ຂ່າວຫຼ້າສຸດ

ຍີ່ປຸ່ນ​ຊ່ວຍເຫຼືອ​ພື້ນ​ປູ​ກີລາ​ຢູ​ໂດ​ລາວ 100 ແຜ່ນ

217 01 ມ.ສ. 2019 ວົງຈອນກີລາ
ຍີ່ປຸ່ນ​ຊ່ວຍເຫຼືອ​ພື້ນ​ປູ​ກີລາ​ຢູ​ໂດ​ລາວ 100 ແຜ່ນ

     ພິທີ​ມອບ​ການ​ຊ່ວຍເຫຼືອ​ລ້າ​ພື້ນ​ປູ​ກີລາ​ຢູ​ໂດ (Tatami) ມື​ສອງ​ຈາກ​ປະທານ​ສະຫະພັນ​ກີລາ​ຢູ​ໂດ ແລະ ກະຊວງ​ການ​ຕ່າງປະເທດ​ຍີ່ປຸ່ນ 100 ແຜ່ນ ຈັດ​ຂຶ້ນ​ວັນ​ທີ 28 ມີນາ 2019 ທີ່​ສູນ​ກີລາ​ບູ​ໂດ​ລາວ-ຍີ່ປຸ່ນ ນະຄອນຫຼວງ​ວຽງ​ຈັນ ມອບ​ໂດຍ​ທ່ານ ທາ​ເກ​ຊິ ຮິ​ກິ​ຮາ​ຣະ ເອກ​ອັກ​ຄະ​ຣາ​ຊະ​ທູດ​ຍີ່ປຸ່ນ​ປະຈຳ​ລາວ ແລະ ຮັບ​ໂດຍ​ທ່ານ ເຂັມ​ຊາດ ພິລາ​ພັນ​ເດ​​ຊ ປະທານ​ສະຫະພັນ​ກີລາ​ຢູ​ໂດ​ແຫ່ງ​ຊາດ​ລາວ ມີ​ທ່ານ ກະເສມ ອິນ​ທະລາ ຮອງ​ປະທານ​ຄະນະ​ກຳມະການ​ໂອ​ແລມ​ປິກ​ແຫ່ງ​ຊາດ​ລາວ ພ້ອມ​ດ້ວຍ​ຄະນະ ຄູ​ເຝິກ ແລະ ນັກກີລາ​ເຂົ້າ​ຮ່ວມ.

      ທ່ານ ທາ​ເກ​ຊິ ຮິ​ກິ​ຮາ​ຣະ ໄດ້​ກ່າວ​ວ່າ:ການ​ນຳ​ເອົາ​ພື້ນ​ກີລາ​ຢູ​ໂດ​ມາ​ຊ່ວຍເຫຼືອ​ຄັ້ງ​ນີ້ ແມ່ນ​ທ່ານ ຢາ​ມາ​ຊິຕະ ຢາ​ຊຸ​ຮິ​ໂຣ ປະທານ​ສະຫະພັນ​ຢູ​ໂດ ແລະ ກະຊວງ​ການ​ຕ່າງປະເທດ​ຍີ່ປຸ່ນ​ໃຫ້ການ​ຊ່ວຍເຫຼືອ​ລ້າ ໂດຍ​ຜ່ານ​ສະຖານທູດ​ຍີ່ປຸ່ນ​ປະຈຳ​ລາວ ເພື່ອ​ເປັນ​ການ​ປະກອບສ່ວນ​ເຂົ້າ​ໃນ​ການ​ສົ່ງເສີມ ແລະ ພັດທະນາ​ນັກກີລາ​ຢູ​ໂດ​ລາວ​ກ້າວ​ສູ່​ລະດັບ​ສາກົນ​ໃຫ້​ຫຼາຍ​ຂຶ້ນ ໂດຍ​ສະເພາະ​ເປັນ​ການ​ກະກຽມ​ຄວາມ​ພ້ອມ​ຂອງ​ນັກກີລາ​ຢູ​ໂດ​ລາວ​ກ້າວ​ສູ່​ມະ​ຫະ​ກຳ​ກີລາ​ໂອ​ແລມ​ປິກ​ປີ 2020 ທີ່​ປະເທດ​ຍີ່ປຸ່ນ ໄດ້​ຮັບ​ກຽດ​ເປັນ​ເຈົ້າພາບ.

      ໂອກາດ​ນີ້​ທ່ານ ເຂັມ​ຊາດ ພິລາ​ພັນ​ເດ​​ຊ ໄດ້​ກ່າວ​ສະແດງ​ຄວາມ​ຂອບໃຈ ແລະ ຮູ້​ບຸນຄຸນ​ຕໍ່​ທ່ານ​ທູດ ແລະ ທ່ານ​ປະທານ​ສະຫະພັນ​ຢູ​ໂດ ແລະ ກະຊວງ​ການ​ຕ່າງປະເທດ​ຍີ່ປຸ່ນ​ທີ່​ໄດ້​ນຳ​ພື້ນ​ກີລາ​ຢູ​ໂດ​ມາ​ຊ່ວຍເຫຼືອ​ຄັ້ງ​ນີ້ ເຊິ່ງ​ໄດ້​ເປັນ​ສິ່ງ​ຢັ້ງຢືນ​ເຖິງ​ສາຍ​ພົວພັນ​ອັນ​ສະໜິດ​ແໜ້ນ​ທີ່​ມີ​ມາ​ຍາວ​ນານ ລະຫວ່າງ​ສະຫະພັນ​ກີລາ​ຢູ​ໂດ​ແຫ່ງ​ຊາດ​ລາວ ແລະ ຫຼາຍ​ພາກສ່ວນ​ຂອງ​ປະເທດ​ຍີ່ປຸ່ນ ເປັນຕົ້ນ​ສະຫະພັນ​ກີລາ​ຢູ​ໂດ​ແຫ່ງ​ປະເທດ​ຍີ່ປຸ່ນ​ໃນ​ການ​ປະກອບສ່ວນ​ພັດທະນາ​ນັກກີລາ​ຢູ​ໂດ​ຂອງ​ລາວ ແລະ ຂະຫຍາຍ​ສະຖານທີ່​ເຝິກຊ້ອມ​ໃຫ້​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ