ການແກ້ໄຂບັນຫາທີ່ດິນ

1.082 01 ມ.ສ. 2019 ນານາສາລະ

    ໃນ​ຊຸມ​ປີ​ຫຼັງ​ມາ​ນີ້ ມີ​ສະ­ພາບ​ພົ້ນ​ເດັ່ນ​ເກີດ​ຂຶ້ນ​ຢູ່​ຫຼາຍ​ບ່ອນ ທັງ​ຢູ່​ໃນ​ຕົວ​ເມືອງ ແລະ ຊົນ­ນະ­ບົດ ກ່ຽວ​ກັບ​ທີ່​ດິນ ເຊິ່ງ​ໄດ້​ກໍ່­ໃຫ້­ເກີດ​ບັນ­ຫາ​ສັບ­ສົນ ແລະ ເກີດ​ຄວາມ​ວຸ້ນ­ວາຍ​ໃນ​ການ​ດຳ­ລົງ​ຊີ­ວິດ-ທຳ​ມາ​ຫາ​ກິນ​ຂອງ​ປະ­ຊາ­ຊົນ ກໍ​ຄື ການ​ດຳ­ເນີນ​ທຸ­ລະ​ກິດ​ຂອງ​ຜູ້​ປະ­ກອບ​ການ​ຈຳ­ນວນ​ບໍ່​ໜ້ອຍ ຄວາມ​ສັບ­ສົນ​ວຸ້ນ­ວາຍ​ດັ່ງ­ກ່າວ ສະ­ແດງ​ອອກ​ໃນ​ການ​ຕໍ່­ສູ້​ຊິງ​ເອົາ​ສິດ ເອົາ​ຜົນ​ປະ­ໂຫຍດ​ຈາກ​ທີ່​ດິນ ອັນ​ໄດ້​ກໍ່­ໃຫ້­ເກີດ​ຄວາມ​ຂັດ​ແຍ່ງ​ກັນ​ລະ­ຫວ່າງ​ບຸກ­ຄົນ ແລະ ຄອບ­ຄົວ​ດ້ວຍ​ກັນ ລະ­ຫວ່າງ ບຸກ­ຄົນ-ກຸ່ມ​ຄົນ​ກັບ​ການ­ຈັດ­ຕັ້ງ ແລະ ອົງ­ການ​ປົກ­ຄອງ​ຂັ້ນ​ຕ່າງໆ ລະ­ຫວ່າງ ຊາວ­ບ້ານ​ກັບ​ພະ­ນັກ­ງານ ແລະ ຜູ້​ລົງ­ທຶນ​ສຳ​ປະ­ທານ​ທີ່​ດິນ ລະ­ຫວ່າງ​ເຈົ້າ​ຂອງ​ທີ່​ດິນ​ກັບ​ຜູ້​ຮັບ​ເໝົາ ແລະ ເຈົ້າ​ຂອງ​ໂຄງ­ການ​ພັດ­ທະ­ນາ.

    ໃນ​ຍຸກ​ເສດ­ຖະ­ກິດ​ຕະ­ຫຼາດ​ທີ່​ດິນ​ໄດ້​ກາຍ­ເປັນ​ສິນ­ຄ້າ ເປັນ​ທີ່​ຕ້ອງ­ການ​ຂອງ​ນັກ­ທຸ­ລະ­ກິດ ທັງ​ພາຍ​ໃນ ແລະ ຕ່າງ­ປະ­ເທດ ສະ­ນັ້ນ ໃນ​ຊຸມ​ປີ​ມໍ່ໆມານີ້ ຈຶ່ງ​ເກີດ​ມີ​ສະ­ພາບ​ພົ້ນ​ເດັ່ນ​ຂຶ້ນ​ກ່ຽວ​ກັບ​ທີ່​ດິນ ທັງ​ຢູ່​ໃນ​ຕົວ​ເມືອງ ແລະ ຊົນ­ນະ­ບົດ ເຊິ່ງ​ກໍ່­ໃຫ້­ເກີດ​ບັນ­ຫາ​ສັບ­ສົນ ແລະ ເກີດ​ຄວາມ​ວຸ້ນ­ວາຍ ໃນ​ການ​ດຳ­ລົງ​ຊີ­ວິດ-ທຳ​ມາ​ຫາ​ກິນ​ຂອງ​ປະ­ຊາ­ຊົນ ກໍ​ຄື ໃນ​ການ​ດຳ­ເນີນ​ການ​ຜະ­ລິດ​ທຸ­ລະ​ກິດ​ຂອງ​ຜູ້​ປະ­ກອບ​ການ​ຈຳ­ນວນ​ບໍ່​ໜ້ອຍ.

    ຄວາມ​ຈິງ​ແລ້ວ ທີ່​ດິນ​ບໍ່​ພຽງ​ແຕ່​ເປັນ​ປັດ​ໄຈ​ພື້ນ­ຖານ​ດ້ານ​ການ​ຜະ­ລິດ ແລະ ການ​ດຳ­ລົງ​ຊີ­ວິດ​ທໍ່​ນັ້ນ ແຕ່​ມັນ​ຍັງ​ເປັນ​ປັດ​ໄຈ​ສ້າງ​ຄວາມ​ຮັ່ງ­ມີ​ດ້ານ​ເງິນ​ຄຳ​ແກ່​ຜູ້​ຖື​ສິດ​ຄອບ​ຄອງ ແລະ ທັງ​ເປັນ​ເງື່ອນ­ໄຂ​ທາງ​ດ້ານ​ວັດ­ຖຸ​ອັນ​ສຳ­ຄັນ​ຕົ້ນ­ຕໍ ສຳ­ລັບ​ການ​ຄ້ຳ­ປະ­ກັນ​ໃຫ້​ເຂົ້າ​ເຖິງ​ແຫຼ່ງ​ທຶນ (ເງິນ​ກູ້) ຈາກ​ສະ​ຖາ​ບັນ​ການ​ເງິນ ແລະ ທະ­ນາ­ຄານ ຍ້ອນ​ທີ່​ດິນ​ມີ​ຄວາມ​ສຳ­ຄັນ​ຄື​ແນວ​ນັ້ນ ມັນ​ຈຶ່ງ​ເປັນ​ຕົວ​ບັນ­ຫາ​ທີ່​ກໍ່­ໃຫ້­ເກີດ​ສະ­ພາບ​ພົ້ນ​ເດັ່ນ​ທີ່​ສົ່ງ​ຜົນ​ກະ­ທົບ​ເຖິງ ແນວ​ຄິດ​ຈິດ­ຕະ­ສາດ​ຂອງ​ຄົນ​ໃນ​ສັງ­ຄົມ ດັ່ງ­ນັ້ນ ການ​ແກ້​ໄຂ​ຂໍ້​ຂັດ​ແຍ່ງ​ກ່ຽວ​ກັບ​ທີ່​ດິນ​ຈະ​ຕ້ອງ​ປະ­ຕິ­ບັດ​ຢ່າງ​ເຂັ້ມ​ງວດ ກົດ­ໝາຍ​ວ່າ​ດ້ວຍ​ທີ່​ດິນ ສະ­ບັບ​ປັບ­ປຸງ ເລກ​ທີ 48/ສພຊ ລົງ​ວັນ​ທີ 21 ຕຸ­ລາ 2008 ໂດຍ​ສະ­ເພາະ ມາດ­ຕາ 31 ການ​ແກ້​ໄຂ​ຂໍ້​ຂັດ​ແຍ່ງ​ກ່ຽວ​ກັບ​ທີ່​ດິນ ເຊິ່ງ​ໄດ້​ລະ­ບຸ​ໄວ້​ວ່າ: “ການ​ແກ້​ໄຂ​ຂໍ້​ຂັດ​ແຍ່ງ​ກ່ຽວ​ກັບ​ທີ່​ດິນ ຕ້ອງ​ປະ­ຕິ­ບັດ​ໃຫ້​ສອດ­ຄ່ອງ​ກັບ​ມາດ­ຕາ 73 74 75 76 80 ແລະ 81 ຂອງ​ກົດ­ໝາຍ​ວ່າ​ດ້ວຍ​ທີ່​ດິນ ສຳ­ລັບ​ຄະ­ດີ​ຕ່າງໆ​ກ່ຽວ​ກັບ​ທີ່​ດິນ​ທີ່​ສານ​ໄດ້​ຕັດ­ສິນ​ຢ່າງ​ຖືກ­ຕ້ອງ ແລະ ໃຊ້​ໄດ້​ຢ່າງ​ເດັດ­ຂາດ​ແລ້ວ​ນັ້ນ​ໃຫ້​ປະ­ຕິ­ບັດ​ຢ່າງ​ເຂັ້ມ​ງວດ ບຸກ­ຄົນ ຫຼື ການ­ຈັດ­ຕັ້ງ​ໃດ​ໜຶ່ງ ທີ່​ມີ​ຈຸດ­ປະ­ສົງ​ຢາກ​ແກ້​ໄຂ​ຂໍ້​ຂັດ​ແຍ່ງ​ກ່ຽວ​ກັບ​ທີ່​ດິນ ຕ້ອງ​ໄດ້​ຍື່ນ​ຄຳ​ຮ້ອງ ພ້ອມ​ດ້ວຍ​ເອ­ກະ­ສານ​ທີ່​ກ່ຽວ­ຂ້ອງ ຕໍ່​ອົງ­ການ​ຄຸ້ມ​ຄອງ​ທີ່​ດິນ​ເພື່ອ​ຄົ້ນ­ຄວ້າ ແກ້​ໄຂ ໂດຍ​ສົມ­ທົບ​ກັບ​ການ​ປົກ­ຄອງ​ທ້ອງ­ຖິ່ນ ບ່ອນ​ທີ່​ດິນ​ຕັ້ງ​ຢູ່​ໃນ​ກໍ­ລະ­ນີ​ທີ່​ອົງ­ການ​ຄຸ້ມ​ຄອງ​ທີ່​ດິນ ບໍ່​ສາ­ມາດ​ແກ້​ໄຂ​ໄດ້ ກໍ​ໃຫ້​ດຳ­ເນີນ​ການ​ແກ້​ໄຂ​ໄປ​ຕາມ​ຂະ​ບວນ​ການ​ຍຸ­ຕິ​ທຳ”.

    ທີ່​ດິນ ແຫ່ງ ສປປ ລາວ ເປັນ​ກຳ­ມະ­ສິດ​ຂອງ​ວົງ​ຄະ­ນາ​ຍາດ​ແຫ່ງ​ຊາດ ຕາມ​ທີ່​ໄດ້​ກຳ­ນົດ​ໄວ້​ໃນ​ມາດ­ຕາ 17 ຂອງ​ລັດ​ຖະ​ທຳ​ມະ­ນູນ ເຊິ່ງ​ແມ່ນ​ລັດ​ເປັນ​ຜູ້​ຄຸ້ມ​ຄອງ​ຢ່າງ​ລວມ​ສູນ ແລະ ເປັນ​ເອ­ກະ​ພາບ​ໃນ​ທົ່ວ​ປະ­ເທດ ແລະ ມອບ​ໃຫ້​ບຸກ­ຄົນ ຄອບ­ຄົວ ແລະ ອົງ​ການ­ຈັດ­ຕັ້ງ​ຂອງ​ລັດ​ນຳ​ໃຊ້ ສ່ວນ​ການ­ຈັດ­ຕັ້ງ​ເສດ­ຖະ­ກິດ​ຊາວ​ຕ່າງ​ດ້າວ ຜູ້​ບໍ່​ມີ​ສັນ­ຊາດ ຄົນ​ຕ່າງ­ປະ­ເທດ ແລະ ການ­ຈັດ­ຕັ້ງ​ຂອງ​ບຸກ­ຄົນ​ດັ່ງ­ກ່າວ​ນັ້ນ​ແມ່ນ​ໃຫ້​ເຊົ່າ ຫຼື ສຳ​ປະ­ທານ.

    ສະ­ນັ້ນ ການ​ແກ້​ໄຂ​ຂໍ້​ຂັດ​ແຍ່ງ​ບັນ­ຫາ​ທີ່​ດິນ ຕ້ອງ​ມີ​ຄວາມ​ລະ­ອຽດ​ຮອບ​ຄອບ ມີ​ຄວາມ​ນິ້ມ​ນວນ​ຄ່ອງ​ແຄ້ວ ໂດຍ​ຖື​ມາດ​ຕະ­ການ​ສຶກ​ສາ​ອົບ­ຮົມ ອະ­ທິ­ບາຍ​ຊີ້​ແຈງ​ເປັນ​ກົກ ສົມ­ທົບ​ກັບ​ມາດ​ຕະ­ການ​ທາງ​ເສດ­ຖະ­ກິດ​ຢ່າງ​ເໝາະ​ສົມ ສ່ວນ​ການ​ໃຊ້​ມາດ​ຕະ­ການ​ທາງ​ບໍ­ລິ­ຫານ ຫຼື ກົດ­ໝາຍ​ນັ້ນ​ໃຫ້​ຖື​ເປັນ​ມາດ​ຕະ­ການ​ສຳ­ຮອງ ໃຫ້​ຫຼີກ­ເວັ້ນ​ທີ່​ສຸດ​ມາດ​ຕະ­ການ​ໃຊ້​ຄວາມ​ຮຸນ​ແຮງ.

    ຂໍ​ສະ­ເໜີ​ເປັນ​ການ​ແລກ­ປ່ຽນ ?.

ແນວລາວ

ຂ່າວທີ່ກ່ຽວຂ້ອງ