ຂ່າວຫຼ້າສຸດ

ສຳເລັດກໍ່ສ້າງຂົວຂ້າມນໍ້າຕອນບ້ານນາສາວນາງ

301 01 ມ.ສ. 2019 ຂ່າວໜ້າ​ໜຶ່ງ
ສຳເລັດກໍ່ສ້າງຂົວຂ້າມນໍ້າຕອນບ້ານນາສາວນາງ

    ພິ­ທີ​ມອບ-ຮັບ ແລະ ເປີດ​ນຳ​ໃຊ້​ຂົວ​ຂ້າມ​ນ້ຳ​ຕອນ​ບ້ານ​ນາ​ສາວ​ນາງ ເມືອງ​ສັງ​ທອງ ນະ­ຄອນ­ຫຼວງ​ວຽງ​ຈັນ ຈັດ​ຂຶ້ນ​ວັນ​ທີ 28 ມີ­ນາ 2019 ມີ​ທ່ານ ດາວ​ເພັດ ອາ​ລຸນ ເຈົ້າ­ເມືອງ​ສັງ​ທອງ ຕາງ­ໜ້າ​ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ ຂະ­ແໜງ​ປະ​ເມີນ​ຜົນ​ພະ​ແນກ​ແຜນ­ການ ແລະ ການ​ລົງ­ທຶນ ນະ­ຄອນ­ຫຼວງ​ວຽງ​ຈັນ ບັນ­ດາ​ຫົວ­ໜ້າ​ຫ້ອງ­ການ​ອ້ອມ​ຂ້າງ​ເມືອງ ອຳ­ນາດ​ການ​ປົກ­ຄອງ​ບ້ານ ແລະ ປະ­ຊາ­ຊົນ​ເຂົ້າ​ຮ່ວມ.

    ທ່ານ ສຸ​ລິ​ວັນ ບຸນ​ວິ­ໄລ ປະ­ທານ​ບໍ­ລິ­ສັດ ເຮືອງ​ຮອງ​ກໍ່­ສ້າງ​ຂົວ-ທາງ ແລະ ຊົນ­ລະ­ປະ­ທານ ຈຳ­ກັດ​ຜູ້​ດຽວ ໄດ້​ກ່າວ​ວ່າ: ໂຄງ­ການ​ກໍ່­ສ້າງ​ຂົວ​ຂ້າມ​ນ້ຳ​ຕອນ​ບ້ານ​ນາ​ສາວ​ນາງ ໂດຍ​ທຶນ​ຂອງ​ລັດ​ໃນ​ສົກ​ງົບ­ປະ­ມານ​ປີ 2013-2014 ຂອງ​ເມືອງ​ສັງ​ທອງ ແລະ ໄດ້​ເລີ່ມ​ກໍ່­ສ້າງ​ແຕ່​ເດືອນ​ພຶດ­ສະ­ພາ 2017 ແລະ ສຳ­ເລັດ​ເດືອນ​ມີ­ນາ 2019 ເຊິ່ງ​ຂົວ​ດັ່ງ­ກ່າວ​ເປັນ​ຂົວ​ເບ​ຕົງ ມີ​ຄວາມ​ຍາວ 46,8 ແມັດ ກວ້າງ 4 ແມັດ ໂຄງ​ສ້າງ​ສ່ວນ​ລຸ່ມ​ເປັນ​ເບ​ຕົງ​ເສີມ​ເຫຼັກ ພາກ­ສ່ວນ​ເທິງ​ເປັນ​ໂຄງ​ສ້າງ​ເຫຼັກ​ປະ­ສົມ​ໄມ້ ເຊິ່ງ​ເປັນ​ຂົວ​ເຄິ່ງ​ຖາ­ວອນ ສາ­ມາດ​ຮັບ​ນ້ຳ­ໜັກ​ໄດ້ 20 ໂຕນ ນອກ​ນີ້ ບໍ­ລິ­ເວນ​ຫົວ​ຂົວ​ທັງ​ສອງ​ເບື້ອງ​ກໍ່­ສ້າງ​ດ້ວຍ​ກະ­ຕ່າ​ຫີນ ແລະ ລຽນ​ຫີນ​ຕ້ານ​ເຈື່ອນ​ສະ­ຫຼົບ​ຕະ​ຝັ່ງ​ຫົວ​ຂົວ​ປັບ​ຄວາມ​ເນີນ ປູກ​ຫຍ້າ ເສັ້ນ­ທາງ​ເຂົ້າ​ຂົວ​ທັງ​ສອງ​ເບື້ອງ​ປູ​ດ້ວຍ​ເບ​ຕົງ​ເບື້ອງ​ລະ 25 ແມັດ ໜາ 20 ຊັງ​ຕີ​ແມັດ ລວງ​ຍາວ​ຂອງ​ທາງ​ເບ​ຕົງ​ທັງ​ສອງ​ຟາກ 50 ແມັດ ນອກ​ນັ້ນ ຍັງ​ໄດ້​ກໍ່­ສ້າງ​ປູ​ຫີນ​ໃສ່​ໜ້າ​ທາງ​ແຕ່​ທາງ​ຫຼວງ​ຫາ​ບໍ­ລິ­ເວນ​ຂົວ​ໃນ​ໄລ­ຍະ 1 ກິ­ໂລ­ແມັດ ລວມ​ມູນ​ຄ່າ​ໃນ​ການ​ກໍ່­ສ້າງ​ທັງ​ໜົດ 3,15 ຕື້​ກີບ.

    ທັງ​ນີ້​ກໍ​ເພື່ອ​ເຮັດ​ໃຫ້​ປະ­ຊາ­ຊົນ​ຢູ່​ໃນ​ເຂດ​ບ້ານ​ດັ່ງ­ກ່າວ ໄດ້​ມີ​ເສັ້ນ­ທາງ​ລົງ​ສູ່​ການ​ຜະ­ລິດ ແລະ ການ​ໄປ​ມາ​ມີ​ຄວາມ​ສະ­ດວກ​ສະ­ບາຍ ສາ­ມາດ​ທຽວ​ໄດ້​ສອງ​ລະ­ດູ ແລະ ເປັນ​ການ​ຂະ­ຫຍາຍ​ຕາ​ໜ່າງ​ເສັ້ນ­ທາງ​ພາຍ​ໃນ​ເມືອງ​ສັງ​ທອງ ໃຫ້​ມີ​ການ​ເຊື່ອມ​ຈອດ ແລະ ຮັບ­ປະ­ກັນ​ໃນ​ການ​ໄປ​ມາ​ຂອງ​ປະ­ຊາ­ຊົນ​ທຽວ​ໄດ້​ຕະ­ຫຼອດ​ປີ.

ຂ່າວທີ່ກ່ຽວຂ້ອງ