮັດ​ເລີຍ ກໍ​ອາດ​ຈະ​ເຮັດ​ໃຫ້​ຮູ້ສຶກ​ວ່າ ກຳລັງ​ຖືກ​ບັງຄັບ ແລະ ລັກ​ຕໍ່ຕ້ານ​ຢູ່​ໃນ​ໃຈ ສະນັ້ນ​ພໍ່​ແມ່ ກໍ່​ໜ້າ​ຈະ​ສອນ​ລູກ​ທາງ​ອ້ອມ​ແທນ ໂດຍ​ການ​ເລົ່າ​ຂ່າວ ຫຼື ປະສົບ​ການ​ຄວາມ​ຜິດພາດ ທີ່​ກ່ຽວຂ້ອງ​ກັບ​ການ​ໃຊ້​ອຸປະກອນ​ອີ​ເລັກ​ໂທ​ນິກ​ໃຫ້​ລູກ​ຟັງ ເພື່ອ​ໃຫ້​ລູກ​ຄ່ອຍໆ ຊຶມ​ຊັບ​ຂໍ້​ເສຍ​ຂອງ​ມັນ​ໄປ​ເທື່ອ​ລະ​ນ້ອຍ ເພື່ອ​ໃຫ້​ລູ​ກະ​ມັດ​ລະວັງ​ຕົນ​ເອງ​ໃນ​ການ​ໃຊ້​ຫຼາຍ​ຍິ່ງ​ຂຶ້ນ ແລະ ປ້ອງ​ກັນ​ພຶດຕິ​ກຳ​ຕ່າງໆ ທີ່​ອາດ​ສ້າງ​ຄວາມ​ເສຍ​ຫາຍ​ກັບ​ຜູ້​ອື່ນ​ໄດ້.

ຂ່າວທີ່ກ່ຽວຂ້ອງ