ຍົກ​ລະດັບ​ໃຫ້​ຄູ​ເຝິກ​ບານເຕະ ແລະ ກຳມະການ​ຕັດສິນ

236 01 ມ.ສ. 2019 ວົງຈອນກີລາ
ຍົກ​ລະດັບ​ໃຫ້​ຄູ​ເຝິກ​ບານເຕະ ແລະ ກຳມະການ​ຕັດສິນ

    ພິທີ​ເປີດ​ຊຸດ​ອົບຮົມ​ໃຫ້​ແກ່​ຄູ​ເຝິກ​ເຕະບານ ແລະ ກຳມະການ​ຕັດສິນ​ຂັ້ນ​ພື້ນຖານ ໄດ້​ຈັດ​ຂຶ້ນ​ວັນ​ທີ 25-27 ມີນາ 2019 ທີ່​ພະ​ແນກ​ສຶກ​ສາ​ທິ​ການ ແລະ ກີລາ​ແຂວງ​ຫົວພັນ ມີທ່ານ ສົມ​ເພັດ ອິນ​ທະ​ສອນ ຮອງ​ຫົວໜ້າ​ພະ​ແນກ​ສຶກ​ສາ​ທິ​ການ ແລະ ກີລາ​ແຂວງ​ຫົວພັນ ທ່ານ ສີ​ປະເສີດ ສິນ​ບັນດິດ ຫົວໜ້າ​ພະ​ແນກ​ກຳມະການ​ຕັດສິນ ສະຫະພັນ​ບານເຕະ​ແຫ່ງ​ຊາດ​ລາວ ມີ​ພະນັກງານ​ວິຊາ​ການ ສຳ​ມະກອນ​ທີ່​ມາ​ຮຽນ​ຄູ​ເຝິກ 21 ຄົນ ຍິງ 1 ຄົນ ແລະ  ສຳ​ມະກອນ​ທີ່​ມາ​ຮຽນ​ກຳມະການ 19 ຄົນ ຍິງ 1 ຄົນ ທີ່​ມາ​ຈາກ 10 ເມືອງ ແລະ ບັນດາ​ໂຮງຮຽນ​ອ້ອມ​ຂ້າງ​ແຂວງ​ຫົວພັນ​ເຂົ້າ​ຮ່ວມ.

    ການ​ເຝິກອົບຮົມ​ຄັ້ງ​ນີ້​ເພື່ອ​ເສີມ​ສ້າງ​ພັດທະນາ​ຄູ​ຝຶກ​ຮຸ່ນ​ສືບ​ທອດ​ກີລາ​ເຕະບານ​ໃຫ້​ໄດ້​ທົ່ວ​ທຸກ​ເຂດ ລວມ​ທັງ​ເຂດ​ຊົນນະບົດ​ຫ່າງ​ໄກ​ສອກຫຼີກ ແລະ ດ້ອຍ​ໂອກາດ ເພື່ອ​ນຳ​ໃຊ້​ການ​ເຝິກ​ສອນ​ທັກ​ສະ​ກີລາ​ເຕະບານ​ຂັ້ນ​ພື້ນຖານ​ໃຫ້​ຖືກຕ້ອງ​ຕາມ​ຂັ້ນ​ຕອນ ແລະ ມີ​ຄວາມ​ຄ່ອງ​ແຄ້ວ ເພື່ອ​ປັບປຸງ ແລະ ພັດ ທະ​ນາ​ຄູ​ຝຶກ​ໃຫ້​ມີ​ຄວາມ​ຮູ້​ຄວາມ​ສາມາດ​ໃນ​ການ​ເຂົ້າ​ຮ່ວມ​ການ​ອົບຮົມ​ຄູ​ເຝິກ​ລະດັບ​ພາກ​ພື້ນ​ຂອງ​ອາຊີ ທັງ​ເປັນ​ການ​ເຝິກ​ສອນ​ນັບ​ມື້​ນັບ​ນັບ​ມີ​ມາດຕະຖານ ຮັບປະກັນ​ທາງ​ດ້ານ​ປະລິມານ ແລະ ຄຸນ​ນະ​ພາບ.

    ສ່ວນ​ການ​ເຝິກອົບຮົມ​ກຳມະການ​ຕັດສິນ​ບານເຕະ​ຂັ້ນ​ພື້ນຖານ​ເພື່ອ​ພັດທະນາ​ກຳມະການ​ຕັດ ສິນ​ໃໝ່​ໃຫ້​ຂະຫຍາຍຕົວ​ຄຽງ​ຄູ່​ກັບ​ການ​ພັດທະນາ​ນັກກີລາ​ເຕະບານ​ໃຫ້​ຫຼາຍ​ຂຶ້ນ ເພື່ອ​ເປັນ​ການ​ສ້າງ​ກຳມະການ​ຮຸ່ນ​ສືບ​ທອດ ມາ​ທົດ​ແທນ ແລະ ຍົກ​ລະດັບ​ໃຫ້​ສູງ​ຂຶ້ນ​ໃນ​ອະນາຄົດ ເພາະ​ປັດຈຸບັນ​ກຳມະການ​ທີ່​ຮັບ​ໃຊ້​ໃນ​ວົງ​ການ​ເຕະບານ​ລາວ​ມີ​ຈຳກັດ ສ້າງ​ໂອກາດ​ໃຫ້​ກຳມະການ​ໃໝ່​ມີ​ການ​ພັດທະນາ​ຮຽນ​ຮູ້​ກ່ຽວ​ກັບ​ກະຕິ​ກາ​ແຂ່ງຂັນ ຮູ້​ນຳ​ໃຊ້​ກະຕິ​ກາ​ໃຫ້​ຖືກຕ້ອງ ແລະ ເໝາະ​ສົມ​ກັບ​ການ​ແຂ່ງຂັນ​ໃນ​ແຕ່​ລະ​ນັດ ເພື່ອ​ຈະ​ສອບເສັງ​ທາງ​ພາກ​ທິດ​ສະ​ດີ ແລະ ດ້ານ​ພະລະ​ກຳລັງ ເພື່ອ​ອອກ​ໃບຢັ້ງຢືນ​ໃຫ້​ຜູ້​ທີ່​ຜ່ານ​ລະດັບ​ຄາດໝາຍ​ທີ່​ທາງ​ສະຫະພັນ​ບານເຕະ​ແຫ່ງ​ຊາດ​ວາງ​ໄວ້.

ຂ່າວທີ່ກ່ຽວຂ້ອງ