ສຳເລັດສອບເສັງແຂ່ງຂັນ ນັກຮຽນເກ່ງລະດັບຊາດຊັ້ນມັດທະຍົມ

240 01 ມ.ສ. 2019 ຂ່າວໜ້າ​ໜຶ່ງ
ສຳເລັດສອບເສັງແຂ່ງຂັນ ນັກຮຽນເກ່ງລະດັບຊາດຊັ້ນມັດທະຍົມ

    ພິ­ທີ​ສະ­ຫຼຸບ​ການ​ສອບ­ເສັງ​ແຂ່ງ­ຂັນ​ນັກ­ຮຽນ​ເກ່ງ ຊັ້ນ​ມັດ­ທະ­ຍົມ​ສຶກ​ສາ ລະ­ດັບ​ຊາດ ປະ­ຈຳ​ສົກ­ຮຽນ 2018-2019 ຈັດ​ຂຶ້ນ​ວັນ​ທີ 26-29 ມີ­ນາ 2019 ທີ່​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ມີ​ທ່ານ ຄຳ​ຜາຍ ສີ​ສະ­ຫວັນ ຮອງ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ທ່ານ​ຮອງ​ອະ­ທິ­ການ​ບໍ­ດີ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ບັນ­ດາ​ຫົວ­ໜ້າ​ກົມ ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ​ແຂວງ ນະ­ຄອນ­ຫຼວງ ຜູ້​ໃຫ້­ການ​ສະ­ໜັບ­ສະ­ໜູນ ຄະ­ນະ​ກຳ­ມະ­ການ​ສອບ­ເສັງ ຄະ­ນະ​ອຳ­ນວຍ​ການ​ໂຮງ­ຮຽນ ພະ­ນັກ­ງານ ຄູ-ອາ­ຈານ ຜູ້​ປົກ­ຄອງ​ນັກ­ຮຽນ ແລະ ນັກ­ຮຽນ​ເຂົ້າ​ຮ່ວມ.

    ໃນ​ພິ­ທີ​ທ່ານ​ນາງ ສີ​ສຸກ ວົງ​ວິ­ຈິດ ຫົວ­ໜ້າ​ກົມ​ສາ­ມັນ​ສຶກ​ສາ ໄດ້​ຂຶ້ນ​ສະ­ຫຼຸບ​ສັງ​ລວມ​ຜົນ​ການ​ສອບ­ເສັງ​ວ່າ: ການ​ຈັດ​ສອບ­ເສັງ​ແຂ່ງ­ຂັນ​ນັກ­ຮຽນ​ເກ່ງ​ລະ­ດັບ​ຊາດ ເພື່ອ​ສົ່ງ­ເສີມ​ຂະ​ບວນ​ການ​ສອນ​ດີ-ຮຽນ​ເກ່ງ ໃນ​ໂຮງ­ຮຽນ​ມັດ­ທະ­ຍົມ​ໃຫ້​ມີ​ບັນ­ຍາ­ກາດ​ຟົດ­ຟື້ນ ແລະ ມີ​ລັກ­ສະ­ນະ​ແຂ່ງ­ຂັນ​ກັນ ສ້າງ​ໂອ­ກາດ​ໃຫ້​ນັກ­ຮຽນ​ໄດ້​ສະ­ແດງ​ອອກ​ດ້ານ​ຄວາມ​ຮູ້​ຄວາມ​ສາ­ມາດ ພອນ​ສະ­ຫວັນ ແລະ ຫົວ­ຄິດ​ປະ­ດິດ​ສ້າງ​ຂອງ​ຕົນ​ເອງ ເພື່ອ​ສົ່ງ­ເສີມ​ໃຫ້​ນັກ­ຮຽນ​ເກ່ງ​ທີ່​ສອບ­ເສັງ​ໄດ້​ທີ 1 ທີ 2 ແລະ ທີ 3 ແຕ່​ລະ­ວິ​ຊາ​ໄດ້​ຮັບ​ທຶນ​ການ​ສຶກ​ສາ​ໃນ​ມະ­ຫາ­ວິ­ທະ­ຍາ­ໄລ​ແຫ່ງ​ຕ່າງໆ​ຢູ່​ພາຍ​ໃນ​ປະ­ເທດ ເພື່ອ​ວັດ­ແທກ ແລະ ປະ​ເມີນ​ຜົນ­ສຳ­ເລັດ​ດ້ານ​ການ​ສິດ­ສອນ​ຮ່ຳ­ຮຽນ​ຂອງ​ຄູ ແລະ ນັກ­ຮຽນ ເພື່ອ​ຄັດ​ເລືອກ ແລະ ສົ່ງ­ເສີມ​ນັກ­ຮຽນ​ເກ່ງ​ເປັນ​ຕົວ​ແທນ​ຂອງ​ຊາດ ເຂົ້າ​ຮ່ວມ​ແຂ່ງ­ຂັນ​ລະ­ດັບ​ພາກ​ພື້ນ ແລະ ສາ­ກົນ ສຳ­ລັບ​ສົກ­ຮຽນ​ນີ້ ຊັ້ນ ມ ຕົ້ນ ເປັນ​ປີ​ທີ 10 ແລະ ຊັ້ນ ມ ປາຍ ເປັນ​ປີ​ທີ 9 ແລະ ນັກ­ຮຽນ​ເກ່ງ​ທີ່​ເຂົ້າ​ຮ່ວມ​ການ​ສອບ­ເສັງ​ລະ­ດັບ​ຊາດ​ຄັ້ງ​ນີ້ ລ້ວນ​ແຕ່​ແມ່ນ​ຕົວ​ແທນ​ນັກ­ຮຽນ​ເກ່ງ​ຈາກ​ທຸກ​ແຂວງ ແລະ ນະ­ຄອນ­ຫຼວງ​ວຽງ​ຈັນ ທີ່​ຜ່ານ​ການ​ສອບ­ເສັງ​ຄັດ​ເລືອກ​ໃນ​ລະ­ດັບ​ໂຮງ­ຮຽນ ເມືອງ ແລະ ແຂວງ.

    ສຳ­ລັບ​ການ​ສອບ­ເສັງ​ແຂ່ງ­ຂັນ​ນັກ­ຮຽນ​ເກ່ງ​ລະ­ດັບ​ຊາດ ຊັ້ນ​ມັດ­ທະ­ຍົມ​ສຶກ​ສາ​ຄັ້ງ​ນີ້ ໄດ້​ສອບ­ເສັງ​ແຂ່ງ­ຂັນ​ໃນ 4 ວິ­ຊາ ຄື: ວິ­ຊາ​ພາ­ສາ​ລາວ-ວັນ­ນະ­ຄະ­ດີ ຄະ­ນິດ­ສາດ ຟີ​ຊິກ​ສາດ ແລະ ເຄ​ມີ​ສາດ ທັງ ມ4 ແລະ ມ7 ມີ​ນັກ­ຮຽນ​ເກ່ງ​ຈາກ 17 ແຂວງ ແລະ ນະ­ຄອນ­ຫຼວງ​ວຽງ​ຈັນ​ເຂົ້າ​ຮ່ວມ​ສອບ­ເສັງ​ທັງ​ໝົດ 144 ຄົນ ຍິງ 55 ຄົນ ເຊິ່ງ​ກວມ​ເອົາ​ເຜົ່າ​ຊົນ​ຕ່າງໆ​ເຖິງ 11 ເຜົ່າ ໃນ​ນັ້ນ ຊັ້ນ ມ4 ມີ​ນັກ​ສອບ­ເສັງ 72 ຄົນ ຍິງ 32 ຄົນ ແລະ ຊັ້ນ ມ7 ມີ 72 ຄົນ ຍິງ 23 ຄົນ ເຊິ່ງ​ຜ່ານ​ການ​ສອບ­ເສັງ​ອັນ​ດັບ​ທີ 1 ທີ 2 ແລະ ທີ 3 ທີ່​ມີ​ຄະ­ແນນ​ສອບ­ເສັງ​ໄດ້ 7 ຂຶ້ນ​ໄປ ມີ 22 ຄົນ ຍິງ 6 ຄົນ ເທົ່າ​ກັບ 15,28% ນັກ­ຮຽນ​ເກ່ງ​ເຫຼົ່າ​ນີ້ ໄດ້​ຮັບ​ຫຼຽນ​ນັກ­ຮຽນ​ເກ່ງ ໃບ​ຍ້ອງ­ຍໍ​ຂັ້ນ​ກະ­ຊວງ​ສຶກ​ສາ ພ້ອມ​ເງິນ​ລາ­ງວັນ 5 ລ້ານ​ກີບ ສ່ວນ​ນັກ­ຮຽນ​ເກ່ງ​ໄດ້​ຮັບ​ລາ­ງວັນ​ຊົມ­ເຊີຍ​ມີ 22 ຄົນ ຍິງ 9 ຄົນ ໄດ້​ຮັບ​ໃບ​ຊົມ­ເຊີຍ​ຂັ້ນ​ກົມ​ສາ­ມັນ​ສຶກ​ສາ ແລະ ເງິນ​ລາ­ງວັນ 500.000 ກີບ ຈາກ​ລັດ­ຖະ­ບານ ແລະ ເງິນ​ຈຳ­ນວນ​ໜຶ່ງ​ຈາກ​ຜູ້​ອຸ­ປະ­ຖຳ​ຄື: ບໍ­ລິ­ສັດ ເບຍ​ລາວ ຈຳ­ກັດ ແລະ ລັດ​ວິ​ສາ​ຫະ​ກິດ​ການ­ບິນ​ລາວ.

    ສ່ວນ​ນັກ­ຮຽນ​ເກ່ງ​ອັນ​ດັບ​ທີ 1 ຊັ້ນ ມ4 ວິ­ຊາ​ພາ­ສາ​ລາວ-ວັນ­ນະ­ຄະ­ດີ ນາງ ພອນ​ໄພ​ລັກ ໄຊ­ຊະ­ນະ ຄະ­ນິດ­ສາດ ທ້າວ ມັກ​ມີ​ພົນ ໄຊ­ຊະ­ນະ ທັງ 2 ຈາກ ມຕ ນິ​ຣະ​ດາ ຈອມ​ເພັດ ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ ວິ­ຊາ​ຟິ​ຊິກ​ສາດ ທ້າວ ເຕັງ​ມົວ ເຢຍ​ຊົງ​ມົວ ມສ ພູ​ວຽງ ເມືອງ​ພູ​ກູດ ແຂວງ​ຊຽງ​ຂວາງ ແລະ ວິ­ຊາ​ເຄ​ມີ​ສາດ ທ້າວ ຖົງ​ທໍ່ ໄຊ​ກົວ ມສ ຊົນ­ເຜົ່າ​ວັງ​ວຽງ ເມືອງ​ວັງ​ວຽງ ແຂວງ​ວຽງ​ຈັນ ແລະ ຊັ້ນ ມ7 ວິ­ຊາ​ພາ­ສາ​ລາວ-ວັນ­ນະ­ຄະ­ດີ ນາງ ພຸດ​ສະ­ຫວັນ ແກ້ວ​ລົດ​ສາ ມປ ພອນ​ສະ­ຫວັນ ນະ­ຄອນ​ປາກ​ເຊ ແຂວງ​ຈຳ­ປາ​ສັກ ວິ­ຊາ​ຄະ­ນິດ­ສາດ ທ້າວ ບີ​ວ່າງ ຈົງ​ດົງ ວິ­ຊາ ຟິ​ຊິກ​ສາດ ທ້າວ ເລົາ​ຢ່າງ ເຍ່ຍ​ເຢີ ທັງ​ສອງ​ຈາກ ມສ ໂພນ​ໄຊ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ແລະ ວິ­ຊາ​ເຄ​ມີ​ສາດ ທ້າວ ຈ່າງ​ມົວ ໄຊ​ຈຸ​ມົວ ມສ ສັນ­ຕິ­ພາບ ນະ­ຄອນ­ຫຼວງ​ພະ​ບາງ.

ຂ່າວທີ່ກ່ຽວຂ້ອງ